Ariisi oghị omhiịn ophanyanhaạn asipuru Aḍinyạ Ituughạ Ogboku Awiki Phọ
MARCH 4-10
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ROM 12-14
“Remạ Ghan Eeghe Oḍeenhaan Ephomhoghiạn Akristẹn”
(Rom 12:10) Oniin aphomoghiạn ghan nyoniin idiphọ anmụny onhiin. Oniin aphurọm ghan aghueni nyoniin.
it-1 55
Ephomoghiạn anmụny onhiin
Ephomhoghiạn abumor phọ (Gr., phi·la·del·phiʹa, remạ ghan, ‘ephomoghiạn anmụny onhiin’) kụ erọl igbo oomo ookpomhoghan aKristẹn phọ. (Rom 12:10; Hib 13:1; miịn kẹn 1Pit 3:8.) Esi iduọn phọ, asiya phọ ketọl bọ siphẹ ookpomhoghan phọ ekpạr, kụ eḅilhẹ eghologhọl idiphọ epẹ retọl ghan bọ igbo anmụny onhiin. Ghalamọ r’iduọn abuọ ookpomhoghan phọ roḍeenhaan ghan bọ ni ephomhoghiạn abumor phọ, okpaariọm ni mọ oḍighi opuemhi siẹn.—1Tẹs 4:9, 10.
Ekpo-onhụ aGrik phọ phi·loʹstor·gos, remạ ghan ‘omoọgh ghan igbiririph,’ rosighẹ ghan koḍighinhom ilọ oye dị atuman onhọn oye eten eenyuụm. Eniin emhụ ekpo onhụ phọ ephẹn phọ, sterʹgo, rogbor ghan koḍighinhom mem dị rokaạph ilọ ogbolhomaam mọ opọ omharạm bọ oye, idiphọ abuọ eniin eghun otu. Otelhedom mọ aPọl akpaariọm Kristẹn omhoọgh eegharạ phọ ephẹn phọ. (Rom 12:10) APọl aḅilhẹ ni aḍeenhaan mọ siḍio aruukuna phọ awe “ko/moọgh ghan igbiririph” (Gr., aʹstor·goi) ḅilhẹ mọ odọ phọ awe phọ abuẹn phọ okpẹ ni omhuughu.—2Tim 3:3; Rom 1:31, 32.
(Rom 12:17-19) Oye iḍighi inyina ikarạph, ke/kpeọm ghan ikarạph. Ikpatiạn ghan oḍighi idị awe inyina ki/ḍaghạ ghan. 18 Bin muọ anyina, iḍighi ghan oomo iIọ nyina ketue, eroIọm eephọ r’oomo awe. 19 Iiḅi asiya, ke/ḅuIemian ghan oye ikarạph, ibiIenaạn ghụn Enaạn kụ eIiọm ghan. Ogẹ ni pạ aḍinyạ iigbia phọ mọ, “Omoọgh-we phọ aḅẹm mọ mị kụ kaḅuIemian. Mị kụ kakpẹ.”
w09 10/15 8 ¶3
ItoIhọm “Eephọ R’oomo Awe”
3 Bạl Rom 12:17. APọl aḅẹm mọ oye uḍighi iyira ikarạph, ku/kpeọm ghan ikarạph. Onaghanhạn oroma phọ ophọn amoọgh ni maạr oḍighinhom igey, ekạr ekpaariọm rughun otu dị olom mọ obobọ anhịr phọ u/lo aani siẹn igey phọ. Opọ aḍighi bọ onyọ aKristẹn phọ aghel eegharạ oḅulhemhian ghan mem lọ oḅenhị nyodị ḍikarạph. Osighẹ “ikarạph” okpeọm ikarạph k/engọ suọ. Ḍierị phọ aḍighaạgh phọ, odọ eegharạ phọ ephẹn reḍighi ghan idị iiḅaghamhị phọ reloghorị ghan bịn.
w07 7/1 24-25 ¶12-13
“Oye Iḍighi Inyina Ikarạph, Ke/kpeọm Ghan Ikarạph”
12 Oroma aPọl dị atum siẹn ilọ ozoọm ghan abuẹn odi bọ siẹn igey phọ r’abuphẹ u/lo aani bọ pọ: “Oye iḍighi inyina ikarạph, ke/kpeọm ghan ikarạph.” Oḅẹm mọ opọ phọ ameeraam r’ipẹ odị aghaạph bọ epẹ omhạn mọ: “IkeI ikarạph.” Loor esi dị, oye ka/tue aḅẹm mọ onọ akel ikarạph, eḍighi maạr lọ asighẹ ikarạph kụ akpeọm ikarạph? Oḍighi ghan iduọn phọ egbạgh ni r’omoọgh ephomhoghiạn dị i/ḅarạm ‘r’enụm iikpukiạn’. Kụ aPọl mọ: “Ikpatiạn ghan oḍighi idị awe inyina ki/ḍaghạ ghan.” (Rom 12:9, 17) Ika kụ idị yira kosighẹ bọ oḍighinom ikpo-onhụ phọ iphẹn?
13 Epẹ omhạn siphẹ aḍinyạ phọ odị agẹ bọ aghiọm Korịnt, aPọl agẹ ni ilọ igbiphoghọm mọ abumatuạn phọ osoman bọ. Mọ “kozẹ esi ogbo dị aruukpaạny phọ Enaạn r’aweye r’oomo aḅirini phọ romiịn. . . . Bulọ uronyon iyoor, yoor rongọ ghan ḍisẹph. Bulọ ugbiphoghọm iyoor, yoor rokparạm ghan ni. Bulọ ugilaạm iyoor yoor robonyiạn ghan iyoghoyoghọ ikpo onhụ.” (1 Korịnt 4:9-13) Iniin phọ kẹn ni, awe aḅirini phọ oḅilhẹ kẹn ni ropogh aani bugey aKristẹn ḍio phọ arodon. Mem dị abuẹn ukoom bọ iyira omhiịn imạ phọ ipẹ yira rozọ ghan bọ ghalamọ r’amem dị uzoọm iyira eten dị i/nighẹ, kenyu ni bidị ophogh imạ eten dom mọ ayira idiphọ aKristẹn.—1 Pita 2:12.
(Rom 12:20, 21) Kparipẹ ghụn r’oḅuIemian, enọn esi eḅẹm ni mọ, “AmuIọgh ḍien anạ Iọ okoọny rasiph, ngọ ghan ni eḍien. Mọ amuụm kụ rapụ, ngọ ni dị aphughọI. Iduọn phọ kụ idị nạ kakiighe nyodị umughoIoor.” 21 Ke/meera ikarạph ekpạr ipu inyina, isighẹ igey kụ ezuoghom ikarạph.
w12 11/15 29 ¶13
Oniin Asạr Ghan Awilhenhaạn Nyoniin Oopho
13 Eeni amem nạ raloghoma ghan ni mọ ekpeanaạn ni ologhonhaạn aḍighaạgh oye dị apiomạn nyinhạ osereghiạn asiigbu aKristẹn. Otelhedom mọ aPọl agẹ mọ: “ ‘AmuIọgh ḍien anạ Iọ okoọny rasiph, ngọ ghan ni eḍien. Mọ amuụm kụ rapụ, ngọ ni dị aphughọI. Iduọn phọ kụ idị nạ kakiighe nyodị umughoIoor.’ Ke/meera ikarạph ekpạr ipu inyina, isighẹ igey kụ ezuoghom ikarạph.” (Rom 12:20, 21) Esi imạ aroozọ phọ anạ ghalamọ r’amem dị oḍighi idị repin esi anạ, bịn nạ katue ni adughe igbagarạ ilhoghi aḅilhẹ amiteom imạ loor awe. Esi oḍeenhaan mọ nạ anaghanhạn ni, r’eekaạny—ghalamọ r’aghusạn—nyoọn apiomạn bọ, bịn nạ katue ni aloghonaạn nyodị ḍighaạgh otuughạ igey aBaibul pho. Toroboiperolbọ, oyoghoyoghọ ophagharanaạn rangọ ghan oye phọ imạ eepoogh oḅilhẹ ootughiạn imạ aroozọ phọ anạ.—1 Pit. 2:12; 3:16.
