Ariisi oghị omhiịn ophanyanhaạn asipuru Aḍinyạ Ituughạ Ogboku Awiki Phọ
MAY 6-12
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 2 KORỊNT 4-6
“R’iyaạr Ologhi Ayira Re/dughe”
(2 Korịnt 4:16) Esi iduọn phọ r’iyaạr ologhi ayoor re/dughe. Ghalamọ iduọn aḍizu oposọ phọ memiigha bọ ni loor reḅọr, roosạ ghan ni ruwaloor phọ ayoor ḍio etum ḍio.
w04 8/15 25 ¶16-17
Odugh ni kuolọ I/pẹr
16 Omaạr ophogh omoon aloor phọ ayira eten aruwaloor, emạn igey maạr. Mem dị yira omoọgh siya dị ekpạr r’aZihova Enaạn phọ, aloor ayira ketue ni edugh, kuolọ iyira ki/phẹr okumu ghan aZihova. AZihova kụ “r’angọ ghan bọ buẹn m’odugh bọ inyaạm; ḅilhẹ nyopọ inyaạm i/lo bọ odị ramuzeḍinaan ghan ni inyaạm.” (Isaiah 40:28, 29) Otelhedom m’aPọl, opọ phọ igey ilọ ikpo onhụ phọ ipẹ phọ emitenhaan bọ, agẹ iduọn mọ: “Esi iduọn phọ r’iyaạr ologhi ayoor re/dughe. Ghalamọ iduọn aḍizu oposọ phọ memiigha bọ ni loor reḅọr, roosạ ghan ni ruwaloor phọ ayoor ḍio etum ḍio.”—2 Korịnt 4:16.
17 Lọgh elhegh m’oḅẹm mọ, “ḍio etum ḍio.” Iphẹn phọ remạ ghan osighẹ oḍighinhom oomo araraạr phọ ipẹ aZihova aghaạph bọ torobọ aḍio. Onyọ amissionarị dị akumuan esi 43 asiạ eten dị ekpẹ oḍuom olhoghi asoman ni sidọl dị edughe nyodị eḅilhẹ eḅonyon ezu. Kuolọ i/pẹr onyọ umaranhi phọ. Odị aḅẹm mọ: “Mị uḍighi eegharạ amhị oḅon ghan oḅetenhu pidị mị atue aaḅereghị aḅilhẹ abạl Ekpo Onhụ phọ aZihova, kụ agbi oḍighi inhọn araraạr. Oḍighi ghan iduọn phọ torobọ aḍio m’ilhoghonaạn imhị ḍighaạgh orue okparạm k’arodon.” Okạr agey yira kotue ni obeḍenhọm iikpọ olhoghonhaạn aḍighaạgh phọ aZihova, eḍighi maạr dị e/gbạ gbạ amem, ii “ḍio etum ḍio,” kụ yira ooḅereghị ghan oḅilhẹ ogbiran ghan ilọ araagharạ r’aruguanhaan ph’odị.
(2 Korịnt 4:17) Kụ oọny iminimiịn phọ yoor romiinọm bọ ekulha amem mọ amuẹn phọ kiruom ni iyoor ebalabalạ eegu k’agee-pọ dị epeloghiom ni iminimiịn phọ iboom.
it-1 724-725
Okparạm
Eḅilhẹ kẹn ni emạn maạr dị yira ko/toph oḍuom olhoghi aKristẹn phọ ayira, ghuḍum k’agee-pọ dọl dị ikarạph i/lo. Ghalhamọ aḍuugh ḍighaạgh abuọ igbiphoghọm bịn ke/tue egbuurogh oḍuom olhoghi phọ ophọn. (Rom 5:4, 5; 1Tẹs 1:3; Ogan 2:10) Ko/tue osighẹ iminimhiịn phọ ayira nyiidiphọ otomaạm ipẹ ketọl bọ mem dị ookiạ oḍuom olhoghi phọ ayira amunhughan. (Rom 8:18-25) Ropoghom kẹn ghuḍum k’agee-pọ phọ, torobọ iminimhiịn, ghalhamọ igbagarạ ni, eḍighi “oọny iminimiịn” ḅilhẹ ilọ “ekulha amem.” (2Kọr 4:16-18) Kesophoghom ni oye oḅonyonhu ozuan r’owilhẹ oḍuom olhoghi ph’odị esi aZihova Enaạn phọ, mem dị aatughiạn ghan mọ odẹgh ophogh nyiidiphọ aḍighi olọ ekulha amem bịn.
(2 Korịnt 4:18) Yoor u/gbononomi iloghi phọ ayoor ophogh ghan araraạr phọ ipẹ romiịn bọ, yoor ropogh ghan ghụn ipẹ ro/miịn ghan bọ ekpeḍien phọ. Ipẹ romiịn ghan bọ re/bia ghan, kụ ipẹ ro/miịn ghan bọ retọI ghan ni k’agee-pọ.
Oguphogh Owạ Imạ Araraạr Dị Edi Siphẹ ABaibul Phọ
(2 Korịnt 4:7) Kụ olọ yoor phọ omoọgh bọ eeḍiọm mọ ephẹn okịgh ighiil aroko, obọ olegheriom mọ oomo iikpọ phọ ki/lọ ayoor, ilọ Enaạn.
w12 2/1 28-29
“Ḍighi Idị Olhoghi AZihova K’aḅaạl”
ADevid Splane oniin pạ Aloor phọ aḍiphẹ Repogh bọ aaḅeghiọn ni emhụ esi aBaibul phọ epẹ phọ. (2 Korịnt 4:7) Eeghe kụ eeḍiọm mọ? Eḍighi olhegheri iyaạr ḍughụm obobọ osụ olhoghi? Okaaphọm m’aḅẹm mọ “Eeye”. “Eeḍiọm mọ otelhedom m’aPọl aghaạph bọ aghol pọ ‘oḍighi’ ‘oghaạph ghan ipẹ eru bọ inẹ.’ ” (2 Korịnt 4:1, 2, 5) Umor phọ aSplane aghiọm olhoghi nmụny askul aGilead phọ mọ, oogh unwanyụ phọ bidị m’olọgh bọ otuughaạm mọ, eḍighi ilọ ookolhobian abidị ongọ oḍighi dị agbatanhaạn epẹ erugh phọ. Oḍighi phọ opọ phọ akpẹ ni omaghamị iyaạr igey.
Okaaphọm mọ amạ ni amiteom mọ “ighiil aroko” phọ remạ ghan we iphulhupul. Odị agbạ agbatạn oko dị oḍighinhom aḅạy r’olọ agol. Roko agol phọ ro/gbor ghan koḍighinhom iyaạr. Ḍierị phọ aḍighaạgh phọ, ipẹ aḅạy phọ ulhẹm oḍighinhom oḍighi. Eḍighi maạr lọ yira osighẹ eeḍiọm olhọgh oko dị oḍighinom gol, pọ k’eḍighi idị yira k’obilhẹ eeḍiọm mọ opogh ghan oko agol phọ. Umor phọ aSplane aḅẹm mọ, “Nyinha anmụny askul phọ i/wạ dị awe phọ k’igbon inyina.” Kparipẹ ghụn “idiphọ asimissionarị, nyinha rewạ ghan dị awe phọ k’ogbon aZihova. Nyinha ighiil aroko dị i/wạ eghuan.”
