Adạm r’Iv umhạr ri ibadị anmụny mem mọ oḍuạ bọ siphẹ oghoony phọ Iden. Ḍien oḅẹl oọny phọ abidị ughol mọ aKen, kụ omhunhenhiom iyạl oọny phọ ughol mọ Ebel. AKen aḍighi oḅephom iizo, kụ Ebel aḍighi okoriom iyool igạ.

Ḍiniin aḍio aKen r’Ebel uphighirọn ni ekiạ ongọ aJehova. Kuolọ aJehova asighẹ ekiạ Ebel kụ awilhẹ elọ aKen. AKen aghạgh ni olhoghi loor iduọn aJehova u/sighẹ aani bọ ekiạ phọ odị. AJehova aḅenhị ni Ken mọ oghạgh olhoghi phọ odị katue ni aḍighi idị odị kaḍighi iyaạr dị i/nighẹ. Kuolọ aKen o/mheera onhaghạn.

Ḍiniin aḍio, aKen aḅenhị Ebel mọ: ‘Udạph imhị oghị epẹ ozo phọ.’ Mem dị bidị odi epẹ ozo phọ, aKen azuom ni umor phọ odị kụ aghiigh. AJehova alhiọm ni Ken. Odị aphorogh Ken asighẹ siphẹ eghunotu phọ abidị odi bọ, kụ o/mheera mọ odị aḅilhẹ aḅula.

Iphẹn phọ itughemhị iyira eeghe? Eeni yira otue ni omiigh oghạgh olhoghi eḍighi maạr dị araraạr i/kị eten phọ epẹ yira ootughiạn bọ. Yira koḍighi eeghe eḍighi maạr dị yira omhiigh oghạgh olhoghi obobọ abunhọn awe uḅenhị iyira mọ yira rokạgh olhoghi? Ewạ dị yira koogborion opamhaghạn loor ayira obọ yira koḍighi ghan bọ iyaạr dị i/nighẹ.

Loor esi iduọn Ebel aphomhoghiạn bọ aJehova kụ aḍighi bọ idị enhighẹ, aJehova raatughiạn ni nyodị. Kụ kaḅeton ni nyodị mem dị ade phọ meḍighi paradaịs.

Iduọn amem rekị bọ bịn awe obụgh siẹn ade phọ. Ibadị awe phọ uḍighi bukarạph awe. Abuniin aruukpaạny epẹ k’akẹ phọ umhiigh ni oḍighi aani ikarạph araraạr. Bidị uwilhẹ sidọl phọ abidị epẹ k’akẹ phọ kụ oru siẹn ade phọ oten we. Nạ alegheri ni iyaạr phọ eḍighi bọ kụ bidị oḍighi bọ iduọn phọ? Bidị uḍighi iduọn phọ pidị bidị otue opinhogh nmariịr.

Aruukpaạny phọ r’anmariịr phọ abidị umharaghị ni nmụny. Kụ anmụny phọ abidị ophoph omhanhạm kụ omhiigh ookpoḍị ghan awe. Bidị uḍighi yogh ghan kẹn ni we raraạr. Araraạr phọ emite ghan bọ aJehova i/ḅeraạn. Esi iduọn phọ, aJehova aḅẹm mọ onọ kasighẹ muụm aḍigho apiemhiom bukarạph awe phọ.

Kuolọ, oye arọl li dị u/ḍighi aani okarạph oye. Odị aphomhoghiạn aJehova. Ḍien odị ughol mọ aNoa. ANoa r’anhịr odị umhoọgh iraạr ibạm anmụny, dị oghol mọ Sem, Ham ḅilhẹ r’aJapheth. Iraạr phọ anmụny phọ aNoa uphinhogh kẹn ni nmariịr. Kụ aJehova aḅenhị Noa mọ akạ ogbogh oghuugh pidị odị r’eghunotu phọ odị okpetenhaan Muụm Aḍigho phọ. Oghuugh phọ arọl idiphọ igbogh igbe dị okaạm ireeny dị katue ni apooph anyụ amuụm. AJehova aḅilhẹ ni aḅenhị Noa mọ alhọgh idọ kirokirọ inhạm siphẹ oghuugh phọ pidị bidị ekpetenhaan aani muụm aḍigho phọ.

Mem mem mọ bịn aNoa amhiigh okạ oghuugh phọ. Eeni 50 asiạ kụ edị aNoa r’eghunotu phọ odị osighẹ bọ okaạm oghuugh phọ. Bidị ukạ ni oghuugh phọ eten phọ epẹ aJehova aḅenhị bọ bidị. Mem mọ amuphẹ phọ, aNoa aghaạph ni aḅenhị we phọ mọ Amuụm Aḍigho ratu. Kuolọ awe phọ u/meeraam.

Eekunha phọ, iteẹny ni mem dị bidị koḍigh oghuugh phọ. Omhiịn idị eḅilhẹ emite siphẹ esi ituughạ phọ etum bọ siẹn.