Ariisi oghị omhiịn ophanyanhaạn asipuru Aḍinyạ Ituughạ Ogboku Awiki Phọ
DECEMBER 4-10
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ZEPHANIAH 1–HAGGAI 2
“Wạ AJihova Kụ Egbi Oteẹny Aḍio Ighạgh Ilhoghi Phọ Odị”
w01 2/15 18-19 ¶5-7
Wạ AJihova Kụ Egbi Oteẹny Aḍio Ighạgh Ilhoghi Phọ Odị
5 Nạ atue ni aḅẹm mọ: ‘Mị oniin ebenhẹ Enaạn dị m’aḅọgh ni loor angọ nyodị, aḍiiny muụm, kụ mị onyọ Ogbaanhaạn AJihova ni. Oghaạph phọ ko/munheen ḍughụm?’ Eeye oo, i/munheen oḅọgh aloor ongọ aJihova bịn. Izrạl uḍighi ni eelhe Enaạn, kuolọ siḍio phọ aZephaniah awe phọ aJuda (Eelhe phọ Izrạl) u/tọl idị eḍeenhaan mọ abidị awe k’Enaạn ni. Loor esi iduọn phọ, aJihova aghel li bidị. ‘Owạ ghan aJihova ḍio arodon eḅarạm ooneghị kụ oḅilhẹ ophamhanhạm igey asiya r’odị, dị emhoọgh muuḅọph r’oḍighom m’odị. Emeeraam mọ yira kolegheri ipẹ Enaạn repogh ghan bọ raraạr ḅilhẹ kẹn r’ipẹ odị raloghoma ghan bọ. Yira rowạ ghan aJihova mem lọ yira olhọgh mem otuughạ Ekpo-onhụ ph’odị, ogbirima, ḅilhẹ r’osighẹ iromhoghiom mọ odị kụ oḍighinhom siẹn adọl aghuḍum mọ ayira. Mem dị yira oḅilhẹ owạ iiḅakiọm mọ aJihova esi ogbor ghan ooḅereghị r’odaphạn ghan iiḅakiọm uwaloor iigbia phọ odị, amasian phọ ayira r’odị kakpạr, kụ eḅilhẹ inyu iyira okumu odị ‘r’oomo ekpom, aghuḍum, ḅilhẹ r’inyaạm ayira.’—Deuteronomy 6:5; Galetia 5:22-25; Filipaị 4:6, 7; Ogananami 4:11.
6 Omhunhenhiom iyạl iyaạr dị rewạ, dị oghaạph siphẹ aḍinyạ phọ aZephaniah 2:3 pọ ‘owạ elhiom eḍighinhom iyaạr.’ Ogbogh opol ayira uwilhẹ ni ibadị ikarạph iḍighinhom araraạr obọ osi omanhanhaạm oḍiiny amuụm, kuolọ yira omoọgh oghiọm aghisigh ophamhanhạm asiigbu phọ Enaạn eeleeny bọ oomo adọl aghuḍum m’ayira. Ibadị dị omiigh ni agey, m’ongọ ogẹl mọ araraạr aḅirinhi phọ esighenhọm bidị. I/dugh owạ elhiom eḍighinhom iyaạr, loor esi dị yira odi igbo awe dị omheeraam mọ ipesi, ogbạ okpẹ, ḅilhẹ r’inhọn odọ ikarạph i/beeph. Ghalamọ r’iduophonị, mem dị eephuạ phọ ayira oḍighi ipẹ eḅeeraạn bọ aJihova kụ ekpạr, yira kotue ni okpạr opu inyuughiom oḅọph iḍighinhom araraạr r’aḅirinhi phọ. Eelhe phọ aJuda uroph ni kuuḅi aghisigh phọ bidị omhoọgh bọ r’aJihova esi otuughaạny areelhe phọ okitonhom bọ bidị Enaạn u/legheri bọ. Kparipẹ rotuughaạny ghan aḅirinhi phọ, ewạ mọ, yira ‘otuughaạny Enaạn,’ kụ omhoọgh ghan “imoom igey aroozọ phọ olẹm bọ oghighemiọm Enaạn kụ eganana bọ esi akugey aghuḍum mọ akuphẹ aakuan bọ aseleman.”—Efesọs 4:24; 5:1.
