ITUUGHẠ 8

Oghaạph Omaanhiọm Dị Katughemhị Iyaạr

Matiu 13:34, 35

OGHAẠPH OOKARAGH: Nighemhị itughemị ph’anạ esi osighẹ ghan oḍighinhom oghaạph omaanhiọm dị adugh onhaghanhạn, kụ atughemhị ephigh iyaạr phọ.

Saḅạr oghaạph omaanhiọm dị aagholhaan. Idiphọ aJizọs, sighẹ ghan ibạm araraạr kụ agbaạm igbogh, kụ asighẹ idị edugh onhaghanhạn agbaạm idị ekpạr. Ka/ḅarạm raraạr dị kegbaragbaramhị we. Miịn ni mọ oghaạph omaanhiọm mọ anạ amoọgh ni muḅọph r’oghaạph phọ, obọ kekparanhaạn bọ we phọ omhiịn amuḅọph phọ odi bọ igbo oghaạph omaanhiọm mọ r’oghaạph ph’anạ.

Kiririom ghan aphogh raraạr phọ remiteghu bọ siẹn aḅirini phọ. Atuughạ ghan rinyạ ookpomhoghan phọ, aḅilhẹ ghan anhaghạn mem lọ abukaaphọm dị osilor rotughemhị. Mem lọ nạ raḍighi iphẹn phọ, lọgh ghan elhegh oghaạph omaanhiọm dị nạ katue ni asighẹ aḍighinhom aani onhighemhị eten itughemhị ph’anạ. Kụ agẹ alhọgh esi.
Tuutughiạn ghan iyaạr dị kengọ suọ buphẹ ronaghạn bọ. Saḅạr oghaạph omaanhiọm dị agbolhomaam raraạr dị awe phọ roḍighi ghan ḅilhẹ k’aḅeraạn buphẹ ronaghạn bọ. Gona loor, oghaạph omaanhiọm mọ anạ ku/siphe umugholoor obobọ ku/pin ilhoghi abuphẹ ronaghạn bọ.
Tughemhị ikpanhạ araraạr phọ. Oghaạph omaanhiọm mọ anạ agbon ikpanhạ araraạr phọ. Miịn ni mọ opọ ranaghạn bọ atuughạ ni iyaạr siphẹ oghaạph omaanhiọm mọ.