EMHUOGHAẠPH ITUUGHẠ PHỌ 25
Ikumor Awe—Ituughạ Esi Eḍeenhaan Phọ AGidiọn
“Amem i/lo mun oghaạph oghol aGidiọn.”—HIB. 11:32.
AḌUỌR PHỌ 124 Ever Loyal
OGHAẠPH OOKARAGHa
1. Odaphạn 1 Pita 5:2, eeghe eepoogh kụ edị ikumor awe arookpomhoghan rokelhọm?
MOḄỌGH oḍighi ophogh iyool phọ aZihova omhạn bọ maạr olọgh ḍighaạgh ikumor awe arookpomhoghan phọ. Ikumor awe phọ abuẹn phọ okuọm bọ loor osereghiạn ni eepoogh okumu abumor r’abumaranhi phọ abidị, kụ bidị olọgh ni inyaạm idiphọ “abupoghom dị okạr ropogh.” (Jer. 23:4; bạl 1 Pita 5:2.) P’eeghe idị olhoghi ayira aḅaạl omhoọgh abudọ awe phọ abuẹn siẹn arookpomhoghan phọ ayira!
2. Eeghe odọ ipaanhaạn kụ edị abuniin ikumor awe arookpomhoghan kotue osoman?
2 Ikumor awe arookpomhoghan rosoman ghan ni ibadị ipaanhaạn siphẹ arukumuan phọ abidị. Okạr oghaạph, ophogh ookpomhoghan eḅaramaạm ni oboom oḍighi. Iwạ ni dị aTony oniin okumor oye ookpomhoghan epẹ United States, kalọgh elhegh esi dị inyaạm odị esi, mem dị rokaạph ilọ onhụ iiḍighi dị odị kapamạgh siphẹ ookpomhoghan phọ. Odị aḅẹm mọ: “Mem mọ ezẹgh aCOVID-19 phọ emhiigh bọ, mị uphamhạgh ni iboom iiḍighi, ilọ kopạm ituughạ ḅilhẹ r’omite epẹ erugh phọ. Kuolọ etigheri oomo ikuph phọ mị alhọgh bọ, ibadị araraạr oḅilhẹ oḍighi yogh iru ghan bịn. Esighẹ rekị bịn, ibạl aBaibul phọ amhị, ituughạ ogina amhị, ḅilhẹ r’iiḅereghị phọ amhị emhiigh omhiinhọm.” Ilir, oniin okumor oye ookpomhoghan epẹ Kosovo, asoman aani ni ipaanhaạn dị egbatanhaạn. Mem dị odị arọl ekpisi dị robe eghạm, ikparanhaạn ni nyodị odaphạn iiḅakiọm dị ookpomhoghan phọ ongọ. Odị aḅẹm mọ: “Akpọ oḅio phọ amhị aḍigh ni esi odẹgh ophogh mem dị olạ agadạ phọ ungọ imhị oḍighi oghị olhoghonhaạn aḍighaạgh bumor r’abumaranhi dị odi ekpisi ooto r’osoorominheen. Mị ughiilhaan ni, ighịgh mudị iiḅakiọm mọ i/kpeanhaạn.” Ikparanhaạn ni Tim, onyọ amisonarị epẹ Asia, oḍighi ghan oomo phọ ipẹ ewạ bọ mọ odị aḍighi ghan ḍio phọ. Odị aḅẹm mọ: “Eeni amem, aloor amhị idugh ghan ni ephughạn ophogh abumor r’abumaranhi phọ.” Eeghe kụ ketue eloghonhaạn ḍighaạgh ikumor awe arookpomhoghan dị osoman aani idọ ipaanhaạn phọ iphẹn phọ?
