Emhạ irọl li dị etumhan Babẹl dị oghol mọ Ur. Awe emhạ phọ uu/ḅereghị ghan oginha aJehova. Kuolọ oniin oye arọl li siphẹ emhạ phọ dị aaḅereghị ghan oginha aJehova. Ḍien odị ughol mọ Ebraham.

Ḍiniin aḍio aJehova aḅenhị ni Ebraham mọ: ‘Bilhẹ siya anạ r’emhạ phọ anạ, aghị arọl de dị mị kaḍeenhaan nyinhạ.’ Enhaạn aguanhaan nyodị mọ: ‘Mị kaḍighi ni idị eemarạ eemarạ anạ keḍighi egbogh eelhe, kụ dị eego esi anạ mị kasẹph ni we oomo ade phọ.’

Ebraham o/lhegheri ekpisi phọ aJehova aḅenhị bọ nyodị oghị, kuolọ odị aḍuom olhoghi aJehova. Esi iduọn phọ Ebraham r’anhịr phọ odị Sera, r’odẹ phọ odị Tera, r’aLọt oọny umor phọ odị uukoroghian ni raraạr abidị omhiigh erelhe phọ.

Ebraham mamạn 75 asiạ mem mọ bidị osi bọ ekpisi phọ aJehova aḅenhị bọ nyodị oghị phọ. Ughol ekpisi phọ mọ Kenan. Epẹ phọ Enhaạn aḅaanhaạn ni Ebraham kụ aḅenhị nyodị mọ: ‘Oomo ade phọ aḍiẹn phọ nạ ramiịn bọ, mị kangọ nmụny anạ.’ Kuolọ mem mọ amuphẹ phọ Ebraham r’aSera mokpọ kụ moọny ko”mhoọgh. Esi iduọn phọ, oguan phọ aJehova aguanhaan bọ Ebraham kamunhughan bọ ika?

Ibadị asiạ meten ni Ebraham aphin bọ Sera. Kụ bidị mowilhẹ ni imạ otu abidị epẹ Ur omiigh orọl ogbogo. Kuolọ aSera o/gum, loor esi dị odị alhegheri ni mọ oḍighi ipẹ aJehova rawạ bọ kụ inhighẹ.

ASera awạ ni obumoọny asi esi dị aḅenhị Ebraham mọ: ‘Sighẹ Hegạr ebenhẹ onyanhị phọ amhị idiphọ anhịr anạ. Eḍighi maạr dị odị amhạr obumoọny pọ obumoọny phọ kaḍighi ni olọ amhị.’ Ebraham aḍighi ni ipẹ aSera aghaạph bọ. Kụ aHegạr amhạr olhephiri oọny kụ oghol mọ Ishmael.

Ibadị asiạ reten, mem dị Ebraham mamhạn 99 asiạ kụ aSera odi 89 asiạ, iraạr aruuruen uru ni k’abidị. Kụ Ebraham aḅenhị mọ orọl ude eeḍiạn oreeny dị odi siphẹ amarugh phọ odị olhe eẹny iyaạr oḅilhẹ ophooghian. Nạ alegheri ni we phọ oru bọ ophogh abidị? Awe phọ abuẹn phọ aruukpaạny Enhaạn! Oniin ookpaạny phọ aḅenhị ni Ebraham mọ: ‘Lhạ phọ aḍiphẹ retu bọ, aSera anhịr phọ anạ kamharanhaạn ni nyinhạ olhephiri oọny.’ ASera arọl li epẹ olhoghi ogbogo phọ anhaghạn kụ amhilhọgh. Kụ aatughiạn mọ: ‘Minạ phọ makpọ bọ iduọn kụ kamạr moọny?’

Ḍieriphọ alhạ phọ, bịn aSera amhạr olhephiri oọny, idiphọ ookpaạny phọ aJehova aghaạph bọ. Ebraham aghol oọny phọ mọ Aizịk, emhụ phọ pọ “Areẹr.”

Mem dị Aizịk odi oogh asiạ, aSera amhiịn ghan ni dị Ishmeal ranmoghoghoọm Aizịk. Orue oghoph oọny phọ odị, aSera aḅenhị Ebraham mọ aphorogh Hegạr r’Ishmeal. Eḅẹl amem mọ, Ebraham o/wạ oḍighi ipẹ aSera aghaạph bọ. Kuolọ aJehova awạ kẹn ni oghoph Aizịk. Esi iduọn phọ aḅenhị Ebraham mọ: ‘Naghanhạn Sera. Mị kapogh ni Ishmeal. Kuolọ k’eego esi Aizịk kụ mị amuneni ruguanhaan phọ amhị.’