Ariisi oghị omhiịn ophanyanhaạn asipuru Aḍinyạ Ituughạ Ogboku Awiki Phọ
APRIL 1-7
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 1 KORỊNT 7-9
“Adọl Egelhenyạ—Eḍighi Inmo”
(1 Korịnt 7:32) lḅeraạn imị mọ ke/moọgh ghan ooḅaghamiạn aloor. Oye lọ anịr u/pin rakuọm ghan loor odị oḍighi Omoọgh-we phọ, idị eḍighi bọ odị rawạ ghan oḅaalamị ologhi Omoọgh-we phọ.
w11 1/15 17-18 ¶3
Ḍighinhom Agey Dọl Egelhenyạ Phọ Anạ
3 Egelhenyạ ramoọgh ghan mem r’eereẹgh kapu odị m’aạl obobọ aphin. (1 Kọr. 7:32-35) Iphẹn phọ aroopoogh dị egbatanhaạn dị ketue ni engọ nyodị mem obughẹ arukumuan ph’odị epẹ erugh phọ, omoọgh ibadị arighirị, r’oḅilhẹ oḍuraan ogbị aJihova. Esi iduọn phọ, opol aKristẹn m’okạr olọgh elhegh suọ orọl adọl egelhenyạ phọ, kụ mosopha “oḍighi iduọn phọ” nyiidiphọ kụ ophoghom. Abunhọn u/kạr ugbiighi orọl egelhenyạ, kuolọ mem dị asidọl phọ enmia, r’iiḅereghị bidị usighẹ ni onmeeghian phọ bịn osopha k’epẹ ekpom mọ orọl adọl egelhenyạ, r’oḍuom ologhi m’aJihova katọl li r’abunọ. Iduọn phọ pọ bidị mosighẹ dọl phọ enmia bọ osophaam oḍighi aregelhenyạ.—1 Kọr. 7:37, 38.
(1 Korịnt 7:33) Kụ oye Iọ maphin anịr rakuọm ghan loor igbiriḅa aḅirini phọ, idị eḍighi bọ odị rawạ ghan oḅaalamị ologhi anịr phọ odị.
w08 7/15 27 ¶1
Oghaạph Ookaragh Araraạr dị Edi Rinyạ Phọ Ogẹ Bọ Oghiọm We aKorịnt
7:33—Ighẹn kụ “igbiriḅa aḅirini phọ” aPọl aghaạph bọ aghol mọ edianhaan buẹn m’aalhạn bọ? APọl rakaạph ghan siẹn phọ ilọ araraạr ooḅaghamhiạn aloor adọl aghuḍum mọ, ipẹ ewạ bọ mọ aKristẹn dị m’aalhạn omhoọgh ogbolhomaam oghị. Iphẹn phọ eḅaramaạm riiḍien, oonmenemineen, ḅilhẹ rotu orugh, kuolọ i/ḅarạm ikarạph araraạr aḅirinhi phọ ophọn aKristẹn m’oghel bọ.—1 Jọn 2:15-17.
(1 Korịnt 7:34) Bịn roḍurughan nyodị. Anịr m’esina onyanị dị ilom u/bạl rakuọm ghan loor odị oḍighi Omoọgh-we phọ, idị eḍighi bọ odị rawạ ghan oḅọgh aruzu-anyụ phọ r’uwaloor phọ odị ongọ Enaạn, kụ anịr lọ maạl ilom rakuọm ghan loor odị igbiriḅa aḅirini phọ, idị eḍighi bọ odị rawạ ghan oḅaalamị ologhi olom mọ odị.
w96 10/15 12-13 ¶14
Adọl Egelhenyạ—Eghuugh Arukumuan dị Omhạn U/pogh
14 Onyọ aKristẹn dị asighẹ dọl aregelhenyạ phọ rawaạm ilọ aloor pọ o/ḍighi opuemhi nyophọ m’aạl bọ. Odị o/tuạn “omạr phọ k’Enaạn” kụ odi bọ dọl egelhenyạ phọ, kuolọ rawạ ilọ aloor. (Matiu 19:12) M’egelhenyạ olhephiri oọny, mọ anhịr, akuọm ghan “loor oḍighi Omoọgh-we phọ,” amhoọgh ogbolhomaam ilọ “oḅaalamị ologhi Omoọgh-we phọ,” kụ oḅilhẹ ‘oḅọgh oomo aloor phọ abidị okuọm Omoọgh-we phọ, dị omạn upogh.’ Iphẹn phọ remạ ghan oḅọgh aloor ongọ okumuom aJihova r’aJizọs Kraist dị omhạn u/pogh. Mem dị eghị iduọn phọ kụ edị kotue oḅẹm mọ egelhenyạ phọ aḍighi ni rapuemhi Kristẹn phọ abuẹn m’aalhạn bọ.
Oguphogh Owạ Imạ Araraạr Dị Edi Siphẹ ABaibul Phọ
(1 Korịnt 7:11) (kụ olọ [m’agbatanhaạn olọm odị NW ] ku/wạ ghan Iephiri, aḅiIẹ ghụn aḅuIa k’oIom mọ odị!) kụ oIom anịr odị ku/seere ghan.
lvs 251
Igẹ dị opumhom
Eeni amem, abuniin aKristẹn rosaḅạr ghan ni ogbaranhaạn r’opọ bidị aalhạn bọ dị olhe emhạ ko/mite ni. (1 Korịnt 7:11) Onyọ aKristẹn atue ni aatughiạn ogheel k’abidị eeḍiạn asidọl phọ iphẹn.
• Asopha m’onọ ka/miteom mun iyaạr: Olom mọ o/meera omiteom ongọ eghun-otu phọ odị, dị ikpoki r’iyaạr olhe i/lo mun.—1 Timoti 5:8.
• Ikuphogh: Akuphogh asi esi dị opọ r’odị aalhạn bọ amhiịn mọ aghuḍum mọ odị odi esi ooto r’osooromhinheen.—Galetia 5:19-21.
• Asophoghom siya phọ oye phọ r’aJihova: Olom obobọ anhịr aḍighi idị ekparanhaạn ophodiphọ okumu aJihova.—Iiḍighi 5:29.
(1 Korịnt 7:36 NW) Kụ olọ aatughiạn mọ onọ razọ idị i/kpeanaạn r’adọl egelhenyạ phọ odị, kụ eḍighi maạr lọ odị m’atenhom ni dọl iḍoọgh, pọ odị aḍighi iphẹn: Odị aḍighi ipẹ odị rawạ bọ; i/ḍighi ikarạph. Odị aphin anhịr.
w00 7/15 31 ¶2
Nạ Katue ni Asererẹ Aḅirinhi Aroozọ dị I/ḅaạl
Esi iduọn phọ, iḍoọgh ku/kiil ghan bịn ukị uḍigh pinien loor olhoghoma aruuphuạ orolạn esi. Adọl apinien ewạ okuọm aloor, kụ osianhaan adọl phọ aḍiẹn phọ ewạ ni osi omhanhanhaạm. (Genesis 2:24) Enighẹ ghụn okori mem dị oye phọ “m’atenhom . . . dọl idoọgh”—mem dị aruuphuạ orolhạn esi rekpạr ghan iboom kụ ketue ni etir eten phọ epẹ oye rapogh ghan bọ raraạr. (1 Korịnt 7:36) P’eeghe idị eḍighi elologhi r’ikarạph dị oye dị masi ni amanạm ophin anhịr dị rawạ ni, k’akị amoọgh siyạ orolạn esi dị u/ḅaạl loor esi dị odị ko/miịn anhịr ophin!
