AMozis arọl Midian esi 40 asiạ. Odị aphin ni anhịr aḅilhẹ amhoọgh ibạm anmụny epẹ Midian. Ḍiniin aḍio, mem dị odị rapogh iyool igạ epẹ eeḅarạph phọ aSinai, odị amhiịn ni iyaạr dị eḍigh ḍiigu esi odị. Odị amhiịn ni ekpu eḍum dị aniạn reemor, kuolọ aniạn phọ i/le eḍum mọ! Mem dị aMozis aghị omhiịn iyaạr phọ eḍighi bọ kụ aniạn phọ i/le bọ eḍum mọ, odị anhaghạn eḍọgh dị eḅẹm mọ: ‘Mozis! Meerạ siphẹ nạ odi bọ, akporonhaạn rokoro phọ nạ alhoghạ bọ. Loor esi dị ade phọ nạ ameerạ bọ ade iigbia.’ Eḍọgh phọ aMozis anaghạn bọ eḍọgh ookpaạny dị aJehova arom oḅaanhaạn odị.

Loor esi oghiilaan aMozis apuki ni risigh odị. Eḍọgh phọ iḅilhẹ eḅenhị nyodị mọ: ‘Mị mamhiịn imhinhimiịn awe phọ Izrạl. Kụ mị rawạ otagharạn abidị ḍighaạgh awe phọ Ijipt kụ osighẹ olhọgh de dị emaạr enhighẹ. Mị rawạ mọ kiạ asighẹ we phọ amhị amitenom Ijipt.’ Dị iikia i/lo, ipẹ phọ iḍigh ni ḍiigu esi aMozis.

AMozis apuru mọ: ‘Mị kapagharanhaạn ika eḍighi maạr dị awe phọ upuru imhị mọ anhiạn kụ arom nyinhạ?’ Enhaạn iḅenhị nyodị mọ: ‘Ḅenhị bidị mọ aJehova Enhaạn phọ Ebraham, Aizịk r’aJekọb kụ arom nyinhạ.’ AMozis aḅilhẹ ni apuru mọ: ‘Mị kaḍighi ika eḍighi maạr dị awe phọ u/meeraam ipẹ mị aghaạph bọ?’ AJehova aḍighi ni iyaạr dị aMozis akuphom owol mọ odị kaloghonhaạn ni nyodị ḍighaạgh. Odị aḅenhị Mozis mọ atebeeny ikparạ phọ odị aphạm bọ ude. Mem dị aMozis atebeeny ikparạ phọ, ikparạ phọ iten ni ekarạph iyaạr! Mem dị aMozis asiph esọph ekarạph iyaạr phọ, iḅilhẹ ni eten ikparạ. AJehova aḅenhị nyodị mọ: ‘Nạ aḍighi iiḍaạny phọ iphẹn phọ, keḍeenhaan ni mọ mị kụ urom nyinhạ.’

AMozis aḅẹm mọ: ‘Mị ra/tue ghan kaghaạph iyaạr dị kedụgh onhaghạn.’ AJehova aḅenhị nyodị mọ: ‘Mị kaḅenhị ghan ni nyinhạ iyaạr dị nạ kakaạph. Kụ mị kaḅilhẹ kẹn ni atom umor phọ anạ Eeron olhoghonhaạn anạ ḍighaạgh.’ Iphẹn phọ iḍighi idị aMozis akuphom owol mọ aJehova odi ni r’odị. Kụ odị aphạm anhịr phọ odị r’anmụny phọ odị anyeenhiom Ijipt.

Ukpaariọm ni we phọ Izrạl oḍighi arebenhẹ. AJehova arom Mozis r’Eeron oghị oḅenhị aFero mọ: ‘Meera awe phọ amhị ogheel pidị uuḅereghị imhị epẹ edalạ phọ.’ R’oḅom emhụ, aFero aḅẹm mọ: ‘Ilọ aJehova aghaạph imhị i/mooghọm, kụ mị ka/meera mọ awe phọ Izrạl ogheel.’ AFero abughẹ ni igbagarạ iiḍighi phọ awe phọ Izrạl oḍighi ghan bọ. Kuolọ aJehova kaḍeenhaan ni Fero odọ oye dị odị aru. Odị asighẹ Ḍioph Araraạr Alhiọm We Phọ Ijipt. AJehova aḅenhị Mozis mọ: ‘AFero o/meera unaghanhạn imhị. Esi iduọn phọ ḍiroọr, kiạ epẹ Ophiịny aNile phọ ateẹny Fero. Ḅenhị nyodị mọ loor iduọn odị u/meera bọ mọ awe phọ amhị ogheel, amuụm Ophiịny aNile phọ katen iḅaạl.’ AMozis anaghanhạn ni aJehova. Odị aghị ni ateẹny Fero siphẹ Ophiịny aNile phọ. Kụ aFero amhiịn dị Eeron asighẹ ikparạ phọ odị agurọm muụm Ophiịny aNile phọ, kụ amuụm mọ aten iḅaạl. Ina phọ imuughu ni kụ amuụm ophiịny phọ amhiigh ophur. Kụ awe phọ u/tue upughọl muụm mọ. Ghalhamọ r’iduọn phọ ni, aFero o/meera mọ awe phọ Izrạl ogheel.

Oḍual aḍughul otu reten, aJehova aḅilhẹ ni arom Mozis oghị oteẹny aFero oḅenhị mọ: ‘Eḍighi maạr dị nạ u/meera mọ awe phọ amhị ogheel, iḅạl kemuza ni oomo phọ Ijipt.’ Kuolọ aFero o/meera onaghạn. Esi iduọn phọ, Eeron aphoophe ni ikparạ phọ odị kụ iḅạl emuza oomo ade phọ, esi esi dị eḍiku ilhoghi aruutu, iisoph r’asigbagbạ. AFero aaḅereghiạn ni Mozis mọ aḅenhị aJehova aḍighi idị iḅạl phọ ke/mite mun. Kụ aFero aguanhaan mọ odị kameera ni mọ awe phọ Izrạl ogheel. Esi iduọn phọ, aJehova aḍighi ni idị iḅạl phọ i/mite mun. Awe phọ Ijipt uukpomhoghi ni iḅạl phọ memhuughu bọ, kụ ade phọ emhiigh ophur. Kuolọ aFero o/meera ni mọ awe phọ Izrạl ogheel.

AJehova aḅilhẹ aḅenhị Mozis mọ: ‘Ḅenhị Eeron asighẹ ikparạ phọ odị agurọm iisaạr ade phọ. Odị agụr, iisaạr phọ keten ni iḅirigidi.’ Iduọn Eeron agụr bọ, bịn mem mem mọ iḅirigidi emuza de phọ Ijipt. Abuniin awe Ijipt uḅenhị ni Fero mọ: ‘Enhaạn awe phọ Izrạl kụ ikọm iiḅaghamhị phọ iphẹn phọ.’ Ghalhamọ r’iduọn phọ, aFero o/meera ni mọ awe phọ Izrạl ogheel.