“Mị Usighẹ Ḍighaạgh Amị Kụ Aguphom Ghan Oḍi Amị”

IPHIRIGBA PHỌ AMỊ

“Eḍighi maạr dị nạ akạr ri rawạ otuughạ ilọ Enaạn, pọ ḅạr r’Abugbaanaạn AZihova.” Ikpo onhụ phọ iphẹn phọ Ikạr kụ eḍighi iikia esi amị onaghạn. Mem mọ amuphẹ phọ, mị utuughạ ghan ni eẹny ekula amem Ekpo onhụ phọ Enaạn r’Abugbaanaạn phọ. Kuolọ orue onaghanạn iyaạr phọ eḍighi bọ kụ mị amegheron bọ eten phọ epẹ phọ, pọ mị uḅenị inyina ephurukpu ilọ edọl aghuḍum mọ amị.

Umhạr imị epẹ Quezaltepeque, ebạm emạ dị edi epẹ El Salvador. Mị kụ omuneniom 6 esi 15 anmụny dị onhiin amị amhạr. Odẹ ronhiin amị ukparaghạ ni ookonom amị eten dị mị kagbạ ghan agey ḅilẹ adaphạn ghan iilhogh ekpisi phọ. Oḅarạm isiphẹ, oniin onyọ Ogbaanaạn dị oghol mọ Leonardo r’abunhọn uru ni otughemị ayoor Baibul phọ. Kuolọ mị ophogh ni agunhọn ipẹ utughemị bọ iyoor bịn aḍuạ ghan esi oniin okarạph osopha agbạ onhọn. Mị romhạn 14 asiạ, bịn mị amiigh odạph arighirị amị otu askul ophugholọgh amiin r’igbagarạ asirooghọ. Oomo arighirị phọ amị uwilẹ ni askul oghị oḍigh okarạph otul, bịn mị adaphạn aani ekarạph eḍeenaan phọ abidị. Yoor urọl ghan ikol areten emụ aḍio phọ, ozirion ghan we ikpoki oḅilẹ omiighi obọ yoor omoọgh ikpoki oḍighinom ghan iḅoriạ araraạr.

Okarạph otul phọ kụ aḅilẹ aḍighi eghunotu amị. Mị umeeraam mọ kparipẹ mị amughanaan bidị. Esi omaạm, oniin siphẹ otul phọ ayoor aphugholọgh ni miim bịn aghị okuphogh onyọ amatuman amị. Siphẹ bidị robeeghi bọ, onyọ amatuman phọ amị akpạr ri apu nyoọn r’amị odi bọ oniin phọ otul phọ bịn amhạgh buọ iḍiil. Iphin ni ologhi amị iboom, kụ mị amiigh ogurọgh ophueghị amoto onyọ amatuman phọ amị obọ odị awilẹ oyaghirị phọ amị. Oomo idị onyọ amatuman phọ amị uuḅereghiạn imị owilẹ amoto phọ, mị u/meera unaghạn, mị ugurọgh ni oomo asitamaḍiki phọ aḅomoghi.

Mem dị mị amhạn 18 asiạ, otul phọ ayoor uzia ni a’abuọ iḍiil phọ. Idiphọ mị rawạ bọ orophom abidị bọmb, iyaạr phọ aruphaany ni ḍighaạgh amị—Mị u/kạr ulegheri ipẹ eḍighi bọ. Ogina iyaạr dị mị aatughiạn, pọ omiịn bịn dị mephanyị ḍighaạgh amị—bịn mị anhaạgh. Mem dị mị aloghoma loor epẹ otu arookonom mọ, aḍighaạgh elheom amị mesophaany, aḅeri elhiom amị aḍighi tụm ḅilẹ eten mị u/kạr mun umiinọm ekpeḍien elhiom amị.

Ghalamọ r’iduọn mị aḍighimayogh bọ ni raraạr, useere bọ imị romadạn bịn mị aḅilẹ aḅula ateẹny buọ otul phọ ayoor. I/bia iboom bịn abuọ iḍiil phọ usiph imị okasaghiọm. Asiya phọ amị r’okarạph otul phọ alegheri bịn kụ akpạr epẹ phọ. Oomo ayoor kụ uḅophoghạn oḍighi ghan raraạr torobọ aḍio—yoor ulhe ghan eḍien aḍiroọr eniin esi, ophughulọgh gee, tutụ yoor okị ominạ.

IPẸ ABAIBUL PHỌ ANME BỌ GHUḌUM MỌ AMỊ

ALeonardo aru ni uphogh imị epẹ otu ikoli phọ. Idiphọ yoor rokaạph bọ ni, odị amạ ni raraạr dị ogẹ ḍighaạgh elhiom amị, kụ aḅẹm mọ. “Nạ alegheri ni iyaạr phọ iraạr araraạr phọ ogẹ bọ ḍighaạgh elhiom mọ anạ remạ ghan?” Kụ mị aḅenị nyodị mọ. “Ii, remạ ghan, orolạn esi, igbagarạ asirooghọ, r’asuọr dị oghol mọ rock and roll.” Kuolọ aLeonardo uḅenị imị mọ: “Mị kaḅẹm ghụn mọ remạ ghan otu arookonom, ikoli, r’aḍuugh. Nạ marọl li otu arookonom, nyiidiphọ nạ odi otu ikoli. Nạ alegheri ni iyaạr dị keḅilẹ emitenaan nyinạ.”