Ibạl ABaibul
(1 Korịnt 8:1-13) Ooḅeghiọn nuụn ophogh ḍipuru phọ anyina ilọ ariiḍien lọ ophighironọm ekiạ ongọ ruru! Okạr igey ni bidị roḅẹm ghan mọ, “Oomo phọ ayira olegheri ni iyaạr.” Odọ olegheri-iyaạr phọ ophọn raaphughemi ghan oye, kụ ephomoghiạn kụ repophe ghan oye. 2 Oye lọ ragbi ghan mọ onọ alegheri ni iyaạr, pọ o/karaghị olegheri ipẹ ekpẹ bọ olegheri phọ. 3 Kụ Enaạn reloghomạ ghan ni oye lọ aphomoghiạn nyodị. 4 Oḅilẹ nuụn ophogh male isaraghị phọ! Yira olegheri ni mọ anmụny aghuḍuul phọ i/moọgh ḍiphooghu. Yira olegheri ni mọ edi bọ eniin phọ Enaạn bịn. 5 Ghalamọ ukol arumụgh edi ghan ni epẹ k’akẹ r’isiẹn ade phọ—ḅilẹ kẹn mọ ukol arumụgh dị emoọgh buọ aruru iḍiza ni—6 yira omoọgh bọ eniin Enaạn bịn, Odẹ phọ alemọgh bọ oomo araraạr phọ, opọ roḍighi bọ oḍighi phọ kongọ; ḅilẹ kẹn yira omoọgh bọ oniin Omoọgh-we aJizọs Kraist, opọ otuạn bọ kụ oIẹm oomo araraạr phọ, opọ aḍighi bọ iyaạr phọ yira odi bọ. 7 Oomo awe kụ u/legheri ephigh phọ iphẹn. Tutụ k’arodon oḍighi aruru phọ aḅarạm ni buniin awe dị bidị role eḍien lọ oḍighinom iyaạr aghuḍum rootughianạm ghan ologhi mọ bunọ role eḍien aruru. Idiphọ iitughiạn phọ abidị esi i/meerạ bọ, bidị rogbiighiom ghan ologhi mọ eḍien phọ mephuẹ bunọ. 8 Bidị u/legheri mọ eḍien i/moọgh iyaạr oḍighinom adọl phọ ayira ghisigh Enaạn. Mọ yira ole yira u/le, iyaạr ayira esi re/pe. 9 Kụ olọ imiigha ni loor. Ke/tuạn eḍien lọ ikpeanaạn inyina ole ghan bịn eḍighi dị buphẹ omeeraam mọ abidị adugh bọ komeel oḍighanaan ikarạph. 10 Eḍighi iyaạr dị oye lọ iitughiạn odị esi i/meerạ amiịn dị nạ phọ alegheri bọ iyaạr phọ kụ aleeghi eḍien obughotu aruru, iphẹn phọ ke/kparamị ologhi odị oleeghi aani eḍien aruru ḍughụm? 11 Kụ oye phọ ophọn iitughiạn phọ esi i/meerạ bọ, ophọn aKraist aghol aani bọ ni kụ amugh, atuạn olegheri iyaạr phọ anạ bịn ape. 12 Iduọn phọ nạ maḍighi bọ ikarạph aḅilẹ aphuẹ iloghi abuọ asiya phọ anạ iitughiạn phọ esi i/meerạ bọ, bịn nạ maḍighi aani ikarạph Kraist. 13 Kụ eḍighi iyaạr dị eḍien kụ keḍighi dị onyọ asiya amị kapiomạn, pọ mị ka/bạ mun enạm, obọ onyọ asiya phọ amị kutuạn ghan bọ imị apiomạn.
APRIL 8-14
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 1 KORỊNT 10-13
“AJihova Raḍighi Ghan Ni Ilọ Dị Aguanaan”
(1 Korịnt 10:13) Torobọ odẹgh ophogh dị iteẹny inyina, pọ rateẹny ghan ni weye. Kụ Enaạn reḍighi ghan ni ilọ dị aguanaan, kụ odị ka/meera mọ odẹgh ophogh dị ipel inyina iteẹny inyina. Mem lọ odẹgh ophogh iteẹny inyina, odị kingọ ni inyina inyaạm okparạm ḅilẹ r’ilọ oḍighi kụ okpetenaan.
w17.02 29-30
Asipuru Dị Abuẹn Robạl Ghan Bọ Rinyạ Phọ Ayira Opuru
Otelhedom mọ aPọl agẹ mọ aJihova “ka/meera mọ odẹgh ophogh dị ipel inyina iteẹny inyina.” (1 Kọr. 10:13) Nạ ragbi mọ iphẹn phọ reḅẹm ghan mọ aJihova rapụr ghan k’amhiịn ipẹ yira kotue bọ okparạm kụ k’asaḅạr odẹgh ophogh dị yira kosomhan ḍughụm?
▪ Ooḅeghiọn ophogh idị aḍiitughiạn phọ aḍiẹn phọ remạ ghan. Oniin onyọ umor dị oọny odị aghiigha loor apuru iduọn mọ: ‘Eḍighi edị aJihova aphụr amiịn mughumọ anhịr phọ amị r’amị kotue ni okparạm ḍughụm? Nạ ragbi mọ imite loor esi dị Enaạn m’ephụr emaanaạn mọ yoor kotue ni okparạm?’ Ephigh iyaạr okpạl omeeraam mọ aJihova kụ r’aaḅakị ghan iniin araraạr siẹn aghuḍum mọ ayira edi ni?
Omaạr oḅilhẹ ooḅeghiọn ikpo onhụ phọ aPọl ogẹ bọ siphẹ 1 Korịnt 10:13 iloghonaạn iyira ḍighaạgh okurereri mọ: Esi aBaibul otuạn kụ omeeraam mọ aJihova rapụr ghan ni kamiịn ilọ yira kotue okparạm, kụ k’adạph ipẹ phọ asophaam odọ odẹgh ophogh lọ kumeelhom iyira i/lo. Ooḅeghiọn ophogh inya araraạr phọ otuạn bọ kụ okureri iduọn phọ.
Eḅẹl phọ, aJihova angọ omhạr awe inmo eereẹgh. AJihova rawạ dị yira kụ kosaḅạr ghan eten aghuḍum lọ yira kodạph. (Deut. 30:19, 20; Josh. 24:15) Eḍighi maạr lọ yira osaḅạr egey eten, pọ yira kotue ni osoman aJihova ongọ ayira iiḅakiọm. (Prov. 16:9) Kuolọ eḍighi maạr lọ yira osaḅạr ekarạph eten, pọ yira kobugha ni iikpiạ phọ. (Gal. 6:7) Eḍighi maạr dị aJihova kụ rasaḅạr ghan odẹgh ophogh lọ k’umeelhom iyira, pọ iduọn phọ nạ ragbi mọ odị k’ophogh osooromhi inmo eereẹgh phọ ḍughụm?
Iyạl, aJihova iyira ru/ghoph ghan kasighẹ esi “ekperenhom araraạr dị ologhi u/seere.” (Eccl. 9:11) Ekperenhom oḍighima iyaạr—eeni r’iiḅaghamị dị edaphạn—ketue ni emite loor esi dị yira odi ekarạph esi mem dị i/kpeanaạn. AJizọs aghaạph ni ilọ iyaạr okururu dị emitenhaan 18 awe dị omuughu mem dị otu eedaneẹn ameelhom, odị aḅẹm mọ iyaạr phọ epẹ emite bọ i/ḍighi ogbi Enaạn. (Luk 13:1-5) I”ḍighi elologhi ootughiạn mọ Enaạn repụr ghan ni k’egbiighi emiịn oye lọ kamugh r’olọ katọl kụ egbi oteẹny amem dị iyaạr kemite ḍughụm?
Iraạr, adọl aruukuan atorobọ onyọ ayira edi aani ni siẹn oghaạph phọ ophọn phọ. Tuutughiạn mọ aSetan apạ dọl aruukuan oomo abuẹn rokumu bọ aJihova, kụ aḅẹm mọ yira ko/tue oḅạr aJihova mem dị yira osoman odẹgh ophogh. (Job 1:9-11; 2:4; Ogan. 12:10) Eḍighi maạr dị aJihova rughoph ghan iyira kasighẹ esi iniin odọ odẹgh ophogh loor esi dị amiịn mọ yira ko/tue omerenyạn, nạ ragbi mọ ipẹ phọ i/ḍighi olhoghonhaạn aḍighaạgh ipạ phọ aSetan mọ yira rokumu ghan aJihova loor asuọ dị yira komoọgh?
Inya, i/wạ mọ aJihova aphụr alhegheri torobọ iyaạr lọ kimitenhaan iyira. Iitughiạn oḅẹm mọ Enaạn kụ rasaḅạr ghan odọ odẹgh ophogh lọ yira kosomhan pọ remạ ghan mọ odị amoọgh olhegheri atorobọ iyaạr ilọ aghisigh phọ ayira. Kuolọ aḍiitughiạn phọ aḍiphẹ phọ i/lo Baibul. Okạr agey, Enaạn katue ni alegheri ilọ aghisigh phọ. (Isa. 46:10) Kuolọ aBaibul phọ aḍeenhaan mọ Enaạn reeselạ ghan ni olhegheri ilọ araraạr dị kemite ghisigh. (Gen. 18:20, 21; 22:12) Esi iduọn phọ odị aalemhi ni iikpọ ophụr olhegheri phọ r’olhọgh eegu eereẹgh ph’ayira. Ipẹ kụ k’idị yira kogon ḍighaạgh Enaạn dị emhaghamhị maạr eereẹgh ph’ayira ḅilhẹ torobọ amem rawạ ghan oḍighi oḍeenhaan araagharạ ph’odị eten dị emhunhughan?—Deut. 32:4; 2 Kọr. 3:17.