3. Ika kụ idị oomo ayira komooghọm suọ esi ooḅeghiọn eḍeenhaan Oogboom Iiruẹn phọ Gidiọn?
3 Ikumor awe phọ kotue ni otuughạ iyaạr esi Oogboom Iiruẹn phọ Gidiọn. (Hib. 6:12; 11:32) Odị aḍighi opoghom dị aghoph we phọ Enhaạn. (Judg. 2:16; 1 Chron. 17:6) Idiphọ aGidiọn, momạ ikumor awe phọ ophogh awe phọ Enhaạn mem di ekpạr agey. (Iiḍighi 20:28; 2 Tim. 3:1) Yira kotue ni otuughạ iyaạr esi eegharạ olhegheri okụ phọ, osooromhi aloor phọ, ḅilhẹ r’onhaghanhạn phọ aGidiọn. Okparạm mọ odị asoman ni odẹgh ophogh idiphọ odị raḍighi bọ iiḍighi phọ ongọ bọ nyodị. Ghalhamọ yira rokumuan ni idiphọ okumor oye obobọ ro/kumuan, yira kotue ni obughẹ ipẹ yira rosereghiạn ghan bọ ikumor awe phọ ayira. Yira kotue ni obakị aani bumor phọ abuẹn olhọgh bọ ni inyaạm ophogh ayira.—Hib. 13:17.
MEM DỊ ODẸGH OPHOGH EEGHARẠ OLHEGHERI OKỤ R’OSOOROMHI ALOOR PHỌ ANẠ
4. Ika kụ idị aGidiọn aḍeenhaan osooromhi aloor r’olhegheri okụ?
4 AGidiọn aḍighi oye dị alhegheri okụ aḅilhẹ asooromhi loor.b Mem mọ ookpaạny phọ aZihova aḅenhị bọ Gidiọn mọ mosaḅạr nyodị otagharạn awe phọ Izrạl ḍighaạgh abuọ aMidian phọ okpạr bọ iboom iikpọ. R’osooromhi aloor odị aphagharanhaạn mọ: “Opolo opọ ayoor kụ asoorom iboom siphẹ eghun phọ aManasẹ. Mị kụ obạm siphẹ okuruḅakạ odẹ phọ ayoor.” (Judg. 6:15) Odị alhoghoma mọ onọ o/sianhaan, kuolọ aZihova alhegheri ni mọ odị katue ni. Kụ r’olhoghonhaạn aḍighaạgh aZihova, aGidiọn amhoọgh ni ekol.
5. Ika kụ idị eegharạ olhegheri okụ r’osooromhi aloor dị okumor oye amhoọgh ketue eḍigh esi odẹgh ophogh?
5 Ikumor awe phọ rokparaghạ ghan oomo ilọ bidị kotue oḍeenhaan olhegheri okụ r’osooromhi aloor esi oomo araraạr. (Mic. 6:8; Iiḍighi 20:18, 19) Bidị roo/bagaam ghan raraạr dị bidị kotue oḍighi ḅilhẹ r’idị bidị moḍighi ghan; ḅilhẹ bidị ro/ḅonyonhu ghan kozuan loor asidugh obobọ opiomạn abidị. Toroboiperolbọ, okumor oye katue ni asoman odẹgh ophogh. Esi omaạm, odị katue ni ameera ophamhạgh ibadị iiḍighi, kụ amiigh okparaghạ ilọ oḍighi omhunhenhi. Obobọ otue ni oḍaghạ nyodị ilọ oḍighi dị odị aphạm obobọ osẹph nyodị ilọ eten dị odị aḍighi enhọn iyaạr. Eeghe kụ edị ikumor awe kotue otuughạ esi aGidiọn, dị keloghonhaạn bidị ḍighaạgh sidọl dị erọl iduọn phọ?
Odaphạn eḍeenhaan phọ aGidiọn, okumor oye dị alhegheri okụ rapuru ghan ni olhoghonhaạn aḍighaạgh, idiphọ olhegheri ilọ oḍighinhom akạt (Miịn ekpịgh phọ 6)