(2 Korịnt 6:13)Iphẹn mị rakaạph bọ—mị asighenọm mọ nyina anmụny amị—Irolọm aani iyoor idiphọ yoor idimom bọ inyina, ekpenyon iloghi phọ anyina iwilenaạn iyoor.
w09 11/15 21 ¶7
Ephomhoghiạn Abumor phọ Ayira Eghị Ghisigh
7 K’okaạph ika ilọ ayira? Ika kụ idị yira ‘k’okpenyon ilhoghi phọ ayira,’ oḍeenhaan ephomhoghiạn abumor phọ? Redughanhaan ghan ni we dị oḍighi oniin oki obobọ oḍighi buọ eniin ekpisi dị oniin k’aḍuraan otuman nyoniin. Ḅilhẹ kẹn awe dị eḅeraạn ophegh eniin odọ ephegh rogbor ghan ni kooḍikuan. Kuolọ eḍighi maạr dị araraạr aḍiḅeraạn dị yira r’opinhom ghan bin r’abuniin aKristẹn kụ igbatạn iyira r’abunhọn, pọ ewạ ‘okpenyon ilhoghi’ phọ ayira. K’eḍighi ni osụ ologhi opuruan asiloor mọ: ‘Eḍighi ni idị mị ragbor ghan k’arelhian epẹ erugh phọ obobọ aaḍikuan r’abulọ r’amhị rogbor ghan koghaạph ḍughụm? Siphẹ aKindọm Họl phọ, reḍighi ghan ni idị mị ra/kạr ghan k’aghaaphạn buẹn purukụ omhiigh bọ oru aani phọ loor esi dị mị aloghoma mọ bidị kụ oru uteẹny imị? Mị ramạgh ghan ni bubạm r’abugbogh siphẹ ookpomhoghan phọ?’
Ibạl ABaibul
(2 Korịnt 4:1-15) Idiphọ Enaạn menmạ bọ ighirigiir phọ kụ meḅọgh bọ oḍighi phọ ophọn elọgh ḍighaạgh ayoor, ologhi ayoor r’amem ra/dugh. 2 Yoor moghel oomo omian ghan oḍighi yogh araraạr umughoIoor phọ. Yoor ro/ḍighi ghan ilọ iigbegheḍiom, ḅilẹ kẹn yoor ro/ḅighiḅighiom ghan emụ oghaạph phọ Enaạn. Oghaạph ghan ipẹ eru bọ inẹ ghisigh phọ Enaạn omiteom bịn kụ edị yoor moḍiku bọ iitughiạn iloghi oomo awe phọ. 3 Emụ ooḅi oghaạph phọ yoor rọkaạph ghan bọ kụ eḍighi ibooghiạn, pọ ebooghiạn esi abuphẹ ropeeghu bọ bịn. 4 Bidị u/meeraam idị eḍighi bọ emụgh aḅirini phọ ophọn mesighẹ iloghi phọ abidị elọgh ekụ ufiri. Odị mamirighan mọ bidị omiịn ḍiḅaạl phọ esoorom bọ bidị. Ooḅi oghaạph eegu aKraist phọ akpoghorọn bọ Enaạn bịn amadạn, kụ aseere bọ ḍiḅaạl phọ aḍiẹn phọ. 5 Yoor rokaạph ghan mọ k/ayoor, aJizọs Kraist kụ Omoọgh-we phọ. Yoor moghol ḍien phọ aJizọs Kraist oḍighi rebenẹ anyina bịn. 6 Enaạn phọ eḅẹm bọ mọ, “Aḍiḅaạl kemite ni esoor siphẹ ufiri phọ,” kụ egina phọ Enaạn phọ eḍighi bọ ni dị aḍiḅaạl phọ odị remụ bọ iloghi phọ ayira osighenọm aḍiḅaạl olegheri eegu phọ Enaạn remụ bọ ghisigh phọ aKraist oruom ayira. 7 Kụ olọ yoor phọ omoọgh bọ eeḍiọm mọ ephẹn okịgh ighiil aroko, obọ olegheriom mọ oomo iikpọ phọ k/ilọ ayoor, ilọ Enaạn. 8 Ruuḅaghamị ghan ni iyoor omạn r’ighisigh, kụ olọ u/tue ukuphogh iyoor ugbemeghị. Rowalawalamị ghan ni iitughiạn ayoor, kụ olọ yoor u/toph iloghi phọ ayoor. 9 Rugbiphoghọm ghan ni iyoor kụ olọ iyoor u/ghel. Runyuughi ghan ni iyoor kolereghi kụ oIọ yoor roḅerenu ghan ni kogbam orelhe. 10 Oomo amem aloor ayoor regbirighaan ghan ni kebaphanụ ilọ aḍuugh phọ aJizọs, obọ omiịn aani ghuḍum mọ odị ruzu-anyụ phọ ayoor. 11 Yoor okol ghan ni emụ phọ aJizọs romuzaan ghan ḍuugh oomo aghuḍum mọ ayoor, obọ omiịn aani ghuḍum mọ odị siẹn aḍizu oposọ phọ ayoor. 12 Iphẹn phọ reḅẹm ghan mọ idiphọ aḍuugh phọ odị kụ migho bọ iyoor emoọgh kụ idị aghuḍum mọ odị migho inyina amoọgh aani. 13 Omeeraam mọ ayoor akịgh nyopọ oghaạph bọ oghol siphẹ aḍinyạ iigbia phọ mọ, “Mị mameeraam bọ kụ aghaạph bọ,” idiphọ yoor momeeraam bọ kụ yoor rokaạph ghan bọ. 14 Yoor oIegheri ni mọ Enaạn phọ eḅeton bọ Jizọs Omoọgh-we phọ siphẹ aḍuugh phọ kiḅeton aani ni iyoor eḅarạm nyodị kụ iḅophoghiọm inyina esighẹ ekị ghisigh phọ odị. 15 Oomo iphẹn phọ ughoI emụ anyina kụ omiinọm ghan bọ, obọ, idiphọ aḍita awe phọ Enaạn renmạ bọ ighirigiir phọ rebụgh bọ, oghur asuọr ibo phọ rekị bọ oteẹny Enaạn abụgh aani aghiọm ghisigh.
MAY 13-19
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 2 KORỊNT 7-10
“Oḍighi Olhoghonhaạn Aḍighaạgh” Phọ Ayira
(2 Korịnt 8:1-3) Buọ asiya, mị rawạ mọ ilegheri iiḍighi dị onmạ ighirigiir phọ Enaạn maḍighi yogh buọ asiosị eelhe phọ aMasidonia. 2 Iikiạ phọ iminimiịn phọ bidị omiinọm bọ medẹgh bidị epogh, kụ oIọ oḅaạI ologhi phọ abidị abụgh ni iboom dị bidị ḍighaạgh u/kụl onmo ghan inmo ghalamọ idiphọ ekulom bọ ni bidị iboom. 3 Mị akaạph ni ramiteom mọ bidị ungọ ni iyoor opeeleom ilọ bidị omoọgh. lḍigh ni ologhi abidị,
w98 11/1 25 ¶1
“Enaạn Repomoghiạn Ghan Nyopọ Rangoọm Ghan bọ R’ophooph Ologhi”
Eḅẹl phọ, aPọl aḅenhị we aKorịnt ilọ abumor aMasidonia phọ, buẹn emegheronom mọ abidị ilọ oḍighi olhoghonhaạn aḍighaạgh phọ eḍighi bọ ni imạ eḍeenhaan. APọl aḅẹm mọ “iikiạ phọ iminimiịn phọ bidị omiinọm bọ medẹgh bidị epogh, kụ oIọ oḅaạI ologhi phọ abidị abụgh ni iboom dị bidị ḍighaạgh u/kụl onmo ghan inmo ghalamọ idiphọ ekulom bọ ni bidị iboom.” Abuọ aMasidonia phọ u/kori m’okpaariọm bidị. Kparipẹ ghụn, aPọl aḅẹm m’obidị “uuḅereghiạn iyoor okpaariọm mọ omeera bunọ ologhonaạn aani ḍighaạgh we phọ.” Ipẹ awe aMasidonia phọ ongoọm bọ r’ophooph olhoghi ekạr kụ eḍighan elhegh, loor esi dị u/kụl ḍighaạgh ghalamọ r’iduọn “ekulom bọ ni bidị iboom.”—2 Korịnt 8:2-4.
