Olhoghonhaạn Aḍighaạgh Mem Ekperenhom Iiḅaghamhị Lhạ Phọ 2022—Idị Oḍighi Oḍeenhaan Ephomhoghiạn Abuọ Asiya

ABaibul phọ akaạph ni mọ siẹn amem mọ ayira araaghạm, ophiigha ade, areezẹgh, ḅilhẹ r’inhọn “araraạr aruugu” keepaany ni. (Luk 21:10, 11) Ikpo-onhụ imiịn phọ ipẹ phọ ighiọm ni ghisigh emhunhughan ghan lhạ arukumuan phọ 2022.a Esi omaạm, eghạm mọ edi bọ Ukraine rekiọm ni ghisigh, kụ retir ri sighuḍum irubal awe. Ogbogh apakirị aḅirinhi phọ ko/kpetenhaan ezẹgh aCOVID-19 phọ omhạn. Opumhom ipạ, ekperenhom iiḅaghamhị eseereom, idiphọ ophiigha ade epẹ Haiti r’oghim dị aphueghị raraạr epẹ Central America, r’aPhilippines, ḅilhẹ r’apakirị Africa dị edi igbo epẹ erumuḍio phọ remite ghan bọ r’epẹ esoorom mọ itir ri we dị ko/tue ogbi omuneni. Ika kụ idị Abugbaanhaạn AZihova olhoghonhaạn ḍighaạgh buphẹ iphẹn phọ emitenhaan bọ?

Lhạ arukumuan 2022 phọ, ookpomhoghan phọ ayira ulhoghonhaạn ḍighaạgh buniin awe dị 200 iiḅaghamhị kirokirọ etir aani! Oḅạr oḅophoghị ikpoki dị yira olheom rekị ni omhạn 12 erubal adollar orue ongọ olhoghonhaạn aḍighaạgh phọ.b Ooḅeghiọn idị osighẹ iisogh phọ ayira olhoghonhaạn ḍighaạgh we dị iyạl odọ iiḅaghamhị emitenhaan.

Ophiigha Ade Epẹ Haiti

August 14, 2021, ogbogh ophiigha ade amite ni epẹ esoorom mọ aHaiti. Dị eeph ni, iraạr Abugbaanhaạn umhugh ni—iyạl abumaranhi r’oniin onyọ umor. Abuphẹ okpetenhaan bọ usomhan ni muphe araraạr emhoọgh r’eephinha phọ ophiigha ade phọ akọm bọ. Onyọ umor dị oghol mọ Stephane aḅẹm mọ: “Ibadị awe umhuughu ni siphẹ egbogh emhạ phọ, kụ asimaḍi phọ irọl ghan torobọ awiki esi iyạl arunwanyụ.” Onhọn onyọ umor dị oghol mọ Éliézer aḅẹm mọ: “Ibadị Abugbaanhaạn u/moọgh ghan esi orọl, iinmenian, rokoro, ḅilhẹ r’inhọn araraạr dị emhoghi orolhọm. Esi ibadị arunwanyụ, ibadị urolhọm oghiilhaan loor esi unmam mọ.”

Oḍighom mọ ayira uugboronhom ni olhoghonhaạn ḍighaạgh. Olạ agadạ aHaiti ungọ ni riiḍien dị eemhọr phọ epel li 53000 kg, ḅilhẹ r’araraạr oḍighinhom arogbogo, asitapolin, sifom ḅilhẹ r’asicharger afon dị reḍighinhom ghan iikpọ erumuḍio. Opumom isiphẹ, lhạ arukumuan 2022 phọ ulhoghoḍị ni obobọ uselhemhi yogh ni ruutu dị epel li 100. Ulheom ikpoki dị epel oniin erubal adollar oḍighi iphẹn phọ.

