AJosef oọny aJekọb. Kụ siphẹ ilhephiri anmụny phọ, odị kụ amhunhenhiom ḍioph r’oniin. Abumor phọ odị umhiịn mọ odẹ phọ abidị apomhoghiạn Josef apu bidị kụ olhọgh nyodị ḍien. AJosef amalhạ ni malhạ iyạl amem kụ aḅenhị bumor phọ odị. Abumor phọ aJosef unaghanhạn ni mọ aramalhạ phọ remạ ghan mọ bidị kokpuḍian ongọ Josef ḍiniin aḍio. Kụ bidị olhọgh nyodị ḍien iboom.

Ḍiniin aḍio, abumor phọ aJosef urọl li ekpisi dị etuman Shechem ropogh ghan igạ abidị. Kụ aJekọb arom Josef oghị ophogh abumor phọ odị. Bidị r’omhiịn Josef, bịn oḅẹm mọ: ‘Poronọ omalhaạm amalhạ phọ ratu. Oghiigh nyodị!’ Kụ bidị osiph nyodị osumeeny olhoghi aghuḍia. Kuolọ oniin umor abidị dị oghol mọ aJuda aḅẹm mọ: ‘Ku/kiigh nyodị! Aal nyodị idiphọ ebenhẹ.’ Bidị umhiịn ni bumuul ḍighi aMidia dị rokị Ijipt, kụ osighẹ Josef aalha bidị 20 ipoḍi asilva.

Ipẹ reten kụ abumor phọ odị oghiigh ogạ, kụ osighẹ iḅaạl phọ ogbulhoghom asuomạ phọ aJosef, kụ oghị oḍeenhaan odẹ phọ abidị. Kụ oḅẹm mọ: ‘Pogh, ophọn phọ asuomạ oọny phọ anạ phọ ni?’ AJekọb amhiịn bọ asuomạ phọ, aatughiạn mọ elhom enhạm meghiigh Josef. Bịn aJekọb amhiigh emoghi, kụ o/meera osophe.

R’osi bọ Ijipt bịn osighẹ Josef aalha ogbogh oye dị raḍighinhaan ghan Fero oḍighi, dị oghol mọ Potiphar. Kuolọ, aJehova o/wilhẹ Josef. APotiphar amhiịn mọ aJosef amaạr oḍighi agey ḅilhẹ mọ akpẹ kẹn ni oḍuomolhoghi. Esi iduọn phọ, aPotiphar aḅọgh ni oomo araraạr phọ odị amhoọgh bọ alhọgh ḍighaạgh aJosef.

Anhịr aPotiphar amhiịn mọ aJosef amaạr anighẹ kụ aḅilhẹ amite kẹn agey. Kụ ḍio etum ḍio, anhịr phọ aPotiphar aḅenhị ghan Josef mọ arolhạn nyodị esi. AJosef kaḍighi ika? AJosef o/meera, kụ aḅenhị nyodị mọ: ‘Eeye! Iphẹn phọ i/nighẹ. Odẹ otu phọ amhị uḍuom ni imhị olhoghi, kụ nạ anhịr odị. Eḍighi maạr dị mị arolhạn esi r’anạ, pọ mị maḍighi ikarạph akị esi Enhaạn!’

Ḍiniin aḍio, anhịr phọ aPotiphar asiph ni Josef mọ arolhạn nyodị esi. Kuolọ aJosef aghiil li asuma. Mem dị aPotiphar arigheel, anhịr phọ aḅenhị nyodị mọ aJosef awạ orolhạn esi r’odị. Kuolọ ipẹ phọ iḍighi okpẹ. Iphin ni olhoghi aPotiphar iboom kụ asighẹ Josef alhọgh otu ikoli. Kuolọ aJehova o/wulha Josef.

Mem dị aJosef odi ikoli, aFero, uwo emhạ phọ Ijipt amalhạ ni malhạ dị oye u/tue ugbạ emhụ phọ. Oniin ebenhẹ aFero aḅenhị ni Fero mọ aJosef katue ni agbạ malhạ phọ. Mem mem mọ, bịn aFero arom mọ omhạgh Josef.