kr 209 ¶1
Oḍighi Olhoghonhaạn Aḍighaạgh
iḍighi 46 C.E., mem dị igbakurọ m’ephạm Judia. Abutelhedom mọ aKraist buẹn aJu phọ orugh bọ epẹ phọ u/moọgh iyaạr oghoom ghan eḍien olhe aani iduọn asiḍighi araraạr m’eghiighị bọ anyụ iboom. Ogey phọ okoọny, dị okạr r’omiịn siphẹ asighisigh ph’abidị. Toroboiperolbọ, bidị k’omiịn oghoph aḍighaạgh phọ aZihova eten dị abunhọn abutelhedom aKraist ko/miịn ghan. Eeghe kụ k’emite?
(2 Korịnt 8:4) bịn uuḅereghiạn iyoor okpaariọm mọ omeera bunọ ologhonaạn aani ḍighaạgh we phọ Enaạn odi bọ Judia.
kr 209-210 ¶4-6
Oḍighi Olhoghonhaạn Aḍighaạgh
4 Siphẹ omunhenhiom iyạl aḍinyạ ph’odị agẹ bọ aghiomaạn we aKorịnt, aPọl amạ ni amiteom mọ aKristẹn omoọgh iyạl odọ iiḍighi. Ii obọ ḍinyạ phọ aPọl ageanhaạn Kristẹn phọ abuẹn osagharạn bọ uwaloor phọ, rodon ‘iphodị phọ iyool phọ’ k’otue ni osighẹ oḍighinom aani. (Jọn 10:16) Oniin apakirị oḍighi phọ pọ “oḍighi osighẹ ghan abunọn ophomoghiọm” Enaạn, iduọn phọ pọ oḍighi oghaạph ghan r’itughemhị phọ ayira. (2 Kọr. 5:18-20; 1 Tim. 2:3-6) Ophodiphọ apakirị phọ eḅaramaạm oḍighi olhoghonhaạn aḍighaạgh bumor phọ ayira. Eten dị eegholaan, aPọl aghaạph ghan aghol oḍighi olhoghonhaạn aḍighaạgh. (2 Kọr. 8:4) Idị egbolhomaam “oḍighi osighẹ ghan abunọn ophomoghiọm” Enaạn ‘r’oḍighi olhoghonaạn aḍighaạgh” bunọn, ekpo onhụ phọ ogbạ bọ mọ “oḍighi,” siẹn iyạl ariisi phọ iphẹn phọ usighẹ esi eniin egbaạm abuọ aGrik ilọ ekpo onhụ phọ di·a·ko·niʹa. Eeghe kụ iḍighi kụ ipẹ phọ emoọgh bọ maạr oḍighinhom?
5 Esi osighẹ oḍighinhom eniin phọ ekpo onhụ aGrik phọ ilọ iyạl phọ iiḍighi phọ, aPọl asighẹ oḍighi olhoghonaạn aḍighaạgh phọ aloghọm aani siphẹ iphodiphọ iiḍighi phọ oḍighi ghan bọ pạ ookpomhoghan aKristẹn phọ. Odị m’aghaạph ni omhạn mọ: “Oḍighi olọ oye r’oye ni, kụ oḍighi ghan ni rongọ nyoniin phọ Omoọgh-we phọ: Inyaạm oḍighinom oḍighi phọ kirokirọ ni, . . . [Kuolọ] oniin r’ogina uwaloor phọ ni kụ raḍighi ghan bọ oomo phọ iphẹn phọ.” (1 Kọr. 12:4-6, 11) Okạr oghaạph, aPọl aḅẹm m’iiḍighi kirokirọ phọ ipẹ roḍighi ghan bọ siphẹ ookpomhoghan phọ eḍighi aani ni iiḍighi “aruukuan.” (Rom. 12:1, 6-8) Iikia i/lo epẹ kụ iyaạr ph’odị amhiịn bọ m’ekpeanhaạn ni ongọ amem m’odị “oḍighi oḍighi ongọ awe phọ Enaạn odi bọ epẹ” phọ!—Rom. 15:25, 26.
6 APọl alhoghonhaạn ḍighaạgh we aKorịnt omhiịn iyaạr phọ eḍighi bọ kụ oḍighi olhoghonhaạn aḍighaạgh phọ aḍighi aani bọ pakirị oḍighi ḅilhẹ r’iiseeny ph’abidị rongọ bọ aZihova. Lọgh elhegh ḍiitughiạn ph’odị: AKristẹn phọ abuphẹ rongọ ghan bọ olhoghonaạn aḍighaạgh phọ roḍighi ghan idiphọ phọ loor esi dị bidị ‘okuọm loor phọ abidị ooḅi oghaạph phọ.’ (2 Kọr. 9:13) Esi iduọn phọ, dị aḍiḅeraạn osighẹ oḍighinhom itughemhị phọ aKraist kụ enyu bidị, aKristẹn rologhonhaạn ghan ni ḍighaạgh buẹn rabidị oḅọph bọ omeeraam mọ. APọl aḅẹm m’iiḍighi olhoghonhaạn aḍighaạgh ph’abidị otuạn bọ bumor phọ abidị kụ oḍighi, eḍighi oḍighi oḍeenhaan “eeḍiọm ighirigiir phọ Enaạn.” (2 Kọr. 9:14; 1 Pit. 4:10) Esi iduọn phọ, rakaạph bọ ilọ okumu ghan abumor phọ ayira abuẹn ekuom bọ, ipẹ phọ eḅarạm bọ oḍighi olhoghonhaạn aḍighaạgh, aWatchtower opọ December 1, 1975, akạr kụ aḅẹm mọ: “Yira kuu/kia ghan mughumọ aZihova Enaạn phọ r’Oọny ph’odị Zizos Kraist okạr ri omaghamhị maạr odọ oḍighi phọ ophọn.” Ii, oḍighi olhoghonhaạn aḍighaạgh phọ aḍighi aani ni oḍighi aruukuan dị amạn maạr.—Rom. 12:1, 7; 2 Kọr. 8:7; Hib. 13:16.
(2 Korịnt 9:7) Torobọ oye angọ ghan ipẹ eḍigh bọ ologhi phọ odị, ku/ḅiphighụ mudị ukpaariọm ni nyodị, idị eḍighi bọ Enaạn repomoghiạn ghan nyopọ rangoọm ghan bọ r’ophooph ologhi!
kr 196 ¶10
Ipẹ Romoọgh Ghan Bọ Ikpoki Oḍighinhom Araraạr Ilọ Omhạr Phọ
10 Eḅẹl phọ, yira rosogh ghan iisogh dị u/kpaariọm loor esi dị yira opomoghiạn aZihova kụ rowạ oḍighi “ipẹ eḅeraạn bọ nyodị.” (1 Jọn 3:22) Reḅeraạn ghan ni aZihova mem dị ebenhẹ odị raseere aani ghan iyaạr, dị u/kpaariọm. Ooḅeghiọn ophogh ikpo onhụ phọ aPọl ilọ eegharạ inmo onyọ aKristẹn. (Bạl 2 Korịnt 9:7.) Ogey onyọ aKristẹn roo/ḅiriọn ghan obobọ ro/kpaariọm ghan kụ agbi ongọ. Kparipẹ ghụn rangọ ghan “ipẹ eḍigh bọ ologhi phọ odị” ongọ. Iduọn phọ pọ, odị rangọ ghan loor esi dị amiịn mọ ewạ ni ḅilhẹ m’odị katue ni amoọgh. Odọ ongoọm m’opọ phọ aḅeraạn aZihova, “idị eḍighi bọ Enaạn repomoghiạn ghan nyopọ rangoọm ghan bọ r’ophooph ologhi.” Onhọn aBaibul aḅẹm mọ: “Enaạn epomoghiạn we phọ abuphẹ eḅeraạn bọ ongọ ghan.”