6. Eeghe kụ edị ikumor awe phọ kotue otuughạ ilọ olhegheri okụ ḍighaạgh aGidiọn? (Miịn kẹn afoto phọ.)
6 Puru ghan olhoghonhaạn aḍighaạgh. Oye dị alhegheri okụ ralegheri ghan mọ araraạr edi ni dị onọ ka/tue aḍighi. AGidiọn aḍeenhaan eegharạ olhegheri okụ esi opuru olhoghonhaạn aḍighaạgh abunhọn. (Judg. 6:27, 35; 7:24) Iduọn kẹn kụ idị ikumor awe dị osụ-olhoghi roḍighi ghan. ATony, oghaạph bọ oghol epẹ omhạn aḅẹm mọ: “Loor eten phọ epẹ uukonhom bọ imhị, mị umheera ni ophamhạgh iiḍighi dị ipel imhị loor. Kụ mị asopha dị yoor kooḅeghiọn ilọ olhegheri okụ siphẹ iiseeny eghunotu phọ ayoor, kụ opuru aani anhịr amhị ḍiitughiạn odị. Kụ mị aḅilhẹ aphogh vidio phọ Tughemị, Ḍuom Olhoghi, Aḅilẹ Angọ Iikpọ Bunhọn , Idiphọ AJizọs Aḍighi Bọ” siphẹ jw.org. ATony amhiigh ni odi iiḍighi phọ odị ongọ aani abunhọn. Kụ eeghe kụ iḍuạ emite? ATony aḅẹm mọ: “Ropogh ni iiḍighi ookpomhoghan phọ, kụ mị maḅilhẹ amoọgh muboom amem okparamhiọm asiya phọ amhị r’aZihova.”
7. Ika kụ idị ikumor awe kotuughaạny Gidiọn mem dị oḍaghạ bidị? (Jems 3:13)
7 Megheron ghan eyoghoyoghọ eten mem dị oḍaghạ nyinhạ. Onhọn odẹgh ophogh dị ikumor awe phọ rosoman ghan pọ amem dị oḍaghạ bidị. Eḍeenhaan phọ aGidiọn ketue ni kẹn eloghonhaạn ḍighaạgh. Odị alhegheri ni m’onọ o/mhunhughan kụ amhegheron eyoghoyoghọ eten mem mọ abuọ Ephraim mọ oḍaghạ bọ nyodị. (Judg. 8:1-3) AGidiọn o/phagharanhaạn r’oghạgh olhoghi. Odị aḍeenhaan ni osooromhi aloor esi olher arurụ ongọ ikpo-onhụ iḍaghạ phọ abidị kụ ophagharanhaạn abidị eten dị ephoomhị ilhoghi abidị. Ikumor awe dị osụ olhoghi rotuughaạny ghan Gidiọn esi omhiigha aloor olher arurụ ongọ kụ omhegheron eyoghoyoghọ eten mem dị oḍaghạ bidị. (Bạl Jems 3:13.) Bịn bidị molọgh opophe eephọ ookpomhoghan phọ.
8. Ika kụ idị ewạ dị abumor dị ophamhạgh iiḍighi komegheron ghan mem dị osẹph bidị? Ngọ eḍeenhaan.
8 Ngọ iiseeny phọ aZihova. Mem dị osẹph Gidiọn loor okpạr opu awe aMidian phọ, odị angọ ḍisẹph phọ aZihova. (Judg. 8:22, 23) Ika kụ idị awe dị ophamhạgh iiḍighi kotuughaạny Gidiọn? Bidị ongọ ghan ḍisẹph phọ aZihova ilọ ipẹ bidị orue bọ oḍighi. (1 Kọr. 4:6, 7) Esi omaạm, eḍighi maạr dị osẹph okumor oye loor aḍimạ aḍighalhanyạ itughemhị, odị atue ni angọ ḍisẹph phọ zin itughemhị phọ odị, Ekpo Onhụ phọ Enhaạn, obobọ ookpomhoghan phọ aZihova rutughemhị ghan bọ iyira. Ewạ ni mọ ikumor awe phọ otọ ghan mem ophogh mughumọ eten itughemhị phọ abidị rekuenhi ni aZihova obobọ siloor abidị. Ooḅeghiọn eḍeenhaan oniin okumor oye ookpomhoghan dị oghol mọ Timothy. Mem mọ purukụ omạ bọ nyodị, iḅeraạn ghan agey Timothy ongọ oghaạph ogbo. Odị aḅẹm mọ: “Mị uḍighinhom ghan oghaạph oghughuronhom r’oghaạph omaaniọm dị adoọny aḅilhẹ akpạr onhaghanhạn. Awe utuạn ghan ni iphẹn phọ usereghiạn imhị. Dị eeph ni, awe phọ ugbon ghan imhị kparipẹ r’aBaibul phọ obobọ aZihova.” Idiphọ amem rekị bọ, aTimothy amhiịn ni mọ ekpeanhaạn onme eten itughemhị phọ odị obọ awe kokiọm ghan bọ ghisigh ongọ nyodị ḍisẹph dị i/kpeanhaạn. (Prov. 27:21) Eeghe kụ iḍuạ emite? Odị aḅẹm mọ: “Nyiidiphọ, abumor r’abumaranhi phọ ruḅenhị ghan ghụn imhị idị oghaạph amhị alhoghonhaạn bidị ḍighaạgh okaran iiḅaghamhị, odẹgh ophogh obobọ oḍuraan otuman aZihova. Iphẹn phọ ghụn kụ ringọ ghan imhị oboom oḅaạl olhoghi kepu ḍisẹph phọ ungọ ghan bọ imhị mem dị meten.”
