Onhaghạn Edeọm Ookpomhoghan Eephugh Phọ Olhoghi Aradio r’TV

Ookpomhoghan eephugh alhạ phọ 2020 agbatanhaạn ni esi iphirigba—edị kụ eḅẹl edeọm ookpomhoghan eephugh ayira dị orekọd olhọgh intanẹt! Toroboiperolbọ, ibadị abumor r’abumaranhi ayira epẹ Malawi r’aMozambique, unhaghạn edeọm ookpomhoghan eephugh phọ dị u/ḍighinhom intanẹt. Ika kụ idị iphẹn phọ edugh bọ?

Idiphọ eepoogh dị egbatanhaạn, Ekụ Abuukpomhoghiom Mọ r’Ekụ Abuọ Itughemhị Aloor Phọ Repogh Bọ umheera ni mọ ongọ raghaạph ookpomhoghan eephugh phọ olhoghi aTV r’aRadio epẹ Malawi r’aMozambique. Uḍighi ika kụ emhoghi bọ m’ongọ eepoogh phọ ephẹn phọ? AMalawi aḍighi eelhe dị adata oḍighom intanẹt amhạn ikpoki iboom siẹn aḅirinhi phọ, esi iduọn phọ iyạl ikpo Abugbaanhaạn bịn kụ kotue oḍighinhom intanẹt. Umor phọ William Chumbi, oniin siphẹ Ekụ Phọ Repogh Bọ Olạ Agadạ aMalawi, aghaạph mọ: “ARadio r’aTV bịn kụ areten dị kotue osighẹ ongoọm bumor r’abumaranhi phọ eḍien aruwaloor phọ pakirị phọ ephẹn phọ.” ALuka Sibeko, dị rakumuan aani ghan Ekụ Phọ Repogh Bọ Olạ Agadạ aMalawi, aḅarạm mọ: “Mughumọ u/ḍighinhom bọ TV r’aradio obọ iyạl ikpo abumor bịn kụ mumooghọm suọ ookpomhoghan eephugh phọ.” Epẹ Mozambique kẹn, ghalhamọ iyạl ikpo abumor urue ni omhoọgh ogbogh afon, omhoọgh intanẹt kekparanhaạn ni.

Ookolhobian Ipẹ Koḍeenhaan Bọ

Loor egbogh ezẹgh aCOVID-19 phọ, iniin asiradio r’aTV station momhiigh ni roḍeenhaan ghan edeọm ituughạ awiki phọ.a Abumor phọ ayira ughị ni oteẹny buọ asistation phọ olhọm mọ obughẹ mem mọ obọ opamhạm ookpomhoghan eephugh phọ.

Epẹ Malawi, abumor phọ ayira usoman ni ipaanhaạn. Abuọ astation phọ omoọgh eḍighinhom iyaạr dị ro/ngọ ghan oye mem dị epel oniin awạ. Abidị rokiilhaan ghan mọ eniin edeọm kụ edoọny ephughạn kepẹr we phọ onhaghạn bịn onme station. Kuolọ abumor phọ ayira uḅenhị bidị m’oḍighi phọ ayira raloghonhaạn ghan ḍighaạgh we. Ghalhamọ r’iduọn okasaghị bọ ni rikpisi, yira osighẹ iiḅi iinhaghạn phọ edi bọ Baibul phọ rongoọm ghan we iidereghị, iphẹn phọ reloghonhaạn ghan bidị ḍighaạgh oḍighi abugey awe r’omhoọgh oḅaạl olhoghi rughunotu abidị. Iduọn awe phọ onhaghạn bọ iphẹn phọ bịn omheeraam obughẹ amem mọ idiphọ abumor phọ olhọm bọ.

Epẹ Malawi, uḍeenhaan edeọm ookpomhoghan eephugh phọ oniin aTV station oḅilhẹ ophegh oniin aradio station dị eleeny eleeny oomo isiphẹ eelhe phọ dị irubal awe kotue ni onaghạn edeọm mọ. Epẹ Mozambique, uḍeenhaan ookpomhoghan eephugh phọ oniin aTV station oḅilhẹ ophegh 85 asiradio station.