7 Edị emhunhenhiom iraạr, odaphạn Zephaniah 2:3 pọ, eḍighi maạr dị yira rowạ mọ aJihova aaghị aani iyira ḍio ighạgh ilhoghi ph’odị, pọ ‘oḍighi oḅoroḅorọ oye.’ Ḍio etum ḍio, yira roozuanhaan ghan ni lhepheri, nmariịr ḅilhẹ r’iḍoọgh dị oḍighi we iikparạ arumhụ. Esi abidị, oḍighi oḅoroḅorọ oye eḍighi ḍidugh. Omiịn kẹn osooromhi aloor idiphọ aḍigbogh aḍidugh. Iyaạr bidị re/gbaanyạn ghan, rowạ ghan ilọ asuọ abidị bịn, ḅilhẹ olegheri omạn, kụ rowạ ghan mọ ‘arilhiom’ r’ipẹ bidị rowạ bọ bịn kụ emheerạ. P’eeghe idị k’ebeeph omheera m‘araagharạ phọ iphẹn phọ iipụ iyira! Ophọn kụ amem ‘oḍighi oḅoroḅorọ oye.’ Ika? Esi osooromhi aloor ongọ Enaạn, osighẹ ilhioghọm mọ odị kụ odaphạn ghan ipẹ odị rawạ bọ.
Oguphogh Owạ Imạ Araraạr Dị Edi Siphẹ ABaibul Phọ
w07 11/15 11 ¶3
Oghaạph Ookaragh Aḍinyạ phọ ANahum, Habakkuk, ḅilhẹ r’AZephaniah
1:8. Ibadị siphẹ asiḍio phọ aZephaniah uwạ ghan dị areelhe phọ otuman bọ bidị kologhomạ bidị, esi ‘oonmenhian ghan iinmenhian areelhe phọ.’ Keḍighi ni e”lo-olhoghi pakirị abuusenyom mọ aJihova ḍio arodon, otuughaạny aani aḅirinhi phọ!
w07 12/1 9 ¶3
Oghaạph Ookaragh AḌinyạ phọ AHaggai ḅilhẹ r’AZechariah
2:9—Ighẹn odọ areten kụ edị otu iiḅereghị phọ aZerubbabel alhọgh bọ aḍigh eghuan apu nyophọ aSolomon’? Esoorom pọ esi iraạr areten: onhụ asiạ phọ otu iiḅereghị phọ aZerubbabel arọl bọ, oye phọ atughemhị bọ siphẹ phọ, aḍita awe phọ oghị ghan bọ siphẹ phọ ooḅereghị aJihova. Omạ phọ otu iiḅereghị phọ aSolomon alhọgh bọ arọl 420 asiạ bịn, emhiigh 1027 B.C.E. kụ eghị eteẹny 607 B.C.E., kuolọ ‘otu phọ’ aZerubbabel alhọgh bọ, arọl li siạ dị epel li 580, emhiigh lhạ phọ olhọgh bọ osiemhi 515 B.C.E. kụ eghị eteẹny lhạ phọ ophiemhi bọ 70 C.E. Idị epelhom siẹn, aMesaya phọ—Jizọs Kraist—atughemhị ni siphẹ ‘otu’ iiḅereghị phọ aZerubbabel, kụ awe dị oghị ghan siphẹ phọ ooḅereghị Enaạn kụ upu we dị oghị ghan ‘ogbaany phọ’.—Iiḍighi 2:1-11.
DECEMBER 11-17
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ZECHARIAH 1-8
“Kokpạph Ni Asuomạ Onyọ AJu”
w14 11/15 27 ¶14
“Nyiidiphọ Nyinha Meḍighi Weye Enaạn”
14 Aḍita awe phọ okpiphaany bọ oḍighan we phọ aJihova ooḅereghị odị siẹn eekunha amem mọ eḍighi imiịn dị iyạl ariil aJihova m’omhiịn ni epẹ omhạn. Isaiah amhiịn mọ: “Ibadị awe kotu ni kụ oḅẹm mọ: ‘Itu, oghị osiịny eeḅarạph phọ aJihova, epẹ otu Enaạn ph’aJekọb. Odị kuromhoghiom ni iyira ilọ areten phọ odị, kụ yira otelhe siphẹ eten phọ odị.’ Idị eḍighi bọ olhogh kaḍuạ siphẹ Zayọn amite, kụ ekpo-onhụ aJihova eḍuạ siphẹ Jeruselem emite.” (Isa. 2:2, 3) Iduọn phọ kẹn, kụ idị oyil phọ aZekarayạ amhiịn aani ni mọ “aḍita awe r’igbogh areelhe kotu ni owạ aJihova opọ asita phọ epẹ Jeruselem kụ oḅilhẹ owạ kuuḅi aghisigh ḍighaạgh aJihova.” Odị atoomaạm bidị idiphọ “aḍioph awe oomo arunhụ aḍiaḅạ r’areelhe kirokirọ” buphẹ, eten dị osighẹ omaanhiọm, kokpạph bọ asuomạ onyọ Izrạl k’Enaạn, kụ oḅẹm ghan mọ: “Yoor kidạph inyinha, loor esi dị yoor onaghạn m’Enaạn edi r’anyinha awe phọ.”—Zech. 8:20-23.