MEM DỊ ODẸGH OPHOGH ONHAGHANHẠN PHỌ R’AKPỌ OḄIO PHỌ ANẠ
AGidiọn adaphạn ni itọ phọ ongọ bọ nyodị oghome awe eghạm mọ odị, odị asaḅạr 300 dị oḍeenhaan mọ bidị onyạ ni (Miịn ekpịgh phọ 9)
9. Ika kụ idị odẹgh ophogh onhaghanhạn phọ r’akpọ oḅio phọ aGidiọn? (Miịn afoto oḅẹl opoḍi phọ.)
9 Udẹgh ni ophogh onhaghanhạn phọ r’akpọ oḅio phọ aGidiọn mem mọ omạ bọ nyodị oḍighi oogboom iiruẹn. Ungọ nyodị ogbagarạ oḍighi olhereghi ekpạn phọ odẹ phọ odị raaḅereghiọm ghan bọ Baal. (Judg. 6:25, 26) Onyebel roten, uḅenhị ni Gidiọn iyạl amem mọ odị aghomhe we eghạm mọ odị maakpomhoghi bọ. (Judg. 7:2-7) Ekureriom mọ, uḅenhị nyodị mọ odị azuoghom marugh awe eghạm amulọgh ḍien phọ ogbo aḍughul.—Judg. 7:9-11.
10. Ika kụ idị ketue eḍighi ipaanhaạn esi okumor oye odaphạn iiḅakiọm?
10 Ikumor awe phọ “ookolhobian ghan onhaghanhạn.” (Jems 3:17 NWT) Okumor oye dị ranaghanhạn ghan radaphạn ghan ipẹ edi bọ siphẹ Igẹ Iigbia phọ ḅilhẹ r’iiḅakiọm ookpomhoghan phọ aZihova. Esi iduọn phọ, odị rapighinhaan ghan bunhọn emạ eḍeenhaan. Ghalhamọ r’iduọn phọ bịn, onhaghanhạn phọ odị katue ni asoman odẹgh ophogh. Esi omaạm, eeni kekparanhaạn ni nyodị odaphạn mem dị ongọ ibadị iiḅakiọm mem. Eeni amem odị kaakia ni mughumọ iniin iiḅakiọm ekạr ri ekpeanhaạn obobọ eḍighi ni ilọ osụ olhoghi. Obobọ eeni otue ni oḅenhị nyodị oḍighi iyaạr dị kelọgh eereẹgh phọ odị esi ooto r’osooromineen. Ika kụ idị ikumor awe kotue otuughaạny onhaghanhạn phọ aGidiọn idọ asimem mọ iphẹn phọ?