Oguphogh Owạ Imạ Araraạr Dị Edi Siphẹ ABaibul Phọ
(Rom 12:1) Buọ asiya, Ioor iboom ighirigiir phọ iphẹn Enaạn rinmạ ghan bọ iyira, mị raIọm ni mọ iḅọgh Ioor phọ anyina imoom eḍighinom iyaạr aghuḍum aruukuan dị Enaạn kesighẹ, engọ nyodị. Ekpeanaạn ooseeny ghan odị iduọn phọ bịn.
lvs 76-77 ¶5-6
Ipẹ Yira Kosaḅạr Ghan Bọ Oozaghamiạn Aloor
5 Torobọ iyaạr lọ yira roḍighi siẹn aghuḍum mọ emoọgh ni maạr oḍighinhom r’iiseeny phọ ayira esi aJihova. Iphẹn kụ idị aPọl aghaạph bọ mem mọ aḅẹm bọ mọ: “Iḅọgh Ioor phọ anyina imoom eḍighinom iyaạr aghuḍum aruukuan dị Enaạn kesighẹ, engọ nyodị.” (Rom 12:1) AJizọs aḅẹm mọ: “Ipomoghiạn nyodị r’oomo ologhi anyina, r’oomo uwaIoor anyina, r’oomo iitughiạn anyina, r’oomo inyaạm anyina.” (Mạk 12:30) Yira rowạ ghan ongọ ipẹ enighẹ bọ epelhom aJihova. Siphẹ Izrạl iḍiodi phọ, kụ awe opighironọm ekiạ enhạm r’ongọ aJihova, iwạ ghan mọ bidị ongọ enhạm dị emhoon. Ekiạ phọ kụ emhoọgh eeghạ, Enaạn i/sighẹ ghan. (Leviticus 22:18-20) Eniin phọ eten phọ, ketue ni eḍighi idị aJihova ka/sighẹ iiseeny phọ ayira. Ika?
6 AJihova uḅenhị iyira mọ: “Iikuan ghan, idị eḍighi bọ mị oye aruukuan.” (1 Pita 1:14-16; 2 Pita 3:11) AJihova kasighẹ iiseeny phọ ayira eḍighi maạr lọ eekuan, obobọ esererẹ. (Deuteronomy 15:21) Iiseeny phọ ayira ke/tue esererẹ eḍighi maạr lọ yira roḍighi ghan raraạr dị aJihova aghel, idiphọ aroozọ dị i/ḅaạl, igamaniạn, obobọ iiḍighi ikarạph aruwaloor. (Rom 6:12-14; 8:13) Keḅilhẹ kẹn ni epin esi aJihova eḍighi maạr lọ ophogh ghan araraạr phọ iphẹn kụ iiḅeraạn iyira. Iphẹn phọ keḍighi idị iiseeny phọ ayira kee/kuan ḅilhẹ aJihova ka/sighẹ, bịn ketue ni epuẹ siya phọ ayira r’aJihova.
(Rom 13:1) Ekpẹ ni dị torobọ oye kanaghanạn ghan buphẹ rotooghị bọ itooghị phọ, idị eḍighi bọ iikpọ dị kemeerạ i/Io, emuton ipẹ Enaạn kụ etọ bọ, kụ iikpọ phọ ipẹ emeerạ bọ Enaạn kụ iseere ni.
w08 6/15 31 ¶4
Oghaạph Ookaragh dị Osighẹ Siphẹ Aḍinyạ phọ Ogẹ Bọ Oghiọm we ARom
13:1—Eghẹn eten kụ edị Enaạn kụ eseere bọ “iikpọ phọ ipẹ emeerạ bọ”? Iikpọ itooghị aḅirinhi phọ “ipẹ emeerạ bọ Enaạn kụ iseere ni” iyaạr phọ eḍighi bọ Enaạn kụ angọ ogẹl kụ bidị rotooghị bọ, iniin kẹn eḍighi idị Enaạn mephụr ri emiịn ilọ abidị. Iphẹn phọ iganhanha esi ipẹ aBaibul phọ aghaạph bọ ilọ abuniin abutooghiạ phọ abuẹn phọ.
Ibạl ABaibul
(Rom 13:1-14) Ekpẹ ni dị torobọ oye kanaghanạn ghan buphẹ rotooghị bọ itooghị phọ, idị eḍighi bọ iikpọ dị kemeerạ i/Io, emuton ipẹ Enaạn kụ etọ bọ, kụ iikpọ phọ ipẹ emeerạ bọ Enaạn kụ iseere ni. 2 Oye Iọ agbagharạn buphẹ rotooghị bọ itooghị phọ, pọ magbagharạn ipẹ Enaạn etọ bọ. Kụ oye Iọ aḍighi iduọn phọ kasopha ni ooruẹn apum aḅamạ emụ odị. 3 Buphẹ roḍighi ghan bọ igey phọ ro/kiiIaan ghan buọ itooghị phọ. Abuḍighinom ikarạph phọ kụ rokiiIaan ghan bọ bidị. Mọ nạ ra/wạ oghiiIaan ghan abuphẹ rotooghị bọ, pọ ḍighi ghan igey. Bidị kosẹph ni nyinạ, idị eḍighi bọ bidị abuteIhedom Enaạn dị roḍighi ni iIọ asuọ anạ. 4 Mọ nạ raḍighi ghan ikarạph, pọ kiiIaan ni bidị, idị eḍighi bọ bidị ro/peghom ghan ephegh gheIhẹ phọ abidị. Bidị abuteIhedom Enaạn, kụ opạm ni gheIhẹ phọ Enaạn ogonom awe Iọ roḍighi ghan ikarạph. 5 Kụ loor emụ iduọn phọ, naghanạn ni buọ itooghị phọ. U/ḅẹm mọ iIọ otuạn okpetenaan agheIhẹ phọ Enaạn bịn. Edi kẹn ni ipẹ iitughiạn phọ anạ eIegheri bọ mọ ekpẹ ni oḍighi ghan phọ. 6 Iduọn phọ kẹn kụ edị ekpẹ bọ ni dị nyina kesogh ghan iisogh agomẹt phọ, Ioor esi dị buọ itooghị phọ roḍighinaan ghan Enaạn mem dị bidị roḍighi k’ikparạ k’ikpuru oḍighi phọ abidi. 7 Esi iduọn phọ, ituụgh ipẹ bidị migbi bọ inyina esogh engọ. IkoI iIọ emụ phọ anyina r’iIọ aḍighi Iọ nyina remuuI ghan esogh engọ, eḅilẹ kẹn eIọgh eegu r’eghuan oomo phọ abidị. 8 Ke/Ie ghan omụgh oye. Omụgh dị nyina keIe aḍighi ephomoghiạn dị oniin kapomoghiạn ghan nyoniin! Oye Iọ aphomoghiạn bunọn awe, pọ maako ni iilogh phọ Enaạn. 9 IiIogh phọ “Emạ ka/Ie, enu ka/kọ, imi ka/mi, ka/sẹph iyaạr onọn oye asighenọm,”-oomo phọ iphẹn phọ r’inọn odọ ilọ esugha ookpomoghi ni siẹn ologh phọ ophọn mọ, “Pomoghiạn onọn oye idiphọ aloor phọ anạ.” 10 Oye Iọ aphomoghiạn onọn oye ka/mighirom mun aḍighi oye phọ opọ phọ ikarạph. Esi iduọn phọ ephomoghiạn kụ ooko oomo phọ lilogh phọ omadạn. 11 Iḍighi ghan iphẹn phọ. Nyina eIegheri ni esi dị mesi. Amem mọ meteẹny dị nyina kesumạ raIhạ phọ anyina. Amem mọ kuphẹI bọ iyira otene mekpulạn nyiidiphọ epu eḅẹl amem mọ yira omeeraam bọ. 12 Moọny amem aḍughul phọ meten remuneen, kụ aḍiroọr phọ reḅaạI. Okporonaạn asuomạ oḍighinom araraạr amuphe ufiri phọ! Onyạ iinyạ Iọ kobeom siphẹ aḍiḅaạl phọ! 13 Ku/buIamaam loor ayira oroIọm eegharạ Iọ egbaanyạn buphẹ aḍiḅaạl phọ, iipheeny ku/pheeny ghan, ku/ḍighi bupughọl miim, emạ ku/Ie, ipesi ku/pesi, elephiri ku/be, oIoghi eḍịm ku/moọgh! 14 Isighẹ roozọ phọ aJizọs Kraist Omoọgh-we pho, ekpologhiạn idiphọ asuomạ. Ke/ngọ eepoogh ikarạph aruuphuạ phọ anyina, obọ bidị keḍighi ghan bọ ilọ eḅeraạn bidị.