w16.01 23 ¶4
“Yoor Kodạph Nyinhạ”
4 Loor esi dị i/dugh bọ olhegheri asiḍien oomo abuphẹ oḍighi bọ Izrạl phọ k’Enaạn odi bọ siẹn ade phọ ḍio arodon, ika kụ idị abuphẹ oḍighi bọ ḍierị phọ aḍita iyool phọ “kodạph” bọ bidị? Lọgh elhegh ipẹ oyil phọ aZekarayạ aghaạph bọ idị egbolhomaam ḍioph awe phọ otoomaạm bọ. Abuẹn phọ “kokpạph ni asuomạ onyọ aJu, kụ oḅẹm ghan mọ: Yoor kodạph nyinhạ, loor esi dị yoor onaghạn m’Enaạn edi r’anyinha awe phọ.’” Ii obọ okol siẹn phọ oniin onyọ aJu bịn, ekpo-onhụ phọ oghol bọ siẹn phọ mọ ‘Nyinha’ remạ ghan mọ opel li oniin oye. Iduọn phọ p’onyọ aJu phọ ophọn phọ, ramạ ghan egu awe, ko/niin oye bịn! Esi iduọn phọ re/ḅẹm ghan mọ nạ kamiịn obobọ alegheri ḍien oniin onyọ Izrạl k’Enaạn bịn amiigh orelhe odạph. Kparipẹ ghụn, ewạ mọ yira omhiịn bidị idiphọ egu awe, kụ odạph. R’amem r’amem igẹ iigbia phọ iyira i/ḅenhị odạph oye. AKraist bịn kụ Oḍiemhiom ayira.—Mat. 23:10.
w09 2/15 27 ¶14
Bidị “Rodạph Ghan Ni Moọny Oyool Ogạ Phọ”
14 Olhoghonhaạn aḍighaạgh phọ opọ rongọ ghan bọ bumor phọ aJizọs, esi odị ekịgh mudị oḍighi r’ongọ nyodị r’aloor. (Bạl Matiu 25:40.) Ighẹn odọ areten, kụ edị abuphẹ omhoọgh bọ oḍuomolhoghi orọl isiẹn ade phọ kotue ologhonhaạn ḍighaạgh bumor phọ aKraist osagharạn bọ uwaloor iigbia phọ? Ekpanhạ eten olhoghonhaạn abidị ḍighaạgh pọ ogbeelhom aani ghan iiḅi iinhaghạn phọ. (Mat. 24:14; Jọn 14:12) Idiphọ onhụ abạl abuphẹ osagharạn bọ uwaloor iigbia phọ odi bọ siẹn ade phọ rasoorom bọ, onhụ abạl aḍierị phọ aḍita iyool phọ r’ebụgh ghan bịn. Mem dị buphẹ omhoọgh bọ oḍuomolhoghi orọl isiẹn ade phọ kụ ophinhom aani bin oghaạph iiḅi iinhaghạn phọ, kụ oḍigh aani rukumuan oomo-amem, pọ bidị rologhonhaạn ghan ḍighaạgh buphẹ osagharạn bọ uwaloor iigbia phọ omhunhenhi oḍighi iphelhegbeel phọ. (Mat. 28:19, 20) Enhọn odọ iyaạr dị i/wạ mọ ophogh ogunhọm pọ eepoogh phọ epẹ yira omhoọgh bọ osogh aani osogh ikpoki reten kirokirọ.
