Ika Kụ Idị Mị Katue Abilhẹ Ikarạph Iitughiạn?

• Nạ amiịn ika loor phọ anạ?

• Uḍighi ika kụ emạn bọ maạr?

• Idị nạ katue aḍighi

• Bạl abughẹ ilọ iphẹn phọ

• Idị iigbo anạ oghaạph

Nạ amiịn ika loor phọ anạ?

• Mị ramoọgh ghan igey iitughiạn

  “Mị rakparaghạ ghan ni omhiịn mọ mị amoọgh ni oḅaạl olhoghi ḅilhẹ ra/kạgh ghan olhoghi. Riḅeraạn ghan imhị orọl r’oḅaạl olhoghi torobọ aḍio”—Valerie.

• Mị ramoọgh ghan ikarạph iitughiạn

  “Mem dị egey iyaạr emite, mị raatughiạn ghan mọ eeni ke/nighẹ obobọ okpẹ ni.”—Rebecca.

• Mị ramiịn ghan raraạr eten dị ekpeanhaạn

  “Oḍighi oye dị ramoọgh ghan igey iitughiạn kiḅonyon imhị ezu mem dị araraạr i/kị agey, ḍieriphọ aḍighaạgh phọ, oḍighi oye dị ramoọgh ghan ikarạph iitughiạn keḍighi idị torobọ amem mị katọl ghan re/ḅaạl olhoghi. Oḍighi oye dị ramiịn ghan raraạr eten dị ekpeanhaạn kilhoghonhaạn imhị ḍighaạgh omhiịn ghan araraạr eten phọ epẹ ekpeanhaạn bọ.”—Anna.

Uḍighi ika kụ emạn bọ maạr?

ABaibul phọ aḅẹm mọ “odẹ odianaan ghan buọ oḅaạl olhoghi.” (Proverbs 15:15) Awe dị ro/moọgh ghan ikarạph iitughiạn oomo amem romiịn ghan ghuḍum mọ abidị egey eten kụ komoọgh oḅaạl olhoghi. Kụ ibadị amem bidị kụ rogbor ghan komhoọgh righirị. Ogbạ agey, anhiạn kụ rawạ oḍigh arighirị r’awe dị oomo amem olhoghi u/ḅaạl?

Toroboiperolbọ, araraạr edi ni siẹn aḅirinhi phọ dị ghalhamọ oye dị raatughiạn ghan igey iitughiạn kasoman ni. Esi omaạm:

• Eeni amem nạ kanaghạn ni ilọ eghạm, ilọ iigamaniạn, obobọ ilọ osoroghu iilhogh.

• Eeni iiḅaghamhị etue ni etọl siphẹ eghunotu ph’anạ.

• Dị iikia i/lo, nạ rapiomạn ghan ni loor e/munhughan phọ.

• Oyaghirị anạ kẹn katue ni aḍighi iyaạr dị kepin olhoghi anạ.

Kparipẹ rozọ eten dị eḍeenhaan mọ iiḅaghamhị phọ ipẹ phọ nyinhạ i/gbolhomaam obobọ osighẹ oomo olhoghi anạ ogbon iiḅaghamhị phọ, kparaghạ omhiịn araraạr eten dị eeleeny. Omhiịn ghan araraạr eten dị ekpeanhaạn keloghonhaạn ḍighaạgh dị oye phọ ka/moọgh iboom ikarạph iitughiạn ḅilhẹ ka/ḅonyonhu azuan.

Idị nạ katue aḍighi

• Miịn sipiomạn phọ anạ eten dị eeleeny.

  ABaibul phọ aḅẹm mọ: “Oye o/lho siẹn aḅirini phọ dị raḍighi ghan idị enighẹ oomo amem dị ka/piomạn.” (Ecclesiastes 7:20) Iduọn nạ rapiomạn ghan bọ ni eeni amem kụ iḍeenhaan bọ mọ nạ oye, re/mạ ghan kemiteom mọ nạ o/mhoọgh iyaạr oḍighinhom.

  Omhiịn ghan araraạr eten dị ekpeanhaạn: Mem lọ nạ apiomạn, kparaghạ ni oolemhi kuolọ legheri mọ nạ ka/ḍighi ghan ilọ enighẹ oomo amem. Oniin oḍoọgh oọny dị oghol mọ aCaleb aḅẹm mọ “Mị rakparaghạ ghan omhiịn mọ mị u/tolhonhaạn ghan ootughiạn ghan ilọ asipiomạn phọ amhị, kparipẹ ghụn mị rakparaghạ ghan otuughạ iyaạr esi asipiomạn phọ amhị pidị mị ka/ḅulha mun aḍighi.”

• Ka/tomaạm loor anạ bunhọn.

  ABaibul phọ aḅẹm mọ: “Yira ku/ḅo ghan iḅo igbogh. Oniin nyoniin ku/pạ ghan. Oniin nyoniin ku/suọm ghan ologhi eḍịm.” (Galetia 5:26) Oḍigh isiphẹ intanẹt phọ ophogh ghan asifoto awe dị odi apati dị nyinhạ u/mhạgh oghị aani ketue ni eḍighi idị olhoghi anạ kabeeph. Ketue ni eḍighi idị arighirị anạ koḅilhẹ okịgh mudị amulọgh ḍien anạ.

