Eniin emhạ dị oghol mọ Uz, oye arọl li dị aaḅereghị ghan aJehova. Ḍien odị ughol mọ aJob. Odị amhoọgh ni eelạ r’egbogh eghunotu. Odị aḍighi ogey oye kụ aḅilhẹ alhoghonhaạn ghan ḍighaạgh rukulhom, nmariịr dị aburulom momhuughu, ḅilhẹ r’anmụny dị aburudẹ r’aburunhiin u/lo. Kuolọ abuniin awe otue ni ootughiạn mọ aJob ka/soman iiḅaghamhị loor iduọn aḍighi ghan bọ raraạr dị enighẹ.

AJob o/legheri mọ aSetan Eru phọ agbon ni riḍien nyodị. AJehova aḅenhị Setan mọ: ‘Nạ mamiịn ni ebenhẹ phọ amhị Job? Oye o/lho dị arọl idiphọ odị siphẹ ade phọ. Odị runhaghanhạn ghan imhị koḍighi ipẹ enhighẹ bọ.’ ASetan aphagharanhaạn mọ: ‘Ii, aJob ranhaghanhạn ghan nyinhạ loor esi dị nạ rakoph ghan nyodị kaḅilhẹ asẹph nyodị. Nạ mangọ nyodị de r’inhạm. Sigheọgh oomo araraạr phọ, bịn odị kabilhẹ ni ooḅereghị anạ.’ AJehova aḅenhị Setan mọ: ‘Kiạ aḍighi Job ipẹ edi bọ olhoghi phọ anạ. Kuolọ ka/kiigh nyodị.’ Eeghe kụ iḍighi kụ aJehova amheera bọ mọ aSetan aghị adẹgh Job aphogh? AJehova akuphom owol mọ aJob ka/bilhẹ ooḅereghị odị.

ASetan amhiigh ni okọm iiḅaghamhị ongọ aJob. Odị aphụr aḍighi idị awe aSiba oghị omhiighi sinạm r’inhạm adool aJob. Ipẹ reten kụ aniạn elhe oomo iyool igạ phọ aJob. Abunhọn awe dị oḍighi we aKaldia umhi kẹn ni sikamẹl phọ odị, kụ ozeọm rebenhẹ phọ aJob ropogh bọ inhạm mọ. Inhọn iiḅaghamhị dị epu iphẹn phọ imitenhaan ni Job. Oomo anmụny phọ aJob umuughu ni mem dị otu dị bidị orọl role male amelheghu. AJob aḅonyonhu ni azuan, kuolọ o/wilhẹ ooḅereghị aJehova.

ASetan awạ dị aJob kamiinhọm idị epu iphẹn phọ. Esi iduọn phọ, odị aḍighi idị arufuku emiteghu loor aJob. Iphẹn phọ ikọm ni eboom eephinha engọ Job. Kuolọ aJob o/legheri iyaạr phọ ekọm bọ iiḅaghamhị phọ iphẹn phọ. Etigheri oomo phọ iphẹn phọ, aJob o/wilhẹ ooḅereghị aJehova. Iphẹn phọ iḍighi ni idị olhoghi aJehova aḅaạl.

ASetan aḅilhẹ ni arom iraạr awe oghị odẹgh aJob ophogh. Bidị uḅenhị nyodị mọ: ‘Nạ maḍighi ikarạph kụ aakpereghi. Pọ kụ iyaạr phọ Enhaạn raliọm bọ nyinhạ.’ AJob aḅenhị bidị mọ: ‘Mị ikarạph u/ḍighi.’ Kuolọ odị amhiigh ni ootughiạn mọ aJehova kụ akọm bọ iiḅaghamhị phọ odị, ḅilhẹ mọ Enhaạn ra/pogh nyodị agey.

Oniin onyọ ugheel dị oghol mọ Elihu arọl li ogbạl anhaghạn ghan ipẹ bidị rokaạph bọ. Bidị roghaạph omhạn, kụ odị aḅenhị bidị mọ: ‘Ipẹ nyinha eghaạph bọ i/tu inẹ. Iitughiạn aJehova epu ilọ ayira. Odị ka/tue aḍighi ikarạph. Odị ramiịn ghan ni oomo araraạr kụ aḅilhẹ raloghonhaạn ghan ḍighaạgh we lọ omhoọgh iiḅaghamhị.’

AJehova aḅilhẹ ni kẹn aḅaanhaạn Job kụ aḅẹm mọ: ‘Nạ urọl eghẹn mem mọ mị ralẹm bọ kẹ phọ r’ade phọ? Eeghe kụ iḍighi kụ nạ aḅẹm bọ mọ mị nyinhạ ra/phogh agey? Nạ rakaạph ghan ilọ araraạr dị nạ u/legheri.’ AJob aḅẹm mọ: ‘Mị mapiomạn. Mị manhaghạn ni ilọ anạ, kuolọ nyiidiphọ kụ edị mị alhegheri odọ oye phọ nạ aru bọ. Iyaạr i/lo dị nạ ka/tue aḍighi. Ka/lẹ esi araraạr phọ mị aghaạph bọ.’