Oguphogh Owạ Imạ Araraạr Dị Edi Siphẹ ABaibul Phọ
(2 Korịnt 9:15) Itu oghol inmo phọ Enaạn anem ke/tue bọ ekaạph ongọ ḍisẹph nyodị!
w16.01 12 ¶2
“Inmo phọ Enaạn Anem Ke/tue bọ Ekaạph” kụ Enyu Nyinhạ
2 APọl alhegheri ni mọ oomo iikiạ aruguanhaan ph’Enaạn ketuụgh ni emite dị eego esi ekiạ phọ aKraist emhunhughan bọ. (Bạl 2 Korịnt 1:20.) Esi iduọn phọ “inmo phọ Enaạn anem ke/tue bọ ekaạph” keḍighi oomo igey araraạr r’ephomhoghian oḅạr ph’odị kuḍeenhaan bọ iyira dị eego esi aZizọs. Okạr agey, inmo phọ ipẹ phọ eḍighi ni iyaạr dị enighẹ epelheghiom dị oye isiẹn ade phọ ka/tue akaạph. Ika kụ idị omoọgh inmo dị eleeny iduọn phọ k’itir iyira? Kụ ighẹn areten kụ edị yira k’oḍighi oḍeenhaan ipẹ inmo phọ iphẹn itir bọ iyira iduọn yira rookolhobian bọ ilọ Eyaạl ootughianhạm aḍuugh phọ aKraist Wednesday, March 23, 2016?
(2 Korịnt 10:17) “Oye lọ iituma eḅeraạn aatumaam ghan ilọ Omoọgh-we phọ maḍighi!”
g99 7/8 20-21
Iituma Ebeeph ni Ḍughụm?
Siphẹ igẹ aBaibul aKristẹn ipẹ aGrik phọ, ekpo onhụ phọ kau·khaʹo·mai, ogbạ mọ ‘obaga, iituma,’ osighẹ ni oḍighinom eten dị enighẹ r’idị i/nighẹ. Esi omaạm aPọl aḅẹm mọ: “Oye lọ iituma eḅeraạn aatumaam ghan ilọ Omoọgh-we phọ.” (2 Korịnt 10:17) Iduọn phọ pọ roḅẹm ghan m’ootumaam ghan ni aZihova idiphọ Enaạn ayira, olhoghoma dị kurorori iyira akị angọ omoọgh ghan ibo ilọ aḍigey aḍien r’adọl phọ odị.
Ibạl ABaibul
(2 Korịnt 7:1-12) Iiḅi asiya, iduọn muguanaan bọ iyira ruguan phọ iphẹn, owopha loor ayira osighẹ oomo ikarạph Iọ aruzu phọ r’aruwaIoor phọ ayira mebiphighạ, orọl ghan dọl olọgh ghan eegu Enaạn phọ, kụ owaạm ghan idị yira kookuan oseleman omadạn! 2 lseenaan iyoor epholopool siphẹ iloghi phọ anyina. Yoor oye u/ḍighi ikarạph. Yoor oye uu/gughuḍiọm. Yoor oye ilọ ikeḍi u/ ḍighi. 3 lphẹn mị ra/kaạph onughenọm anyina ekạ. ldiphọ mị maḅẹm bọ ni, nyina ekạn ni iloghi ayoor iboom dị m’aḍuugh ni m’aghuḍum ni yira kụ odi ni eniin esi. 4 Mị iḍuom ni inyina ologhi, aḅilẹ iseerean inyina onhụ. Esi oomo iminimiịn phọ ayoor, mị apamanạm ni akpọ ologhi phọ amị. Ologhi amị ophaph eele. 5 R’idiphọ yoor oghị bọ ni osi Masidonia bịn yoor u/pooghian ni. lminimiịn r’iruonụ ikoom ni omạn r’ighisigh. Iloghi ayoor r’amem i/pọ. 6 Kụ Enaạn phọ rekparamị ghan bọ bulọ iloghi phọ meḅonyonu irom ni Taitọs mọ aru ilọ okparamiọm iloghi phọ ayoor. 7 K/eru phọ aTaitọs bịn, iloghọm ni oomo iIọ anyina dị odị aghaạph uḅeniọm iyoor. Odị aghaạph ni aIoghọm idị nyina ekparamị ologhi odị, ḅilẹ r’idị nyina remoghi ni omiịn amị, r’idị nyina eloghoma ni ḍiaḅạ phọ mị iḅaạm bọ inyina, r’idị nyina ekpatiạn ni ophẹl ghan amị. 8 Ghalamọ idiphọ aḍinyạ phọ mị agẹ bọ eḍighi bọ ni iyaạr dị nyina ekururu yogh phọ, bịn mị ra/kol li kaḅiphighụ. Obọ mị muḅiphighụ ni mem mọ mị aloghoma bọ mọ nyina etuạn ni ḍinyạ phọ amị rekururu moọny amem mọ. 9 Kụ nyiidiphọ ologhi amị maḅaạl. Mị u/tuạn dị nyina ekururu yogh bọ, mị utuạn ghụn dị okururu phọ anyina maḍighi iyaạr dị nyina meloghoma ekiton esi ikarạph phọ anyina. Yoor inyina ilọ eekaạny i/ḍighi loor esi dị Enaạn mesighẹ okururu phọ anyina ingoọm inyina suọ. 10 Odọ okururu phọ ophọn rakọm ghan okiton esi ikarạph phọ, kụ iyaạr oghol oḅiphighụ i/lo. Okururu olọ aḅirini phọ rangoọm ghan ḍuugh. 11 lmiịn raraạr dị Enaạn esighẹ okururu phọ anyina eḍighinom: ḍidụgh dị oḍighi phọ radụgh, ephiighaam dị nyina repiigha oḍeenaan mọ nyina i/piọm, oghạgh ologhi dị nyina rekaghạm ikarạph, eegu dị nyina rekiil mọ ḍien ilọ kemite, emoghi dị nyina rimoghiom imị, eghologhọl dị aloor anyina rekologhọl, r’eliomọm dị nyina emeerạ oliọm olọ apiomạn. Nyina meḍeenaan mọ r’oniin okạl oghaạph phọ ophọn dị nyina epiomạn o/lo. 12 Esi okpere, mị u/tuạn nyopọ apiomạn bọ ḅilẹ r’opọ opiomạn bọ kụ agẹ bọ ḍinyạ phọ aḍiphẹ. Mị ugẹ ghụn oḍeenaan anyina ghisigh Enaạn mọ nyina iseere ni iyoor ologhi.