Epẹ iyạl phọ areelhe phọ ipẹ phọ, ulheom ikpoki dị emhạn $28,227b oḍeenhaan edeọm ookpomhoghan eephugh siTV station, oḅilhẹ olheom ikpoki dị rekị ni omhạn $20,000 ophegh asiradio station. Ulheom ghan ikpoki dị remhạn ni $15 ilọ obạm astation, kụ eghị esi $2,777 ilọ astation dị aleeny eleeny oomo eelhe phọ.

Abumor phọ ayira ukparaghạ ni omhiịn mọ u/lheoghom ikpoki ilọ ateẹny. Esi omaạm, epẹ Malawi, bidị umherenyan ni dị kodughe ḍighi phọ, kụ eniin esi uwilhenhaạn ni iraạr abin esi aḍioph abin. Iphẹn phọ iḍighi idị oseerean ikpoki dị remhạn ni $1,711. Epẹ Mozambique, iniin asistation umheera ni osoore aḍighi phọ loor imạ aḍien phọ ayira idiphọ awe dị rogbạ ghan agey ḅilhẹ rokpẹ ghan ikpoki lọ oghaạph okạr amem mo oguan bọ.

Ikpo-onhụ Osereghiạn

Abumor phọ ayira ukạr kụ osereghiạn ophogh aani ḅilhẹ r’onhaghạn edeọm ookpomhoghan eephugh phọ siphẹ aTV phọ r’aradio phọ. APatrick, oniin okumor oye epẹ Malawi, aḅẹm mọ: “Yoor rosẹph ni Loor Phọ Repogh Bọ ilọ eepoogh phọ egbatanhaạn bọ bidị ungọ bọ iyoor mem egbogh ezẹgh phọ.” Onhọn onyọ umor epẹ Malawi dị oghol mọ Isaac, aḅẹm mọ: “Yoor u/moọgh aani ogbogh afon, esi iduọn phọ yoor rosẹph ni iikolhobian phọ egbatanhaạn bọ oḍighom mọ aZihova omiteom bọ obọ yoor onaghạn aani edeọm mọ siẹn aradio phọ. Esi iduọn phọ oomo eghunotu phọ amhị umhooghọm ni suọ edeọm ookpomhoghan eephugh phọ. Iphẹn phọ iḍeenhaan iyoor mọ aZihova apomhoghiạn ni we phọ odị.”

Oookpomhoghan eephugh alhạ phọ 2020 kụ oḅẹl odị oniin okaaphọm epẹ Mozambique aghị. Kụ odị aḅẹm mọ: “Iikolhobian ilọ awe kopogh ookpomhoghan eephugh phọ esi aTV iitughianạm imhị mọ aZihova aḍighi Enhaạn oomo iikpọ. Egbogh ezẹgh phọ bịn i/sophoghom nyodị ongọ ayira eḍien aruwaloor phọ okạr isiẹn ogbotu amhị. Mị umhiịn eḍeenhaan ephomhoghiạn phọ edi bọ igbo awe phọ aZihova. Mị makuphom owol mọ ephẹn kụ egey ekụ iiḅereghị phọ.”

Okumor oye ookpomhoghan dị oghol mọ Wyson aḅẹm mọ: “Mị rawạ osẹph ebenhẹ phọ asụ bọ olhoghi phọ ilọ eten phọ bidị uphogh bọ iyoor mem egbogh ezẹgh phọ. Iikolhobian oḍeenhaan edeọm ookpomhoghan eephugh phọ TV ḅilhẹ r’ophegh aradio phọ, melhoghonhaạn ḍighaạgh ibadị ayoor phọ rokparaghạ bọ ephẹn apakirị aḅirinhi phọ omheel bọ iduọn ekulhom, omhooghọm aani asuọ edeọm mọ.”

Ilọ edeọm ookpomhoghan eephugh 2021, Ekụ Abuukpomhoghiom Mọ r’Ekụ Abuọ Itughemhị Phọ moḅilhẹ kẹn ongọ eepoogh dị egbatanhaạn mọ oḅilhẹ oḍeenhaan TV ḅilhẹ ophẹgh olhoghi aradio edeọm mọ iniin arikpisi. Ika kụ idị yira romoọgh ghan bọ ikpoki oḍighinhom iphẹn phọ? Esi iisogh oḍighi oomo aḅirinhi phọ, opol ipẹ ibadị rosogh ghan bọ edaphạn reten phọ edi bọ siphẹ donate.jw.org Meḍighi iisogh phọ anyinha.