Ika kụ edị yira konaghanhạn ikpo-onhụ phọ aPọl aḅẹm bọ mọ: “Enaạn . . . ka/meera mọ odẹgh ophogh dị ipel inyina iteẹny inyina”? Siẹn phọ aPọl ra/kaạph ghan idị aJihova raḍighi ghan mem dị odẹgh ophogh ko/mite, kuolọ mem odẹgh ophogh phọ. Siẹn phọ otelhedom mọ rukparamhị ghan iyira mọ etigheri torobọ oḍegh ophogh lọ umitenhaan iyira, aJihova kulhoghonhaạn ni iyira ḍighaạgh eḍighi maạr dị yira oḍuom nyodị olhoghi. (Ps. 55:22) Ikpo onhụ iidereghị phọ aPọl iḍuạ esi iyạl ikpanhạ igey kụ emite.
Eḅẹl phọ, odẹgh ophogh phọ yira rosoman ghan bọ ‘kụ odianaan ni buọ oomo areelhe aḅirini phọ.’ Odẹgh ophogh phọ ayira, esi iduọn phọ, ramiteghunaan ni we. Odọ odẹgh ophogh phọ ophọn oḍighi odị yira k/otue okparạm—eḍighi maạr lọ yira oḍuom ni ologhi Enaạn. (1 Pit. 5:8, 9) Ophogh siikpịgh phọ edi bọ 1 Korịnt 10, kụ egbi oteẹny ekpịgh phọ 13, aPọl aghaạph aghol odẹgh ophogh phọ amitenhaan bọ we phọ Izrạl epẹ edalạ phọ. (1 Kọr. 10:6-11) Odẹgh ophogh phọ opọ phọ u/ḅẹm mọ k/omiteghunaan ghan we obobọ awe Izrạl dị okpẹ oḍuom olhoghi k/otue okparạm. Inya amem aPọl aḅẹm mọ “buniin abidị” uḅaạr emhụ. Eten okururu, abuniin abuọ Izrạl umheel oḍighanhaan ikarạph aruuphuạ loor esi dị bidị u/beḍenhọm Enaạn.
Iyạl, “Enaạn reḍighi ghan ni ilọ dị aguanaan.” Igẹ ilọ ipẹ Enaạn ezoọm ghan bọ we ph’odị emạ emiteom mọ odị raḍeenhaan ghan ni ephomhoghiạn oḅạr ph’odị k’aghị esi “abuẹn ophomhoghiạn bọ nyodị oḅilhẹ rooko ghan itọ phọ odị.” (Deut. 7:9) Igẹ phọ eḅilhẹ eḍeenhaan mọ Enaạn ra/bi ghan oguan. (Josh. 23:14) Odaphạn ipẹ ogẹ bọ ilọ e/bi ghan oguan ph’odị, abuẹn ophomhoghiạn bọ oḅilhẹ rooko ghan ito ph’odị kotue ni oḍuom olhoghi mọ odị kamunhenhi ni iyạl agạ aruguanaan ph’odị dị egbolhomaam odẹgh ophọgh dị katue ni umheelhom iyira: (1) Odị ka/meera odẹgh ophogh phọ asi esi dị yira ko/tue okparạm, ḅilhẹ (2) odị kaḍeenhaan ni “ilọ oḍighi kụ okpetenaan” odẹgh ophogh phọ.
Ika kụ idị aJihova raḍeenhaan ghan bọ buẹn oḍuom bọ nyodị olhoghi mem odẹgh ophogh ilọ oḍighi kụ okpetenaan? Ii, lọ eḍighi ni ogbi odị, odị katue ni akpor asighẹ odẹgh ophogh. Kuolọ tuutughiạn ikpo onhụ phọ aPọl aḅẹm bọ mọ: “Odị [aJihova] kingọ ni inyina inyaạm okparạm ḅilhẹ r’ilọ oḍighi kụ okpetenaan.” Esi iduọn phọ, ibadị amem odị raḍeenhaan ghan “ilọ oḍighi kụ okpetenaan” esi omiteom ipẹ ewạ bọ pidị yira otue okparạm odẹgh ophogh phọ. Ooḅeghiọn ophogh iniin odọ areten phọ ipẹ aJihova raḍighi ghan bọ ilọ yira kotue okpetenaan:
▪ Odị “ruudereghị ghan [iyira] esi oomo iminimiịn.” (2 Kọr. 1:3, 4) AJihova katue ni apoomhị ilhoghi phọ, ekpom mọ ḅilhẹ r’inyuughiom m’ayira dị eego esi Ekpo-onhụ phọ, uwaloor iigbia phọ ḅilhẹ r’iromoghiom mọ ebenhẹ phọ ekpẹ bọ oḍuom olhoghi phọ rengọ ghan bọ.—Mat. 24:45; Jọn 14:16, Rom. 15:4.
▪ Odị katue ni uuḅakị iyira dị eego esi uwaloor iigbia phọ. (Jọn 14:26) Mem dị odẹgh ophogh amite, uwaloor iigbia phọ katue ni ughiọm iyira olhoghi riisi aBaibul r’asinhị iilhogh pidị yira olegheri edạ lọ ekpẹ ogbatạn.
▪ Katue kẹn ni asighẹ ruukpaạny ph’odị aḍighinhom loor emhụ ayira.—Hib. 1:14.
▪ Odị katue ni ulhoghonhaạn iyira ḍighaạgh dị eego esi abuḅaramạ omheeraam m’ayira, buẹn phọ ikpo onhụ r’iiḍighi phọ abidị ketue bọ ni eḍighi iyaạr okparamhị ingọ iyira.—Kọl. 4:11.
Eeghe odọ iyaạr kụ okạr emhụ ikpo onhụ phọ aPọl ogẹ bọ siphẹ 1 Korịnt 10:13? AJihova kụ ra/mạ ghan kaḅilhẹ asaḅạr odẹgh ophogh lọ yira kosomhan. Kuolọ mem dị odẹgh ophogh amite siphẹ aghuḍum mọ ayira, yira kotue ni okuphom owol ilọ iphẹn phọ: Eḍighi maạr dị yira oḍuom ni olhoghi aJihova, odị ka/meera odẹgh ophogh phọ apelhom esi dị oye ka/tue akparạm; odị kungọ ni iyira inyaạm okparạm ḅilhẹ r’ilọ oḍighi kụ okpetenhaan. P’eeghe imạ ikpo-onhụ iidereghị dị aḍiitughiạn phọ aḍiẹn phọ ephạm!
(1 Korịnt 10:13) Torobọ odẹgh ophogh dị iteẹny inyina, pọ rateẹny ghan ni weye. Kụ Enaạn reḍighi ghan ni ilọ dị aguanaan, kụ odị ka/meera mọ odẹgh ophogh dị ipel inyina iteẹny inyina. Mem lọ odẹgh ophogh iteẹny inyina, odị kingọ ni inyina inyaạm okparạm ḅilẹ r’ilọ oḍighi kụ okpetenaan.
(1 Korịnt 10:13) Torobọ odẹgh ophogh dị iteẹny inyina, pọ rateẹny ghan ni weye. Kụ Enaạn reḍighi ghan ni ilọ dị aguanaan, kụ odị ka/meera mọ odẹgh ophogh dị ipel inyina iteẹny inyina. Mem lọ odẹgh ophogh iteẹny inyina, odị kingọ ni inyina inyaạm okparạm ḅilẹ r’ilọ oḍighi kụ okpetenaan.
Oguphogh Owạ Imạ Araraạr Dị Edi Siphẹ ABaibul Phọ
(1 Korịnt 10:8) Yira ipesi ku/pesi ghan, idiphọ buniin abidị opesi yogh ghan bọ kụ awe dị oḅeleghu oniin ootaany bịn omuughu ughiọm ni erapharaạr oonịr.
w04 4/1 29
Asipuru Dị Abuẹn Robạl Ghan Bọ Rinyạ Phọ Ayira Opuru
Yira konaghanhạn ika esi aBaibul phọ ephẹn mem lọ ophoghom ipẹ ogẹ bọ siphẹ Numbers 25:9?
Ibadị araraạr kụ iḍighi ni iyaạr phọ ogbaranhaạn phọ odi bọ siphẹ onhụ abạl iyạl phọ ariisi phọ iphẹn. Edị edugh onhaghanạn pọ, onhụ abạl phọ odi igbo 23,000 r’24,000, bịn engọ eepoogh dị kotue ni osighẹ oḍighinhom iyạl phọ idị.
