AMozis r’Eeron ughị ni oteẹny Fero kụ oḅenhị mọ Enhaạn aḅẹm mọ: ‘Eḍighi maạr dị nạ u/meera mọ awe phọ amhị ogheel, mị kamuzeḍi de phọ r’isoọph.’ Isoọph phọ eḍighi raraạr dị repeẹph ghan dị relomian ghan. Isoọph phọ iḍiku ni ruutu awe phọ Ijipt, ruutu arukulhom r’araalạ. Oginha epẹ Goshen awe phọ Izrạl orọl bọ kụ edị isoọph phọ i/tọl aani. Ophọn phọ omhunhenhiom inya iyaạr dị aJehova asighẹ alhiọm we phọ Ijipt. Kụ emhiigh omhunhenhiom inya phọ kụ rekị, oginha awe phọ Ijipt bịn kụ umiinhọm ghan. Loor esi isoọph phọ, aFero alhọm Mozis mọ: ‘Seseeny ḅenhị aJehova asigheọgh isoọph phọ. Mị kameera ni mọ awe phọ anạ ogheel.’ Kuolọ mem mọ aJehova asigheọgh bọ isoọph phọ, aFero anme ni olhoghi odị. Dị iikia i/lo, aFero ko/tuughạ ni iyaạr esi iphẹn emite bọ.

AJehova aḅilhẹ ni aḅenhị Mozis oghị oḅenhị aFero mọ: ‘Eḍighi maạr dị nạ u/meera mọ awe phọ amhị ogheel, mị kaḍighi idị areezẹgh kezẹ inhạm awe phọ Ijipt.’ Ḍio phọ etum bọ siphẹ bịn inhạm awe phọ Ijipt emhiigh omhuughu. Kuolọ inhạm awe phọ Izrạl i/mugh aani. Ghalhamọ r’iduọn phọ ni, loor esi oḅom emhụ aFero o/meera mọ awe phọ Izrạl ogheel.

AJehova aḅenhị ni Mozis mọ aḅilhẹ aghị ateẹny Fero, kụ asighẹ oorụ asạr anyụ. AMozis aḍighi ni iduọn phọ kụ oorụ phọ aten ophugh kụ asoorom we phọ Ijipt. Ophugh phọ aḍighi idị arufuku emiteghu siloor awe Ijipt r’inhạm mọ abidị, kụ ipẹ phọ ekọm eboom eephinha engọ bidị. Ghalhamọ r’iduọn phọ ni, aFero o/meera mọ awe phọ Izrạl ogheel.

Ipẹ reten, aJehova aḅilhẹ arom Mozis oghị oteẹny aFero kụ oḅenhị mọ: ‘Nạ ra/meera mọ awe phọ amhị ogheel ḍughụm? Iḍuenheen mị kaḍighi idị igbogh ikpo ibikpo kekạr de phọ Ijipt.’ AJehova aḍighi ni idị ibikpo eghạr kụ oomaạny r’aniạn eḅilhẹ emite. Ophọn phọ kụ ogbagarạ oghim dị awe Ijipt momhiịn ghan. Oghim mọ aphiemhi ni ireeny r’iizuphạ, kuolọ o/si epẹ Goshen. AFero aḅenhị Mozis mọ: ‘Lọm aJehova aḍighi idị oghim mọ ka/kim mun. Bịn nyinha etue ni ekeel.’ Kuolọ iduọn olophiạ phọ asorọph bọ kụ ibikpo phọ i/kạr mun bọ, bịn aFero anme olhoghi odị.

Ipẹ reten kụ aMozis aḅenhị Fero mọ: ‘Nyiidiphọ, igurubia kụ ketaạl oomo iizuphạ r’ireeny phọ esugha bọ.’ Kụ irubal igurubia eraạl torobọ iyaạr dị esugha epẹ iizo phọ r’anyụ ireeny phọ. AFero aḅenhị Mozis mọ: ‘Lọm aJehova aḍighi idị igurubia phọ keḍuạ.’ Kuolọ mem dị aJehova aḍighi idị igurubia phọ eḍuạ, aFero aghiọm ni ghisigh akparamhị olhoghi odị.