11. Eeghe kụ keloghonhaạn ḍighaạgh ikumor awe phọ onhaghanhạn ghan?
11 Maạr ghan alher rurụ angọ iiḅakiọm kụ adaphạn. Enhaạn aḅenhị Gidiọn ilọ ophiemhi ekpạn odẹ phọ odị, esi dị odị kakananaạn aZihova emhoom ekpạn, ḅilhẹ r’edọ enhạm dị odị kapighironhọm ekiạ. AGidiọn o/puru ḍipuru obobọ o/ḍaghạ iiḅakiọm mọ—odị adaphạn bịn. Ḍio arodon, ookpomhoghan phọ aZihova rangọ ghan ni ikumor awe phọ iiḅakiọm dị eego esi ogẹ arinyạ, iinhaghạn, ḅilhẹ r’iiḅakiọm ilọ adọl aruwaloor r’omhoon aloor ayira. Yira opomoghiạn ni ikumor awe phọ iduọn bidị rodaphạn ghan bọ iibạkiọm mọ aZihova. Rengọ ghan suọ oomo ookpomhoghan phọ.—Ps. 119:112.
12. Ika kụ idị ikumor awe kosighẹ ipẹ edi bọ Hibru 13:17 oḍighinhom mem dị oḍighom mọ aaḅenhion raraạr?
12 Kookolobian ooḅenhion araraạr. Tuutughiạn mọ aGidiọn aghome ni we eghạm mọ odị bịn awạ omhạn, odaphạn itọ phọ aZihova. (Judg. 7:8) Eeni odị aatughiạn ni mọ: ‘Onmia phọ ophọn phọ akạr ri akpeanhaạn? Iphẹn phọ kemoọgh ni ekol ḍughụm?’ Ghalhamọ r’iduọn phọ ni, aGidiọn adaphạn ni. Ikumor awe phọ rodon rotuughaạny aani ghan Gidiọn esi odaphạn ghan mem dị ookpomhoghan phọ aZihova onmeeghi raraạr. (Bạl Hibru 13:17.) Esi omaạm, lhạ phọ 2014 Aloor Phọ Repogh Bọ unme ni eten phọ epẹ kokpeeghị ghan bọ malheom olhoghọm asi-Kindọm Họl r’Asemblị Họl. (2 Kọr. 8:12-14) Arookpomhoghan phọ ko/ḅulemian ghan mun oḍighom mọ ikpoki dị olhoghọm Kindọm Họl ongọ bidị. Kparipẹ ghụn, oḍighom mọ rosighẹ ghan iisogh oomo aḅirinhi phọ bịn kolhoghoḍiọm ruutu ookpomhoghan phọ, etigheri dọl ikpoki ookpomhoghan phọ rologhonhaạn bọ otu phọ. Mem dị aJosé anhaghạn bọ ilọ onmia phọ ophọn phọ, odị aakia ni mughumọ kemoọgh ni ekol, odị aatughiạn mọ: ‘R’oniin aKindọm Họl bịn ko/tue olọgh. Ro/ḍighi ghan iduọn raraạr pakirị phọ ephẹn.’ Eeghe kụ ilhoghonhaạn ḍighaạgh José obakị iiḅakiọm mọ? Odị aḅẹm mọ: “Ikpo-onhụ phọ edi bọ Proverbs 3:5, 6 iitughianhạm ni imhị oḍuom olhoghi aZihova. Kụ imạ ni kụ meḍuạ emite! Nyiidiphọ etigheri olhoghoḍị iboom aruutu, yira moḅilhẹ otuughạ imhoom areten osogh aani ikpoki obọ eIhiom eetoI ekeeny, ekeeny eetoI elhiom.”
Ghalhamọ ekpisi dị osophoghom ni oḍighi phọ ayira, yira kotue ni ongọ ogey ogbaanhaạn (Miịn ekpịgh phọ 13)
13. (a) AGidiọn akuphom owol eeghe? (b) Ika kụ idị ikumor awe kotue otuughaạny Gidiọn? (Miịn kẹn afoto phọ.)