Oḅilhẹ ooḅeghiọn ophogh enhọn odọ iyaạr. Otelhedom mọ aPọl aghaạph aghol ipẹ emitenhaan bọ Izrạl siphẹ Shittim ophurọm arurụ Kristẹn phọ abuphẹ orọl bọ Korịnt iḍiodi phọ, egbogh emạ dị olegheriom r’eten aghuḍum dị i/ḅaạl. Odị agẹ mọ: “Yira ipesi ku/pesi ghan, idiphọ buniin abidị opesi yogh ghan bọ kụ awe dị oḅeleghu oniin ootaany bịn omuughu ughiọm ni erapharaạr oonịr.” APọl akaạph bọ r’akol onhụ abuphẹ aJihova aphiemi bọ loor esi ipesi phọ, odị aḅẹm m’onhụ abạl phọ uḍighi 23,000.—1 Korịnt 10:8.
Toroboiperolbọ, aNumbers emhuoghaạph phọ 25, uḅenhị iyira mọ “Izrạl usighẹ loor abidị okuọm Baal opọ aPeor; kụ ighạgh ilhoghi phọ aJihova eemor eghị esi Izrạl.” Kụ aJihova atọ aḅenhị Mozis mọ azẹ “oomo abuẹn oḍiemiom bọ we phọ.” Kụ aMozis, ḍierị phọ aḍighaạgh phọ atọ aḅenhị buugboom iiruẹn phọ m’odaphạn itọ phọ ipẹ phọ. Ekureriom mọ, mem dị aPhinehas aḍighi bọ iyaạr amiteom, esi oghiigh onyọ Izrạl dị aphạm onyanị olọ aMidia aḍighom siphẹ amarugh phọ Izrạl, “bịn aḍuugh phọ esi eekuna.” Oghaạph phọ akureriom r’ikpo onhụ phọ iphẹn: “Abuẹn omuughu bọ esi imhinhimhiịn phọ iphẹn uḍighi iyạl dị r’inya oonịr.”—Numbers 25:1-9.
Onhụ abạl phọ oghol bọ siphẹ Numbers eḅarạm “buẹn oḍiemiom bọ we phọ” abugboom iiruẹn phọ ozẹ bọ ḅilhẹ r’abuẹn aJihova raloor kụ azẹ bọ. Eeni abuẹn oḍiemiom bọ we phọ abuugboom iiruẹn phọ ozẹ bọ umạn ni oonịr, bịn eḍighi idị onhụ abạl phọ aru amạn 24,000. Mughumọ abuḍiemiom mọ abuẹn phọ upesi aani ipesi phọ, uḍighan olhe aani rayaạl phọ, obobọ umeeraam aani iiḍighi phọ ipẹ phọ, bidị usoor aani ni ologh “osighẹ aloor abidị okuọm Baal opọ aPeor.”
Idị egbolomaam ekpo onhụ phọ “okuọm,” iniin igẹ aBaibul egbạ mọ remạ ghan “osighẹ aloor oye kụ oghuunyọm onọn oye.” Awe phọ Izrạl uḍighi we dị oḅọgh ongọ aJihova, kuolọ mem dị bidị oḅilhẹ osighẹ loor phọ abidị “okuọm Baal opọ aPeor,” bidị ukạ siya oḅọgh aloor ph’abidị ongọ Enaạn. Mem dị 700 asiạ reten, dị eego esi oyil phọ Hosea, aJihova aghaạph ilọ awe phọ Izrạl mọ: “Bidị raloor abidị ughị esi aBaal opọ aPeor, kụ oghị ghisigh oḅọgh siloor abidị ongọ iyaạr umugholoor, bịn oru oḍighi aani iyaạr abaphanyạ idiphọ iyaạr ephomoghiạn phọ abidị.” (Hosea 9:10) Oomo phọ abuẹn oḍighi aani bọ iphẹn phọ ukạr okpeanaạn iiruẹn Enaạn mem mem mọ. Odaphạn iphẹn phọ, aMozis aghiọm ologhi nmụny phọ Izrạl mọ: “Ariḍien phọ anyina imhiịn ni ipẹ aJihova aḍighi bọ idị egbolomaam Baal opọ aPeor, mọ oomo abuẹn odạph bọ Baal opọ aPeor kụ abudị aJihova Enaạn phọ anyina aphiemhi bọ siphẹ igbo phọ anyina.”—Deuteronomy 4:3.
(1 Korịnt 11:5, 6) Ḅilẹ kẹn anịr ephoph dị emụ odị okaghaạm u/kaghạ kụ aḍighom otu asiosị raaḅereghị, aḅilẹ rakaạph ghan ipẹ Enaạn eganhanami bọ, pọ mamuton eephoogh olom mọ aru bọ emụ phọ odị bịn ogbaranaạn o/lo mun esi odị r’oopheeny anịr dị aghula emụ. 6 Anịr lọ emụ odị ra/wạ ghan okaghạ pọ asamạ ghan amadạn! Kụ siẹn dị osamạ phọ r’oghula phọ eḍighi bọ umugholoor, pọ odị akaghạ ghan okaghaạm.
(1 Korịnt 11:10) Iduọn kụ iḍighi kụ anịr akaghạ ghan emụ odị oḍeenaan mọ onọ odianaan itooghị olom mọ, otuạn idiphọ aruukpaạny phọ edianaan bọ itooghị phọ Enaạn.
w15 2/15 30
Asipuru Dị Abuẹn Robạl Ghan Bọ Rinyạ Phọ Ayira Opuru
Ewạ ni dị anhịr ephogh okaaphọm kakaghạ okaghaạm mem lọ ratughemhị oye Baibul esi dị okaaphọm dị aḍighi olhephiri oọny odi?
▪ Siphẹ agạ “Asipuru Dị Abuẹn Robạl Ghan Bọ Rinyạ Phọ Ayira Opuru,” dị omiteom Watchtower aJuly 15, 2002, uḅẹm mọ onyọ umaranhi akaghạ ghan emhụ odị mem lọ r’atughemhị oye Baibul ghisigh okaaphọm dị aḍighi olhephiri oọny, mọ maḍiiny muụm obobọ ko/ḍiiny. Uḅilhẹ ni owaaghị ophogh oghaạph phọ ophọn kụ omiịn mọ ewạ nị ooḅenhion.
Eḍighi maạr lọ onyọ umor phọ adạph bọ onyọ umaranhi phọ oghị otughemhị oye dị odị ratughemhị ghan ni Biabul m’aḍiiny ni muụm, pọ ewạ ni m’onyọ umaranhi phọ akaghạ emhụ odị. Oḍighi iduọn phọ kụ edị odị kaḍeenhaan olhọgh eegu iikolhobian phọ aJihova ilọ aruw-emhụ siphẹ ookpomhoghan aKristẹn phọ, idị eḍighi bọ odị rakumuan aani ghan r’ukumuam dị eḍighi dool abumor phọ. (1 Kọr. 11:5, 6, 10) Odị atue kẹn ni aḅenhị onyọ umor phọ otughemhị, eḍighi maạr lọ masini amhanhanhaạm kụ katue ni aḍighi iduọn phọ.
Ḍierị phọ aḍighaạgh phọ, eḍighi maạr dị olhephiri oọny okaaphọm mọ adạph bọ onyọ umaranhi phọ oghị otughemhị oye Baibul phọ muụm k/oḍiiny, kụ k/olom odị, siẹn phọ aBaibul phọ o/kpaariọm nyodị okaghạ emhụ. Toroboiperolbọ, ooruẹn olhoghi abuniịn abumarani atue ni anyu bidị okaghạ eeḍiạn asidọl phọ iphẹn.