MAY 20-26
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | 2 KORỊNT 11-13
“Ooburom Mọ” Agim Bọ Pọl
(2 Korịnt 12:7) Utuạn ni omirighan mọ mị kabagaam ghan bọ iituma phọ, ungọ imị eephinia dị ephin ni iboom mudị ooburom kụ ugim imị. Ephinom mọ ighịgh eeroma dị aSetan ugiphoghọm ghan imị, ḅilẹ r’omirighan mọ mị kuu/tuma.
w08 6/15 3-4
Amoọgh Ni Iikpọ Etigheri Riisi Dị Asughanam
Onhọn ebenhẹ dị akpẹ oḍuom olhoghi alhọm ni aZihova m’asighẹ “ooburom mọ” agim bọ nyinọ, iiḅaghamị dị edighan bịn. Otelhedom mọ aPọl aabereghiạn ni Enaạn iraạr amem ilọ oḍuạ esi odẹgh ophogh phọ ophọn. Torobọ iyaạr phọ eephina phọ epẹ eru bọ, idiphọ ooburom dị agim, m’esighẹ ibo phọ aPol siphẹ arukumuan phọ aZihova. APọl asighẹ atoomaạm ḍiḅor dị u/gbạ mem oḅor. AZihova aphagharanhaạn mọ: “Enọn iyaạr dị nạ kawạ i/io, emuton onmạ ighirigiir phọ amị. Iikpọ phọ amị relom ghan mem lọ nạ adugh.” AZihova osighẹ ooburom mọ agim bọ nyodị. APọl eenhaan ni, kụ aḅilhẹ aḅẹm mọ: “Mị adugh ghụn, purukụ molome iikpọ phọ amị.” (2 Kọr. 12:7-10) Iduọn phọ raḅẹm ghan ika?
(2 Korịnt 12:8, 9) Iraạr odọ amem mị uuḅereghị ghan ni Omoọgh-we phọ mọ odị amuton eephina phọ ephẹn loor amị asighẹ. 9 Odị apagharanaạn ni akpaariọm mọ, “Enọn iyaạr dị nạ kawạ i/io, emuton onmạ ighirigiir phọ amị. Iikpọ phọ amị relom ghan mem lọ nạ adugh.” Esi iduọn phọ kiḅeraạn ghụn imị olegheri ghan oboom r’ootumaam ghan araraạr phọ reḍeenaan ghan bọ ḍidugh phọ amị, obọ iikpọ phọ aKarist kụ ighoph imị.
w06 12/15 24 ¶17-18
AZihova Rangọ Ghan ni “Buphẹ Olọm Bọ Nyodị Uwaloor Iigbia Phọ”
17 Omegheron oghị esi iiḅereghị phọ aPọl, Enaạn iḅenị nyodị mọ: “Enọn iyaạr dị nạ kawạ i/io, emuton onmạ ighirigiir phọ amị. Iikpọ phọ amị relom ghan mem lọ nạ adugh.” Kụ aPọl aḅẹm mọ: “Esi iduọn phọ kiḅeraạn ghụn imị olegheri ghan oboom r’ootumaam ghan araraạr phọ reḍeenaan ghan bọ ḍidugh phọ amị, obọ iikpọ phọ aKarist kụ ighoph imị.” (2 Korịnt 12:9; Psalm 147:5) Esi iduọn phọ, aPọl amiịn ni mọ, dị eego esi aKraist, m’oghoph phọ Enaạn abụgh bọ ni iboom aghoph ni nyodị idiphọ ogbogo. Rodon, aZihova rapagharanhaạn ghan ni iiḅereghị phọ ayira eniin phọ eten phọ. Odị rataramhị ghan ni oghoph phọ odị idiphọ ogbogo k’aghoph rebenẹ ph’odị.
18 Ii, ogbogo phọ ra/sophoghom ghan dị olọph ka/lọph ḅilhẹ dị oghim ka/kim, kuolọ rakoph ghan ni dị olọph r’oghim mọ ke/teẹny oye. Iniin phọ kẹn ni, oghoph “iikpọ phọ aKarist” ra/sophoghom ghan odẹgh ophogh oteẹny ayira obobọ ḍikparaminheẹn omeelhom ayira. Ghalhamọ r’iduọn phọ ni, r’engọ ghan ni oghoph dị yira ko/loghoma mun izuoghom aḅirinhi phọ aSetan. (Ogananami 7:9, 15, 16) Esi iduọn phọ, ghalhamọ nạ rakaran ni odẹgh ophogh dị ‘nyinạ u/meera ubilhẹ,’ pọ legheri akuphom owol mọ aZihova alegheri ni ipẹ nạ rakparaghạ bọ ḅilhẹ kẹn m’odị k’amegheron ni atu esi “aḍiolọ emoghi phọ anạ.” (Isaiah 30:19; 2 Korịnt 1:3, 4) APọl agẹ mọ: “Enaạn reḍighi ghan ni ilọ dị aguanaan, kụ odị ka/meera mọ odẹgh ophogh dị ipel inyina iteẹny inyina. Mem lọ odẹgh ophogh iteẹny inyina, odị kingọ ni inyina inyaạm okparạm ḅilẹ r’ilọ oḍighi kụ okpetenaan.”—1 Korịnt 10:13; Filipai 4:6, 7.
(2 Korịnt 12:10) Loor iphẹn phọ, mị atuạn ni emụ phọ aKraist ramiloghọm ghan ḍidugh, roofola, iminimiịn, igbiphoghọm, ḅilẹ r’iiḅaghamị. Mị adugh ghụn, purukụ molome iikpọ phọ amị.
w18.01 9 ¶8-9
“Odị Rangọ Ghan ni Inyaạm Nyopọ M’adugh Bọ”
8 Bạl Isaiah 40:30. Etigheri ipẹ yira osi bọ omananaạm, araraạr edi ni dị uwilenhaạn yira, yira ko/tue oḍighi. Epẹ phọ iyaạr dị ewạ mọ olhọgh elhegh. Ghalhamọ r’iduọn asilor bọ ni, otelhedom mọ aPọl amoọgh ni riisi dị asughanam dị esophoghom nyodị oḍighi atorobọ iyaạr lọ odị awạ oḍighi. Mem dị odị aghaạph ipẹ odị alhoghoma bọ aḅenhị Enaạn, uḅenhị nyodị mọ: “Iikpọ phọ amị relom ghan mem lọ nạ adugh.” APọl anhaghanhạn ni. Kụ akureri mọ: “Mị adugh ghụn, purukụ molome iikpọ phọ amị.” (2 Kọr. 12:7-10) Odị rakaạph ghan eeghe?
9 APọl amiịn ni mọ iboom araraạr edi ni dị olhoghonhaạn aḍighaạgh oye dị apelhom kụ o/lho, odị ka/tue aḍighi. Uwaloor iigbia phọ Enaạn katue ni angọ Pọl iikpọ phọ ipẹ odị awạ bọ. K/ipẹ bịn, kuolọ uwaloor phọ Enaạn katue ni angọ Pọl iikpọ oḍighinhom oḍighi dị r’inyaạm odị bịn mu/tue uḍighi. Ipẹ phọ kẹn ni etu ni inẹ ilọ ayira. Eḍighi maạr dị inyaạm m’ipẹ yira omoọgh bọ kụ eḍuạ esi aZihova kụ eru, pọ yira k’okpạr ri igey!