MARCH 11-17
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ROM 15-16
“Kiạ Esi AJihova Omhoọgh Okparạm r’Akpọ Ologhi”
(Rom 15:4) Torobọ iyaạr Iọ ogẹ siphẹ aḍinyạ iigbia phọ, ugẹ otughemiọm ghan ayira, pidị yira otuạn okparạm mọ r’akpọ oIoghi phọ oghaạph aḍinyạ iigbia phọ rungọ ghan bọ iyira omoọgh oḍuom ologhi.
w17.07 14 ¶11
Iḍighan “Bulọ Romoghi Emoghi Aani”
11 Oghaạph ilọ emoghi phọ aJizọs mem mọ aLazarọs amugh bọ, eḍighi eniin, esi ibadị ariisi aBaibul dị eḍighi elọ iidereghị, siphẹ Ekpo-onhụ iidereghị phọ Enaạn. Iikia i/lo, “torobọ iyaạr Iọ ogẹ siphẹ aḍinyạ iigbia phọ, ugẹ otughemiọm ghan ayira, pidị yira otuạn okparạm mọ r’akpọ oIoghi phọ oghaạph aḍinyạ iigbia phọ rungọ ghan bọ iyira omoọgh oḍuom ologhi.” (Rom. 15:4) Eḍighi maạr lọ nạ ramoghi, nạ katue kẹn ni amoọgh iidereghị dị kepoomị olhoghi phọ anạ siẹn ariisi aBaibul phọ iphẹn:
▪ “AJihova atumhan ni buẹn arokpom mọ meḅonyonhu bọ ezuan; odị r’apẹl ghan ni buẹn inyaạm mọ m’emoopha bọ.”—Ps. 34:18, 19.
▪ “Mem dị ooḅaghamhiạn aloor aạr imhị boọr, nạ [aJihova] kụ uudereghị imị aḅilhẹ uphoomị imị.”—Ps. 94:19.
▪ “AJizọs Kraist Omoọgh-we phọ ayira r’aloor odị, r’Enaạn Odẹ phọ ayira uphomoghiạn bọ iyira, kụ atuạn bọ oghọr phọ odị ungọ iyira akpọ oIoghi r’ogey oḍuom oIoghi k’agee-pọ, imuzeḍinaan inyina akpọ ologhi r’inyaạm.”—2 Tẹs. 2:16, 17.
(Rom 15:5) Kụ Enaạn, azin okparạm r’akpọ ologhi phọ, eḍighi ni maạr dị nyina ketuughaạny ghan ipẹ aJizọs Kraist aḍighi bọ, emoọgh aani igina phọ iitughiạn phọ siphẹ ogbo phọ anyina,
w16.04 14 ¶5
“Okparạm Mọ Anyina Ku/dugh R’amem Odaanaạn Oomo Phọ Inẹ”
5 Ghiighiraan asoman aJihova omhoọgh inyaạm. AJihova kụ “azin okparạm r’akpọ ologhi phọ.” (Rom 15:5) Odị o/naghanạn ogina iiḅaghamị phọ yira osoman bọ bịn kuolọ ipẹ amarugh phọ, inyuughiom mọ, ḅilhẹ r’olẹm mọ ayira rutir ghan bọ iyira. Esi iduọn phọ, Odị bịn kụ akạr akasiạn onyaamị ayira orue okparạm. ABaibul phọ aḅẹm mọ “Odị ragbaanyamhị ghan ni ruuphuạ abuẹn rokiilaan bọ nyodị. Odị ranaghạn ghan ni emoghi phọ abidị ilọ ologhonaạn aḍighaạgh, kụ kaphẹl bidị.” (Ps. 145:19) Ika nuụn kụ idị Enaạn kapagharanaạn bọ iiḅereghị phọ ayira ilọ inyaạm orue okparạm?
(Rom 15:13) Enaạn phọ eḍighi bọ zin oḍuom ologhi imuzeḍinaan inyina oomo oḅaạl ologhi r’eephọ, Ioor omeeraam mọ anyina esi odị, pidị iikpọ Uwaloor ligbia phọ eḍighi dị oḍuom oIoghi phọ anyina kapoph ghan bịn akiọm ghisigh!
w14 6/15 14 ¶11
“Pomoghiạn [AJihova Enaạn] Phọ Anạ”
11 AJihova ‘aḍighi zin oḍuom ologhi dị rumuzeḍinaan ghan iyira oḅaạl ologhi r’eephọ.’ (Rom 15:13) Oḍuom olhoghi phọ k’Enaạn ruloghonaạn ghan iyira ḍighaạgh orue okparạm odẹgh ophogh omeeraam mọ ayira. Abuẹn osagharạn bọ uwaloor phọ ophạm bọ ‘ḍimeeraam mọ abidị tutụ k’aḍuugh kozu ni eghoony aghuḍum epẹ k’akẹ.’ (Ogan. 2:10) Abuẹn oḍuom bọ olhoghi orọl isiẹn ade phọ kụ ophamanạm bọ dọl aruukuan phọ abidị kokelọm ḍisẹph kirokirọ siphẹ aParadaịs omoom aḅirini phọ oguanaan bọ. (Luk 23:43) Nạ aloghoma ika ilọ oḍuom olhoghi phọ ophọn? Ibo r’eephọ kụ r”emuze ghan ilhoghi phọ ayira ḅilhẹ r’ephomoghiạn esi Ongoọm “oomo phọ igey inmo phọ yira omoọgh bọ”?—Jems. 1:17.