Ibạl ABaibul
(1 Korịnt 10:1-17) Buọ asiya, ikiọm ologhi ipẹ emitenaan bọ burudẹ abụrudẹ phọ ayoor odạph bọ Mozis. Bidị uḍigh ḍibuo ootụ dị Enaạn emiteom, kụ oomo phọ abidị uḅeẹny ni Ophiịny Igbilha phọ r’ewoọr 2 Ootụ phọ r’ophiịny phọ kụ amuụm dị owurogh mọ bidị oḅophoghạn odạph Mozis. 3 Oomo phọ abidị ule ni eniin phọ eḍien aruwaloor phọ. 4 Ḅilẹ kẹn oomo phọ abidị uphughọl li muniin amuụm aruwaloor phọ. Bidị uphughọl ghan muụm aḍighiigh aruwaloor phọ edạph ghan bọ bidị. Aḍighiigh phọ pọ aKraist r’aIoor odị. 5 R’iduọn phọ ni bịn bidị uphin ni oIoghi Enaạn dị arumụ ogbogh opol awe epheeghu ni epẹ edalạ phọ. 6 Oomo phọ araraạr phọ iphẹn phọ ilo osuemị ayira ologhi, ophurọm arurụ ayira mọ ikarạph iyira ki/phụ ghan idiphọ ephụ ghan bọ bidị, 7 mọ kuu/ḅereghị ghan raraạr lọ okaaghị, idiphọ buniin abidị ooḅereghị ghan bọ. Idiphọ aḍinyạ iigbia phọ eḅẹm bọ mọ, “Awe phọ urọI ude oIe ghan ophughọI, kụ oḅerenu oghẹr iḅạ.” 8 Yira ipesi ku/pesi ghan, idiphọ buniin abidị opesi yogh ghan bọ kụ awe dị oḅeleghu oniin ootaany bịn omuughu ughiọm ni erapharaạr oonịr. 9 Yira ku/ḍighi ghan ilọ odẹgh Omoọgh-we phọ idiphọ buniin abidị oḍighi bọ kụ iḍigh-eḍum mọ eḍaanyọgh ghan bọ bidị ezẹ. 10 Ke/nụn ghan inụn, idiphọ buniin abidị onụn ghan bọ kụ ookpaạny aḍuugh phọ aphiemi bọ. 11 Oomo phọ araraạr phọ iphẹn phọ imiteghunaan bidị ilọ osuemị abunọn ologhi, kụ ogẹ bọ oseere ophurọm arurụ ayira, idị eḍighi bọ yira odi mem dị aruukuna phọ reteẹny. 12 Oye lọ ragbi mo onọ ameerạ ni amiigha ni loor, obọ odị kameel ghan bọ! 13 Torobọ odẹgh ophogh dị iteẹny inyina, pọ rateẹny ghan ni weye. Kụ Enaạn reḍighi ghan ni ilọ dị aguanaan, kụ odị ka/meera mọ odẹgh ophogh dị ipel inyina iteẹny inyina. Mem lọ odẹgh ophogh iteẹny inyina, odị kingọ ni inyina inyaạm okparạm ḅilẹ r’ilọ oḍighi kụ okpetenaan. 14 Iiḅi asiya amị, esi iduọn phọ, ikporiọn raghaạgh ooḅereghị ghan aruru. 15 Mị asighenọm mọ nyina awe oIoghi ni. Imitenom ezue iloghi phọ anyina kụ eeḅeghiọn iphẹn mị rakaạph bọ ephogh. 16 Oḅophoghạn ophugholọm oniin ophaạI amiim mọ yoor oghol ghan bọ rongọ ḍisẹph Enaạn—iduọn phọ pọ yira kụ ro/pin bin asuọ iḅaạl phọ aKraist ḍughụm? Oḅophoghạn ole eniin eeḅoghoḍi abrẹd phọ yoor opariọn bo—iduọn phọ pọ yira kụ ro/pin bịn asuọ aIoor phọ odị ḍughụm? 17 Idiphọ abrẹd phọ yira roḅophoghạn ghan bọ koIe aḍighi bọ ni eniin eeḅoghoḍi, oomo phọ ayira, aḍita phọ emuza-muza, pọ aḍiniin aIoor phọ ni.
APRIL 22-28
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 1 KORỊNT 14-16
“Enaạn Bịn kụ ‘Kepogh Oomo’ Awe Emadạn”
(1 Korịnt 15:24, 25) Eekuna phọ reteẹny, kụ aKraist apiemi oomo abulọ omoọgh iikpọ odaaghiọm aruwaloor r’awe, kụ aḅọgh omạr phọ alọgh ḍighaạgh Enaạn Odẹ phọ. 25 AKraist phọ kụ katooghị ni raraạr tutụ [Enaạn NW ] makpạr apu oomo abumulọgh ḍien phọ odị aḍighi bidị ikasị okpasaghiọm aruwol.
w98 7/1 21 ¶10
‘Kopiemhi Ni Ḍuugh’
10 “Eekuna phọ” pọ eekuna Itooghị Oonịr Asiạ phọ aKraist, mem dị aJizọs rosooromi aloor k’aḅọgh Itooghị Omhạr phọ angọ Enaạn Odẹ phọ odị. (Ogananami 20:4) Mem mọ amuẹn phọ igbiighi phọ Enaạn mọ onọ “kasighẹ oomo araraạr phọ edi bọ k’akẹ r’isiẹn aḅirini phọ aakpomoghi kụ aKraist aḍighi uw-emụ” m’emunughan. (Efesọs 1:9, 10) Eḅẹl phọ pọ, aKraist kapiemi ‘oomo itooghị ḅilhẹ r’iikpọ itooghị’ dị egbagharạn eghị esi igbiighi Itooghị phọ Enaạn Epeleghiom bọ. Iphẹn phọ epeleghiom ighạgh ilhoghi phọ ipẹ koḍighinom bọ siphẹ Amagedọn. (Ogananami 16:16; 19:11-21) APọl aḅẹm mọ: “AKraist phọ kụ katooghị ni raraạr tutụ [Enaạn] makpạr apu oomo abumulọgh ḍien phọ odị aḍighi bidị ikasị okpasaghiọm aruwol. Aḍuugh kụ onyọ amulọgh ḍien dị kopiemi osughanam omạn.” (1 Korịnt 15:25, 26) Ii, oomo eeteḅa ikarạph phọ Adam r’aḍuugh m’osighẹ. Idị ekạr emoọgh maạr oḍighinom, pọ Enaạn k’epokoromi ni oomo ‘iiḍi [iitughiạn],’ esi oḅerion abuẹn momuughu bọ ongọ aghuḍum.—Jọn 5:28.
(1 Korịnt 15:26) Aḍuugh kụ onyọ amulọgh ḍien dị kopiemi osughanam omạn.
kr 237 ¶21
Omhạr phọ K’amunhenhi Ogbi Enaạn Siẹn Ade phọ
21 K’okaạph ika, ilọ iyaạr phọ e/moon rekọm ghan bọ, iikpiạ phọ ikarạph k/otue bọ okpetenhaan—aḍuugh? Onyọ “amulọgh ḍien” ph’ayira, eeni amem r’akpoghotiom ghan bọ omhạr awe phọ u/munughan bọ. (1 Kọr. 15:26) Kuolọ nạ ragbi mọ aḍuugh ekạr ri eḍighi igbogh iiḅaghamhị esi aJihova ḍughụm? Lọgh elhegh ipẹ Isaiah aghaạph bọ mọ: “Odị k’amịn ḍuugh k’agee-pọ, k’Uw-emhoọgh Itooghị phọ aJihova k’agbuurogh ni izin oomo aghisigh asighẹ.” (Isa. 25:8) Nạ atue ni agbiom ologhi amiịn ipẹ phọ? Amaḍi k/etọl mun, ekarạph eḍum i/lo mun, emoghi okururu i/lo mun! Idị egbạgh r’iphẹn phọ—emoghi ibo kụ k’etọl mem dị aJihova ramuneni iikiạ aruguanaan ph’odị oḅulhemi abuẹn m’omuughu bọ ongọ aghuḍum! (Bạl Isaiah 26:19.) Ekureriom mọ, oomo phọ ariiphina phọ aḍuugh ekọm ghan bọ k’ooḍighion ni.
(1 Korịnt 15:27, 28) “Enaạn mesighẹ oomo araraạr eḍighi ikasị okpasaghiọm aruwol phọ odị.” Iikia i/lo mọ Enaạn phọ esighẹ bọ oomo araraạr phọ eseere eeḍiạn aKraist r’aloor odị i/ḍighom aani siphẹ “oomo araraạr” phọ. 28 Kụ mem dị mosighẹ oomo araraạr phọ oseere eeḍiạn aKraist, Oọny phọ r’aloor odị kaseere aani loor eeḍiạn Enaạn phọ epẹ eḅọgh bọ oomo phọ idị engọ nyodị. Enaạn bịn kụ kepogh oomo phọ idị emadạn.
w12 9/15 12 ¶17
Eephọ dị ketọl Oonịr Asiạ—Kụ Eḅilhẹ Epelhom!
17 Enhọn imạ eten oghaạph ipẹ ketọl bọ mem mọ amuphẹ phọ i/lo, epel ikpo-onhụ phọ iphẹn mọ ‘Enaạn bịn kụ kepogh oomo awe emadạn.’ Iphẹn phọ remạ ghan eege? Tuutughiạn aḅulha omạn siphẹ oghoony phọ Iden mem mọ Adam r’Iv omunughan bọ, oḍighi aani bọ ni pakirị eghun otu phọ aJihova eḍighi bọ elọ eephọ r’amuuḅọph. AJihova Uw-emhoọgh Itooghi phọ kụ akạr ghan atooghị angọ oomo olhẹm mọ odị, ruukpaạny r’awe. Bidị urue ghan ni oghaaphạn r’odị, ooseeny nyodị, kụ odị aḅilhẹ ghan kẹn asẹph bidị. Odị kụ aphogh ghan ‘oomo awe amadạn.’