Oguphogh Owạ Imạ Araraạr Dị Edi Siphẹ ABaibul Phọ
w17.10 25 ¶18
Uḍien Kirokirọ phọ aZekarayạ—Ipẹ Etir Bọ Nyinhạ
18 Toroboiperolbọ, uḍien phọ aḅilhẹ aghiọm olhoghi we aJu phọ ilọ ophamhanhạm iserereẹny iiseeny. Ekarạph eḍighinhom iyaạr ke/tue, kụ ko/meera kẹn mọ emhian eḍigh igbo awe ph’aJihova. Musighẹ bọ iyira oru olhọgh aani siẹn oserereẹny oḍighom mọ Enaạn aḍighi bọ olọ oghoph r’ephomhoghiạn phọ, oḍighi ayira pọ omhaạr ophamhanhạm adọl dị eḅaạl. R’inyu ghan ni iyira oḅaalhamhị “otu” phọ ayira ḍughụm? R’eeteḅa ekarạph eḍighinhom iyaạr i/loom siphẹ aparadaịs aruwaloor ph’ayira.
w17.10 27-28 ¶7-8
Arughuugh Eghạm r’Eghoony Odaạm Emhạ K’eghoph Ni Nyinhạ
7 Eeni amem, oghol raaḅarạph siphẹ aBaibul phọ, pọ remạ ghan omhạr, obobọ itooghị. Araaḅarạph phọ oghaạph bọ oghol siphẹ aḍinyạ phọ aZekarayạ iniin r’iyạl araaḅarạph phọ aḍinyạ aDaniel eghaạph bọ eghol. Nyeniin siphẹ iyạl araaḅarạph phọ remạ ghan itooghị phọ aJihova keleeny bọ elheeny eḅilhẹ etọl k’iiḍuul k’iiḍuul. Nyeerị phọ remạ ghan Itooghị aMesaya phọ. (Dan. 2:35, 45) Emhiigh kamem mọ orolhomhị bọ Jizọs agadạ phọ, osoor a1914, iyạl phọ araaḅarạph phọ iphẹn phọ edi ni, reloghonhaạn ni ḍighaạgh eten dị egbatanhaạn omhunhenhi ipẹ Enaạn rewạ bọ oḍighi isiẹn ade phọ.
8 Utuạn eeghe kụ oḍighinhom bọ raaḅarạph phọ ogiatạ phọ? Idiphọ agol, ogiatạ phọ aḍighi okuron dị amhạn maạr iboom. AJihova angọ ni itọ m’osighẹ okuron phọ ophọn raalhoghoḍian bọ kụ olhemhọm igbe iyọ phọ, r’otu iiḅereghị phọ arọl bọ epẹ Jeruselem. (Ex. 27:1-3; 1 Ki. 7:13-16) Dị ekạr ri ekpeanhạn, iyạl araaḅarạph ogiatạ phọ otoomaạm bọ ighiọm iyira olhoghi odọ idị elhiom mọ aJihova amhoọgh bọ otooghị phọ r’Itooghị aMesaya phọ emhạn maạr, ipẹ k’engọ bọ omhạr awe ḍisẹph kirokirọ.
DECEMBER 18-24
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ZECHARIAH 9-14
“Tọl Siphẹ ‘Eḍiiny Araaḅarạph Phọ’”
w13 2/15 19 ¶10
Tọl Siphẹ Eḍiiny Oghoph Phọ AJihova
10 Mem mọ eeḅarạph phọ otoomaạm bọ edia bọ, eniin apakirị iikilha eghị epẹ esiinyọm mọ kụ eerị phọ eekilha eghị epẹ esoorom mọ, kụ aJihova adaghaghạ igbo iyạl araaḅarạph phọ. Kụ ‘Egbogh eḍiiny’ emite siphẹ ipholhophol ph’odị. Eḍiiny phọ ephẹn phọ otoomaạm bọ remạ ghan oghoph phọ aJihova rangọ ghan bọ rebenhẹ ph’odị, odi bọ eeḍiạn elhiom itooghị ph’odị ḅilhẹ r’Itooghị aMesaya phọ. AJihovah kaḍighi ni iyaạr amiteom omhiịn mọ iserereẹny iiseeny i/pe. Pụr amem kụ edị eeḅarạph ireeny oliv ph’edia bọ iyạl abin phọ? Iphẹn phọ imite lhạ phọ 1914, mem mọ ophighi bọ Itooghị aMesaya phọ siphẹ eekunha Amem Awe Areelhe phọ. Pụr amem kụ edị abugey abuusenyom mọ omhiigh bọ oghiil oghị oḍigh isiphẹ eḍiiny phọ otoomaạm bọ?