Oguphogh Owạ Imạ Araraạr Dị Edi Siphẹ ABaibul Phọ
(Rom 15:27) Bidị r’aIoor abidị kụ umeeraam ni osogh osogh phọ ophọn, kụ oIọ obọ esi ogbạ agey, ekpaariọm ni bidị oIoghonaạn aḍighaạgh phọ aḍien phọ. Idiphọ aruuruen phọ ophin aani bọ ni bin aḍisẹph aruwaIoor phọ abuọ aJu phọ omoọgh bọ, ekpẹ ni dị abuọ aJu phọ kophin aani bin araraạr aḍisẹph isiẹn ade awe phọ Iọ aruuruen phọ omoọgh.
w89 12/1 24 ¶3
“Rowạ Ghan Omiịn Aani Eemọr Ephomoghiạn Phọ Anyina”
Okạr agey, ikpẹ ni dị aKristẹn phọ abuẹn oḍighi bọ ruuruen phọ komegheron okị esi iminimiịn aKristẹn abuọ aJu phọ. Loor esi dị bidị ole ni “omhụgh” aKristẹn phọ abuphẹ odi bọ Jeruselem. K”epẹ Jeruselem ḍiẹn kụ idị iiḅi iinaghạn phọ eḍuạ bọ eru eteẹny aani Ruuruen phọ? APọl agbiighi mọ: “Eḍighi maạr dị aKristẹn abuọ aJu phọ odi ni ongọ aani ruphua aruwaloor phọ abidị Ruuruen phọ, pọ aRuuruen phọ omoọgh ogbogh oḍighi osogh ongọ aani araraạr emhoọgh phọ abidị.”—Rom 15:27, New English Bible.
(Rom 16:25) Odị kụ kingọ bọ inyina inyaạm dị nyina ketue emeerạ zim siphẹ omeeraam mọ anyina, idiphọ adom amị r’ooḅi oghaạph phọ aJizọs Kraist mị rakaạph bọ ḅiIhẹ r’idiphọ igey phọ ipẹ aaghiạn bọ k’eḅẹI egbiom aḅirini phọ kụ meganana bọ
it-1 858 ¶5
Olhegheri ilọ aghisigh, Odạ-odạ
AMesaya phọ obobọ aKraist phọ, kụ kaḍighi Eemuma phọ oguanaan bọ, opọ kotuạn bọ kụ osẹph oomo awe aruukuan r’oomo arughunotu isiẹn ade phọ. (Gal 3:8, 14) Eḅẹl amem dị oghaạph oghol Eemuma phọ epẹ pọ amem mọ igbagharạn phọ emite bọ pạ Eden kụ egbi oteẹny amem dị omạr Abel. (Ge 3:15) Kụ 4,000 asiạ meten ni kụ ogananamhị iphẹn “aaghị bọ” egbi omite dị eego esi oogholhomhi aMesaya phọ idiphọ “eemuma” phọ epẹ phọ. Esi iduọn phọ, ‘igey phọ ipẹ aaghị ni k’eḅẹI egbiom aḅirini phọ.’—Rom 16:25-27; Efẹ 1:8-10; 3:4-11.
Ibạl ABaibul
(Rom 15:1-16) Ekpẹ ni dị yira phọ abuẹn omeeraam mọ akpạr bọ koIọgh ḍighaạgh otoolaan sidooI abuphẹ omeeraam mọ adugh bọ. Ku/ḍighi ghan iIọ igbaanyạn iyira bịn! 2 Torobọ onyọ ayira aIoghonaạn ghan ghụn ḍighaạgh iIọ kengọ onyọ asiya odị suọ, pidị aaneghiọm omeeraam mọ odị, 3idị eḍighi bọ aKraist o/ḍighi ghan iIọ egbaanyạn nyodị! Idiphọ aḍinyạ iigbia phọ eḅẹm bọ, “Iitunyan phọ ipẹ ootuuny bọ nyinạ mimeIeghuom imị.” 4 Torobọ iyaạr Iọ ogẹ siphẹ aḍinyạ iigbia phọ, ugẹ otughemiọm ghan ayira, pidị yira otuạn okparạm mọ r’akpọ oIoghi phọ oghaạph aḍinyạ iigbia phọ rungọ ghan bọ iyira omoọgh oḍuom ologhi. 5 Kụ Enaạn, azin okparạm r’akpọ ologhi phọ, eḍighi ni maạr dị nyina ketuughaạny ghan ipẹ aJizọs Kraist aḍighi bọ, emoọgh aani igina phọ iitughiạn phọ siphẹ ogbo phọ anyina, 6 pidị aḍita phọ anyina eḅophoghạn r’eniin eḍọgh kụ esephọm Enaạn r’Odẹ phọ aJizọs Kraist, Omoọgh-we phọ ayira! 7 Loor iphẹn phọ, oniin aIoghomạ nyoniin, idiphọ aKraist miloghomạ bọ inyina, obọ engọ eghuan phọ Enaạn, 8 idị eḍighi bọ mị riḅenị ghan inyina mọ aKraist aḍighi oteIhedom abuọ aJu phọ oḍeenaan mọ Enaạn ekpẹ ni oḍuom ologhi, r’oḅilẹ oḍighi oguan phọ dị aguanaan bọ bugbogh aburudẹ phọ, 9 r’oḅilẹ ologhonaạn aḍighaạgh dị aruuruen phọ kokoI onmạ ighirigiir phọ Enaạn oboom nyodị. Idiphọ aḍinyạ iigbia phọ reḅẹm ghan bọ, “Loor iphẹn phọ, mị kaboom ni nyinạ siphẹ ogbo aruuruen phọ. Mị kamoọr ri suọr aboomiom ḍien phọ anạ.” 10 EḅiIẹ kẹn eḅẹm mọ, “Nyina aruuruen phọ, iḅarạm we phọ Enaạn esaḅạr bọ emoọgh ibo.” 11 EḅiIẹ kẹn eḅẹm mọ, “Oomo aruuruen phọ, iboom Omoọgh-we phọ. Weye oomo areeIhe, iboom nyodị.” 12 ḄiIẹ kẹn, Aizaya aḅẹm mọ, “Onyọ eemarạ eemarạ aJesị katu ni. Kopophe ni nyodị otooghị araraạr ongọ aruuruen phọ, kụ bidị oḍuom ologhi nyodị.” 13 Enaạn phọ eḍighi bọ zin oḍuom ologhi imuzeḍinaan inyina oomo oḅaạl ologhi r’eephọ, Ioor omeeraam mọ anyina esi odị, pidị iikpọ Uwaloor ligbia phọ eḍighi dị oḍuom oIoghi phọ anyina kapoph ghan bịn akiọm ghisigh! 14 Buọ asiya amị, mị r’aIoor amị aḍuom ni oIoghi akuphom owol mọ igey r’olegheri iyaạr emuza ni Ioor anyina, ḅiIẹ mọ oniin ratue ni katughemị ghan nyoniin. 15 Kụ mị ageọm ni r’oḅom emụ iniin ikpo araraạr oghiọm anyina ologhi. Oḅom emụ phọ amị atuạn idiphọ Enaạn eḍighi bọ eeḅi 16 imạ imị oḍighi oteIhedom aJizọs Kraist oḍighi ghan oḍighi ongọ aruuruen phọ. Mị akịgh opinyọn rikiạ idiphọ mị rakaạph bọ ooḅi oghaạph phọ Enaạn, pidị Uwaloor Iigbia phọ awoph ruuruen phọ aḍighi bidị ekiạ dị Enaạn keIe.
MARCH 18-24
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 1 KORỊNT 1-3
“Nạ Amaghamhị Maạr Raraạr Iphulupul Obobọ Raraạr Aruwaloor?”
(1 Korịnt 2:14) Kụ oye lọ u/legheri raraạr uwaloor phọ ka/moọgh aani ruunmo k’Uwaloor ligbia phọ. Iphẹn phọ ke/tue ebọl eḍigh rurụ odị. Odị ka/maghamị iyaạr idị eḍighi bọ ropoghom uwaloor bịn kụ oIegheriom mọ emạn ni iyaạr.
w18.02 19 ¶4-5
Remạ Ghan Eeghe Omaghamhị Iyaạr Raraạr Aruwaloor?
