EMHUOGHAẠPH ITUUGHẠ PHỌ 39
Eegharạ Oyoghoyoghọ Kụ Eḍighi Inyaạm Anạ
“Oye arukumu Omoọgh-we phọ sighiton ku/wạ ghan! Aḍighi ghụn oophọ oye esi oomo awe.”—2 TIM. 2:24.
AḌUỌR PHỌ 120 Imitate Christ’s Mildness
OGHAẠPH OOKARAGHa
1. Eeghe kụ edị kotue upuru iyira epẹ otu oḍighi obobọ otu askul ayira?
NẠ RALOGHOMA ghan ika mem dị olọ otu oḍighi obobọ olọ otu askul anạ apuru nyinhạ ḍipuru ilọ omheeraam mọ anạ? Oḅio anạ rakaph ghan ni? Reḍighi ghan ni iduọn phọ ogbogh opol ayira. Kuolọ aḍipuru phọ odị ketue ni eḍighi idị nạ kalegheri ḍiitughiạn r’omheeraam mọ odị, bịn emiteom eepoogh oghaạph iiḅi iinhaghạn phọ oḅenhị odị. Eeni amem oye kapuru ḍipuru loor esi dị rawạ oogbakiạn r’ayira. Ipẹ phọ ki/ḍighi iikia esi ayira, loor esi dị abuniin awe rokaạph ghan ikarạph ilọ omheeraam mọ ayira koḅenhị bidị. (Iiḍighi 28:22) Opumom isiẹn, yira odi siḍio “aruukuna phọ,” mem dị ibadị awe ‘ko/meeraam ghan ilọ oghaạph,’ ḅilhẹ “omoọgh igbagbaar.”—2 Tim. 3:1, 3.
2. Uḍighi ika kụ oyoghoyoghọ aḍighi bọ emạ eegharạ?
2 Nạ atue ni aakia mọ, ‘Mị kayoghoyoghọ bọ ika aḅilhẹ apoomhị loor mem dị oye raagbakiạn ilọ omheeraam aBaibul phọ amhị?’ Eeghe kụ kelhoghonhaạn nyinhạ ḍighaạgh? Oyoghoyoghọ kelọgh ni ḍighaạgh. Iyaạr re/nuụn ghan kephin esi oye dị ayoghoyoghọ, kuolọ rapamaghạn ghan loor odị mem dị odị u/kạr ulegheri eten ongọ ophagharanhaạn phọ obobọ oḍighi nyodị iyaạr dị repin esi odị. (Prov. 16:32) Eeni nạ kaloghoma mọ re/dugh ghan oomo amem oyoghoyoghọ. Ika kụ edị nạ kaaneghị eegharạ oyoghoyoghọ? Ika kụ edị nạ kamegheron r’eyoghoyoghọ eten mem dị oye raagbakiạn r’omheeraam mọ anạ? Eḍighi maạr dị nạ aḍighi odẹ obobọ onhiin, ika kụ edị nạ katue aloghonhaạn ḍighaạgh ibạm anmụny phọ anạ otuughạ ilọ ogbạ omheremhị omheeraam mọ abidị r’eyoghoyoghọ eten? Uguạ omhiịn.
IPẸ NẠ KATUE BỌ AANEGHỊ EEGHARẠ OYOGHOYOGHỌ
3. Uḍighi ika kụ kotue bọ ni oḅẹm mọ oyoghoyoghọ aḍighi inyaạm, ka/ḍidugh? (2 Timoti 2:24, 25)
3 Oyoghoyoghọ aḍighi inyaạm, ka/ḍidugh. Resighẹ ghan ni inyaạm orue ophoomhị aloor mem dị oye asoman odẹgh ophogh. Eegharạ oyoghoyoghọ aḍighi aani pakirị ‘eemuma uwaloor iigbia phọ.’ (Gal. 5:22, 23) Ekpo onhụ aGrik phọ ogbạ bọ mọ ‘oyoghoyoghọ’ eeni amem usighẹ ghan oḍighinhom mem dị rokaạph ilọ olhom asụ elhegheḍum dị maḍighi enhạm olhoghotu. Ḍighi mudị nạ ramiịn ni olhom asụ elhegheḍum dị maphọ. Ii, ghalhamọ r’iduọn asụ phọ maphọ bọ obobọ u/gạm mun bọ, amoọgh ni inyaạm. Idiphọ awe, ika kụ idị yira kotue ooneghị eegharạ oyoghoyoghọ kụ eniin phọ amem mọ okpạr? Ogina ayira ko/tue oḍighi iduọn phọ. Ekpanhạ iyaạr dị yira koḍighi pọ ooḅereghị olhọm uwaloor iigbia phọ Enhaạn, pidị yira omhoọgh aani emạ eegharạ phọ ephẹn phọ. Ibadị odi ni dị morue ni oḍighi iduọn phọ. Ibadị Abugbaanhaạn mongọ ni ophagharanhaạn eyoghoyoghọ eten we dị oogbakiạn r’abidị, kụ iphẹn phọ mengọ imạ ogbaanhaạn buphẹ romiịn bọ. (Bạl 2 Timoti 2:24, 25.) Ika kụ edị nạ katue aḍighi eegharạ oyoghoyoghọ inyaạm anạ?