w13 2/15 20 ¶13
Tọl Siphẹ Eḍiiny Oghoph Phọ AJihova
13 Eḍighi maạr lọ yira oḅạr aJihova ḅilhẹ okpạr siẹn igey phọ, odị r’Oọny ph’odị, Jizọs Kraist, koḍighi ni pakirị ph’opọ abidị, ḅilhẹ Enaạn ke/meera oye obobọ iyaạr ‘iziton iyira esighẹ siphẹ aḍighaạgh phọ Odị.’ (Jọn 10:28, 29) AJihova aakolhobian ni ongọ ayira torobọ olhoghonhaạn aḍighaạgh lọ yira rowạ obọ yira onhaghanhạn nyodị idiphọ Odị Amhoọgh Elhiom Itooghị Oomo Isiẹn Aḅirinhi phọ, kụ oḅilhẹ oḅạr Itooghị AMesaya phọ. Ekạr ri ewạ dị yira kotọl siphẹ eḍiiny oghoph phọ, loor esi dị eḍiiny oghoph phọ keḍighinhaan ni eboom iyaạr buusenyom mọ abuphẹ kotọl bọ siphẹ phọ mem igbogh iiḅaghamhị phọ eegboronhom bọ ni retu.
w13 2/15 20 ¶15
Tọl Siphẹ Eḍiiny Oghoph Phọ AJihova
15 Ḍio eghạm m’Enaạn, eeghe kụ kemitenhaan oomo abuphẹ ko/tọl aani bọ siphẹ ‘egbogh eḍiiny’ oghoph phọ? Enaạn ka/nmạ bidị ighirigiir kụ ‘aḍiserereẹny aḍiḅaạl’ ph’odị ke/soorom aani bidị. Siphẹ aḍio eghạm mọ retu bọ, ‘asụ phọ, enhạm oḍighi phọ, enhạm adool phọ, olhephiri anạm mọ, ḅilhẹ r’oomo odọ inhạm olhoghotu’ phọ—remạ ghan bọ raraạr eghạm areelhe phọ—kopiemhi ni. Raraạr araaghạm mọ iphẹn phọ ‘keekirighan’ idiphọ amuụm dị eephoọm kụ enhiiremhi bịn iyaạr ko/tue mun oḍighinhom. AJihova kaḅilhẹ ni asighẹ aḍighinhom reezẹgh ogogo ‘r’imhinhimhiịn.’ Torobọ ipẹ ookperemhi phọ katọl bọ, imhinhimhiịn phọ keḍimhe ni. Ḍio phọ aḍiphẹ phọ, ‘ariḍien awe . . . r’asinem awe keḅoroghụ ni’ loor esi dị abuẹn robe bọ eghạm mọ ko/miịn ghan epẹ bidị rotạph bọ, kụ araghaạph arigilaạm m’abidị esophe. (Zech. 14:6, 7, 12, 15) Amuphe phọ kateẹny ni oomo ade phọ. Awe eghạm mọ aSetan kobụgh ni iboom. (Ogan. 19:19-21) ‘Abuphẹ aJihova kazẹ bọ ḍio phọ aḍiphẹ phọ koḍuạ ni eniin apakirị eekunha ade phọ okị osi eerị phọ eekunha phọ.’—Jer. 25:32, 33.
