ALọt arọl ghan r’umor odẹ odị dị oghol mọ Ebraham, epẹ Kenan. Iduọn amem mọ rekị bọ, inhạm aLọt r’ipẹ Ebraham i/ḍigh mun esi phọ bidị orọl bọ. Esi iduọn phọ, Ebraham aḅenhị Lọt mọ: ‘Esi phọ i/manạm mun dị iyạl ayira kotọl. Ka/lẹ, pin nyeniin agạ. Mị kasighẹ ḍieriphọ agạ phọ.’ Ipẹ Ebraham aḍighi bọ iḍeenhaan mọ Ebraham o/wạ ghan imạ ilọ aloor odị bịn, k”idiphọ?

ALọt amhiịn mọ ade dị etuman emhạ dị oghol mọ aSodọm emaạr enighẹ. Amuụm amuza ni ekpisi phọ, ḅilhẹ arooghọ asi kẹn ni. Esi iduọn phọ, odị aphin epẹ phọ kụ aphạm eghunotu odị aghimọm.

Awe phọ aSodọm r’awe emhạ phọ otuman bọ bidị oghol bọ mọ Gomorạ uḍighi yogh ghan ikarạph araraạr. Ikarạph phọ abidị isi ni esi dị aJehova aḅẹm mọ onọ kapiemhi Sodọm r’aGomorạ. Kuolọ Enhaạn o/wạ ophiemhi aani aLọt r’eghunotu phọ odị. Esi iduọn phọ, odị arom iyạl aruukpaạny odị mọ oghị oḅenhị bidị mọ: ‘Iigborion emite! AJehova rawạ ophiemhi emhạ phọ.’

ALọt aabinya ni omite emhạ phọ. Kụ aruukpaạny phọ ophạm ḍighaạgh aLọt, r’aḍighaạgh anhịr phọ odị r’iyạl phọ anmanyaạn phọ odị oghiilhom omitenhom siphẹ emhạ phọ. Kụ oḅenhị bidị mọ: ‘Ikiil eḍuạ obọ nyinha kemugh ghan bọ. Kụ ke/pogh omhạn. Nyinha ephogh omhạn nyinha kemugh ni!’

Mem dị bidị osi emhạ dị oghol mọ aZoar, aJehova aḍighi ni idị aniạn r’asolfọ eḍuạ epẹ k’akẹ esoor kụ elhe Sodọm r’aGomorạ. Oomo awe phọ orọl bọ ramhạ phọ ipẹ phọ umhuughu ni. Mem dị anhịr phọ aLọt u/naghanhạn itọ phọ aJehova kụ aphogh omhạn, odị aten ni eeḅoghoḍi aboph! Kuolọ aLọt r’iyạl phọ anmanyaạn phọ odị u/mugh aani loor esi dị bidị unhaghanhạn aJehova. Dị iikia i/lo, aLọt r’iyạl phọ anmanyaạn phọ odị ukururu ni loor iduọn anhịr phọ odị u/naghanhạn bọ aJehova. Kuolọ ipẹ phọ itughemhị iyira mọ emạn ni maạr onhaghanhạn ghan itọ aJehova.

Ebraham atughemhị Aizịk oọny phọ odị ophomhoghiạn aJehova r’oḍuom olhoghi oomo aruguanhaan phọ odị. Kuolọ mem dị Aizịk amhạn 25 asiạ, aJehova aḅenhị ni Ebraham oḍighi iyaạr dị ekpạr ri iboom. Eeghe kụ iyaạr phọ?

Enhaạn aḅenhị Ebraham mọ: ‘Seseeny, sighẹ oginha oọny phọ anạ aghimọm eeḅarạph dị edi epẹ Moriah aphighironhọm ekiạ.’ Ebraham o/lhegheri iyaạr phọ eḍighi bọ kụ aJehova aḅenhị bọ nyodị osighẹ oọny phọ odị ophighironhọm ekiạ. Kuolọ odị anaghanhạn ni aJehova.

Eḅon aḍiroọr bịn Ebraham aphạm Aizịk r’iyạl arebenhẹ odị anyeenhiom Moriah. Omunhenhiom iraạr aḍughul otu phọ mem dị bidị ophogh oghiọm ghisigh, bidị umhiịn ni eeḅarạph phọ Enhaạn aḅenhị bọ bidị oghị. Kụ Ebraham aḅenhị rebenhẹ phọ odị mọ orọl siphẹ okori loor esi dị Aizịk r’odị kụ kokị epẹ eeḅarạph phọ opighirọn ekiạ phọ. Ebraham asighẹ ipẹ phọ angọ Aizịk, kụ odị aphạm elekẹ phọ. Aizịk apuru ni odẹ phọ odị mọ: ‘Enhạm mọ yira kopighironhọm bọ ekiạ phọ edi eghẹn?’ Ebraham aphagharanhaạn mọ: ‘Moọny amhị, aJehova kamiteom ni.’

Mem mọ bidị osi bọ siphẹ eeḅarạph phọ, bidị ukạn ni enmeny ophighironhọm ekiạ phọ. Kụ Ebraham aghoroghị raghaạgh r’aruwol Aizịk, kụ asighẹ aḅạm siphẹ enmeny phọ.

Ebraham asighẹ ni elekẹ phọ odị aphạm bọ, oghiighom Aizịk. Kụ ookpaạny aJehova alọ amhạgh nyodị, kụ aḅẹm mọ: ‘Ebraham! Ka/ḍighi iyaạr moọny phọ! Nyiidiphọ, mị malhegheri mọ nạ amoọgh ni omheeraam esi Enhaạn loor esi dị nạ umheera ni osighẹ oọny phọ anạ ophighironhọm ekiạ.’ Ebraham aphogh ni ogbạl kụ amhiịn odughunha dị aghinhighian esi siphẹ elhegheḍum mọ. Kụ aagborion aakpọ iḍigh phọ odị aghoroghiọm bọ Aizịk, kụ asighẹ odughunha phọ aphighironhọm ekiạ phọ.

Emhiigh ḍio phọ aḍiphẹ phọ kụ rekị, aJehova amhiigh omhạgh Ebraham mọ oyaghirị onọ. Nạ alegheri ni iyaạr phọ eḍighi bọ? Ebraham aḍighi ghan torobọ iyaạr dị aJehova aḅenhị nyodị, ghalhamọ r’amem dị u/legheri iyaạr phọ eḍighi bọ kụ aJehova aḅenhị bọ nyodị oḍighi iyaạr phọ.

AJehova aḅilhẹ ni aḅenhị Ebraham mọ: ‘Mị kasẹph ni nyinhạ, kụ aḍighi idị anmụny phọ anạ kobụgh.’ Iphẹn phọ remạ ghan mọ dị eego esi oniin oọny phọ odị, aJehova kasẹph ni oomo abugey awe.