Oguphogh Owạ Imạ Araraạr Dị Edi Siphẹ ABaibul Phọ
(2 Korịnt 12:2-4) Mị aIegheri ni oniin onyọ aKraist dị osiph ogheeIom ookpe k’akẹ dị amuneniom iraạr, esi aḍioph r’inya asiạ dị meten. Mọ isiẹn eye phọ, ḅilẹ mọ emụgh aIoor, mị u/legheri, Enaạn kụ ilegheri. 3 Mị aḅilẹ ni raḅẹm mọ usiph ni oye pho ophọn ogheeIom ooḅi omạr phọ—mọ isiẹn eye phọ, ḅilẹ mọ emụgh aIoor, mị u/Iegheri, Enaạn kụ ilegheri.— 4 Kụ epẹ phọ odị anaghạn ni raraạr dị ilọ oghaạph u/legheri, raraạr dị anem oye ke/tue ekaạph.
w18.12 8 ¶10-12
Asipuru Dị Abuẹn Robạl Ghan Bọ Rinyạ Phọ Ayira Opuru
“Ookpe k’akẹ dị amuneniom iraạr” phọ oghaạph bọ oghol siphẹ 2 Korịnt 12:2 eeni remạ ghan Itooghị aMesaya phọ edi bọ ḍighaạgh aZizọs Kraist ḅilhẹ r’144,000 phọ, oḍighi bọ “kumoom akẹ.”—2 Pit. 3:13.
Eḍighi “ookpe k’akẹ dị amuneniom iraạr” loor esi dị Itooghị Omhạr phọ eḍighi idị epelheghiom ḅilhẹ opophe okiọm anyụ iboom.
“Ooḅi omạr” phọ opọ “osiph [bọ Pọl] ogheelom” siphẹ uḍien phọ remạ ghan (1) ooḅi omhạr phọ ratu bọ siẹn ade phọ, (2) paradais eten aruwaloor phọ katọl bọ mem mọ amuphẹ phọ, opọ phọ katarạ bọ ni apelheghiom paradais eten aruwaloor phọ odi bọ nyiidiphọ, ḅilhẹ (3) r’aparadais phọ Enaạn epẹ k’akẹ, opọ k’aḅarạm bọ atọl siphẹ omoom aḅirinhi phọ.
(2 Korịnt 11:23-27) Mọ bunọ buọ oḍighi aKarist? Mị odi aani ni. Ekịgh mudị mị ubomoghạn, kụ arị mị kụ oomo phọ idị. Mị kụ makpạr ḍighaạgh apu. Mị kụ magbor atọl ikoli. Mị kụ odị u/gbạ mem oguroghọm ikparạ. Mị kụ magbor ghan amuzaan ḍuugh. 24 Oogh odọ amem buọ aJu phọ ugurọgh ghan imị siriḍioph r’esugha asigụr. 25 Iraạr odọ amem buọ aRom uguroghọm bọ imị raḅạm. Eniin amem awe uroḅoI imị ikpo. Iraạr odọ amem mị agbanạ bọ ophiịny-abazị kụ eniin amem mị urọI li umuụm ḍiniin aḍughul r’oniin ootaany. 26 Siphẹ ibadị oghirighaan erelhe phọ amị, mị mazuan ni omuzaan aḍuugh amuụm—aḍigho r’aruḅạ r’araghaạgh abuọ aJu eelhe phọ amị, ḅilẹ r’aruuruen phọ. Mị mazuan kẹn ni omuzaan aḍuugh ologhi igbogh aramạ r’aradalạ ‘ophiịny-abazị ḅilẹ r’ikarạph asiya. 27 Oḍighi r’elhoman emuza ni; ibadị amem mị urọl ghan ni enaanị; mị umugh ghan ni okoọny eḍien r’amuụm; ibadị amem mị u/moọgh ghan eḍien r’oonmenemineen. Mị urọI ghan ni ooroogh.
w12 10/15 p. 8 ¶ 7
Okaran Iiḅaghamhị Kirokirọ Rodon R’akpọ Oḅio
7 Ooḅeghiọn ophogh aani, idị emitenhaan otelhedom mọ aPọl. Odị asoman ‘omuzaan aḍuugh ologhi igbogh aramạ, r’aradalạ, ḅilhẹ r’epẹ ophiịny-abazị phọ.’ Odị aghaạph ilọ ‘okoọny eḍien r’amuụm, e/moọgh oonmenemineen r’ooroogh.’ APọl aḅilhẹ kẹn ni aghaạph dị odị arọl “umuụm ḍiniin aḍughul r’oniin ootaany,” eeni loor iduọn oghuugh ph’abidị agbanạ bọ. (2 Kọr. 11:23-27) Etigheri oomo phọ ipẹ phọ, lọgh elhegh eegharạ ph’odị aḍeenhaan bọ mem dị odị asoman ḍuugh loor iduọn odị rakumu bọ Enaạn: “Kụ arị iphẹn phọ imite oḍeenaan ayoor mọ yoor ko/dạ emụ ayoor bịn orọI, emuton oḍuom oIoghi Enaạn phọ reḅerion ghan bọ bulọ momuughu. Odị muphẹl li iyoor asighẹ esi oboom omuzaan aḍuugh phọ ophọn, kụ kuphẹl li iyoor. Kụ yoor oḍuom ni ologhi mọ odị kuphẹl kẹn ni iyoor.” (2 Kọr. 1:8-10) Awe dị ikarạph araraạr phọ iphẹn emiteghunhaan bọ Pọl emitenhaan u/bụgh. Toroboiperolbọ, ibadị ayira kotue ni okaạph ipẹ odị aloghoma bọ oḅilhẹ omoọgh iiḍereghị esi eḍeenhaan akpọ oḅio ph’odị.
Ibạl ABaibul
(2 Korịnt 11:1-15) Mị aḅo ephurukpụ ilọ elologhi, iseseeny ipogh ni bịn iwilenaạn imị. 2 Mị riseeghiạn ni inyina idiphọ Enaạn, loor esi dị nyina ekịgh osẹr-sẹr esina onyanị dị mị aguan onughenyạn oniin oye—Kraist. 3 Oḅio amị rakaph ni mudị Eru keḍighi ni dị iloghi phọ anyina kepuphọgh bịn nyina ebilẹ okuọm aloor phọ anyina Kraist omadạn, idiphọ ekarạph iyaạr phọ esighẹ bọ iguegue phọ eekeleghiom Iv. 4 Mị mamiịn ni mọ nyina rekuraam ghan ni torobọ oye lọ aru aghaạph ilọ aJizọs dị agbatanaạn nyopọ ayoor iḅenị inyina. Nyina eḅilẹ kẹn ni ekuraam uwaloor r’ooḅi oghaạph dị egbatanaạn ni emadạn ipẹ yoor iḅenị bọ inyina. 5 Mị u/meeraam r’enụm mọ mị asoorom ni apu butelhedom mọ abuphẹ nyina reephughemi ghan bọ. 6 lini siẹn mị u/maạr oghelegel oghaạph, kụ mị alegheri emụ ipẹ mị rakaạph bọ. Yoor romạ ghan ni iphẹn phọ kiḍeenaan inyina oomo amem esi oomo areten. 7 Mị inyina iyaạr i/muulaan mem mọ mị aghaạph bọ ooḅi oghaạph phọ iḅenị inyina. ldiphọ mị asooromi bọ loor aḍighi ghan oḍighi phọ oopho ilọ obugheọm anyina, eḍighi ni opiomạn ḍughụm? 8 Mem mọ mị raḍighi bọ oḍighi phọ siphẹ ogbo phọ anyina, abuọ inọn asiosị kụ ukpẹ ghan imị ikpoki. Oḍighom oghaạph, mị umoọph ghụn ni bidị ologhonaạn anyina ḍighaạgh. 9 Ḅilẹ yira orolạn bọ kụ ikpoki ikuom bọ ni imị, mị inyina dool ikpoki i/leti. Buọ asiya phọ odi bọ Masidonia uruom ni imị oomo ilọ ikuom imị. Idiphọ mị arọl bọ mem mọ opọ eten bọ kụ idị mị katọl li akiọm ghisigh. Mị inyina dool ikpoki ki/leti. 10 AKraist alegheri ni mọ iphẹn mị rakaạph bọ inẹ ni. Mị raatuma ni mọ ephẹn eelhe phọ aGris mị u/sighẹ ooko phọ amị ugbi k’oye. 11 lphẹn mị rakaạph bọ ekịgh mudị mị inyina i/phomoghiạn ḍughụm? Eeye, Enaạn elegheri ni mọ mị iphomoghiạn ni inyina. 12 Mị kapamanạm ni eḍighinom iyaạr phọ amị, obọ buphẹ nyina reephughemi ghan bọ komoọgh ghan bọ iyaạr oghaạph ootumaam mọ bunọ roḍighi aani ni odọ phọ oḍighi phọ yoor oḍighi bọ. 13 Awe phọ abuphẹ k/abugey abutelhedom—bidị eepua abutelhedom dị rogbaạm okpẹ oḍighi phọ abidị oḅilẹ okue rowạ ghan oghịgh aani abugey abutelhedom mọ aKraist. 14 Te, phọn eeghe nuụn? Ghalamọ aSetan bịn atue ni azuughian akịgh aani ookpaạny aḍiḅaạl. 15 Eḍighi iphẹn phọ bịn eḍeenaan mọ iikia i/lo dị awe oḍighi phọ odị kozuughian okịgh aani we oḍighi aruukuan phọ. Ruukuna phọ kokpẹ ni bidị ilọ ekasiạn oḍighi oye r’oye.