Oguphogh Owạ Imạ Araraạr Dị Edi Siphẹ ABaibul Phọ
(1 Korịnt 14:34, 35) anmariịr phọ oḅoroghian ghan mem lọ ookpomoghan! Omirighan ni bidị oghaạph ghan oghaạph, idiphọ iilogh phọ aMozis eḅẹm bọ mọ bidị ku/ḍighi ghan ruw-emụ. 35 lyaạr lọ bidị u/legheri, opuru ghan burulom mọ abidị ologhi otu! Eḍighi ni umugholoor dị anịr ephoph kaghaạph oghaạph mem lọ ookpomoghan.
w12 9/1 9, igbe
Otelhedom mọ APọl Agbiemi ni Nmariịr Oghaạph ghan Iyaạr Ḍughụm?
Otelhedom mọ aPọl aḅẹm mọ “anmariịr phọ oḅoroghian ghan mem lọ ookpomoghan.” (1 Korịnt 14:34) Iduọn phọ raḅẹm ghan m’eeghe? Odị apogh asoore olhegheri iyaạr phọ abidị ḍughụm? Eeye. Okạr rokaạph, odị agbor ghan ni aghol ilọ imạ itughemhị anmariịr phọ. (2 Timoti 1:5; Taitọs 2:3-5) Siphẹ aḍinyạ phọ odị agẹ bọ aghiọm we aKorịnt, aPọl o/ḅenhị ogina anmariịr bịn, kuolọ oomo awe phọ abuẹn omoọgh bọ inmo arunhụ aḍiaḅạ r’imiịn mọ “oḅoroghian ghan” mem lọ onhọn umor rakaạph iyaạr. (1 Korịnt 14:26-30, 33) Eeni, iḍighi idị abuniin anmariịr phọ, loor oophugh omoom omeeraam m’abidị, osoph ghan onhụ olọ rakaạph opuru aḍipuru olhọgh, idiphọ emite ghan bọ ni pakiṛi aḅirini phọ opọ. Osophoghom igbaragbarạ phọ ipẹ phọ, aPọl aḅenhị bọ bidị mọ “opuru ghan burulom mọ abidị ologhi otu.”—1 Korịnt 14:35.
(1 Korịnt 15:53) IIọ remugh ghan kesighẹ ilọ aḍuugh i/loonaan kụ eenmenan, Ilọ kemiịn ḍuugh kesighẹ ilọ ḍuugh ke/miịn kụ eenmenan.
it-1 1197-1198
Ilọ Aḍuugh I/loonaan
Dị oḅeton esi aḍuugh ph’abidị aghighimaạm aani nyophọ aJizọs, abuẹn k’oḅophoghạn bọ r’aJizọs otooghị, k”oḅeton ongọ ghuḍum k’agee-pọ idiphọ olẹm aruwaloor bịn, kuolọ koḅeton kụ oonmenhemhi ilọ ḍuugh ke/miịn ḅilhẹ r’ilọ aḍuugh i/loonaan mun. Dị m’orọl li, okumuan eten dị ekpẹ oḍuom olhoghi, kụ omughom r’aloor awe dị reḅọr ghan, nyiidiphọ bidị m’oonmenan loor aruwaloor dị aḍuugh i/loonaan mun, idiphọ aPọl amaạr bọ amạ aagholhomi siphẹ 1 Korịnt 15:42-54. Oonmenan ilọ ḍuugh ke/miịn remạ ghan odọ aghuḍum mọ opọ bidị k’okelhọm bọ, opọ eekuna k”etọl bọ ḅilhẹ k/otue bọ opiemi, ḍierị phọ aḍighaạgh phọ, oonmenan ilọ aḍuugh i/loonaan phọ remạ ghan oye phọ obobọ loor phọ aḍiphẹ Enaạn k’engọ bọ bidị, loor dị k/etue mun eḅọr, e/pụ obobọ oogulemi. Esi iduọn phọ ekịgh mudị Enaạn kengọ bidị iikpọ dị kotue ghan ni otọl okiọm ghisigh dị iyaạr bidị i/loghonaạn ḍighaạgh, dị k’ebeḍenọm enọn iyaạr omoọgh iikpọ orolọm idiphọ onọn olhẹm odị, buẹn iphulupul phọ r’aruwaloor phọ. Iphẹn phọ ekạr eḍeenhaan mọ Enaạn eḍuom ni bidị olhoghi. Omooghạ aloor ph’abidị ḅilhẹ r’aloor dị aḍuugh i/loonaan phọ, i/sighẹ bidị esi iiḅakiọm Enaạn; kụ idiphọ Oḍiemiom m’abidị Kraist Jizọs, bidị k’osooromi ghan ni loor ongọ ogbi r’iiḅakiọm Odẹ ph’abidị.—1Kọr 15:23-28.
Ibạl ABaibul
(1 Korịnt 14:20-40) Buọ asiya, isereghi iitughiạn anmụny, emoọgh iitughiạn awe dị momanạm, kụ esi Iọ eḍighi iIọ ikarạph itọI ghan dọl ipuụny anmụny. 21 Ogẹ ni siphẹ aḍinyạ iigbia phọ mọ, “Omoọgh-we phọ aḅẹm mọ, ‘Mị kasighẹ weye dị roḅạ onhụ dị u/naghạn kụ akaaphọm aḅenị we phọ abuẹn. Mị kasighẹ ni iidoronụ aruuruen kụ akaaphọm, kụ bidị imị ku/naghanạn ni.” 22 Esi iduọn phọ, aruunmo oḅạ ghan onọn onhụ dị u/naghạn eḍighi eḍeenaan ophurọm arurụ abuphẹ u/meeraam bọ k/abuphẹ momeeraam bọ, kụ aruunmo oghaạph ghan ipẹ Enaạn egananami bọ eḍighi eḍeenaan oḅaaIamị oIoghi abuphẹ omeeraam bọ k/abuphẹ u/meeraam bọ. 23 Eḍighi iyaạr dị oomo abuọ asiosị phọ oru ookpomoghan, kụ oye ye amiigh oḅạ ghan onọn onhụ dị ko/naghạn, kụ abuniin oopho awe r’abudị u/meeraam oru oḍigh aani, bidị ko/ḅẹm mọ nyina reepheḍu ḍughụm? 24 Kụ eḍighi iyaạr dị oomo awe phọ rokaạph ipẹ Enaạn egananami bọ kụ oniin oye lọ u/meeraam ḅilẹ m’oopho oye aru aḍigh aani, odị katuạn ni ipẹ dị anaghạn bọ aloghoma ikarạph phọ odị. Kosighẹ oomo phọ ipẹ dị anaghạn bọ kụ osophonaan nyodị ooruẹn. 25 Kogananami ni iitughiạn ibooghiạn phọ odị, kụ odị aḅololo ghisigh Enaạn aaseeny agbạ amiteom mọ, “lgey ni, Enaạn edi ni ogbo phọ anyina.” 26 Buọ asiya, emụ iphẹn phọ eeghe? Mem lo nyina eekpomoghan iiḅereghị, oye ye aakolobian ni. Ooni oye apạm ḍuọr, ooni iyaạr otughemị, ooni idị Enaạn egananami eḍeenaan nyodị, ooni amoọgh iyaạr oghaạph onọn onhụ dị u/naghạn, kụ ooni ogbạ emụ phọ. Iḍighi ghan oomo phọ inẹ ilọ ooneghiọm abuọ asiosị phọ ophophe. 27Eḍighi iyaạr dị rowạ oḅạ onọn onhụ dị ko/naghạn, awe phọ ku/pel ghan iraạr mem, kụ oniin aghaạph ghan aseere kụ ophorị phọ asighẹ aani, kụ onọn oye ameerạ ogbạ ghan emụ phọ! 28 Kụ eḍighi iyaạr dị oye ogbạ ghan emụ phọ u/lo, opọ rawạ bọ oḅạ onọn onhụ phọ aḅoorian bịn aghaạphọm ologhi aḅenị Enaạn! 29 IyạI m’iraạr Iọ engọ oghaạph ipẹ Enaạn egananami bọ bịn kụ oghaạph ghan kụ abuerị phọ ooḅeghiọn oghaạph phọ abidị ophogh! 30 Eḍighi iyaạr dị ephum onọn oye dị arọl aani ude oghaạph ipẹ Enaạn egananami bọ eḍeenaan nyodị, ophorị phọ asophe ghan nyopọ odị! 31 Oomo phọ anyina, oniin atum nyoniin, etue ni ekaạph ghan ipẹ Enaạn egananami bọ, obọ aḍita phọ otuughạ ghan oḅilẹ omoọgh akpọ ologhi. 32 Olọ amoọgh ruunmo oghaạph ghan ipẹ Enaạn egananami bọ kụ kapamaghạn ruunmo phọ odị, 33 idị eḍighi bọ Enaạn imạgh iyira mọ orolọm eephọ k/iwalawalạ. Esi eḍighinom iyaạr abuọ oomo asiosị phọ Enaạn, 34 anmariịr phọ oḅoroghian ghan mem lọ ookpomoghan! Omirighan ni bidị oghaạph ghan oghaạph, idiphọ iilogh phọ aMozis eḅẹm bọ mọ bidị ku/ḍighi ghan ruw-emụ. 35 lyaạr lọ bidị u/legheri, opuru ghan burulom mọ abidị ologhi otu! Eḍighi ni umugholoor dị anịr ephoph kaghaạph oghaạph mem lọ ookpomoghan. 36 Kụ ekịgh mudị oghaạph phọ Enaạn aḍuạ esi anyina kụ aru bọ ḍughụm? Ḅilẹ aru iteẹny inyina bịn ḍughụm? 37 Oye lọ agbiighiom ologhi mọ onọ oye dị rakaạph ghan ipẹ Enaạn egananami bọ eḍeenaan nyinọ ḅilẹ mọ onọ amoọgh ruunmo aruwaloor, aloghoma mọ Omoọgh-we phọ kụ atọ iphẹn mị agẹ bọ riruomaan inyina! 38 Kụ ke/lọgh elegh olọ iphẹn phọ elegh u/lọgh. 39 Buọ asiya, esi iduọn phọ, iseere ologhi oghaạph ghan ipẹ Enaạn egananami bọ, kụ ke/mirighan bulọ roḅạ ghan onọn onhụ dị ko/naghạn. 40 lḅoonomị ghan oomo phọ inẹ eḍighi ekuamị.