4. Eegharạ oyoghoyoghọ phọ Aizịk itughemhị iyira eeghe?
4 ABaibul phọ apamanhạm ni reḍeenhaan dị emạ emiteom idị oyoghoyoghọ amhạn maạr. Ooḅeghiọn eḍeenhaan Aizịk. Mem mọ odị arugh bọ epẹ Gerar emhạ abuọ aPhilistine phọ, bidị umhooghọm ni nyodị eḍịm kụ ookpereghi sighuḍia phọ odẹ phọ odị aguphogh bọ. Kụ kparipẹ r’owạ elhiom odị esi ee r’abidị, Aizịk asighẹ ghụn eghunotu phọ odị agheelhom enhọn ekpisi kụ aguphogh inhọn asighuḍia. (Gen. 26:12-18) Kuolọ awe aPhilistine phọ uḅilhẹ ni oru oḅẹm mọ bunọ kụ umhoọgh muụm asighuḍia phọ. Ghalhamọ r’iduọn phọ ni bịn, Aizịk azọ ni r’eephọ. (Gen. 26:19-25) Eeghe kụ ilhoghonhaạn bọ nyodị ḍighaạgh ophamhaghạn aloor mem mọ ozuoghom ghan bọ nyodị? Dị iikia i/lo, odị atuughaạny ni ezọ eephọ odẹ phọ odị Ebraham ḅilhẹ “osooromi aloor r’obolobolọ ologhi” onhiin phọ odị Sera.—1 Pit. 3:4-6; Gen. 21:22-34.
5. Eeghe eḍeenhaan kụ imạ emiteom mọ aburudẹ r’aburunhiin dị oḍighi Kristẹn kotue ni otughemhị nmụny abidị idị eegharạ oyoghoyoghọ emhạn maạr?
5 Aburudẹ r’aburunhiin dị oḍighi Kristẹn, kotue kẹn ni okuphom owol mọ bunọ kotue ni otughemhị ibạm anmụny phọ abidị idị omhoọgh eegharạ oyoghoyoghọ emhạn maạr. Ooḅeghiọn eḍeenhaan aMaxence, dị amhạn 17 asiạ. Odị asoman ghan ni we iboom ighạgh ilhoghi epẹ otu askul r’epẹ erugh phọ. Odẹ r’onhiin odị utughemhị ni nyodị omhoọgh eegharạ oyoghoyoghọ. Bidị uḅẹm mọ, “aMaxence aru ni anhaghanhạn mọ ophamhaghạn aloor kụ akpạr apu ozọ r’oghạgh olhoghi.” Rodon, olegheri Maxence idiphọ oye dị ayoghoyoghọ.
6. Ika kụ edị iiḅereghị kilhoghonhaạn iyira ḍighaạgh oghị aghisigh oḍeenhaan eegharạ oyoghoyoghọ?
6 Yira koḍighi ika mem dị oye ragbaaghiọm Enhaạn phọ ayira obobọ raafolhomhi Baibul phọ? Yira kolọm aZihova uwaloor phọ r’osụ-olhoghi phọ odị orue omhegheron eyoghoyoghọ eten. Kuolọ kokaạph ika eḍighi iyaạr dị yira ootughiạn mọ eten phọ yira omhegheron bọ isughanham ni? Pọ kol emhụ ipẹ phọ aaḅereghị kụ aatughiạn idị nạ kaḍighi idị enhighẹ epu ipẹ phọ enhọn amem. Bịn, aZihova kangọ ni nyinhạ uwaloor iigbia phọ odị orue ophamhaghạn oghạgh olhoghi phọ anạ kụ oḅilhẹ oḍeenhaan oyoghoyoghọ.