  Omhiịn ghan araraạr eten dị ekpeanhaạn: Lọgh elhegh mọ k/oomo amem dị awe roḍighi apati kụ edị komhạgh nyinhạ. Ḅilhẹ legheri mọ, asifoto phọ nạ ramiịn ghan bọ siphẹ intanẹt phọ re/kaạph ghan oomo ilọ awe phọ. Oḍoọgh onyanhị dị oghol mọ Alexis aḅẹm mọ: “Ibadị amem asifoto awe rolọgh ghan bọ siphẹ intanẹt phọ reḍeenhaan ghan oginha imạ araraạr dị bidị rokelhọm, ro/loghọm ghan raraạr dị i/ḅeraạn bidị dị emite.”

• Ḍighi oye dị kawạ ghan eephọ r’oomo awe ekạr ekpaariọm siphẹ eghunotu phọ anạ.

  ABaibul phọ aḅẹm mọ: “Bin muọ anyina, iḍighi ghan oomo ilọ nyina ketue, erolọm eephọ.” (Rom 12:18) Nạ ka/tue apamaghạn ipẹ awe kozoọm bọ nyinhạ, kuolọ nạ katue ni apamaghạn ipẹ nạ kamegheron bọ akị. Nạ katue ni asopha oḍighi oye dị rawạ ghan eephọ.

  Omhiịn ghan araraạr eten dị ekpeanhaạn: Kparaghạ omhiịn mọ nạ o/bughẹ iiḅaghamhị dị emite siphẹ eghunotu phọ, kuolọ wạ ghụn eephọ r’abuọ eghunotu phọ anạ iduọn nạ kaḍighi bọ r’arighirị phọ anạ. Oḍoọgh onyanhị dị oghol mọ Melinda aḅẹm mọ: “Onyọ ayira dị amhunhughan o/lho, kụ oniin kapiomạn ghan ni nyoniin, yira kụ kosopha ipẹ yira komegheron bọ, mọ eten eephọ obobọ enhọn eten.”

• Moọgh eegharạ osẹph ghan.

  ABaibul phọ aḅẹm mọ: “Kụ ingọ ghan ni ḍisẹph.” (Kolosị 3:15) Omhoọgh eegharạ osẹph ghan kelhoghonhaạn nyinhạ ḍighaạgh ogbon igey araraạr phọ remite bọ siphẹ aghuḍum mọ anạ kparipẹ r’araraạr phọ ipẹ eghịgh bọ mudị re/kị agey siphẹ aghuḍum mọ anạ.

  Omhiịn ghan araraạr eten dị ekpeanhaạn: Lọgh ni elhegh iiḅaghamhị phọ anạ, kuolọ ki/ḍighi idị nạ ka/miịn oomo phọ imạ araraạr phọ remite bọ siphẹ aghuḍum mọ anạ. Esinha onyanhị dị oghol mọ Rebecca aḅẹm mọ: “Torobọ aḍio, mị ragẹ ghan kalhọgh ḍinyạ eniin egey iyaạr siẹn aghuḍum mọ amhị. Mị rawạ ghan ootughianhạm aloor phọ amhị mọ ghalhamọ r’iduọn mị amhoọgh bọ ni iiḅaghamhị, mị amoọgh ni ibadị imạ araraạr dị mị kaatughiạn ghan.”

• Maạr aaḅeghiọn odọ awe phọ arighirị phọ anạ oru bọ.

  ABaibul phọ aḅẹm mọ: “Orelhean ikarạph arighirị repuẹ ghan ni ezọ.” (1 Korịnt 15:33) Mem dị awe phọ nạ ragbor ghan bọ karelhean oḍighi we dị rokaạph ghan ikarạph ilọ araraạr obobọ ilọ abunhọn, pọ nạ kamoọgh aani ni ekarạph eegharạ phọ abidị.

  Omhiịn ghan araraạr eten dị ekpeanhaạn: Mem dị arighirị anạ osoman iiḅaghamhị, abidị otue ni okururu obobọ oḅonyonhu ozuan oọny amem. Ḍighi raraạr dị nạ katue olhoghonhaạn abidị ḍighaạgh, kuolọ ka/meera dị iiḅaghamhị phọ abidị keḅonyon nyinhạ ezu. Esinha onyanhị dị oghol mọ Michelle aḅẹm mọ: “Awe dị romiịn ghan ikarạph araraạr dị remitenhaan ghan bidị bịn kụ ku/ḍighi righirị ayira.”

Bạl abughẹ ilọ iphẹn phọ

Yira odi mem dị aBaibul phọ aghol mọ amem “ooto r’osooromineen.” (2 Timoti 3:1) Rekparanhaạn ghan ni nyinhạ ophogh ghan araraạr egey eten loor esi ikarạph araraạr phọ remite bọ aḅirinhi phọ ḍughụm? Bạl emhuoghaạph phọ “Why So Much Suffering?”