Uḍighi Ika Kụ Ikarạph r’Imhinhimhiịn Edi Bọ?

Mem dị ekarạph iyaạr emite, awe rogbor ghan ni kopuru mọ: “Eeghe kụ iḍighi kụ iphẹn phọ emite bọ?” Eḍighi ni iyaạr oḅaạl olhoghi olhegheri mọ aBaibul phọ apagharanhaạn ni ḍipuru phọ aḍiẹn phọ!

1. ASetan akọm ika ikarạph kụ alhọgh siẹn ade phọ?

ASetan agbagharạn Enhaạn. ASetan awạ otooghị ongọ abunhọn, esi iduọn phọ odị aḍighi idị Adạm r’Iv ogbagharạn aani Enhaạn. Oḍighi idị iphẹn phọ kedugh, aSetan agbạ okpẹ aḅenhị Iv. (Genesis 3:1-5) Odị aḍighi idị Iv amhiigh ootughiạn mọ aZihova o/wạ dị Iv kakelhọm emạ iyaạr. Odị aḅạ ikpo-onhụ dị okiririom ophogh, remạ ghan mọ oḅaạl olhoghi awe kabụgh eḍighi maạr dị u/naghanhạn Enhaạn. ASetan agbạ oḅẹl okpẹ esi oḅenhị Iv mọ odị ka/mugh. Esi iduọn phọ, aBaibul phọ akol Setan mọ “ogbaạm okpẹ ḅilẹ r’odẹ oomo okpẹ.”—Jọn 8:44.

2. Adạm r’Iv usopha oḍighi eeghe?

AZihova angọ Adạm r’Iv torobọ iyaạr lọ owạ. Odị aḅenhị bidị mọ olhe ni eemuma atorobọ oreeny dị odi siphẹ oghoony phọ Iden, kuolọ mọ ku/ḅọgh nyoniin. (Genesis 2:15-17) Toroboiperolbọ, bidị usopha olhe eemuma oreeny phọ opọ phọ. Iv “akapharạn eemuma oreeny phọ bịn amhiigh olhe.” Onyebel roten bịn Adạm “amhiigh olhe aani.” (Genesis 3:6) Iyạl phọ abidị usopha ogbagharạn Enhaạn. Loor iduọn Adạm r’Iv omhunhughan bọ, i/ḍighi eseeriom abidị oḍighi ikarạph. Esi iduọn phọ, iḍighi ni osopha abidị ogbagharạn Enhaạn kụ oghel itooghị odị. Osopha phọ abidị akọm ni iboom imhinhimhiịn angọ bidị.—Genesis 3:16-19.

3. Ika kụ idị osopha phọ Adạm r’Iv mutir iyira?

Iduọn Adạm r’Iv oḍighi bọ ikarạph phọ, bịn oḍighi we dị u/munhughan. Esi iduọn phọ, usighẹ e/munhughan phọ kụ omharạm nmụny phọ abidị. ABaibul phọ akaạph ilọ Adạm mọ: “Oniin oye kụ aphạm bọ ikarạph phọ arumom siẹn aḅirini phọ, kụ ikarạph phọ odị iphamạm ni ḍuugh. Kụ aḍuugh phọ metuạn bọ ikarạph phọ odị eetura oomo aḅirini phọ.”—Rom 5:12.

Ibadị araraạr kụ rekọm ghan bọ imhinhimhiịn phọ ayira. Eeni amem yira romiinhọm ghan loor esi okarạph osopha ayira. Eeni amem yira romiinhọm ghan loor esi okarạph osopha abunhọn. Kụ eeni amem yira romiinhọm ghan loor esi ekperenhom iiḅaghamhị.—Ibạl Ecclesiastes 9:11.

OLHEGHERI OBUGHẸ

4. Oye phọ akọm bọ imhinhimhiịn phọ ayira

Ibadị omeeraam mọ Enhaạn kụ ratooghị aḅirinhi phọ. Iduọn phọ ni? Ipegh VIDIO phọ.

AVIDIO: Anhiạn Kụ Otooghiạ Aḅirinhi Phọ? (1:24)

Ibạl Jems 1:13 r’1 Jọn 5:19, kụ eeḅeghiọn ḍipuru phọ aḍiẹn:

• Enhaạn kụ rakọm ghan imhinhimhiịn r’ikarạph araraạr ḍughụm?