Oguphogh Owạ Imạ Araraạr Dị Edi Siphẹ ABaibul Phọ
w07 12/15 22-23 ¶9-10
Eenemạ I/lo Dị Iphoghomhiom Inyinha Kụ Kemoọgh Ekol
9 Imiịn ph’aZechariah ekaạph ni eegholhomhi iyaạr phọ eḍighi bọ kụ areelhe phọ rosophoghom ghan bọ bugey aKristẹn. Lọgh elhegh idị Zechariah 12:3 eḅẹm, mọ: ‘Kemite ni idị ḍio phọ aḍiphẹ phọ mị kaḍighi aJeruselem ḍighiigh eemọr esi oomo awe phọ.’ Oghẹn aJeruselem kụ edị imiịn phọ iphẹn rekaạph ghan bọ keghol? Imiịn phọ aZechariah idị egbolhomaam aJeruselem remạ ghan “aJeruselem kʼakẹ” phọ, Omhạr phọ opọ k’akẹ phọ aKristẹn phọ abuphẹ osagharạn bọ uwaloor iigbia phọ kokelhọm bọ. (Hibru 12:22) Abusughenheen phʼabuphẹ kotooghị bọ r’aKraist epẹ k’akẹ phọ osugha ni siẹn ade phọ. Abidị r’arighirị phọ abidị—‘aḍierị phọ iyool phọ,’ olọgh ni iboom inyaạm oḅenhị awe mọ okiton osoman Omhạr phọ k’Enaạn siẹn amem m’edi bọ. (Jọn 10:16; Ogananami 11:15) Areelhe phọ omegheron ika kụ okị esi aḍimhạgh ph’aḍiẹn phọ? Ika kụ idị aJihova raloghonhaạn ghan ḍighaạgh bugey abuusenyom mọ ḍio arodon? Ooḅeghiọn omhiịn, esi ophogh obughẹ ipẹ aZechariah emhụ phọ 12 remạ ghan bọ. Yira ooḅeghiọn ophogh, kekpoomhị akpọ-oḅio ayira mọ ‘eenemạ i/lo dị ketue emoọgh ekol’ loor abuphẹ Enaạn masagharạn bọ uwaloor iigbia phọ r’abumor phọ abidị.
10 AZechariah 12:3 eḍeenhaan mọ areelhe phọ “koḍighimayogh ni raraạr iboom.” Ika kụ idị iphẹn phọ emite bọ? Enaạn m’engọ itọ mọ ogbeelhom iiḅi iinhaghạn ilọ Omhạr phọ. Kụ iḍighi kụ Abugbaanhaạn AJihova omaghamhị ni maạr iboom oḍighi oghaạph iiḅi iinhaghạn phọ. Kuolọ, oghaạph ilọ adom Omhạr phọ k’Enaạn eḍighi bọ oginha oḍuomolhoghi omhạr awe meḍighi ‘ḍighiigh eemọr’ esi awe areelhe phọ. Abidị r’okparaghạ ghan ophoophe aḍighiigh phọ ogbolhẹ esi osophoghom ghan abuphẹ rogbeelhom bọ Omhạr phọ. Okparaghạ ghan oḍighi iduọn phọ meḍighi iyaạr dị areelhe phọ ‘moḍighimayogh raraạr iboom,’ siloor abidị. Etigheri ilọ bidị okparaghạ okikima oḍighi phọ, epẹ eekunha phọ, abidị romoọgh ghan roofolha koḅilhẹ ophuenhaạn ḍien. Bidị ko/tue ni bịn osophoghom buphẹ r’ooḅereghị bọ Enaạn, buphẹ omhaghamhị bọ maạr eepoogh ogbeelhom adom “ooḅi oghaạph k’agee-pọ” Omhạr aMesaya phọ k’Enaạn, kụ egbi oteẹny amem eekunha phọ. (Ogananami 14:6) Mem dị oniin onyọ opoghom otu ikoli eniin emhạ Africa, amhiịn dị rokpuuroghọm rebenhẹ aJihova, odị aḅẹm mọ: ‘Nyinha epu ni bịn repiemhi inyaạm anyinha omhiinẹ awe ph’abuẹn phọ. Bidị ko/tue ni bịn oparanhaạn omheeraam m’abidị. Kobụgh ghan ghụn bịn.’
w07 12/15 25 ¶13
Eenemạ I/lo Dị Iphoghomhiom Inyinha kụ Kemoọgh Ekol
13 Bạl Zechariah 12:7, 8. Arogbogo iitura ni siphẹ eelhe Izrạl iḍiodi phọ, ibadị amem abukoriom iyool igạ r’abuḅephom iizo urolhoghụ ghan ni siphẹ phọ. Mem dị amulhọgh ḍien rotu ozuoghom eelhe phọ, abukoriom r’abuḅephom iizo phọ orolhoghụ ghan bọ rogbogo phọ kụ uḍighi ghan we dị ewạ ghan mophụr oghoph. Oḅẹm mọ ‘arogbogo phọ aJuda’ pọ remạ ghan m’abusughenheen phọ abuphẹ osagharạn bọ uwaloor iigbia phọ odi eyaghaghaạny esi, obobọ ramhạ dị u/koony. Abidị odi siphẹ phọ kụ rokaạph ghan imạ ilọ Itooghị aMesaya phọ dị u/ḅarạm oghiilhaany. AJihova opọ asita phọ kapụr apẹl ‘rogbogo phọ aJuda’ loor esi dị bidị kụ abuḅẹl awe dị aSetan ranyaaghiạn ghan ophụr ozuoghom.