7. Ika kụ edị ootughiạn ghan ariisi aBaibul keḍighi idị yira kotue opamaghạn ikpo-onhụ r’ezọ phọ ayira? (Proverbs 15:1, 18)
7 Ariisi aBaibul edi ni dị ketue ilhoghonhaạn iyira ḍighaạgh ophamhaghạn ikpo onhụ phọ ayira mem dị yira osoman igbagarạ asidọl. Uwaloor iigbia phọ katue ni uutughianhạm iyira riisi phọ ipẹ phọ. (Jọn 14:26) Esi omaạm, asinhị iilhogh phọ edi bọ ḍinyạ aProverbs ketue ni ilhoghonhaạn iyira ḍighaạgh oḍeenhaan eegharạ oyoghoyoghọ. (Bạl Proverbs 15:1, 18.) Aḍinyạ aProverbs phọ eḅilhẹ kẹn ni eḍeenhaan suọ dị raḍuạ ghan kamitẹ esi ophamhaghạn aloor.—Prov. 10:19; 17:27; 21:23; 25:15.
IDỊ ORỌPH OMHIỊN RAḌIGHI GHAN IDỊ YIRA KOYOGHOYOGHỌ
8. Uḍighi ika kụ enhighẹ bọ ophụr olhegheri iyaạr phọ oye atụ bọ apuru ḍipuru ilọ omheeraam mọ ayira?
8 Orọph omhiịn rulhoghonhaạn ghan ni iyira ḍighaạgh. (Prov. 19:11) Oye dị amhoọgh orọph omhiịn, rapamaghạn ghan loor mem dị abunhọn ogbagharạn omheeraam mọ odị. Iniin asipuru obobọ ipaanhaạn ekịgh eesua, dị ogbogh apakirị phọ odi ude. Esi omaạm, oye atue ni upuru iyira ḍipuru dị yira u/legheri iyaạr phọ odị atụ bọ apuru. Esi iduọn phọ, yira ogbi ophagharanhaạn aḍipuru phọ, kenighẹ ni dị yira kopụr olegheri iyaạr phọ odị atụ bọ apuru ḍipuru phọ.—Prov. 16:23.
9. Ika kụ edị Gidiọn aḍeenhaan orọph omhiịn r’eegharạ oyoghoyoghọ aghị esi awe phọ Ephraim?
9 Oobeghiọn ipẹ aGidiọn amhegheron bọ aghị esi awe phọ Ephraim. R’oghạgh olhoghi bidị upuru ni nyodị iyaạr phọ eḍighi bọ kụ odị u/mạgh bọ bidị oḍighan odị obian amulhọgh ḍien phọ Izrạl. Kuolọ eeghe kụ okạr emhụ oghạgh olhoghi phọ abidị? Keḍighi ophoophe aloor ḍughụm? Torobọ ipẹ ekọm bọ, r’osụ-olhoghi aGidiọn aphagharanhaạn ni bidị eyoghoyoghọ eten dị eḍeenhaan mọ odị anaghanhạn ni ipẹ bidị olhoghoma bọ. Iphẹn phọ iḍighi idị “oghạgh olhoghi phọ abidị awologhụ.”—Judg. 8:1-3.
10. Eeghe kụ kilhoghonhaạn iyira ḍighaạgh olhegheri eten ophagharanhaạn abuphẹ ropuru ghan bọ ilọ omheeraam mọ ayira? (1 Pita 3:15)
10 Eeni oye epẹ otu oḍighi obobọ otu askul ayira atue ni apuru iyaạr phọ yira otụ bọ rodạph ghan siigbu aBaibul phọ. R’olhọgh eegu yira kokparaghạ ni omhiịn mọ yira ogbạ ni omeremhị omheeraam mọ ayira. (Bạl 1 Pita 3:15.) Kparipẹ r’omhiịn aḍipuru phọ idiphọ izuoghom, miịn ghụn idiphọ eten osighẹ olhegheri ipẹ oye phọ alhoghoma bọ. Etigheri emhụ aḍipuru phọ odị, kenighẹ ni dị yira kopagharanhaạn eyoghoyoghọ eten. Ophagharanhaạn phọ ayira kanyu ni oye phọ oḅilhẹ okiririom ophogh aḍiitughiạn phọ odị. Ghalhamọ odị aḅaaghị ni ikarạph ikpo onhụ, aḍiigbu ayira pọ omhiịn mọ yira omegheron ni eyoghoyoghọ eten.—Rom. 12:17.