MAY 27–JUNE 2
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | GALETIA 1-3
“Mị Uḍaghạ ni Nyodị Ghisigh Odị”
(Galetia 2:11-13) Mem dị aPita aru bọ asi Antiọk, mị uḍaghạ ni nyodị ghisigh odị idị eḍighi bọ odị apiomạn ni egaan. 12 Tutụ abuniin awe dị aJems alọgh oru bọ osi epẹ, aPita alean ghan ni eḍien r’aruuruen phọ momeeraam bọ Kraist. Kụ awe phọ abuẹn rosi, bịn odị amiigh agbatanaạn bidị aḅulolom omạn, loor oghiilaan abuphẹ okpaariọm bọ mọ oḍunogh ghan ruuruen phọ. 13 Abuerị abuọ aJu phọ momeeraam bọ ni Kraist umiigh aani ni oḍighi yogh idị bidị olegheri ni mọ i/kpeanaạn, dị r’aBanabạs bịn aḍighom aani ni.
w17.04 27 ¶16
Nạ Radaphạn Aani Ghan Ni Elhiom Ooruẹn Phọ AZihova?
16 Bạl Galetia 2:11-14. APita ameel aḍighanhaan ḍiphil oghiilaan oye. (Prov. 29:25) Etigheri iduọn odị omhoọgh bọ ni olhegheri iyaạr ilọ ipẹ aZihova asighẹ bọ raghaạph phọ iphẹn phọ, aPita aghiilaan ni ipẹ abuọ aJu phọ abuẹn oḍuna bọ odi bọ siphẹ ookpomhoghan phọ aJeruselem kosighẹ bọ nyodị. Otelhedom mọ aPọl, opọ arọl aani bọ ni Jeruselam mem mọ araghaạph iḍun phọ emite bọ lha phọ 49 C.E., aḍaghạ ni Pita epẹ Antiok kụ ayegherọn dọl ughelhe phọ odị. (Iiḍighi 15:12; Gal. 2:13) AKristẹn phọ abuphẹ oḍighi bọ buọ Areelhe phọ opiomạn phọ aPita atir bọ komegheron ika kụ okị esi ekeeny ooruẹn phọ ephẹn? Bidị komeera ni iphẹn phọ eḍighi idị bidị kokpetaan ḍughụm? APita k’atoph roopoogh phọ odị loor opiomạn ph’odị ḍughụm?
(Galetia 2:14) Kụ mị amiịn bọ mọ eḍighinom iyaạr phọ abidị i/seleman r’igey phọ ipẹ ooḅi oghaạph phọ, mị uḅenị ni Pita siphẹ aghisigh phọ abidị mọ, “Nạ onyọ aJu ni kụ odi ghan bọ dọl aruuruen phọ, k/aḍiphẹ abuọ aJu phọ. Ika kụ edị nạ kakpaariọm bọ ruuruen phọ mọ orọl dọI abuọ aJu phọ?”
w13 3/15 5 ¶12
Esi Abuẹn Ophomhoghiạn Bọ AZihova, “Iyaạr Otuạn Okpetaan I/lo”
12 APita aḍeenhaan oghiilaan oye, kụ akpetaan eeni amem eten dị eeph ni iboom; ghalamọ r’iduọn phọ ni, bịn odị aḅạr ri Zizọs r’aZihova. Esi omaạm, odị apharanaạn ni Odẹ otu phọ odị esi ogbo, ka/mem bịn kuolọ iraạr amem. (Luk 22:54-62) Onyebel roten, aPita apiọm ozọ idiphọ onyọ aKristẹn, kụ azoọm Ruuruen phọ abuẹn momeeraam bọ mudị u/seleman aani idiphọ aKristẹn aJu phọ moḍuna bọ. Toroboiperolbọ, otelhedom mọ aPọl amiịn ni oghaạph phọ eten dị eegholaan—mọ iyaạr otuạn omoọgh amadia i/lo siẹn ookpomhoghan phọ. Eegharạ phọ aPita ikạr kụ eeph. Kụ ezọ phọ aPita ephẹn egbi ophuẹ ookpomhoghan phọ, aPọl aḍighi ni iyaạr amiteom esi oolemi aPita pạ ghisigh odị. (Gal. 2:11-14) Iḍighi edị aPita alhoghoma mọ moofolomi nyodị bịn awilhẹ eghiil aghuḍum mọ ḍughụm? Eeye. Odị akiririom ni aphogh oroma phọ aPọl, asighẹ aḍighinhom, bịn aghiọm ghisigh eghiil phọ.
Oguphogh Owạ Imạ Araraạr Dị Edi Siphẹ ABaibul Phọ
(Galetia 2:20) Mughiigh aani ni imị r’aKraist siphẹ oreeny phọ. Mị odi ni rapooghu, kụ k/amị. AKraist kụ odi ghan loor phọ amị. Aghuḍum mọ mị odi bọ nyiidiphọ, mị odimom omeeraam mọ mị amoọgh bọ esi Oọny phọ Enaạn, opọ uphomoghiạn bọ imị kụ ughol bọ imị kụ amugh bọ.
w14 9/15 16 ¶20-21
Ḅarạn Akumu Enaạn Etigheri “Iiḅaghamị Kirokirọ”
20 K’okaạph ika ilọ izuoghom dị i/tu egaan? Esi omaam, ika kụ idị yira k’okel oḅonyonhu ozuan? Eniin imạ eten omerenyạn iphẹn phọ pọ ogbirima ghan ilọ etagharạn phọ. Ipẹ kụ idị otelhedom mọ aPọl aḍighi. Eeni amem odị aloghoma ghan m’onọ odi—dọl aagiạ. Kuolọ odị aḅilhẹ ghan kẹn ni aatughiạn mọ aKraist o/mughanaan we dị omunughan kuolọ buḍighinom ikarạph. Kụ aPọl oniin oḍighinom ikarạph phọ. Okạr rokaạph, odị agẹ mọ: “Aghuḍum mọ mị odi bọ nyiidiphọ, mị odimom omeeraam mọ mị amoọgh bọ esi Oọny phọ Enaạn, opọ uphomoghiạn bọ imị kụ ughol bọ imị kụ amugh bọ.” (Gal. 2:20) Ii, aPọl ameeraam ni etagharạn phọ. Odị alhọgh elhegh mọ etagharạn phọ k’otue ni osighẹ oḍighinom esi odị r’aloor.