Ipẹ aLeonardo aghaạph bọ iphẹr imị bịn. Odị akaạph ni elhiom. Mị usighẹ ḍighaạgh amị kụ aguphom ghan oḍi amị dị eego esi adọl aghuḍum mọ amị. ALeonardo aḅẹm ni mọ onọ katu ghan utughemị imị Baibul phọ, kụ mị umeeraam ni. Ipẹ mị atuughạ bọ siphẹ aBaibul phọ inyu ni imị onme adọl aghuḍum mọ amị. Esi omaạm, aBaibul phọ aḅẹm mọ “Orelhean ikarạph arighirị repuẹ ghan ni ezọ.” (1 Korịnt 15:33) Esi iduọn phọ, eḅẹl iyaạr dị ewạ oḍighi pọ omoọgh imoom arighirị. Orue oḍighi iduọn phọ, mị u/kị ghan mun simitin dị abuọ otuI phọ ayoor ophamạgh, kparipẹ ghụn, mị umiigh oghị aani ghan ituughạ dị Abugbaanaạn AZihova ophạm ghan siphẹ otu ikoli phọ. Siphẹ ituughạ phọ, mị uuzuanaan ni oniin onyọ umor dị oghol mọ Andrés dị olhọgh aani ikoli phọ, dị aḍiiny muụm idiphọ oniin onyọ Ogbaanhaạn AZihova siphẹ olhoghi otu ikoli phọ. Odị uḅenị imị oḍighan odị olhe eḍien aḍiroọr. Esighẹ rekị bịn, mị u/miighom ghan mun ḍio phọ esi ophughọl agee. Kparipẹ ghụn, Andrés r’amị uuḅeghiọn ghan eniin ekpịgh aBaibul torobọ aḍiroọr.

I/bia iboom bịn abuọ okarạph otul phọ amị omhiịn mọ mị ranmia. Kụ iḍighi kụ oniin oḍiemiom mọ uḅenị imị mọ onọ rawạ oḅaanaạn amị. Oḅiom amị aḍuạ ni. Mị u/legheri ipẹ dị kuḍighi bọ imị eḍighi maạr dị odị anaghạn mọ mị rawạ oḍighi oniin onyọ Ogbaanaạn, idị eḍighi bọ, esi phọ mesi bọ ilọ owilẹ okarạph otul phọ i/lo mun. Odị aḅẹm mọ: “Yoor omiịn ni mọ nạ ra/tu ghan mun simitin lọ yoor ophạm, kparipẹ ghụn nạ rakiighị ghan ituughạ Abugbaanaạn AZihova. Nạ akạr agbiighi ghan oḍighi ika?” Mị uḅenị ni nyodị mọ mị rawạ oghiọm aghisigh otuughạ aBaibul phọ kụ onme adọl aghuḍum mọ amị. Iḍighi ni iikia esi amị mem dị odị uḅenị imị mọ otul phọ ayoor kulọgh ni imị eegu, eḍighi maạr dị mị akạr ri aḅẹm mọ mị rawạ oḍighi oniin onyọ Ogbaanaạn AZihova. Kụ odị aḅarạm mọ: “Eḍighi maạr dị nạ akạr ri rawạ otuughạ ilọ Enaạn, pọ ḅạr r’Abugbaanaạn AZihova. Yoor u/wạ mun onaghạn mọ nạ akị epẹ apogh iniin iniin aḍighiyogh. Nạ aḍigh ni ḍighaạgh igey awe. Abugbaanaạn phọ kokạr kụ ologhonaạn nyinạ ḍighaạgh. Mị matuughạ ghan ni r’abidị epẹ Yunaitẹd Stet, ḅilẹ abuniin asiya amị oḍighi Bugbaanaạn AZihova. Ka/kiilaan. Kiọm ni ghisigh.” Ghalamọ r’iduọn phọ ni bịn ekpom amị i/pọ, kuolọ eniin phọ amem mọ, mị umoọgh ni iboom ibo. Mị usẹph ni aZihova ologhi ekpom amị. Mị uloghoma idiphọ enhụn dị apheẹph emite okporoma, pọ kụ amem dị mị anaghanạn ikpo onhụ phọ aZizọs eḅẹm bọ mọ: “Nyina kelegheri ni ipẹ eru bọ igey phọ, kụ etuạn igey phọ ekpetenaan.”—Jọn 8:32.

Abuniin abugbaany arighirị amị udeghọm ghan ni imị igbagarạ asirooghọ ophogh. Ogbạ agey, eeni amem mị umeel ghan ni aḍighanaan bidị. Kuolọ idiphọ amem mọ rekị bọ ni, mị uuḅereghị ni igey phọ iiḅereghị, mị uwilẹ ni oomo iḅoriạ iḍighinom araraạr phọ mị aḍighiyogh ghan bọ.—Psalm 51:10, 11.

