Aizịk aphin aRibeka mem dị odi 40 asiạ kụ odị aphomhoghiạn ni nyodị iboom. Kụ iduọn amem rekị bọ, aRibeka amhạr ri iyạl ilephiri anmụny mem.

Ḍien okumor phọ ughol mọ Isọ, kụ obạm mọ ughol mọ Jekọb. Isọ aḍighi otayạm itayạ dị aphomhoghiạn rukumuan elhegheḍum. Kuolọ aJekọb aḍighi oye dị orọl olhoghi otu aḅeraạn.

Mem mọ amuphẹ phọ, erua okpanhạ oọny phọ kụ ibụgh ghan epu elọ abueriphọ anmụny phọ mem dị odẹ phọ amugh. Siphẹ eghunotu phọ Aizịk, opọ kale bọ erua ikpanhạ anmụny phọ kapinhom aani ni bin aruguanhaan phọ aJehova aguan bọ Ebraham. Isọ o/maghamhị maạr ruguanhaan phọ, kuolọ aJekọb amhaghamhị ni maạr.

Ḍiniin aḍio, Isọ arigheel li olhoghi otu r’aloor dị medugh loor esi itayạ phọ odị aghị bọ. Odị anhaghạn ni eḍu iisạ phọ aJekọb rasạ bọ kụ aḅẹm mọ: ‘Okoọny rughiigh imhị! Kor ototọgh oḍụ phọ nạ rasạ bọ ungọ aani imhị!’ AJekọb aḅenhị Isọ mọ: ‘Mị kangọ ni nyinhạ, kuolọ uguan imhị mọ nạ kungọ imhị erua ikpanhạ phọ anạ.’ Isọ aḅenhị Jekọb mọ: ‘Mị u/moọgh iyaạr oḍighinhom erua phọ! Nạ katue ni asighẹ, ungọ imhị eḍien mị ule bịn.’ Nạ ragbi mọ ipẹ Isọ aḍighi bọ enighẹ ni ḍughụm? Eeye. Isọ asighẹ iyaạr dị emạn maạr iboom kụ aanmenhiom oopho eḍien.

Aizịk awạ ni osẹph oḅẹl oọny phọ odị mem mọ odị makpọ bọ azighazighạ. Kuolọ aRibeka aḍighi ni idị aJekọb aḍighi bọ obạm oọny phọ abidị amhoọgh ḍisẹph phọ. Iphin ni olhoghi Isọ mem mọ alhegheri bọ, kụ awạ reten oghiigh aJekọb. Loor iduọn Aizịk r’aRibeka rowạ bọ oghoph aJekọb, bidị uḅenhị nyodị mọ: ‘Kiạ arọl r’aLaban umor oniin phọ anạ tutụ oghạgh olhoghi phọ Isọ aḍuạ.’ AJekọb adạph ni oromha odẹ r’onhiin phọ odị kụ asuma.

AJehova aguanhaan Jekọb mọ odị kakoph ni nyodị iduọn odị aghoph bọ Ebraham r’Aizịk. Kụ aJekọb aghị ekpisi dị oghol mọ Haran. Epẹ phọ, odị amhoọgh ni eboom eghunotu r’aruphua.

Iduọn amem mọ rekị bọ, aJehova aḅenhị Jekọb mọ: ‘Ḅula epẹ emhạ phọ anạ.’ Esi iduọn phọ, aJekọb r’eghunotu phọ odị uukoroghian ni onyeenhe ogheel. Mem dị bidị odi eten, arebenhẹ aJekọb uru ni oḅenhị nyodị mọ: ‘Isọ umor phọ anạ ratu oteẹny anạ, kụ 400 awe kụ rodạph nyodị!’ Iphẹn phọ iḍighi idị aJekọb amhoọgh oghiilaan loor esi dị aatughiạn mọ Isọ ratu ozuom odị r’eghunotu phọ odị. Kụ odị aaḅereghị aḅenhị aJehova mọ: ‘Seseeny, uphẹl imhị asighẹ ḍighaạgh umor phọ amhị.’ Reḅaạl, bịn aJekọb asighẹ iyool igạ r’arekpe igạ, sinạm, sikamẹl, r’inhạm adool aghiọm Isọ.

Ḍughul aḍio phọ aḍiphẹ phọ, mem dị oginha aJekọb odi, odị amhiịn ni ookpaạny Enhaạn! Kụ iyạl phọ abidị ogbạ inhụgh tutụ aḍiroọr eḅaạl. Ghalhamọ r’iduọn aJekọb aḍighima bọ ni iyaạr siphẹ bidị rogbạ bọ inhụgh phọ, odị o/meera owilhẹ ookpaạny phọ. Esi iduọn phọ ookpaạny phọ aḅenhị nyodị mọ: ‘Uwilhẹ imhị.’ Kuolọ aJekọb aḅẹm mọ: ‘Mị nyinhạ ra/wilhẹ tutụ nạ usẹph imhị.’

Eekunha phọ, ookpaạny phọ asẹph ni Jekọb. Ipẹ phọ iḍighi idị aJekọb akuphom owol mọ aJehova ka/meera mọ Isọ aḍighi nyodị iyaạr.

Mem dị aḍiroọr meḅaạl, aJekọb aphogh ni ghisigh kụ amhiịn Isọ r’inya okuron awe phọ odị. Kụ aJekọb awilhẹ eghunotu phọ odị aghị akpuḍian risigh Isọ umor phọ odị oḍual amem. Isọ aghiil li aghị ateẹny Jekọb kụ aḅol nyodị. Kụ iyạl phọ abumor phọ omhoghi, kụ oḅilhẹ ophomhoghiạn. Nạ ragbi mọ irọl ika esi aJehova mem mọ odị amhiịn bọ ipẹ aJekọb aḍighi bọ?

Ipẹ reten, Isọ agheel li olhoghi otu kụ aJekọb aghiọm ghisigh erelhe phọ. AJekọb amhoọgh 12 alhephiri anmụny. Siḍien abidị ughol mọ Riubẹn, Simiọn, Livai, Juda, Dan, Naftalaị, Gạd, Asạ, Isakạ, Zebiulọn, Josef, r’aBenjamin. Oọny phọ aJekọb oghol bọ mọ aJosef kụ edị aJehova asighẹ aphelhọm we phọ odị. Nạ alegheri ri ni ipẹ aJehova asighẹ bọ Josef aphelhọm we phọ odị? Omhiịn.