4 Ophụr ooḅeeghiọn eegharạ oye dị amaghamhị maạr raạr iphulupul. Aḅirini phọ omoọgh ekpanạ eegharạ ogbaanyamị ghan iphulupul phọ. APọl aghaạph ilọ iphẹn phọ idiphọ “uwaloor phọ opọ rapogh bọ buphẹ ro/naghanạn ghan bọ Enaạn.” (Efẹ. 2:2) Uwaloor phọ ophọn phọ ranyuughiom ghan ibadị awe omhoọgh eniin eegharạ—odạph aḍita. Bidị ogbon ilọ iphulupul phọ bịn. Loor iduọn phọ, oboom opol abidị roḍighi ghan ilọ bidị ootughiạn mọ enighẹ bịn, u/lọgh inyaạm odaphạn asiigbu phọ Enaạn. Oye iphulupul phọ obobọ oye dị raatughiạn ghan ilọ iphulupul phọ, ramoọgh ghan oboom ogbolomaam ilọ igbogh ḅilhẹ r’ophorogh eelạ obobọ okparaghạ omeremhị ilọ odị aatughiạn mọ eḍighi elhiom odị.
5 Koḅilhẹ osighẹ eeghe kụ olegheriom oye dị amaghamhị maạr raraạr iphulupul? Awe dị ropinom aani ghan bin torobọ ‘eḍighinom iyaạr iphulupul phọ’ oḍighom aani ni ekụ phọ ephẹn phọ. (Gal. 5:19-21) Aḍiḅẹl aḍinyạ phọ aPọl agẹ bọ aghiomaạn ookpomhoghan phọ aKorịnt eḅilhẹ ni egoolạ inhọn araagharạ awe iphulupul phọ. Iphẹn phọ eḅarạm: obughẹ amadia, omoọgh aruukụ, iruonụ, oniin r’asoorom nyoniin erugh, e/lọgh eegu buḍiemiom, ḅilhẹ r’osighẹ aloor okuọm amuboom amalhe r’ipughọl. Mem lọ asoman odẹgh ophogh, opọ amaghamhị bọ maạr ilọ iphulupul phọ radugh ghan bịn kangọ. (Prov. 7:21, 22) AJud aghaạph ni ilọ abudị kologhorị osi esi dị keḍeenhaan mọ “uwaloor Iigbia phọ kụ o/moọgh ghuḍum mọ abidị.”—Jud 18, 19.
(1 Korịnt 2:15, 16) Oye lọ alegheri raraạr uwaloor phọ ratue ghan ni kaIegheri idị oomo araraạr emạn, kụ onọn oye ka/tue amiịn idị odị amạn aani. 16 ldiphọ aḍinyạ iigbia phọ eḅẹm bọ, “Anhiạn kụ alegheri iitughiạn Omoọgh-we phọ? Anhiạn kụ katue atomoghiom nyodị?” Kụ yira ghụn oḅọph iitughiạn r’aKraist.
w18.02 19 ¶6
Remạ Ghan Eeghe Omaghamhị Iyaạr Raraạr Aruwaloor?
6 Remạ ghan eeghe omaghamhị iyaạr raraạr aruwaloor? Reḅeraạn ghan oye phọ opọ amaghamị bọ maạr raraạr aruwaloor oḍighi ipẹ k’Enaạn, idị egbạgh r’opọ u/maghamhị bọ maạr. Awe dị rootughiạn ghan ilọ aruwaloor phọ rokparaghạ ghan ‘otuughaạny Enaạn.’ (Efẹ. 5:1) Iduọn phọ reḅẹm ghan mọ bidị rolọgh ghan ikuph olhegheri aḍiitughiạn phọ aJihova ilọ iyaạr, kụ ophogh araraạr eten phọ epẹ odị rapogh ghan bọ. Esi abidị Enaạn akạr odi ghan. Dị u/kịgh aani buphẹ rootughiạn ghan bọ ilọ iphulupul phọ, bidị rokparaghạ ghan osighẹ oomo areten phọ abidị orolọm idị eḅọph r’asiigbu phọ aJihova. (Ps. 119:33; 143:10) Kparipẹ rogbon iiḍighi iphulupul phọ, oye dị raatughiạn ghan raraạr aruwaloor phọ rakparaghạ ghan omuum “iimuma uwaloor ligbia phọ.” (Gal. 5:22, 23) Okạr orue oogholomhi oye dị “raatughiạn ghan raraạr aruwaloor,” pọ ootughiạn ilọ oghaạph omaaniọm mọ ophọn: Oye dị asilor reten omuul aḍighi roḅẹm ghan mọ amoọgh epul aḍighi. Iniin phọ kẹn ni kụ idị oye dị akụl emhụ alhọgh raraạr aruwaloor obobọ iiḍighi ekụ iiḅereghị roḅẹm ghan mọ oye aruwaloor.
w18.02 22 ¶15
Remạ Ghan Eeghe Omaghamhị Iyaạr Raraạr Aruwaloor?
15 Ika kụ idị yira raloor kotuughaạny Kraist? ABaibul phọ siphẹ 1 Korịnt 2:16 akaạph ilọ “oḅọph iitughiạn r’aKraist.” Ḅilhẹ kẹn Rom 15:5 aḅẹm mọ omoọgh “aani igina phọ iitughiạn phọ” aKraist Jizọs. Esi iduọn phọ, oghịgh aani aKraist, pọ ewạ m’olhegheri aani okol iitughiạn phọ aKraist r’okạr oye phọ odị aru bọ. Kụ odạph igbaranuọm aruwol odị. Olhoghi phọ aJizọs agbon esi asiya phọ odị r’aJihova. Kụ iḍighi kụ oghịgh aJizọs phọ ekịgh mudị oye phọ akịgh aani aJihova. Loor emhụ ariphigh phọ iphẹn phọ, ekạr eegholaan odọ idị emạn maạr otuughạ ilọ ootughiạn aani ghan idiphọ aJizọs.
Oguphogh Owạ Imạ Araraạr Dị Edi Siphẹ ABaibul Phọ
(1 Korịnt 1:20) Ika kụ emụ iphẹn phọ esi abuọ oIegheri iyaạr phọ r’abutughemiạ iilogh phọ r’abuphẹ rooḅeghiọn bọ konunuạn olegheri emụ ilọ aḅirini phọ? Enaạn meḍeenaan ni mọ olegheri iyaạr aḅirini phọ ophọn pọ elologhi.
it-2 1193 ¶1
Osụ-olhoghi
Aḅirinhi phọ esi osụ-olhoghi phọ odị amiịn iikolobian phọ Enaạn eego bọ esi aKraist mọ elologhi kụ akel; ghalamọ r’abutooghiạ phọ mutue bọ ni, r’abugboom iiruẹn phọ abidị, uḅilhẹ ghụn oghị ghisigh “okạn Omoọgh-we Eghuan phọ.” (1Kọr 1:18; 2:7, 8) Kuolọ ḍierị phọ aḍighaạgh phọ, Enaạn raḍeenhaan ni mọ olhegheri iyaạr aḅirinhi phọ pọ elologhi, rasiphe umugholoor we olhegheri iyaạr ph’abidị esi osighẹ oḍighinhom ipẹ bidị ogbiighi bọ mọ “elologhi Enaạn,” ḅilhẹ kẹn r’abuẹn bidị osighẹ bọ mọ ‘aruwelologhi, awe dị odugh, ḅilhẹ mọ u/lo dọl eghuan,’ kụ ramuneniom igbiom mọ Odị k/otue bọ osophoghom. (1Kọr 1:19-28) APọl aatughianạm Kristẹn aKorịnt phọ mọ “olegheri iyaạr isiẹn aḅirini phọ ḅilẹ r’ilọ abuphẹ odaaghị bọ riisi siẹn aḅirini phọ” kamineen ni; iduọn phọ pọ odọ osụ-olhoghi phọ opọ phọ o/ḍighi aani pakirị adom mọ Enaạn abutelhedom mọ oghaạph ghan bọ. (1Kọr 2:6, 13) Odị aphụr rurụ Kristẹn phọ aKolosị dị k/ookeleghiom bidị “olegheri iyaạr aḅirini phọ [phi·lo·so·phiʹas, remạ ghan mọ, ephomoghiạn olhegheri iyaạr] opọ o/moọgh iyaạr oḍighinom, adạph eḍighinom iyaạr agediidi r’itughemị eghoroghọr bịn.”—Kọl 2:8; tomaạm ekpịgh phọ 20-23.