13 Ḍighi ghan ogbi phọ aZihova r’akpọ-oḅio. AGidiọn anhaghanhạn ni aZihova etigheri oghiilhaan phọ odị ḅilhẹ r’ootoo r’osooromineen phọ arọl bọ oḍighi oḍighi phọ ongọ bọ nyodị. (Judg. 9:17) AZihova rongọ nyodị okuphom owol, bịn aGidiọn amheeraam ni mọ Enhaạn kabakị ni nyodị oghoph awe phọ Enhaạn. Ikumor awe dị odi rikpisi dị osophoghom rukumuan phọ ayira rotuughaạny aani ni eḍeenhaan phọ aGidiọn. R’akpọ oḅio, bidị roḍiemhiom ni ophamhạgh ituughạ ḅilhẹ r’arukumuan epẹ erugh phọ etigheri ipaarọgh ikoli, oopuruyogh asipuru, oroph oḍighi, obobọ iigamanhiạn.c Siphẹ igbogh iiḅaghamhị phọ, ikumor awe phọ komoghi ni akpọ-oḅio orue odaphạn iiḅakiọm mọ kongọ bọ bidị—etigheri ooto r’osooromineen. Iromoghiom mọ etue ni eḍighi ilọ ogbeelhom adom dị eghịgh idiphọ iiḅoghoḍi ibikpo ḅilhẹ r’ipẹ yira kokpetenhaan bọ izuoghom mọ aGog opọ aMagog.—Ezek. 38:18; Ogan. 16:21.
MEM DỊ ODẸGH OPHOGH OKPARẠM MỌ ANẠ
14. Ika kụ idị odẹgh ophogh okparạm mọ aGidiọn?
14 Oḍighi phọ aGidiọn idiphọ oogboom iiruẹn amhoghi ni iboom inyaạm. Mem mọ awe aMidian phọ osumughu bọ eghạm mọ ḍughul phọ, aGidion aphorogh ni bidị emhiigh Eḍiiny phọ aJezreel kụ eghị esi Ophiịny phọ aJordan, eḍighi bọ ruukpuạ. (Judg. 7:22) AGidiọn asophe ni mem mọ asi bọ Ophiịny phọ aJordan ḍughụm? Eeye! Ghalhamọ r’iduọn aloor odị medugh bọ ni, odị r’300 awe phọ odị uḅeẹny ni oghiọm ghisigh ophorogh we phọ. Ekureriom mọ, bidị uteẹny ni we aMidian phọ, okpạr opu bidị.—Judg. 8:4-12.
15. Pụr amem kụ edị okparạm okumor oye ookpomhoghan katue asoman odẹgh ophogh?
15 Aloor okumor oye ookpomhoghan etue ni edugh loor esi iiḍighi arookpomhoghan phọ r’ilọ eghunotu odị. Mem dị asidọl phọ erọl iduọn phọ, ika kụ idị ikumor awe ookpomhoghan kotue otuughaạny Gidiọn?
Ikumor awe dị omhoọgh ephomhoghiạn mokparamhị ni ibadị dị omhoghi olhoghonhaạn aḍighaạgh (Miịn siikpịgh phọ 16-17)
16-17. Eeghe kụ ilhoghonhaạn ḍighaạgh Gidiọn okparạm, kụ eeghe okuphom owol kụ edị ewạ mọ ikumor awe omhoọgh? (Isaiah 40:28-31) (Miịn kẹn afoto phọ.)
16 Ḍuomolhoghi mọ aZihova kakparamhị ni nyinhạ. AGidiọn aḍuomolhoghi mọ aZihova kangọ ni nyodị inyaạm, kụ aZihova nyodị o/bi. (Judg. 6:14, 34) Eniin amem, aGidiọn r’awe phọ ughiil owol ade kụ ophorogh iyạl aruw-emhạ aMidian, mem dị aruw-emhạ phọ oḍiku sinạm kụ rosumughu. (Judg. 8:12, 21) Kụ r’olhoghonhaạn aḍighaạgh phọ Enhaạn, abuọ Izrạl phọ okuọm bọ loor ukpạr ri opu. Ikumor awe arookpomhoghan kotue ni obeḍenhọm aani aZihova phọ “re/pẹr ghan [bọ] ḅilhẹ ra/dugh ghan” bọ. Odị kangọ ni bidị inyaạm mem dị emhoghi.—Bạl Isaiah 40:28-31.