AJehova aḅilhẹ aḅenhị Mozis mọ: ‘Poophe ḍighaạgh anạ aghiọm epẹ okuaḍio phọ.’ Eginha amem bịn, okuaḍio phọ akitonhu bịn ufiri aḍigh. Kụ esi iraạr aḍughul otu, awe phọ Ijipt u/tue umiịn iyaạr. Oginha epẹ awe phọ Izrạl orọl bọ kụ edị aḍiḅaạl erọl siphẹ aruutu phọ abidị.

AFero aḅenhị Mozis mọ: ‘Nạ r’awe phọ anạ otue ni okeel. Kuolọ ibilhẹ inhạm mọ anyinha ephẹn.’ AMozis aphagharanhaạn mọ: ‘Yoor kopạm ni inhạm mọ ayoor, pidị yoor osighẹ opinyonhọm rikiạ ongọ Enhaạn phọ ayoor.’ AFero aghaghạm ni Mozis olhoghi kụ alọ mọ: ‘Ḍuạ siẹn ghisigh amhị! Eḍighi maạr dị mị aḅilhẹ amhiịn nyinhạ, mị kaghiigh ni nyinhạ.’

AMozis aguahaan Fero mọ onọ ka/kị mun omhiịn odị. Kuolọ tutụ odị kaḍuạ bọ, odị aḅenhị Fero mọ: ‘Ogbo aḍughul, torobọ oḅẹl oọny olọ Ijipt, emhiigh oọny aFero kụ esi nmụny arebenhẹ phọ odị komuughu ni.’

AJehova aḅenhị we phọ Izrạl mọ ookolhobian olhe eḍien dị egbatanhaạn. Odị aḅenhị bidị mọ: ‘Ikiigh olhephiri oyool ogạ obobọ atụ ogạ dị mamhạn lhạ kụ esighẹ iḅaạl phọ egbul iḅaghaghaạm onhụ aḍibuo phọ anyinha. Ipoghị enhạm mọ kụ elheom abrẹd dị u/lọgh iyaạr dị kafughughu. Ikpolhoghiạn rusuomạ anyinha, esighẹ rokoro anyinha elhoghạ kụ eekolhobian omhiigh erelhe phọ. Loor esi dị ḍughul phọ aḍiẹn phọ, mị kitagharạn ni inyinha.’ P’eeghe ibo dị awe phọ Izrạl omhoọgh olhegheri mọ kotagharạn bidị!

Ogbo aḍughul, ookpaạny aJehova aghị ni torobọ otu siphẹ Ijipt. Kụ torobọ otu dị u/gbul iḅaạl ogạ phọ siphẹ iḅaghaghaạm mọ, okpanhạ oọny phọ amhugh ghan ni. Kuolọ ookpaạny phọ aten ghan ni ruutu phọ ipẹ ogbul bọ iḅaạl phọ siphẹ iḅaghaghaạm mọ. Torobọ eghunotu siphẹ Ijipt, mọ uwo ekulom obobọ oolạ, okpanhạ oọny phọ amhugh ghan ni. Kuolọ igbo awe phọ Izrạl, r’oniin obumoọny o/mhugh.

Okpanhạ oọny phọ aFero amhugh aani ni. Esi iduọn phọ, aFero aagborion ni aḅenhị Mozis r’Eeron mọ: ‘Iḅetenhu eḍuạ siẹn. Ipạm inhạm mọ anyinha eghị eeḅereghị Enhaạn phọ anyinha!’

Mem dị unwanyụ phọ aḍighi okpom kụ ramu agey, awe phọ Izrạl uḍuạ ni Ijipt. Torobọ oye arọl r’eghunotu phọ odị iduọn bidị rokeel bọ. Alhephiri anmụny dị oḍighi buọ Izrạl umhạn 600,000, kụ ibadị anmariịr r’ibạm anmụny urolhọm aani ni. Abunhọn awe dị u/ḍighi buọ Izrạl udạph ni bidị, loor esi dị rowạ ooḅereghị aani aJehova. Nyiidiphọ, aJehova matagharạn we phọ Izrạl!

Orue ootughiạn ghan ipẹ aJehova aphẹl bọ bidị, awe phọ Izrạl kole ghan eḍien phọ epẹ egbatanhaạn bọ, mem torobọ alhạ. Kụ ughol ghan eḍien phọ mọ Eyaạl Ophẹl Otenhe.