(1 Korịnt 2:3-5) Mị uphạm ni eepuph r’ophiigha aloor r’okaphian oomiigh kụ arumom bọ iteẹny inyina. 4 Mị u/sighẹ ḍiidughạ anem r’olegheri iyaạr isiẹn aḅirini phọ kụ aghaaphọm ghan bọ atughemị. Iikpọ Uwaloor Iigbia phọ ikparamị ghan ni ikpo onhụ phọ amị, eḍeenaan mọ iḍuạ ni esi Enaạn phọ kụ eru. 5 Esi iduọn phọ, nyina i/tuạn oIegheri iyaạr awe aḅirini phọ, nyina ituạn ghụn ni iikpọ phọ Enaạn kụ emeeraam bọ.
w08 7/15 27 ¶6
Oghaạph Ookaragh dị Osighẹ Siphẹ Arinyạ phọ Ogẹ bọ Oghiọm we AKorịnt
2:3-5. Mem dị odị rangọ ogbaanhaạn epẹ Korịnt, eḍighi bọ zin itughemhị r’ituughạ olhegheri iyaạr iitughiạn abuọ aGris phọ, aPọl eeni amhoọgh ni ogbolhomaam mughumọ odị katue ni alereghian buphẹ odị rakaaphạn bọ. Toroboiperolbọ, odị o/mheera mọ aḍidugh obobọ oghiilaan dị odị amhoọgh esophoghom oḍighi phọ Enaạn angọ bọ nyodị oḍighi. Iniin phọ kẹn, ku/meera asidọl dị olhoghi u/seere eru isophoghom iyira ogbeelhom iiḅi iinhaghạn ilọ omhạr phọ k’Enaạn. R’akpọ oḅio yira kotue ni ooghiraan osoman aJihova ilọ olhoghonhaạn aḍighaạgh idiphọ aPọl aḍighi bọ.
Ibạl ABaibul
(1 Korịnt 1:1-17) Mị aPọl phọ opọ Enaạn esaḅạr bọ esighẹ mọ aḍighi otelhedom aJizọs Kraist, r’aSostenis umor phọ ayira, 2 kụ ugẹ ḍinyạ phọ aḍiẹn riruomaan inyina abuọ asiosị phọ edi bọ epẹ Korịnt, r’oomo awe phọ abuphẹ Enaạn mewoph bọ eḍighi buọ odị, r’oomo abuọ areelhe kirokirọ phọ romạgh ghan bọ ḍien phọ aJizọs Kraist Omoọgh-we phọ ayira—k/olọ ayira bịn, olọ abidị r’ayira ni. 3 Aḍisẹph r’eephọ k’Enaạn Odẹ phọ ayira r’aJizọs Kraist Omoọgh-we phọ irolonaạn inyina! 4 Mị ighol ghan ni inyina rangọ ḍisẹph Enaạn oomo amem loor esi oghọr phọ Enaạn ingọ bọ inyina phọ meḅophoghạn bọ Jizọs Kraist. 5 Esi amuḅọph phọ amuẹn r’aKraist mingọ inyina ebalabalạ eelạ dị eḅarạm iikpọ oghaạph r’olegheri iyaạr. 6 ldiphọ nyina edi bọ rekori ghan ḍio phọ aJizọs Kraist Omoọgh-we phọ ayira kamite bọ egaan phọ, 7 ooḅi oghaạph phọ aKraist makaraghị aḍiku iphuụny anyina dị tutụ r’aḍiniin aḍisẹph inyina i/tenom. 8 Odị katọl li siphẹ iphuụny phọ anyina k’aruukuna phọ, bịn r’iyaạr inyina ki/bịph ḍio phọ aJizọs Kraist Omoọgh-we phọ ayira katu bọ. 9 Enaạn phọ imạgh bọ inyina mọ iḅophoghạn r’Oọny phọ odị aJizọs Kraist Omoọgh-we phọ ayira reḍighi ghan ni ilọ dị aguanaan. 10 Buọ asiya, mị asighẹ ḍien phọ aJizọs Kraist Omoọgh-we phọ ayira kụ rilomọm inyina mọ oomo phọ anyina imoọgh ghan oniin ologhi r’eḍighinom-iyaạr, amadian ku/tọl mun; iḅọph oghuugh eḅọph ilhọm. 11 Buọ asiya amị, mị rakaạph iduọn, idị eḍighi bọ abuniin awe siphẹ otọ k’aKloi kụ ughaạph uḅenị imị mọ iruonụ edi ni ogbo phọ anyina. 12 Emụ iphẹn mị rakaạph bọ iduọn, mọ nyina maayạ. Oniin mọ, “Mị radạph Pọl”; oniin mọ, “Mị radạph Apolọs”; oniin mọ, “Mị radạph Kifas”; oniin kẹn mọ, “Mị radạph Kraist.” 13 Nyina medi Kraist ruukụ. APọI kụ aghoI bọ emụ phọ anyina amugh ḍuugh egbo phọ siphẹ oreeny phọ ḍughụm? UghoI ḍien aPọl kụ iwur bọ inyina muụm mọ? 14 Mị rasẹph ni Enaạn mọ emuton Krispọs r’aGayọs mị muụm u/bur onọn onyọ anyina, 15 ḄiIẹ kẹn onyọ anyina ka/kaạph mọ ughoI ḍien amị kụ iwurogh bọ inyina muụm mọ. 16 (Mị aḅilẹ ni aatughiạn mọ mị uwur ri muụm Stefanọs r’otọ odị, kụ olọ mị u/kiọm mun ologhi onon oye dị mị aḅilẹ awur muụm.) 17 AKraist imị u/rom owurogh ghan awe muụm, urom ghụn imị oghaạph ghan ooḅi oghaạph phọ. Mị u/kaaphọm ghan ḍiidughạ anem olegheri iyaạr aḅirini phọ, obọ iikpọ aḍuugh egbo phọ aKraist loor oreeny phọ kepe ghan bọ oopho.
MARCH 25-31
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 1 KORỊNT 4-6
“Oọny Enụm Ayist Kụ Raḍighi Ghan Bọ Idị Abrẹd Phọ Katu”
(1 Korịnt 5:1, 2) Mokaraghị rokaạph ghan mọ ipesi dị abuọ aruru bịn k”opesi ghan mesoor siphẹ ogbo phọ anyina—Muḅenị ni imị mọ oniin onyọ anyina ratolạn ghan esi r’anịr odẹ odị. 2 lyaạr obagaam inyina i/lo. Imeelom ghụn oboom otọ kụ eroph ogbeph nyoọn aaḅaghian bọ iphẹn phọ?