APRIL 29–MAY 5
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 2 KORỊNT 1-3
“AJihova—‘Enaạn phọ Eḍighi bọ Zin Oomo Iidereghị’ ”
(2 Korịnt 1:3) ltu ongọ ḍisẹph Enaạn r’Odẹ pho aJizọs Kraist Omoọgh-we phọ ayira, Odẹ onmạ ighirigiir, Enaạn phọ eḍighi bọ zin oomo iidereghị phọ,
w17.07 13 ¶4
Iḍighan “Bulọ Romoghi Emoghi Aani”
4 Odẹ onmạ ighirigiir phọ ayira r’aloor masoman aani ghan ni ḍuugh awe ephomoghiạn odị, iduọn Ebraham, Aizịk, Jekọb, Mozis, r’Uw-emhạ phọ Devid. (Num. 12:6-8; Mat. 22:31, 32; Iiḍighi 13:22) Ekpo-onhụ phọ Enaạn ikparamị iyira mọ aJihova rawạ ghan r’ikpukpụ—amoọgh ḍiḅeraạn—ilọ amem mọ amuphẹ odị kaḅulhemi bọ bidị angọ ghuḍum. (Job 14:14, 15) Bidị komoọgh oḅaạl olhoghi r’omoon aloor dị amunughan. Tuutughiạn kẹn mọ, Ooḅi Oọny phọ Enaạn—“opọ akạr bọ aḅeraạn nyodị”—amhugh ḍuugh iminimhiịn. (Prov. 8:22, 30) Ikpo-onhụ k/etue ekaạph eephina phọ aJihova aloghoma bọ.—Jọn 5:20; 10:17.
(2 Korịnt 1:4) Odị kụ ruudereghị ghan iyoor esi oomo iminimiịn, obọ yoor orue osighẹ odọ iidereghị phọ Enaạn riidereghiọm ghan bọ iyoor kụ oodẹreghiọm aani buphẹ romiinọm bọ iminimiịn kirokirọ phọ.
w17.07 15 ¶14
Iḍighan “Bulọ Romoghi Emoghi Aani”
14 Eten dị onaghanạn ni, rekpạr ghan ni olhegheri iyaạr oḅenị oye dị emoghi m’aạr boọr. Toroboiperolbọ, aBaibul phọ aḅẹm mọ “anem opọ asụ bọ olhoghi phọ reemanami ghan.” (Prov. 12:18) Ibadị m’omoọgh ni ikpo onhụ iidereghị oḅenị aani abunọn siphẹ abrochure phọ When Someone You Love Dies. Ii, ibadị amem, ekạr iyaạr olhoghonaạn aḍighaạgh reḍighi ghan oḍighan ‘abulọ romoghi omoghi aani.’ (Rom. 12:15) AGabi, anhịr dị olom amhugh aḅẹm mọ “izin kụ meḍighi ikpo onhụ ekpom mọ amị. Epẹ kụ iyaạr phọ mị ramoọgh ghan bọ iidereghị mem lọ arighirị amị romoghi ramị. Mem dị eḍighi iduọn phọ, mị r/aloghoma ghan mun dị ogina amị bịn odi dọl emoghi.”
Oguphogh Owạ Imạ Araraạr Dị Edi Siphẹ ABaibul Phọ
(2 Korịnt 1:22) Elọgh Uwaloor Iigbia phọ oḍighi eIegh siphẹ iloghi phọ ayira, emeremị nyodị enye oomo araraạr phọ dị useenaan bọ iyira.
w16.04 32
Asipuru Dị Abuẹn Robạl Ghan Bọ Rinyạ Phọ Ayira Opuru
Eeghe kụ “elegh” phọ ḅilhẹ r’omeerạ “enye” phọ Enaạn engọ bọ Kristẹn phọ osagharạn bọ uwaloor iigbia phọ?—2 Kọr. 1:21, 22.
▪ omeerạ enye: Odaphạn iniin arinyạ, ekpo onhụ aGrik phọ ogbạ bọ mọ omeerạ “enye” siphẹ 2 Korịnt 1:22 eḍighi “ekpo onhụ dị edaphạn olhogh abumuul ḍighi” reḍeenaan ghan “iḅẹl opol ikpoki dị ongọ dị oguanaan, dị ophaghạn, dị okpẹ, idiphọ opol ikpoki iyaạr dị rowạ ogho, bịn m’eeroghi iyaạr phọ rowạ bọ ogho eseenaan opọ k’ako bọ, obobọ memeremi iyaạr phọ.” Idị egbolomaam buẹn osagharạn bọ uwaloor phọ, okaraghị iikpiạ phọ abidị, okaạph siphẹ 2 Korịnt 5:1-5 m’eḍighi okpologhiạn aloor aruwaloor phọ r/eḅọr ghan bọ. Iikpiạ phọ eḅilhẹ kẹn ni eḅarạm inmo aghuḍum e/mugh ghan.—1 Kọr. 15:48-54.
Grik arodon, egbaạm dị eghịgh nyeẹn phọ rosighẹ ghan koḍighinom oghaạph ilọ agulu dị oguanham pinien. Ophọn phọ aḍighi oghaạph omaaniọm ilọ abuẹn koḍighi aani bọ pakirị anhịr phọ aKraist otomaạm bọ.—2 Kọr. 11:2; Ogan. 21:2, 9.
▪ Elhegh: Mem dị eten, elhegh phọ iḍighi ghan iyaạr dị olhegheriom ghan emhoọgh, iyaạr dị eru inẹ, obobọ omeeraam. Eten dị omaaniọm, buẹn osagharạn bọ uwaloor phọ, olegheriom obobọ ologhọm bidị “elhegh,” uwaloor iigbia phọ idiphọ iyaạr emoọgh Enaạn. (Efẹ. 1:13, 14) Ii, elhegh phọ ephẹn phọ r/eḍighi ghan edị k/otue ogbuurogh, tutụ oye phọ amugh eten dị ekpẹ oḍuom olhoghi obobọ kụ egbi oteẹny amem mọ igbogh iiḅaghamị phọ k’ekamaan bọ.—Efẹ. 4:30; Ogan. 7:2-4.