Mem mọ useere bọ imị ikoli phọ, ibadị awe ugbi ghan mọ mị kaḅilẹ ni aḅula ḍigbaany adọl aghudum mọ amị, kuolọ i/kị ipẹ bidị ootughiạn bọ. Kparipẹ ghụn mị uḅula ni epẹ otu ikoli phọ aphinom ghan bin iphẹn mị atuughạ bọ aḅenị budị odi siphẹ otu ikoli phọ ipẹ mị atuughạ bọ siphẹ aBaibul phọ. Ekureriom mọ, igbaany arighirị phọ amị ukạr ri omiịn mọ mị akạr ri anmia. R’okururu ni, amulọgh ḍien phọ amị u/naghanạn aani mọ mị manmia.

Eniin aḍio dị mị amite epẹ erugh phọ, onhọn okarạph otul dị r’ayoor eeghi ghan uru ni ukitonom imị r’asilaagbạ ekperenom, mọ bunọ k’ughiigh imị. Opọ r’amị rotelhean bọ r’ankpọ oḅio, amiigha ni loor agbạ aḅenị bidị mọ mị u/lo mun okarạph otul phọ. Oomo phọ iphẹn remite bọ, mị aḅoorian bịn kpaị. Bidị rukuphogh imị oḅilẹ uphụr imị rurụ mọ mị ku/kị mun ekool phọ epẹ phọ, bidị ukereriạn ni silaagbạ abidị kụ uwilẹ iyoor. ABaibul phọ makạr kụ anme ghuḍum amị. Mughumọ amem dị meten, obọ mị mukparaghạ ni oḍighi oḅulemian. Kuolọ nyiidiphọ mị rasighẹ ghan kaḍighinom oroma aBaibul phọ odi bọ siphẹ 1 Tesalonikạ 5:15: eḅẹm bọ mọ, “Onyọ anyina ikarạph ku/ḍighi ghan uḅulemian. Oomo amem iwạ ghan oḍighi iiḅi siphẹ ogbo phọ anyina r’oomo awe.”

Esighẹ k’amem mọ mị aḍighi bọ onyọ Ogbaanaạn AZihova, mị maḍighi oye dị ragbạ ghan agey. I/dugh oo. Kuolọ r’ologhonaạn aḍighaạgh aZihova Enaạn, oroma aBaibul phọ, rologhonaạn aḍighaạgh abumoom arighirị phọ amị, mị mamoọgh ekol. R’amem r’amem mị ra/bula mun ḍigbaany adọl aghuḍum mọ amị.—2 Pita 2:22.

ASUỌ DỊ MỊ MAMOỌGH

Mị uḍighi ghan oye iigamaniạn dị amoọgh ghan iboom ighạgh iloghi. Mị ameeraam mọ mughumọ mị mu/bilẹ bọ okol aghuḍum mọ opọ phọ obọ mị maḍighi oḍim k’aḍio arodon. Ipẹ mị atuughạ bọ siphẹ aBaibul phọ mekạr kụ inme imị. Mị mawilẹ ḍiḅoriạ adọl phọ mị arọl ghan bọ. Mị matuughạ owạ eephọ oghị esi abugbaany amulọgh ḍien phọ amị. (Luk 6:27) Kụ nyiidiphọ mị rakelọm ni righirị dị ruloghonaạn imị ḍighaạgh omoọgh igey araagharạ. (Proverbs 13:20) Nyiidiphọ mị amoọgh ghuḍum dị aḍighi olọ oḅaạl ologhi ḅilẹ amoọgh ogbi, ḅilẹ mị rakumu ghan nyiidiphọ Enaạn dị aakolobian osạr owilenaạn oomo ikarạph phọ mị aḍighi bọ.—Isaiah 1:18.

Lhạ phọ 2006, mị ughị ni askul abukaaphọm aKristẹn dị agbatanaạn. Idiphọ asiạ phọ rekị bọ, mị uphin ni ooḅi anhịr phọ amị, kụ yoor oḅophoghạn ni rookonom onyanị ayoor. Nyiidiphọ rokaạph bọ, mị ralọgh ghan ni muboom amem otughemiọm abunhọn ilọ asinị iilhogh aBaibul phọ iloghonaạn bọ imị ḍighaạgh. Mị aḅilẹ kẹn rakumu ghan idiphọ okumor oye ookpomoghan ayoor, kụ mị rakparaghạ ghan ni ologhonaạn aḍighaạgh iḍoọgh dị bidị ko/piomạn aani oniin phọ opiomạn phọ mị apiomạn bọ mem iḍoọgh amị. Kparipẹ rosighẹ aḍighaạgh amị oguphom oḍi amị, mị ralọgh ghan ghụn ghisigh dị katọl bịn k’agee-pọ, idiphọ Enaạn meguanaan bọ siphẹ aBaibul phọ.