DECEMBER 25-31
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | MALACHI 1-4
“Apinien phọ Anạ Akuenhi Ni AJihova Ḍughụm?”
jd 125-126 ¶4-5
Loghonhaạn Ḍighaạgh Omhoọgh Adọl Eghun-otu Dị Kekuenhi Enaạn
4 Siḍio ph’aMalachi omhunhenhiom oogh okuron asiạ phọ, kụ aKraist agbi bọ oru phọ, oseere anhịr aatura ni igbo aJu phọ. AMalachi aḅenhị bidị mọ: ‘AJihova raloor odị maḍighi ogbaanhaạn igbo anhịr iḍoọgh phọ anạ r’anạ, opọ nạ m’aakelheghi bọ.’ Loor esi iiḍighi iikelheghian agạ aburulom mọ, anmariịr phọ abuẹn romoghi bọ, buẹn m’ookelheghi bọ, umuzeḍi ekpạn ph’aJihova izin, loor esi ‘emoghi phọ r’iḍumhughu’ phọ abidị. Kụ abukarạph abupinyọn rikiạ phọ uḅoronhom ghan ni bịn ekeeny eḍighinhom iyaạr phọ ephẹn phọ!—Malachi 2:13, 14.
5 AJihova aphogh ika ekeeny eḍighinhom iyaạr phọ ephẹn erọl bọ siḍio phọ aMalachi? Odị agẹ mọ:“‘Mị akel oḅạm ikpoki,’ aJihova Enaạn phọ Izrạl kụ aḅẹm.” Odị aḅilhẹ kẹn ni aghaạph akparamhị m’aJihova ‘ko/nmia.’ (Malachi 2:16; 3:6) Nạ amiịn ni oghaạph phọ? Enaạn meḍeenhaan ni m’onọ akel li oḅạm ikpoki. (Genesis 2:18, 24) Odị aghel li oḅạm ikpoki ḍio ph’aMalachi. Kụ odị ko/nmia kẹn ni. Abuniin awe rosopha ghan okạ apinien ph’abidị loor esi dị opọ r’abidị aalhạn bọ o/ḅeeraạn mun bidị. Ghalamọ r’iduọn ekpom mọ abidị eḍighi bọ ni elọ iikelheghian, aJihova rawaaghị ghan ni kamhiịn. (Jeremiah 17:9, 10) Odị alegheri ni torobọ iikelheghian obobọ iḅighiḅighi lọ oye kaḍighi oghol oḅạm ikpoki, etigheri ilọ oye phọ akparaghạ ogbạ. Agey ni, “Ozu ni awaạy oomo araraạr phọ olẹm bọ, mọ odị amiịn ghan. Kụ odị kụ edị oomo phọ ayira kokaạph bọ ilọ yira moḍighi oḍighi phọ oḅenị.”—Hibru 4:13.
w02 5/1 18 ¶19
AJihova Akel Li Eten Iikelheghian
19 Ḍierị phọ aḍighaạgh phọ, aMalachi aghaạph ni mọ abuniin aburulom urọl li dị uu/kelheghi ghan nmaariịr abidị. Abidị ‘umhoọgh ni oọny uwaloor iigbia phọ Enaạn loor abidị.’ (Ekpịgh 15) Idị enighẹ bọ pọ, Ookpomhoghan phọ Enaạn rodon, amuza ni rawe dị ‘rokuenhi ghan nmariịr abidị.’ (1 Pita 3:7) Bidị ro/kuphogh ghan nmariịr abidị obobọ ro/ḅenhị yogh ghan, ro/kpaariọm ghan orolhạn esi eten dị i/kpeanhaạn, kụ roo/folhomhi ghan nmariịr abidị esi ophegh ghan eḅaraḅara ephegh r’abunhọn anmariịr obobọ ophogh ghan asifoto aradaḅạ. AJihova asephọm ni ookpomhoghan ph’odị r’anmariịr dị ronaghanhạn ghan nyodị oḅilhẹ rodạph iilhogh ph’odị. Alhephiri r’anmariịr ph’abuẹn phọ olegheri raraạr dị Enaạn eghel, kụ okel aani. Kiọm ghisigh atuughaạny ghan bidị, ‘onhaghanhạn Enaạn idiphọ otooghiạ’ kụ amhoọgh ḍisẹph dị eego esi uwaloor iigbiạ phọ.—Iiḍighi 5:29.