(1 Korịnt 5:5-8) nyina keḅọgh oye phọ ophọn engọ [Setan pidị ophiemi] ruzu-anyụ phọ odị, obọ uwaloor phọ odị amoọgh pelieẹny, ḍio phọ Omoọgh-we phọ katu bọ. 6 l/kpẹ dị nyina kebaga. Nyina elegheri ni oḅẹm mọ ophọn ḍughụm mọ, “Oọny enụm ayist kụ raḍighi ghan bọ idị abrẹd phọ katu.”? 7 Imiteom ogbaany ayist phọ eroph, obọ nyina esererẹ yogh emạn kụ egbi oghịgh omoom abrẹd dị yist u/lọgh, idiphọ mị alegheri bọ ni mọ nyina mesạr ri igbaany ikarạph phọ ebilẹ yogh. Mumeeghenaạn iyira Kraist phọ aḍighi bọ moọny iyool ogạ eyaạl ophẹl otene phọ. 8 Itu ghan nuụn ole eyaạl phọ. Ku/leom ogbaany ayist ighughiạn r’ikarạph phọ, oleom ghan omoom abrẹd igey dị iguegue u/ḅarạm, nyopọ yist u/lọgh bọ!
(1 Korịnt 5:13) Enaạn kụ kesophonaan ooruẹn buerị phọ. ldiphọ aḍinyạ iigbia phọ eḅẹm bọ mọ, “Iporogh oḍighinom ikarạph phọ emiteom siphẹ ogbo phọ anyina.”
it-2 230
Ayist
Otelhedom mọ aPọl asighẹ ni aḍighinhom eniin phọ eten otomaạm mọ mem mọ odị atọ bọ aḅenhị ookpomoghan aKristẹn phọ epẹ Korịnt mọ ophorogh oḍighinhom ikarạph phọ siphẹ ookpomoghan phọ, kụ aḅẹm mọ: “Nyina elegheri ni oḅẹm mọ ophọn ḍughụm mọ, Oọny enụm ayist kụ raḍighi ghan bọ idị abrẹd phọ katu? Imiteom ogbaany ayist phọ eroph, obọ nyina esererẹ yogh emạn kụ egbi oghịgh omoom abrẹd dị yist u/lọgh, idiphọ mị alegheri bọ ni mọ nyina mesạr ri igbaany ikarạph phọ ebilẹ yogh. Mumeeghenaạn iyira Kraist phọ aḍighi bọ moọny iyool ogạ eyaạl ophẹl otene phọ.” Kụ agbi nuụn omạ oogholomi iyaạr phọ “ayist” phọ aru bọ: “Itu ghan nuụn ole eyaạl phọ. Ku/leom ogbaany ayist ighughiạn r’ikarạph phọ, oleom ghan omoom abrẹd igey dị iguegue u/ḅarạm, nyopọ yist u/lọgh bọ!” (1Kọr 5:6-8) Siẹn phọ aPọl amạ ghan amiteom dị yira komiịn emhụ Abrẹd Eyaạl Abuọ aJu Phọ U/lọgh Bọ Yist pho, epẹ phọ edaphạn ghan bọ Eyaạl ophẹl otenhe phọ. Idiphọ oọny ayist raḍighi ghan bọ idị oomo eeḅoogh abrẹd phọ retu ghan, iduọn kụ idị ookpomhoghan phọ katue ni bịn aḍigh eenịr esi aJihova eḍighi maạr lọ u/gbuurogh usighẹ inyuughiom oḍighinhom ikarạph phọ repuẹ bọ ookpomoghan phọ. Ewạ mọ bidị oḍighi iyaạr omiteom osighẹ “ayist” phọ siphẹ igbo phọ abidị, idiphọ awe Izrạl phọ k/oseere bọ yist ilhoghi aruutu abidị mem eyaạl phọ.
it-2 869-870
ASetan
Remạ ghan eeghe ‘oḅọgh oye phọ ongọ aSetan pidị ophiemi ruzu-anyụ phọ odị’?
Esi oromhạ ookpomhoghan phọ epẹ Korịnt ilọ ipẹ bidị kodịghi bọ onyọ aKristẹn phọ opọ razọ bọ eten asipioghọm mọ, orolạn ghan esi r’anhịr odẹ phọ odị, otelhedom mọ aPọl agẹ mọ: ‘Iḅọgh oye phọ ophọn engọ Setan pidị ophiemi ruzu-anyụ phọ odị.’ (1Kọr 5:5) Iphẹn phọ eḍighi itọ ophorogh oye phọ osighe isiphẹ ookpomoghan phọ, dị koo/ḅughonhaan mun nyodị. (1Kọr 5:13) Oḅọgh odị ongọ aSetan kesighẹ nyodị siphẹ ookpomhoghan phọ, kụ elọgh nyodị aḅirinhi phọ aSetan kụ aḍighi bọ emụgh ḅilhẹ r’otooghiạ phọ. Idiphọ “oọny enụm ayist” loor eeḅoogh “abrẹd,” oye phọ ophọn phọ aḍighi “oye iphulupul,” dị odi pạ ookpomhoghan phọ; esi ophorogh ophọn ratolạn ghan bọ esi r’anhịr odẹ phọ odị siphẹ igbo phọ abidị, pọ ookpomhoghan phọ ophọn amoon bọ ni eten aruwaloor phọ mophiemhi ruzu-anyụ phọ siphe igbo phọ abidị. (1Kọr 5:6, 7) Eniin phọ eten phọ, aPọl aḅọgh ni Haimenios r’Aleksandạ angọ Setan, loor esi dị bidị m’owilẹ omeeraam mọ r’ogey ooruẹn olhoghi phọ abidị, bịn omeeraam mọ abidị atirian idiphọ oghuugh.—1Tim 1:20.
(1 Korịnt 5:9-11) Ḍinyạ phọ mị agẹ bọ, mị iḅenị inyina mọ ke/ḅọph oghuugh r’abuọ ipesi. 10 Mị u/kaạph ukolom buọ aruru phọ ropesi bọ ipesi phọ, omoọgh bọ ekpooko ikpoki phọ romiighi bọ, ḅilẹ rooḅereghị bọ ikaaghineẹn araraạr phọ. Nyina eghel buẹn phọ, pọ nyina ke/moọgh ekụl orọl aani siẹn aḅirini phọ. 11 Mị ugẹ ghụn oḅenị anyina mọ ke/ḅọph oghuugh r’olọ apu aghola mọ onọ onyọ asiya kụ aḅarạm ipesi r’ekpooko ikpoki r’ooḅereghị ikaaghineẹn araraạr, r’osụ-onhụ, r’ipughọl, r’imi, i/lean ghan nyodị eḍien.
lvs 241, Igẹ dị opumhom
Ophorogh
Mem dị oye dị aḍighi igbogh ikarạph, kụ u/meera ukiton ḅilhẹ kẹn u/meera udạph siigbu phọ aJihova pọ ko/meera mun odị aḍighi pakirị ookpomhoghan phọ. Ewạ mọ ophorogh nyodị osighẹ. Mem dị ophorogh oye siphẹ ookpomoghan phọ, pọ yira u/moọgh mun muḅọph r’oye phọ opọ phọ, ḅilhẹ kẹn ku/ḅaanhaạn mun nyodị. (1 Korịnt 5:11; 2 Jọn 9-11) Iikolhobian ophorogh ghan oye phọ rekoph ghan ḍien phọ aJihova ḅilhẹ r’ookpomoghan phọ. (1 Korịnt 5:6) Ophorogh ghan phọ eḍighi ilioghọm dị keloghonhaạn nyodị ḍighaạgh olhoghoma aloor odị okiton kụ oḅula esi aJihova.—Luk 15:17.