Abumor r’abumaranhi phọ ayira okạr kụ osereghiạn. ALorette aḅẹm mọ: “Ophiigha ade phọ alhereghi otu ayoor bịn k’ude aḅilhẹ aphiemhi ḍighi ayoor. R’iyaạr olhe iyoor i/rọl. Kuolọ oḍighom mọ aZihova uḅegh ni iyoor, ungọ ghan iyoor oomo phọ araraạr phọ yoor owạ bọ.” AMicheline aḅẹm mọ: “Ophiigha ade phọ aphueghị ni otu dị iyạl anmụny amhị r’amhị omhinhạ ghan. Enhọn iyaạr oḍighi mị u/legheri emuton ooḅereghị ghan ilọ olhoghonhaạn aḍighaạgh, kụ aZihova aphagharanhaạn ni dị eego esi ookpomhoghan phọ odị. Yoor momhoọgh ghụn ogey otu dị omhaạr olhọgh nyiidiphọ. Mị asopha oḍighi oomo ilọ mị katue oḍeenhaan aZihova mọ mị asereghiạn ni.”

Abuọ itooghị ekpisi phọ ulhọgh ni elhegh iiḍighi olhoghonhaạn aḍighaạgh phọ ayira. Oye dị rapogh ghan otu emhạ L’Asile aḅẹm mọ: “Mị risẹph ni inyinha iduọn nyinha eegboronhom bọ eru elhoghonhaạn ḍighaạgh. Mị risẹph ni inyinha ilọ eboom eegu phọ nyinha engọ bọ buọ itooghị phọ. Kụ eḅaạl li olhoghi amhị omhiịn mọ nyinha i/tuạn ikpoki kụ eru bọ. Kparipẹ ghụn, nyinha rewạ ghan olhoghonhaạn awe ḍighaạgh. Nyinha esighẹ ephomhoghiạn kụ reḍighinhom.”

Okarạph Oghim Dị Oghol Mọ Ana Asoor Ri Malawi R’AMozambique

January 24, 2022, Okarạph Oghim dị oghol mọ Ana asoor ri Mozambique kụ aḍuạ pakirị phọ epẹ erumuḍio phọ remeel ghan bọ bịn aḍigh Malawi. Kụ ogbagarạ ookugh iphoroḅoor phọ ophọn phọ aḅarạm ni ogbogh olophiạ r’iikpọ oghim dị eghiil phọ emhạn 100 itobi oniin awạ (62 mph). Alhereghi ni sipol alaịt, aagbo siḅagạ, aḅilhẹ akọm ḍiboom aḍigho.

Oghim mọ aphueghị ni raraạr Abugbaanhaạn dị ropel li 30,000 epẹ Malawi r’aMozambique. ACharles, onyọ umor dị akumuan aani r’abumor phọ oghị bọ olhoghonhaạn aḍighaạgh phọ aḅẹm mọ: “Mem mọ mị amhiịn bọ raraạr abumor phọ ephe bọ r’imhinhimhiịn phọ bidị mosoman bọ, olhoghi amhị eeph ni ḅilhẹ aloor amhị edugh bịn.” Dị eeph ni iboom, iịny areten omhoọgh aani eḍien r’iizo phọ abidị ipheeghu ni. Ibadị u/moọgh mun esi orọl. Dị ekạr eeph, anhịr oniin onyọ umor r’iyạl iḍoọgh anmanyaạn odị uḅi ni bịn omhuughu mem dị oghuugh phọ aghị bọ otagharạn abidị aḅi.

Oghim mọ akọm ni oghiilhaan. Mem dị aso-keẹny odi 1:00 asuo ogbo aḍughul epẹ Nchalo, Malawi, kụ edị otọ k’aSengeredo onhaghạn oghur ekilhom amuụm dị ratu. Arumuụm iyạl ariphiịny memuza kụ epum ḍigho relọgh emhạ phọ! Umor phọ Sengeredo asopha ni mọ bidị koḍuạ otu phọ. Kụ ophọn phọ aḍighi ni osopha osụ-olhoghi loor esi dị i/bia bịn aḍigho phọ elher otu phọ. Aḍigho phọ iphueghẹ ni raraạr abidị, ekilhom iniin eḅuanhạm. Eghunotu phọ usopha ni oghị epẹ aKindọm Họl phọ, dị obọ bidị rotelhe ghan 30 ikalhạ bịn kosi. Kuolọ nyiidiphọ, isighẹ bidị iyạl awạ. Tutụ bidị rosi bọ oomo abidị moḅoroghụ, asiloor phọ edughogh, kuolọ iyaạr u/ḍighima.