AFero apuru ni Josef mọ: ‘Nạ katue ni agbạ malhạ phọ amhị?’ AJosef agbạ ni emhụ amalhạ phọ aḅenhị Fero mọ: ‘Eḍien kemuza ni Ijipt esi oḍual asiạ. Ipẹ reten kụ igbakurọ etọl esi oḍual asiạ. Saḅạr oye dị asụ olhoghi dị kaakpomhoghi riiḍien phọ aseere, obọ okoọny kazẹ ghan bọ we phọ anạ.’ AFero aḅenhị nyodị mọ: ‘Mị asaḅạr nyinhạ! Nạ kaḍighi omhunhenhiom iyạl oye dị amhoọgh iikpọ siẹn Ijipt!’ AJosef alhegheri ika emhụ amalhạ phọ aFero? AJehova kụ aḍeenhaan nyodị.

AJosef aakpomhoghi riiḍien phọ emuza bọ esi oḍual asiạ. Oḍual asiạ phọ reten, kụ igbakurọ erọl oomo phọ ade phọ idiphọ aJosef aghaạph bọ. Awe uḍuạ ni kirokirọ arikpisi oghị ḍighaạgh aJosef ogho eḍien. Odẹ phọ aJosef, aJekọb, anhaghạn ni mọ eḍien edi Ijipt, kụ arom ḍioph anmụny odị oghị ogho eḍien phọ.

Abumor phọ aJosef oghị bọ oteẹny Josef, odị alhọgh ni bidị elhegh. Kuolọ bidị u/lọgh Josef elhegh. Bidị ukpuḍian ni ongọ Josef idiphọ odị amalhạ bọ mem mọ odị aghom bọ. AJosef awạ ni olhegheri mughumọ abumor phọ odị monmia ni. Esi iduọn phọ, odị aḅenhị bidị mọ: ‘Nyinha iru oḅilhigha ayoor roḅilhẹ owaaghị omhiịn riisi dị yoor osughanham.’ Bidị uḅenhị nyodị mọ: ‘Eeye! Ḍioph r’iyạl ayoor kụ edị odẹ ayoor amhạr, kụ yoor uḍuạ Kenan kụ oru. Oniin umor ayoor mamugh, kụ obạm umor ayoor odi olhoghi otu r’odẹ ayoor.’ AJosef aḅenhị bidị mọ: ‘Ikị esighẹ obạm umor phọ anyinha esighẹ eru, purukụ mị kameeraam iphẹn nyinha rekaạph bọ.’ Kụ bidị oḅula oghị oteẹny odẹ phọ abidị.

Mem dị eḍien abidị emunheen, aJekọb aḅilhẹ ni aḅenhị nmụny phọ odị oghị Ijipt ogho eḍien. Kuolọ nyiidiphọ bidị uphạm ni obạm umor phọ abidị Benjamin. Orue olhegheri mughumọ abumor phọ odị mokạr ri onmia, aJosef asighẹ mogọ odị dị oḍighinhom silva alhọgh okuru eḍien aBenjamin kụ agbạ aḅẹm mọ abumor phọ odị momhi mogọ phọ odị. Iḍigh ni ḍiigu esi abumor phọ odị mem mọ arebenhẹ phọ aJosef omhiịn bọ mogọ phọ okuru aBenjamin. Kụ bidị ooḅereghiạn Josef mọ awilhẹ Benjamin alhiọm bidị.

Nyiidiphọ aJosef mamiịn mọ abumor phọ odị monmia. AJosef o/rue mun ophamhaghạn izin odị kụ amhiigh emoghi. Odị aḅenhị bidị mọ: ‘Mị umor phọ anyinha Josef. Odẹ phọ amhị odi ni ḍughụm?’ Iphẹn phọ iḍigh ni ḍiigu esi abumor phọ odị, kụ odị aḅenhị bidị mọ: ‘Ke/kururu loor esi ikarạph phọ nyinha iḍighi bọ imhị. Enhaạn iruom imhị oru ephẹn phọ ophẹl aghuḍum mọ anyinha. Iigborion eghị esighẹ odẹ phọ amhị erumom.’

Bidị ughị ni olhoghi otu oḅenhị odẹ phọ abidị ipẹ emite bọ kụ osighẹ nyodị oghimọm Ijipt. Nyiidiphọ aJosef r’odẹ phọ odị moḅilhẹ omiinhạn ghalhamọ r’iduọn ibadị asiạ meten bọ.