▸ Emuoghaạph phọ 3, ekpịgh phọ 19
Oguphogh Owạ Imạ Araraạr Dị Edi Siphẹ ABaibul Phọ
(1 Korịnt 4:9) Ekịgh esi amị mudị yoor abutelhedom mọ, eekuna arebenẹ dị Enaạn ekpor ekọI bịn engọ idiphọ awe dị erugh aḍuugh ephum, kụ kozẹ esi ogbo dị aruukpaạny phọ Enaạn r’aweye r’oomo aḅirini phọ romiịn.
w09 5/15 24 ¶16
Aruukpaạny Phọ—“Aruwaloor Phọ Reḍighi Ghan Bọ Oḍighi Phọ”
16 AKristẹn dị osoman odẹgh ophogh oḍighi ‘we dị odi esi ogbo dị aruukpaạny romiịn.’ (1 Kọr. 4:9) R’aḍiboom aḍiḅeraạn, aruukpaạny phọ romiịn ghan iiḍighi aruukuan phọ ayira, kụ romoọgh ghan kẹn ibo mem lọ oḍighinhom ikarạph akiton. (Luk 15:10) Aruukpaạny phọ olọgh kẹn ni elhegh imạ aroozọ anmariịr aKristẹn phọ. ABaibul phọ aḅẹm mọ “anịr akaghạ ghan emụ odị oḍeenaan mọ onọ odianaan itooghị olom mọ, otuạn idiphọ aruukpaạny phọ edianaan bọ itooghị phọ Enaạn!” (1 Kọr. 11:3, 10) Ii reḅeraạn ghan ni ruukpaạny phọ omhiịn dị anmariịr aKristẹn phọ ḅilhẹ r’oomo arebenhẹ Enaạn siẹn ade phọ rodaphạn edeọm itooghị r’iḍiemiom mọ Enaạn. Odọ osooromhi aloor phọ ophọn aḍighi ighiọm ilhoghi dị ekasiạn, engọ nmụny phọ Enaạn buphẹ k’akẹ phọ.
(1 Korịnt 6:3) Nyina i/legheri mọ yira kụ koogboonaan iiruẹn ruukpaạny phọ Enaạn ḍughụm?—kụ eghiọm ologhi iikpalaghiạn awe isiẹn aḅirini phọ.
it-2 211
Olhogh
Olhogh dị Ongọ Ruukpaạny. Aruukpaạny emoọgh iikpọ epu we, kụ esooromi ni loor rengọ iilhogh r’itọ phọ Enaạn. (Hib 1:7, 14; Ps 104:4) Ghalamọ r’amulọgh ḍien phọ odị Setan bịn aJihova ratọ ghan ni kangọ aḅilhẹ asophoghom. (Job 1:12; 2:6) Uw-emhụ aruukpaạny phọ aMaikiẹl alhọgh ni elhegh aḅilhẹ kẹn aghueni dọl phọ aJihova idiphọ Oogboom Iiruẹn dị Apelheghiom mem dị aḅẹm bọ mọ “Omoọgh-we phọ kụ aliọm nyinạ!” mem dị raagbaghanaạn r’Eru phọ (Jud 9; tomaạm Zec 3:2.) AJihova aḅọgh oomo aruukpaạny phọ alọgh eeḍiạn itooghị aJizọs Kraist phọ moghue ni bọ. (Hib 1:6; 1Pit 3:22; Mat 13:41; 25:31; Fil 2:9-11) Loor iduọn phọ, esi itọ aJizọs urom ni ookpaạny oghiomaạn Jọn. (Ogan 1:1) Ghalamọ r’iduọn phọ ni siphẹ 1 Korịnt 6:3 otelhedom mọ aPọl aghaạph ilọ abumor aruwaloor phọ aKraist idiphọ abudị omạ dị k’oogbo iiruẹn ongọ ruukpaạny, eḍeenhaan mọ bidị kopinom aani ni bin oogboonaan iiruẹn ikarạph aruwaloor phọ.
Ibạl ABaibul
(1 Korịnt 6:1-14) Mem lọ oniin onyọ anyina apiomạn nyoniin, iḍighi ika kụ nyina ebilẹ ghan bọ we phọ Enaạn kụ epạm ghan bọ ḍighiton phọ rekimọm k’abuọ aruru kụ oghaạph phọ? lduọn phọ enighẹ ni ḍughụm? 2 Nyina i/legheri mọ awe phọ Enaạn kụ koogboonaan iiruẹn aḅirini phọ ḍughụm? ldiphọ nyina kụ keegboonaan iiruẹn aḅirini phọ, nyina k”emạn ooḅeghiọn ghan ikpirikpirị asighiton ḍughụm? 3 Nyina i/legheri mọ yira kụ koogboonaan iiruẹn ruukpaạny phọ Enaạn ḍughụm?-kụ eghiọm ologhi iikpalaghiạn awe isiẹn aḅirini phọ. 4 Kụ ighiil iikpalaghiạn esoor, ekpẹ ni osighẹ ghan oghiọm abuphẹ u/mạn bọ iyaạr esi abuọ asiosị phọ mọ oghaạph ḍughụm? 5 Iphẹn phọ mị rakaạph bọ ilọ osiphiom anyina umugholoor. Erọl dị r’oniin uwo ologhi o/lo siphẹ ogbo phọ anyina dị amạn osoph ooruẹn ongọ ekeeny r’eliom. 6 Kụ oniin ghụn aḅilẹ rasoorom ghan nyoniin erugh ghisigh abuọ aruru. 7 Onyọ anyina lọ amighirom asoorom nyoniin erugh bịn mamoọgh ni eekuna apum. Iḍighi inyina ikarạph, inighẹ ghụn dị nyina keminoghọm ghan ḍughụm? Ozirion raraạr lọ nyina emoọgh osigheọgh, inighẹ ghụn dị nyina kekparạm ghan ḍughụm? 8 Kparipẹ ghụn r’oḅoronom, kụ oniin aḅilẹ raḍighi ghan nyoniin lkarạph kazirion raraạr aanyị okaraghị abuọ asiya phọ odị. 9 Nyina i/legheri mọ abuḍighinom ikarạph ko/moọgh aani bin omạr phọ k’Enaạn? Ke/bia loor anyina. Abuọ ipesi, r’abuọ iiḅereghị ikaaghineẹn araraạr, r’abuleom emạ, r’abuminiạn riiniọm, 10 r’aruḅạ, r’abuọ ekpooko ikpoki, r’abupughọl miim, r’abuọ ikarạph asiagbạ, r’abukaaghị ruutu—r’onyọ abuẹn dị kamoọgh aani bin omạr phọ k’Enaạn o/lo. 11 Buniin anyina irọl li idiphọ phọ, kụ miwoph inyina osighẹ esi ikarạph phọ. Mitigh inyina oseenaan Enaạn. Enaạn phọ ayira metuạn Uwaloor phọ odị r’aḍien phọ aJizọs Kraist Omoọgh-we phọ esighenọm mọ nyina awe aruukuan ni. 12 Mị kameeraam ni oye lọ aḅẹm mọ, “llọ umirighan imị oḍighi i/lo,” kụ oomo araraạr kụ i/nighenaạn oye oḍighi ghan. “Ilọ umirighan imị oḍighi i/lo,” kụ iyaạr imị ki/gho emoọgh. 13 Mị kameeraam ni oye lọ aḅẹm mọ, “Eḍien elọ okuruḅakạ, kụ okuruḅakạ phọ olọ eḍien,” kụ Enaạn kepiemi ni okuruḅakạ r’eḍien. Aloor oye i/loonaan ipesi, edianaan oghueni ghan Omoọgh-we phọ, kụ Omoọgh-we phọ kụ rakueni ghan loor phọ oye. 14 Idiphọ Enaạn eḅeton bọ Omoọgh-we phọ siphẹ aḍuugh phọ kụ edị odị kasighẹ iikpọ phọ odị uḅerionom aani iyira.