(2 Korịnt 2:14-16) Kụ aḍisẹph edianaan ni Enaạn. Odị mukpotonọm iyoor phọ mosiph bọ oḅaranaạn Kraist ḍita igiri okpạr opu phọ odị. Usighẹ ghan iyoor idiphọ eeḅi eḍu dị ephur reeIeghaan oomo arikpisi, mọ oḍighi idị olegheri ilọ aKraist keeleghaan aani. 15 Yoor kụ eeḅi eḍu insẹns phọ aKraist rasuanaan ghan bọ Enaạn. Eḍu phọ repur ghan ni keteẹny buphẹ ropẹl bọ kotene r’abuphẹ ropeeghu bọ. 16 Esi abuphẹ ropeeghu bọ, eḍu phọ elọ aḍuugh-aḍuugh; esi abuphẹ ropẹl bọ kotene, eḍu phọ elọ aghuḍum. Anhiạn nuụn kụ amanạm bọ omeerạ oḍighi iphẹn phọ?
w10 8/1 23
Nạ Alegheri Ni?
Otelhedom mọ aPọl aghaạph ghan aghol eeghe oḅẹm mọ “igiri okpạr opu”?
▪ APọl aḅẹm mọ: “Enaạn . . . mukpotonọm iyoor phọ mosiph bọ oḅaranaạn Kraist ḍita igiri okpạr opu phọ odị. Usighẹ ghan iyoor idiphọ eeḅi eḍu dị ephur reeIeghaan oomo arikpisi, mọ oḍighi idị olegheri ilọ aKraist keeleghaan aani. Yoor kụ eeḅi eḍu insẹns phọ aKraist rasuanaan ghan bọ Enaạn. Eḍu phọ repur ghan ni keteẹny buphẹ ropẹl bọ kotene r’abuphẹ ropeeghu bọ. Esi abuphẹ ropeeghu bọ, eḍu phọ elọ aḍuugh-aḍuugh; esi abuphẹ ropẹl bọ kotene, eḍu phọ elọ aghuḍum”—2 Korịnt 2:14-16.
Siẹn phọ otelhedom mọ akaạph ghan rakol eḍighinom iyaạr abuọ aRom dị oḍigh ghan ḍikoọl igiri oghuenhi ogbogh oye eghạm dị akpạr apu mulọgh ḍien eelhe phọ. Mem lọ roḍighi raraạr phọ iphẹn phọ, uphạm ghan raraạr ibum mọ r’abuọ ikoli phọ oreleom dị awe omiịn, kụ sinạm mọ uphạm ghan oghimọm ekpisi ophinyonọm arikiạ phọ, ḅilhẹ ogbogh oye eghạm mọ akpạr bọ apu r’aḍita phọ odị umoọgh ghan iiseeny awe phọ. Mem dị rorelhe iduọn phọ romạn, kụ osighẹ sinạm mọ opinyonọm rikiạ, kụ eeni ozeeghị ibadị abuọ ikoli phọ.
Oghaạph otomaạm “eeḅi eḍu aKraist” remạ ghan bọ ghuḍum esi abuniin r’aḍuugh esi abunọn “eeni usighẹ esi eḍighinom iyaạr abuọ aRom dị osuughị ghan insẹns siphẹ aḍikoọl igiri phọ rekị bọ,” iphẹn kụ idị International Standard Bible Encyclopedia phọ aghaạph. “Eḍu phọ remạ ghan bọ okpạr opu abuẹn ee bọ elhephiri phọ, eeni ighiọm ghan ologhi buẹn odi bọ dọl arebenẹ phọ ilọ aḍuugh phọ rekori bọ bidi”.
Ibạl ABaibul
(2 Korịnt 3:1-18) lphẹn phọ ekịgh mudị yoor rootuma kẹn ni ḍughụm? Ekpẹ ogẹ ilọ aroozọ phọ ayoor oruom anyina ḍughụm? Kụ nyina kụ kegẹ ilọ aroozọ phọ ayoor idiphọ abunọn awe rowạ ghan bọ mọ ogeanaạn bunọ phọ ḍughụm? 2 Nyina r’aloor anyina kụ aḍinyạ oghaaphaạn phọ yoor omoọgh bọ. Ogẹ ḍinyạ phọ aḍiẹn siphẹ iloghi phọ ayoor mọ oomo awe omiịn oḅilẹ aạl olegheri. 3 Oomo awe phọ romiịn ni mọ nyina kụ aḍinyạ phọ aKraist yoor osighẹ bọ oruom aḅirini phọ. Ḍinyạ phọ u/gẹ loor eeḅoghoḍi aḍighiigh, ugẹ ghụn siphẹ iloghi phọ awe. U/geọm iki, ugeọm ghụn Uwaloor Enaạn phọ edi ghan bọ. 4 Odọ phọ ophọn kụ oḍuom ologhi phọ yoor otuạn bọ Kraist omoọgh esi Enaạn. 5 Iyaạr loor ayoor i/lo osighẹ oḅemọm mọ yoor omạn ni oḍighi oḍighi phọ ophọn. Ipẹ yoor omạn bọ iḍuạ ḍighaạgh Enaạn phọ kụ eru. 6 Odị kụ uḍighi bọ iyoor we dị omạn oghaạph ghan ilọ imoom iyọ phọ oḅenị awe. Ikọ imoom iyọ phọ u/koọm iilogh dị ogeeghị oseere. Ikọ phọ iIọ aruwaloor. Iilogh phọ ogeeghị bọ oseere rekọm ghan ḍuugh, kụ Uwaloor phọ rangọ ghan ghuḍum. 7 Mem mọ rongọ bọ iilogh phọ okaaghị bọ loor iiḅoghoḍi asighiigh phọ, aḍiḅaạl eegu phọ Enaạn isoor ri. Ghalamọ idiphọ meḍim bọ ni remineen, bịn aghisigh phọ aMozis araphạn ni aphughạn dị aweye phọ lzrạl u/mighirom upogh nyodị ukiririom. Iyọ phọ rekom ghan bọ ḍuugh phọ keseere bịn usighẹ ni ḍiḅaạI eegu dị eleeny idiphọ kụ oghirom, 8 kụ eghiọm ologhi ḍiḅaạI eegu iyọ phọ Uwaloor ligbia phọ aghiran bọ. 9 Aḍiḅaạl eegu iyọ phọ oghiran bọ kụ awe omuughu ghan bọ bịn ileeny ni idiphọ, kụ eghiọm ologhi ḍiḅaạl eegu iyọ phọ resighẹ ghan bọ mọ abuẹn awe aruukuan ni. 10 Omaạr ogbiighi, aḍiḅaạl eegu phọ ogananami bọ mem mọ opọ phọ i/mạn omaaniọm aḍinmananmanạ phọ aḍiẹn anyiidiphọ. 11 Ipẹ i/bia bọ bịn aḍiḅaạl eegu phọ iIeeny ni idiphọ, kụ eghiọm oIoghi ḍiọ aḍiphẹ ketọI bọ k’agee-pọ phọ. 12 Oḍuom ologhi phọ ophọn phọ yoor omoọgh bọ kụ ungọ bọ iyoor akpọ oIoghi oghaaphọm ghan phọ 13 Yoor u/kịgh aani Mozis phọ azua bọ ghisigh phọ odị amanạ phọ, obọ aweye phọ IzrạI komiịn ghan bọ dị aḍiḅaạI eegu aghisigh phọ odị meḍim remineen. 14 Kụ arị iloghi phọ abidị eḍuughi ni dị tutụ k’arodon phọ ni bịn bidị aạI rinyạ igbaany iyọ phọ amanạ enaghanạn phọ ozu bọ iIoghi phọ abidị k”ozughuronu ni. Rozughuron ghan amanạ enaghanạn Iọ ozu ologhi oye kosighẹ, mem Iọ odị maḅophoghạn Kraist. 15 K’arodon phọ ni bịn torobẹ amem Iọ bidị aạI iiIogh phọ aMozis, amanạ enaghanạn phọ ozu bọ iloghi phọ abidị odi ni. 16 Amem lọ oye makiton aḍighom Omoọgh-we phọ kụ amanạ aghisigh phọ odị rozughuron ghan, idiphọ aḍinyạ iigbia phọ eḅẹm bọ mọ, “Amanạ aghisigh phọ aMozis uzughuron mem mọ dị makiton bọ aḍighom Omoọgh-we phọ. 17 ‘Omoọgh-we phọ’ siẹn ekpịgh phọ ephẹn, pọ Uwaloor phọ; kụ esi lọ Uwaloor Omoọgh-we phọ odi, pọ okpetenaan odi aani ni. 18 Aḍiḅaạl eegu phọ eḍuạ bọ esi Omoọgh-we phọ aḍighi bọ Uwaloor phọ esoorom ni sighisigh oomo phọ ayira amanạ enaghanạn phọ u/zua bọ rinmeeghi ghan iyira keghighemị nyodị, kụ aḍiḅaạI eegu phọ odị loor ayira repogh ghan obụgh-obụgh.