Oguphogh Owạ Imạ Araraạr Dị Edi Siphẹ ABaibul Phọ
w07 12/15 27 ¶1
Oghaạph Ookaragh Aḍinyạ phọ aMalachi
1:10. AJihova o/mhoọgh ḍiḅeeraạn oghị esi ekiạ opinyọn rikiạ dị aḍighi oye iigbegheḍiom, dị kaboọr ghan ikpoki oḍighi ikpirikpirị iiḍighi idiphọ oghughi eghuugh obobọ osụ ghan aniạn siphẹ ekpạn phọ. P’eeghe idị emhạn maạr dị iiseeny ph’ayira, eḅarạm bọ ni ipẹ yira roḍighi ghan bọ epẹ erugh phọ, keḍuạ esi ephomhoghiạn Enaạn r’amatumhan ayira, ke/si owạ ikpoki!—Matiu 22:37-39; 2 Korịnt 11:7.
w13 7/15 10-11 ¶5-6
“Ilegheri! Mọ Mị Odianhaan Ni R’anyina, Tutụ Eteẹny Eekunha Aḅirinhi Phọ”
5 Esi arukuron asiạ dị meten epẹ omhạn kụ egbi oteẹny amem mọ aJizọs adogh bọ ḍidogh igey ibiakpạ r’ibiakpạ akelhedeẹny phọ, aJihova aphum ni oyil phọ Malachi oghaạph araraạr dị kemite dị eeghironhaan ḍidogh phọ aJizọs ilọ ibiakpạ phọ. (Bạl Malachi 3:1-4.) AJọn Oḍiinyeom Muụm mọ kụ aḍighi bọ ‘otelhedom mọ aḍiemhi bọ oselemhi eten phọ.’ (Mat 11:10, 11) AMesaya phọ aganhanha lhạ phọ eḍighi bọ 29 C.E., mem mọ ooruẹn amuphe eelhe phọ Izrạl makpụl bọ. AJizọs kụ omhunhenhiom iyạl otelhedom mọ. Odị aḅaalhamhị otu iiḅereghị phọ aJeruselem iyạl amem —siphẹ emhiighom arukumuan phọ odị siẹn ade phọ ḅilhẹ r’epẹ eekunha arukumuan ph’odị. (Mat 21:12, 13; Jọn 2:14-17) Esi iduọn phọ, oḅaalhamhị otu iiḅereghị phọ aJizọs aḅaalhamhị bọ isighẹ ni mem.
6 Imiịn phọ aMalachi imhunhughan ika eten dị egbatanhaạn? Rekị bọ oteẹny a1914, C. T. Russell r’arighirị phọ odị uselhemhi aani ni eten phọ idiphọ aJọn oḍiinyeom muụm mọ aḍighi bọ. Oḍighi oselhemhi eten phọ bidị oḍighi bọ pọ oḅulhemhi igey itughemhị aBaibul phọ. Anmụny ituughạ aBaibul phọ ugbạ ni omiteom ipẹ ekiạ ph’aJizọs aphighirọn bọ remạ ghan, oyegherọn itughemhị okpẹ ooni aniạn phọ, ḅilhẹ kẹn ogbeelhom ilọ amem eekunha areelhe phọ. Ghalamọ r’iduophonị, ibadị aruukụ iiḅereghị urọl li dị oghophora m’abunọ abuọ aKraist. Iphẹn phọ imiteom ni ḍigbogh aḍipuru dị ewạ ophagharanhaạn: Abughẹn awe kụ okạr igey ibiakpạ phọ? Omhoọgh ophagharanhaạn phọ, aJizọs amhiigh ooḅeghiọn ookpomhoghan phọ Enaạn siẹn ade phọ lhạ phọ eḍighi bọ 1914. Ooḅeghiọn r’oḅaalhamhị otu iiḅereghị phọ isighẹ ni mem—imhiigh 1914 kụ eghị esi emhiighom a1919.