Nạ katue ni angọ ogey ophagharanhaạn eḍighi iyaạr dị nạ aphụr aaḅeghiọn emhụ iyaạr phọ otụ bọ romạgh nyinhạ oghị aani olhe eyaạl ootughiạn aḍio dị omhạr oye (Miịn siikpịgh phọ 11-12)
11-12. (a) Eeghe kụ edị yira kopụr oḍighi kụ ogbi ophagharanhaạn aḍigbagarạ aḍipuru? (Miịn kẹn afoto phọ.) (b) Ngọ eḍeenhaan dị emạ emiteom idị aḍipuru ketue ekughuron eepoogh omhoọgh imạ araghaạph.
11 Eḍighi maạr dị olọ otu oḍighi anạ apuru nyinhạ iyaạr phọ eḍighi bọ kụ yira ro/le ghan bọ eyaạl ootughiạn aḍio dị omhạr oye, pọ gbirima: Odị raatughiạn ghan mọ rusophoghom ghan iyira ooḍikuan r’abunhọn? Obobọ mọ yira kopuẹ siya arighirị phọ edi bọ siphẹ otu oḍighi phọ ḍughụm? Yira kotue ni opoomhị olhoghi odị esi osereghiạn ogbolhomaam mọ odị ilọ atorobọ oye siphẹ otu oḍighi phọ, kụ ongọ odị okuphom owol mọ yira rokelhọm aani ghan ni ooḍikuan siphẹ otu oḍighi phọ. Ipẹ phọ ketue ni emiteom eepoogh oghaaphạn eten arighirị ipẹ aBaibul phọ aghaạph bọ ilọ aḍio dị omhạr oye.
12 Yira kotue ni oḍighi aani iniin phọ mem dị upuru iyira inhọn igbagarạ asipuru. Olọ ekụ ayira atue ni aḅẹm mọ Abugbaanhaạn AZihova onme eten phọ epẹ bidị omhiịn bọ buminiạn riiniọm. E/naghanhạn ipẹ Abugbaanhaạn AZihova oghaạph bọ ilọ adọl phọ adiphẹ phọ kụ ikọm bọ ḍughụm? Obobọ odị amoọgh oyaghirị obobọ siya dị odi dọl phọ aḍiphẹ phọ? Odị raatughiạn ghan mọ yira u/pomoghiạn we dị odi dọl phọ adiphẹ phọ? Eeni kewạ dị yira kongọ nyodị okuphom owol mọ yira omoọgh ni ogbolomaam oomo awe kụ yira olọgh ni elhegh mọ torobọ oye amoọgh ni elhiom osopha adọl dị odị rawạ orọl.b (1 Pit. 2:17) Eeni yira otue ni oḅenhị nyodị ipẹ aBaibul phọ aghaạph bọ r’asuọ dị odi odaphạn.
13. Ika kụ edị nạ katue aloghonhaạn ḍighaạgh oye dị aḅẹm mọ i/ḍeenhaan osụ-olhoghi omheeraam mọ Enhaạn edi ni?
13 Mem dị yira ozuan oye dị amhoọgh ḍiitughiạn dị egbạgh omheeraam mọ ayira, ku/nuụn ukureri mọ yira olegheri ni idị odị amheeraam. (Taitọs 3:2) Esi omaạm, eḍighi iyaạr dị olọ ekụ anyinha aḅẹm mọ i/ḍeenhaan osụ-olhoghi omheeraam mọ Enhaạn edi ni, pọ nạ kakureri mọ odị alegheri aḅilhẹ ameeraam mọ iyaạr iḍuạ iyaạr kụ eten iyaạr? Okạr oghaạph, eeni odị rakaạph aani ghan iyaạr dị odị anhaghạn dị awe oghaạph. Kparipẹ r’omhiighom r’idị aBaibul phọ aghaạph ilọ olemiạ, ngọ nyodị eepoogh oḅilhẹ ooḅeghiọn ilọ ipẹ odị amheeraam bọ. Eeni nạ atue ni aḍeenhaan nyodị esi siphẹ jw.org dị eghaạph ilọ olhẹm mọ. Odị atue ni ameeraam aạl obobọ ophogh avidio dị odi siphẹ phọ. Yira oḍeenhaan olhọgh eegu eten phọ ephẹn phọ, pọ ketue ni enyu nyodị ooḅeghiọn ipẹ aBaibul phọ aghaạph bọ.