21 Aḍiniin phọ aḍiitughiạn phọ aḍiẹn phọ—omiịn etagharạn phọ idiphọ inmo dị aZihova kụ angọ oye phọ raloor—k’elhoghonhaạn ni nyinạ ḍighaạgh iboom. Iduọn phọ pọ roḅẹm ghan mọ oḅonyonhu ozuan ka/ḍuạ egina amem. Abuniin ayira kotolonaạn ni eenan izuoghom mọ iphẹn r/etu ghan bọ egaan k’ipạ omoom aḅirini phọ. Kuolọ legheri mọ: Opọ i/pẹr bọ kụ k’ateẹny iikpiạ phọ. Yira r’otumhan ghan bịn ḍiikiạ aḍio arughuenian phọ Omhạr phọ k’Enaạn kapighinaan bọ eephọ r’adọl omunughan aseenaan we phọ abuẹn okpẹ bọ oḍuom ologhi phọ. Kụ iḍighi kụ, sopha oḍigh aani isiphẹ Omhạr phọ opọ phọ—ghalhamọ iḍighi edị yira k’okaran iiḅaghamị kirokirọ.
(Galetia 3:1) Buọ arolologhi aGaletia! Anhiạn nuụn kụ apoghorọn iloghi anyina? Riḍien nyina imiịn ni, rurụ nyina inaghạn ni ipẹ aḍuugh phọ aJizọs Kraist siphẹ oreeny phọ.
it-1 880
Aḍinyạ dị ogẹ aghiomaạn buọ aGaletia
Aḍimhạgh phọ aPọl mọ, “Buọ arolologhi aGaletia,” pọ re/ḅẹm ghan m’odị amhạgh ghan ogina awe dị oḍighi buọ ekụ aGallic epẹ esiinyọm mọ aGaletia. (Gal 3:1) Kparipẹ ghụn, aPọl aḅaaghiọm ghan buniin abudị odiighi pạ arookpomoghan phọ dị omeera mọ awe dị omoọgh aani eegharạ awe aJu pạ igbo phọ abidị kụ onyuughiom ghan bidị, Ju phọ abuphẹ owạ bọ oḍeenhaan adọl aruukuan abidị dị eego esi iilhogh phọ aMozis, kparipẹ r’aruukuan phọ ipẹ eḍuạ bọ esi omeeraam, dị eego esi imhoom iyọ phọ. (2:15–3:14; 4:9, 10) “Abuọ [arookpomoghan] emạ kirokirọ phọ aGaletia” (1:2) aPọl agẹ bọ aghiọm uḍighi buọ aJu r’abuọ Areelhe phọ, abuẹn Areelhe phọ uḍighi we dị m’oduna r’abudị ko/duna yogh, kụ eten dị iikia i/lo abuniin uḍighi buọ aGalli. (Iiḍ 13:14, 43; 16:1; Gal 5:2) Umạgh ghan oomo ph’abidị mọ aKristẹn aGaletia loor esi dị ekool phọ bidị orọl ghan bọ ughol mọ Galetia. Oomo emhụ aḍinyạ phọ aPọl agẹ bọ, ageanhaạn buẹn odị alhegheri bọ orọl bọ agạ esoorom mọ aRom, o/geanhaạn ruuruen phọ orọl bọ epẹ esiinyọm mọ, epẹ ph’odị ko/ghị ghan bọ.
Ibạl ABaibul
(Galetia 2:11-21) Mem dị aPita aru bọ asi Antiọk, mị uḍaghạ ni nyodị ghisigh odị idị eḍighi bọ odị apiomạn ni egaan. 12 Tutụ abuniin awe dị aJems alọgh oru bọ osi epẹ, aPita alean ghan ni eḍien r’aruuruen phọ momeeraam bọ Kraist. Kụ awe phọ abuẹn rosi, bịn odị amiigh agbatanaạn bidị aḅulolom omạn, loor oghiilaan abuphẹ okpaariọm bọ mọ oḍunogh ghan ruuruen phọ. 13 Abuerị abuọ aJu phọ momeeraam bọ ni Kraist umiigh aani ni oḍighi yogh idị bidị olegheri ni mọ i/kpeanaạn, dị r’aBanabạs bịn aḍighom aani ni. 14 Kụ mị amiịn bọ mọ eḍighinom iyaạr phọ abidị i/seleman r’igey phọ ipẹ ooḅi oghaạph phọ, mị uḅenị ni Pita siphẹ aghisigh phọ abidị mọ, “Nạ onyọ aJu ni kụ odi ghan bọ dọl aruuruen phọ, k/aḍiphẹ abuọ aJu phọ. Ika kụ edị nạ kakpaariọm bọ ruuruen phọ mọ orọl dọI abuọ aJu phọ?” 15 Okạr igey ni, yoor abuọ aJu phọ u/kịgh ruuruen phọ ro/dạph ghan bọ iiIogh phọ aMozis. 16 Kụ yoor olegheri ni mọ rotuạn ghan omeeraam aJizọs Kraist kụ Enaạn kẹsighenọm mọ ophọn oye aruukuan ni, ro/tuạn ghan ooko iilogh phọ aMozis. Yoor phọ kẹn momeeraam aani Jizọs Kraist, pidị otuạn omeeraam mọ yoor omoọgh bọ esi aKraist, k/ooko ghan iilogh phọ aMozis, kụ Enaạn esighẹnọm aani mọ yoor awe aruukuan ni. Yoor olegheri ni mọ ro/tuạn ghah ooko ghan iilogh phọ aMozis kụ Enaạn kẹsighenọm mọ ophọn oye aruukuan. 17 Iduọn yoor moḅọphoghạn bọ Kraist kụ rowạ ghan bọ ilọ Enaạn kesighenọm aani mọ yoor awe aruukuan ni, po omiịn ni mọ yoor abuḍighinom ikarạph ni idiphọ aruuruen phọ. Iphẹn phọ emeeraam mọ aKraist kụ oobia ikarạph ḍughụm? Eeye K/idiphọ. 18 Kụ mị aḅiIẹ amiigh oḅerion ipẹ mị alereghi bọ, pọ oḅilẹ reḍeenaan ghan mọ mị masoor ologh. 19 Iilogh phọ imị i/moọgh mun. Esi iiIogh phọ mị mamugh. lilogh phọ mighiigh imị eseere kụ mị awilẹ bọ, pidị mị arọlonaạn Enaạn. 20 Mughiigh aani ni imị r’aKraist siphẹ oreeny phọ. Mị odi ni rapooghu, kụ k/amị. AKraist kụ odi ghan loor phọ amị. Aghuḍum mọ mị odi bọ nyiidiphọ, mị odimom omeeraam mọ mị amoọgh bọ esi Oọny phọ Enaạn, opọ uphomoghiạn bọ imị kụ ughol bọ imị kụ amugh bọ. 21 Mị amaghamị ni ḍuugh phọ aKraist iyaạr. Eru maạr dị Enaạn etuạn ooko iilogh phọ aMozis esighenọm aani mọ yira awe aruukuan ni, pọ i/kpeanaạn dị aKraist mumugh.