Pogh Aghiọm Eekunha Aḅirinhi Phọ R’akpọ Oḅio

Moọny amem okparạm aZihova ilọ aḅirinhi phọ ophọn phọ kasi ni eekunha. Kopiemhi ni ruukụ iiḅereghị okpẹ, areelhe phọ oḅophạn ozuom we phọ Enhaạn, kụ aZihova apiemhi bukarạph phọ siphẹ Amagedọn. Kụ awe phọ Enhaạn opogh ni r’okiọm ghisigh omhiịn iphẹn phọ.

Okạr agey, yira u/lhegheri oomo ipẹ araraạr k’ekị bọ siphẹ igbogh iiḅaghamhị phọ. Esi omaạm, yira u/lhegheri mem mọ k’ekạr bọ emhiigh. Iyaạr phọ agomẹt kokol bọ kụ ozuom ruukụ iiḅereghị. Yira u/lhegheri ipẹ izuoghom awe Enhaạn kedoọny bọ esi ḅilhẹ r’araraạr phọ keḅaramhaạm bọ. Yira u/lhegheri kẹn okạr eten phọ epẹ aZihova kasighẹ bọ apiemhiom bukarạph phọ siphẹ Amagedọn.

Toroboiperolbọ, aBaibul phọ uḅenhị ni iyira ibadị araraạr dị k’ekpoomhị oḅio ayira ilọ aghisigh phọ. Esi omaạm, yira olhegheri ni mọ yira kụ odi bọ eekunha “asiḍio aruukunha phọ.” (2Tim 3:1) Kụ yira olhegheri ni mọ izuoghom aruukụ iiḅereghị phọ “kosoph ni okpere” pidị ko/piemhiom egey ekụ iiḅereghị phọ. (Mat 24:22) Yira olhegheri mọ aZihova kapẹl li we phọ odị. (2Pit 2:9) Bilhẹ kẹn yira olhegheri ni m’opọ aZihova m’asaḅạr bọ opiemhi abukarạph phọ, kụ ophẹl aḍigbogh aḍita phọ dị eego esi Amagedọn amhoọgh iikpọ kụ aḍighi oye elhiom eḍighinhom iyaạr.—Ogan 19:11, 15, 16.

Araraạr phọ kemite bọ ghisigh keḍighi idị awe “k’okanyanhụ” loor oghiilhaany. Toroboiperolbọ, esi aạl ghan ḅilhẹ r’ogbirima ipẹ aZihova maphẹl ghan bọ we odị epẹ omạn r’ipẹ odị maganhanhamhi bọ ilọ aghisigh phọ, yira kotue ni ‘omeremị rumụ phọ ayira opogh anyụ,’ r’akpọ oḅio mọ apelheẹny phọ ayira maabeẹph.—Luk 21:26, 28.