14. Ika kụ edị aNiall asighẹ osoph intanẹt phọ ayira aḍighinhom oḍeenhaan olọ ekụ odị mọ iyaạr phọ oghaạph bọ ilọ Abugbaanhaạn phọ i/tu inẹ?
14 Onyọ iḍoọgh dị oghol mọ Niall asighẹ ni osoph intanẹt phọ ayira aḍighinhom oḍeenaan mọ iniin araraạr phọ rokaạph ghan bọ ilọ Abugbaanhaạn phọ i/tu inẹ. Odị aḅẹm mọ, “oniin olọ ekụ ayoor uḅenhị imhị mọ mị u/meeraam sayẹns loor oḍuom olhoghi oopho araraạr dị ogẹ ḍinyạ kparipẹ r’idị mị ramiinhọm riḍien.” Mem mọ olọ ekụ phọ aNiall u/meera bọ mọ odị aghaạph ilọ omheeraam mọ odị, aNiall aḅenhị ni nyodị oghị isiphẹ jw.org gạ phọ oghol bọ mọ “Science and the Bible.” Onyebel roten, aNiall aru ni alhegheri mọ olọ ekụ phọ odị aghị ni aạl raraạr siphẹ osoph intanẹt phọ ayira, kụ ipẹ phọ eru eḍighi idị odị awạ olhegheri obughẹ ilọ ipẹ aghuḍum amhiigh bọ. Iphẹn phọ etue ni emitenhaan aani nyinhạ.
IIKOLHOBIAN IDIPHỌ EGHUNOTU
15. Ika kụ edị aburudẹ r’aburunhiin kotue otughemhị nmụny abidị omhegheron ghan eyoghoyoghọ eten mem dị opuru bidị ḍipuru ilọ omheeraam mọ abidị?
15 Aburudẹ r’aburunhiin kotue ni otughemhị ibạm anmụny phọ abidị ilọ omhegheron ghan eyoghoyoghọ eten mem dị oye aghaạph iyaạr dị egbạgh omheeraam mọ abidị. (Jems. 3:13) Iniin arughunotu roḅarạm ghan ni oḍighi oḍeenhaan siphẹ iiseeny eghunotu phọ abidị. Bidị rooḅeghiọn ghan ni rumhuoghaạph dị regbor ghan kemite epẹ otu askul phọ, kụ oḍighi oḍeenhaan ilọ ongọ ophagharanhaạn eyoghoyoghọ eten dị keḍạ ḍiḅeraạn.—Miịn igbe phọ “Oḍighi Oḍeenhaan Katue Ni Aloghonhaạn Ḍighaạgh Eghunotu Anạ.”
16-17. Ika kụ edị omhoọgh ghan oḍighi oḍeenhaan ketue eloghonhaạn ḍighaạgh iḍoọgh phọ?
16 Odọ oḍighi oḍeenhaan phọ ophọn phọ katue ni aloghonhaạn ḍighaạgh onyọ aKristẹn orue ongọ ogey ophagharanhaạn r’okuphom owol r’aloor riphigh omheeraam mọ abidị. Asikoọl arumhuoghaạph phọ “Young People Ask,” edi bọ siphẹ jw.org emoọgh ni oḍighi oḍeenhaan olọ iḍoọgh. Uukolhobian rumhuoghaạph phọ ipẹ phọ olhoghonhaạn aḍighaạgh iḍoọgh okparamhị omheeraam mọ abidị ḅilhẹ r’olhegheri ilọ ongọ abunhọn ophagharanhaạn r’akpọ oḅio. Nyinha eeḅeghiọn rumhuoghaạph phọ iphẹn phọ idiphọ eghunotu, pọ keloghohaạn ni ḍighaạgh torobọ oye siphẹ eghunotu phọ ogbạ omheremhị omheeraam mọ odị eyoghoyoghọ eten dị keḍạ ḍiḅeraạn.