5. Eeghe kụ memite egbi k’amem mọ aSetan amhiigh bọ otooghị

AVIDIO: Uḍighi Ika Kụ Enhaạn Emeera Bọ Mọ Imhinhimhiịn Erọl?—Ookpera phọ (3:07)

Ibạl Genesis 3:1-6, kụ eeḅeghiọn sipuru phọ iphẹn:

• Oghẹn okpẹ kụ edị aSetan agbạ?—Miịn ekpịgh phọ 4 r’5.

• Ika kụ idị aSetan aghaạph iyaạr dị eḍeenhaan mọ aZihova o/wạ dị awe kokelhọm emạ iyaạr?

• Odaphạn ipẹ aSetan aghaạph bọ, awe omoghi ni omhoọgh aZihova idiphọ Otooghiạ orue omhoọgh oḅaạl olhoghi ḍughụm?

Ibạl Ecclesiastes 8:9, kụ eeḅeghiọn ḍipuru phọ aḍiẹn:

• Siẹn aZihova kụ ra/tooghị bọ de phọ, eeghe araraạr kụ memite?

1. Adạm r’Iv uḍighi we dị omhunhughan kụ amarugh abidị aḍighi Paradaịs. Kuolọ bidị unhaghanhạn Setan kụ ogbagharạn aZihova

2. Bidị roḅaạr bọ emhụ phọ, bịn ikarạph, imhinhimhiịn r’aḍuugh emuza aḅirinhi phọ

3. AZihova kasiemhi ni eekunha ikarạph, imhinhimhiịn r’aḍuugh. Bịn omhạr awe oḅilhẹ omunhughan oḅilhẹ otọl Paradaịs idiphọ erọl ghan bọ

6. Imhinhimhiịn ayira retir ghan ni aZihova

Retir ghan ni Enhaạn mem dị yira romiinhọm? Ooḅeghiọn idị Uw-emhạ phọ Devid r’otelhedom mọ Pita ogẹ. Ibạl Psalm 31:7 r’1 Pita 5:7, kụ eeḅeghiọn ḍipuru phọ aḍiẹn:

• Etọl ika esi anạ olhegheri mọ aZihova alọgh ni elhegh aḅilhẹ amoọgh ogbolhomaam atu esi ayira mem dị yira romiinhọm?

OGHAẠPH OOKARAGH

ASetan Eru phọ r’Adạm r’Iv kụ ukạr bọ okọm idị ikarạph araraạr remite ghan siẹn aḅirinhi phọ. Imhinhimhiịn phọ ayira retir ghan ni aZihova, kụ odị kaḍighi ni iyaạr amiteom.

Ooḅula

• ASetan Eru phọ agbạ oghẹn okpẹ kụ aḅenhị Iv?

• Ika kụ idị oḅaạr emhụ phọ Adạm r’Iv mutir iyira?

• Yira ulhegheri ika mọ retir ghan ni aZihova mem dị yira romiinhọm?

WAAGHỊ AMHIỊN

Miịn iyaạr dị aBaibul phọ aghaạph mọ ikarạph etu.

“Ikarạph P’eeghe?” (Edi intanẹt)

Legheri abughẹ ilọ iyaạr phọ aSetan Eru phọ aghaạph bọ siphẹ oghoony phọ Iden.

“Uḍighi Ika Kụ Enhaạn Emeera Bọ Mọ Imhinhimhiịn Erọl?” (The Watchtower, January 1, 2014)

Miịn ophagharanhaạn aḍiniin aḍigbagarạ aḍipuru dị kengọ nyinhạ iidereghị.

“Uḍighi Ika Kụ ANazi Ozeeghị Bọ Buọ AJu Epẹ Omhạn? Uḍighi Ika Kụ Enhaạn O/sophoghom Bọ?” (Edi intanẹt)

Miịn iyaạr dị oniin oye atuughạ ilọ imhinhimhiịn dị odị amhiịn.

Oginha Amhị Bịn U/lo Mun Nyiidiphọ (5:09)