Ilạ agadạ phọ aMalawi r’aMozambique ukem ni ookolhobian olhoghonhaạn aḍighaạgh. Uḅenhị bupoghom eghir r’ikumor awe m’ophogh idọ araraạr dị kemoghi olhoghonhaạn aḍighaạgh bumor phọ eten aruwaloor r’okparamhị abidị. Uphighi ni ibadị Aruukụ Abulọgh Ḍighaạgh Mem Ekperenhom Iiḅaghamhị phọ oghị ooḅakị oḍighi phọ, aruukụ phọ ukem ni omhiigh olhoghonhaạn aḍighaạgh bumor phọ dị koteẹny eḍien r’inhọn araraạr orolhọm. Ulheom ni ikpoki dị repel li $33,000 olhoghonhaạn aḍighaạgh we, r’idị repel $300,000 odoghoḍiom r’oḅilhẹ oselhemiom aruutu.

Aruukụ phọ ulheom ni ikpoki phọ eten osụ-olhoghi loor esi dị asiḍighi araraạr ighị ni anyụ iboom. Esi omaạm, siphẹ iḅẹl oḍual arunwanyụ oḍighi olhoghonhaạn aḍighaạgh phọ, aḍighi igbienheẹn ibiakpạ ighị ni anyụ iboom—kuarị epẹ kụ ekpanhạ eḍien aMalawi. Aḍighi afuẹl kẹn eghị anyụ. Oghome amaleom, abumor phọ ugho iboom araraạr olhe phọ r’ilọ olhoghoḍiọm aruutu phọ siphẹ aramhạ phọ. Iphẹn phọ iḍighi ghan idị owilhenhaạn ghan pakirị ikpoki phọ eḅilhẹ esoph eroph iboom ikpoki okoọm eten.

Olhoghonhaạn aḍighaạgh phọ atir ri rokpom awe phọ aZihova. AFelisberto, oniin onyọ umor epẹ Mozambique, aḅẹm mọ: “Mị ko/miịn ghan ookpomhoghan dị rongọ ghan we raraạr dị elheeny iduọn: raraạr olhoghoḍiọm aruutu, ikpoki okoọm eten, buloghọm ruutu, riiḍien, ḅilhẹ r’iiḅakiọm ephomhoghiạn. Olhoghonhaạn aḍighaạgh phọ ophọn akạr aḍighi egbogh eḍeenhaan ephomhoghiạn phọ aZizọs aghaạph bọ siphẹ Jọn 13:34, 35.” Ester, ekpukele anhịr epẹ Malawi dị otu phọ amhelheghu aani aḅẹm mọ: “Mị uḅonyonhu bịn azuan loor esi dị mị u/moọgh ikpoki olhoghọm onhọn. Esi iduọn phọ mem mọ abumor phọ oru bọ ulhoghonhaạn imhị omhoom otu phọ, mị ulhoghomha mudị mị maḍigh Paradaịs.”

Iduọn yira rokpụl bọ omhoom aḅirinhi phọ, yira rogon ni omhiịn ekperenhom iiḅaghamhị kirokirọ dị epu iphẹn phọ. (Matiu 24:7, 8) Toroboiperolbọ, yoor okuphom ni owol mọ loor emhụ iisogh phọ anyinha, awe phọ aZihova komoọgh ghan ni olhoghonhaạn aḍighaạgh phọ ewạ bọ. Okaạph ni ilọ areten osighẹ osoghom aani siphẹ donate.jw.org. Meḍighi esi eegharạ inmo phọ anyinha.