17 Onyọ iḍoọgh dị oghol mọ Matthew aghaạph ni idị oḍighi oḍeenhaan elhoghonhaạn nyodị ḍighaạgh. Idiphọ apakirị iiseeny eghunotu phọ abidị, eghunotu abuọ aMatthew uwaaghị ghan ni rumhuoghaạph dị remite ghan otu askul. Odị aḅẹm mọ: “Mị raatughiạn ghan ni ḍipuru dị kotue upuru imhị, kụ yoor ooḅeghiọn idị mị katue asighẹ raraạr phọ yoor owaaghị bọ omhiịn ongoọm ophagharanhaạn. Mem dị mị akuphom owol riphigh omeeraam mọ amhị, r’ingọ ghan ni imhị akpọ oḅio, kụ ridughanhaan ghan imhị ongọ ophagharanhaạn eten dị eyoghoyoghọ.”
18. Eeghe iyaạr dị emhạn maạr kụ edị Kolosị 4:6 emạ emiteom?
18 Ilọ eegholhaan eegholhaan k’/oomo awe kụ komeeraam ipẹ yira rokaạph bọ. Kuolọ oghaạph eyoghoyoghọ eten r’olhọgh eegu ketue ni elọgh ḍighaạgh. (Bạl Kolosị 4:6.) Oghaaphạn abunhọn ilọ omheeraam mọ ayira ekịgh idiphọ amem dị yira rotoph bọl k’ongọ oye. Yira kotue ni omiigha loor kụ otoph bọl phọ obobọ kotue ni otoph r’inyaạm. Kuolọ yira omhiigha loor kụ oroph, kedughanhaan ni oye phọ okoph. Eniin phọ eten phọ, yira oghaaphạn bunhọn eyoghoyoghọ eten ḅilhẹ r’olhọgh eegu, pọ kedughanhaan ni we olher arurụ ongọ ipẹ yira rokaạph bọ. Toroboiperolbọ, eḍighi maạr dị yira omhiịn mọ oye phọ rawạ bịn ogbakiạn, pọ kewạ mọ owilhẹ raghaạph phọ. (Prov. 26:4) Kuolọ eeni ogbogh opol ko/megheron eten phọ epẹ phọ. Ibadị kowạ ni onhaghạn ipẹ yira rowạ bọ oghaạph phọ.
19. Eeghe kụ kinyu iyira oḍeenhaan ghan eegharạ oyoghoyoghọ mem dị yira rokaạph ilọ omheeraam mọ ayira?
19 Okạr agey, oboom asuọ odi ni mem dị yira okparaghạ ozọ ghan eyoghoyoghọ eten. Lọm aZihova inyaạm orue ozọ eyoghoyoghọ eten oghị esi awe dị opuru nyinhạ ḍigbagarạ aḍipuru obobọ oghaạph ikarạph ilọ omheeraam mọ ayira. Ka/bula mọ, ongọ ophagharanhaạn eten dị eyoghoyoghọ ketue ni epoomhị ighạgh ilhoghi. Kụ kẹn ketue ni eḍighi idị awe konme ḍiitughiạn phọ abidị ilọ aBaibul phọ. “Iikolobian ghan oomo amem ophagharanaạn dị nyina kengọ” ilọ omheeraam mọ anyinha eyoghoyoghọ eten r’olhọgh eegu. (1 Pit. 3:15) Ii, eegharạ oyoghoyoghọ kụ eḍighi inyaạm anạ!
AḌUỌR PHỌ 88 Make Me Know Your Ways
a Emhuoghaạph phọ ephẹn phọ ekaạph idị r’eyoghoyoghọ eten yira kotue ogbạ omeremhị omheeraam mọ ayira mem dị abunhọn oḍighi idị eghạgh olhoghi ayira obobọ rogbakiạn r’ayira.
b Orue omhiịn oromha osighẹ oḍighinhom, pọ pogh emhuoghaạph phọ “What Does the Bible Say About Homosexuality?” siphẹ Awake! 2016 No. 4.
c Nạ katue ni amiịn olhoghonhaạn aḍighaạgh siphẹ jw.org sikoọl arumhuoghaạph phọ “Young People Ask” ḅilhẹ “Frequently Asked Questions About Jehovah’s Witnesses.”