17 Ooḅeghiọn ilọ aMatthew dị rakumuan ghan Hospital Liaison Committee. Eeghe kụ ilhoghonhaạn nyodị ḍighaạgh okparạm? AMatthew aḅẹm mọ: “Mị malhoghoma ni inyaạm mọ aZihova rangọ ghan bọ idiphọ oghaạph bọ siphẹ Filipai 4:13. Ibadị amem lọ aloor amhị redugh iboom kụ mị alhoghoma mọ mị ka/tue mun akiọm ghisigh, mị rakuamhị ghan ni kaaḅereghị, alhọm Enhaạn inyaạm mọ ewạ bọ olhoghonhaạn aḍighaạgh bumor phọ amhị. Simem mọ ipẹ phọ, mị ulhoghoma ghan mọ uwaloor phọ aZihova kụ runyaamhị imhị, kaḅilhẹ ulhoghonhaạn imhị ḍighaạgh okparạm.” Idiphọ aGidiọn, ikumor awe arookpomhoghan phọ ayira okuọm bọ ni loor otue ni osoman ipaanhaạn iduọn bidị ropogh bọ iyool phọ dị i/ḅarạm owạ ilọ aloor. Okạr agey, ewạ ni mọ bidị olhọgh elhegh esi dị inyaạm abidị esi kụ odaphạn ghan iduọn phọ okumuan. Toroboiperolbọ, bidị oḍuom ni olhoghi mọ aZihova kanaghạn ni mem lọ bidị olhọm olhoghonhaạn aḍighaạgh aḅilhẹ anyaamhị bidị orue okparạm.—Ps. 116:1; Fil. 2:13.
18. Esi ookaragh, ika kụ idị ikumor awe arookpomhoghan kotuughaạny Gidiọn?
18 Araraạr osighẹ oḍighinhom dị ekạr ekasiạn r’amem mọ ayira edi ni dị ikumor awe arookpomhoghan kotuughạ esi aGidiọn. Ewạ dị ikumor awe koḍeenhaan ghan eegharạ olhegheri okụ r’osooromhi aloor esi onhụ iiḍighi phọ bidị kopamạgh ghan bọ ḅilhẹ r’ipẹ bidị komegheron ghan bọ mem dị oḍaghạ obobọ osẹph bidị. Ewạ mọ bidị oḍeenhaan eegharạ onhaghanhạn ghan ḅilhẹ r’akpọ-oḅio, ekạr ekpaariọm iduọn eekunha aḅirinhi phọ mekpụl bọ. Ḅilhẹ bidị oḍuomolhoghi mọ etigheri dọl lọ bidị osoman, Enhaạn kanyaamhị ni bidị. Okạr agey, yira rosereghiạn ni koḅilhẹ ongọ “eghuan odọ awe phọ abuẹn” phọ rokumuan bọ kiphẹn kiphẹn.—Fil. 2:29.
AḌUỌR PHỌ 120 Imitate Christ’s Mildness
a AZihova amạ Gidiọn ophogh r’oghoph awe phọ Odị mem dị eelhe phọ Izrạl erọl esi iiḅaghamhị. AGidiọn aphạm ni oḍighi phọ ophọn phọ eten dị ekpẹ oḍuom olhoghi esi 40 asiạ. Toroboiperolbọ, odị asoman ni ipaanhaạn kirokirọ. Yira kokaạph idị eḍeenhaan phọ odị keloghonhaạn ḍighaạgh ikumor awe arookpomhoghan mem dị bidị osoman odẹgh ophogh ḍio arodon.
b Eegharạ olhegheri okụ r’eegharạ osooromhi aloor kụ retelhean ghan. Yira roḍeenhaan ghan mọ yira olegheri ni okụ mem dị yira uu/tughiạn ghan iboom ilọ aloor ayira, oḅilhẹ olhọgh elhegh raraạr dị iyira i/si oḍighi. Eḍighi maạr dị yira osooromhi loor, yira kolọgh ghan eegu bunhọn oḅilhẹ omiịn ghan mọ bidị omạn ni maạr upu iyira. (Fil. 2:3) Kotue ni oḅẹm mọ, oye dị alhegheri okụ pọ asooromhi loor.
c Miịn emhuoghaạph phọ “Kiọm Ni Ghisigh Aaḅereghị AZihova Mem Dị Abuọ Itooghị Phọ Usophoghom Iyira” siphẹ Otu Okoriom, aJuly 2019, ipoḍi phọ 10-11, siikpịgh phọ 10-13.