ASetan rodẹgh bọ Job romạn, bịn aJehova aḍighi idị aJob amhoon. Kụ aḅilhẹ asephọm nyodị raraạr dị epu ipẹ odị amhoọgh ghan bọ. AJob arọl li abia aḅilhẹ amhoọgh oḅaạl olhoghi siphẹ aghuḍum mọ odị. AJehova asẹph Job loor esi dị anaghanhạn nyodị ghalhamọ r’amem dị araraạr ekpạr ri. Keḅeraạn ni nyinhạ oghiọm aghisigh okumu aJehova etigheri torobọ iyaạr lọ emite, idiphọ aJob aḍighi bọ?

Epẹ Ijipt, ughol ghan eghunotu phọ aJekọb mọ Izrạl. Mem mọ aJekọb r’aJosef omugh bọ, onhọn aFero amite ni dị amhiigh otooghị Ijipt. Omhoom aFero phọ ophọn phọ aghiilaan ni we phọ Izrạl loor esi dị mobụgh ropu we phọ Ijipt. Esi iduọn phọ, odị asighẹ we phọ Izrạl aḍighi rebenhẹ, kụ akpaariọm ghan bidị oḅolhọgh abrik r’okumuan igbagarạ arukumuan epẹ iizo phọ. Kuolọ iduọn awe phọ Ijipt rokpaariọm bọ bidị oḍighi igbagarạ iiḍighi kụ edị awe phọ Izrạl robụgh ghan bịn. Iphẹn phọ iḍighi ni idị olhoghi aFero u/ḅaạl, esi iduọn phọ odị angọ itọ mọ ozẹ torobọ olhephiri oọny dị olọ Izrạl amhạr. Dị iikia i/lo, iphẹn phọ iḍighi ni idị awe phọ Izrạl omhoọgh oghiilhaan.

Anhịr olọ Izrạl dị oghol mọ aJochebed amhạr ri oọny dị amhaạr anhighẹ. Orue oghoph obumoọny phọ, odị asighẹ alhọgh egunhum, kụ aseere ogbạl Ophiịny aNile phọ. Onyanhị aJochebed dị oghol mọ aMiriam, aaghiạn ni ogbạl Ophiịny aNile phọ omhiịn iyaạr dị kemitenhaan umor phọ odị.

Onyanhị aFero dị aghị owura amuụm siphẹ ophiịny phọ amhiịn ni egunhum mọ kụ asighẹ. Odị amhiịn ni obumoọny dị ramoghi siphẹ olhoghi egunhum mọ, kụ amhoọgh igbiririph aghị esi odị. AMiriam aghị ni apuru onyanhị phọ aFero mọ: ‘Mị ukị uwaanhaạn nyinhạ anhịr dị kapogh obumoọny phọ ḍughụm?’ Mem mọ onyanhị phọ aFero amheeraam bọ, aMiriam aghị ni amhạgh onhiin phọ odị. Onyanhị phọ aFero aḅenhị Jochebed mọ: ‘Sighẹ obumoọny phọ ophọn phọ aghị uukonhomonaan imhị. Kụ mị kakpẹ ni nyinhạ.’

Mem dị obumoọny phọ aphoph enụm, aJochebed asighẹ ni nyodị aghị angọ onyanhị phọ aFero. Kụ onyanhị phọ aFero aghol nyodị mọ aMozis. Onyanhị phọ aFero aakonhom Mozis idiphọ obumoọny odị kụ angọ Mozis torobọ iyaạr dị awạ. Kuolọ aMozis o/wulha aJehova ghalhamọ r’iduọn ookonhom bọ ni nyodị idiphọ oọny aFero. Odị alhegheri ni mọ odị olọ Izrạl, kụ asopha okumu aJehova.

Mem dị aMozis amhạn 40 asiạ, odị asopha ni olhoghonhaạn awe phọ odị ḍighaạgh. Mem dị aMozis amhiịn dị oye olọ Ijipt rakuphogh olọ Izrạl, odị ee ni r’oye olọ Ijipt phọ kụ aghiigh. AMozis asighẹ ni iisaạr aakpereghiom oye phọ odị aghiigh bọ. Mem dị aFero anaghạn ipẹ aMozis aḍighi bọ, odị awạ ni oghiigh aani aMozis. Kuolọ aMozis asuma aghị epẹ Midian, kụ aJehova aphogh ni nyodị epẹ phọ.