AZihova Atọl Ika?

AZihova Enhaạn phọ, aḍighi eeghe odọ oye esi anạ? Nạ raatughiạn ghan mọ odị abụgh apughạn omhoọgh asiya r’anạ ḍughụm? Obobọ mọ Enhaạn o/ḍighi oye kuolọ aḍighi iyaạr bịn dị emhoọgh iboom iikpọ, idiphọ oomhaạny? AZihova phọ akạr aḍighi eeghe odọ oye? ABaibul phọ agananamhi ni raagharạ aZihova, r’aḍiḅeeraạn dị odị amhoọgh aru esi anạ.

1. Uḍighi ika kụ yira ko/tue bọ omiịn Enhaạn?

“Enhaạn phọ Uwaloor.” (Jọn 4:24) AZihova o/mhoọgh iḅaạl r’iphulhupul. Odị aḍighi uwaloor kụ akẹ kụ amarugh odị, epẹ kụ iyaạr phọ yirạ ko/tue bọ omiịn nyodị.

2. Ighẹn kụ iniin araagharạ aZihova?

Ghalhamọ r’iduọn yira ko/tue bọ omiịn aZihova, odị aḍighi ni oye dị odi ghan, kụ amoọgh imạ araagharạ dị ketue ni eḍur nyinhạ etumeriom nyodị. ABaibul phọ aḅẹm mọ: “AZihova apomhoghiạn elhiom ooruẹn, kụ odị ka/pogh agunhọm rebenhẹ phọ odị okpẹ bọ oḍuom olhoghi phọ.” (Psalm 37:28) Odị aḅilhẹ kẹn “amoọgh iboom igbiririph r’onmạ ighirigiir,” ekạr ekpaariọm esi abuẹn romiinhọm bọ. (Jems 5:11) “AZihova atuman ni buọ amukum olhoghi phọ, kụ rapẹl ghan ni buẹn moḅonyonhu bọ ozuan.” (Psalm 34:18, Igẹ dị edi ude) Nạ alegheri ni mọ iḍighinhom araraạr phọ ayira retir ghan ni aZihova? Odị raloghoma ghan ni mabi kaḅilhẹ akururu mem dị oye asopha oḍighi ikarạph. (Psalm 78:40, 41) Kuolọ olhoghi odị raḅaạl ghan ni mem dị oye asopha oḍighi ipẹ enhighẹ bọ.—Ibạl Proverbs 27:11.

3. Ika kụ idị aZihova muḍeenhaan iyira ephomhoghiạn?

Ekpanhạ eegharạ aZihova pọ ephomhoghiạn. Okạr oghaạph, “Enaạn phọ ephomoghiạn.” (1 Jọn 4:8) Dị eego esi aBaibul phọ r’olhẹm mọ, aZihova magananamhi ephomhoghiạn phọ odị esi ayira. (Ibạl Iiḍighi 14:17.) Esi omaạm, odị ulhẹm iyira eten dị yira kotue omiịn imạ agbạ, okelhọm imạ asuọr, r’ariiḍien dị redụgh. Odị rawạ mọ yira oghelhọm ghuḍum.

OLHEGHERI OBUGHẸ

4. Uwaloor iigbia phọ—Iikpọ dị Enhaạn raḍighinom ghan raraạr

Iduọn yira roḍighinhom ghan bọ oḍighi raghaạgh ayira kụ edị aZihova raḍighinhom ghan uwaloor iigbia phọ. ABaibul phọ aḍeenhaan mọ uwaloor iigbia phọ, o/ḍighi oye, kuolọ eḍighi iikpọ dị Enhaạn rasighẹ ghan kaḍighinhom raraạr. Ibạl Luk 11:13 r’Iiḍighi 2:17, kụ eeḅeghiọn sipuru phọ iphẹn:

• Enhaạn kaḍighi ni idị uwaloor iigbia phọ odị “kasoorom” we lọ olhọm nyodị uwaloor iigbia phọ. Esi iduọn phọ, nạ ragbi mọ uwaloor iigbia phọ aḍighi oye, obobọ aḍighi iikpọ dị Enhaạn raḍighinhom ghan oḍighi? Nạ utụ eeghe kụ aḅẹm bọ iduọn phọ?

AZihova rasighẹ ghan uwaloor iigbia phọ kaḍighinhom ibadị iikiạ araraạr. Ibạl Psalm 33:6 r’2 Pita 1:20, 21, kụ eeḅeghiọn ḍipuru phọ aḍiẹn:

• Ighẹn kụ iniin areten dị aZihova masighẹ ghan uwaloor iigbia phọ odị aḍighinhom?

5. AZihova amoọgh ibadị imạ araagharạ

AMozis aḍighi ebenhẹ aZihova dị akpẹ oḍuomolhoghi, kuolọ awạ ni olhegheri Enhaạn obughẹ. Esi iduọn phọ aMozis aḅenhị aZihova mọ: “Ḍighi idị mị kalegheri reten phọ anạ, pidị mị akuamhị alhegheri nyinhạ.” (Exodus 33:13) AZihova aphagharanhaạn ni, esi oḍeenhaan aMozis iniin araagharạ odị. Ibạl Exodus 34:4-6, kụ eeḅeghiọn sipuru phọ iphẹn:

• AZihova aḍeenhaan Mozis ighẹn araagharạ odị?

• Eghẹn eegharạ aZihova kụ ikạr eḅeeraạn nyinhạ?

6. AZihova apomhoghiạn ni we phọ odị

Mem mọ awe phọ aZihova, abuọ aHibru phọ, oḍighi bọ rebenhẹ epẹ Ijipt, ika kụ idị imhinhimhiịn phọ abidị etir aZihova? Ipegh OLỌ ONHAGHANHẠM ARURỤ phọ kụ edaphạn, obobọ ibạl Exodus 3:1-10. Kụ eeḅeghiọn sipuru phọ iphẹn.

OLỌ ONHAGHANHẠM ARURỤ: Imhinhimhiịn phọ abidị itir ri aZihova (2:45)

• Esi phọ isiẹn phọ etughemhị nyinhạ eeghe ilọ ipẹ aZihova raloghoma ghan bọ mem dị awe romiinhọm?—Miịn siikpịgh phọ 7 r’8.

• Nạ aatughiạn mọ aZihova rawạ ni olhoghonhaạn awe ḍighaạgh ḍughụm, kụ katue ni aḍighi iduọn phọ? Uḍighi ika kụ nạ aphagharanhaạn bọ iduọn phọ?

7. Olhẹm mọ agananamhi ni raagharạ phọ aZihova

Dị eego esi olhẹm mọ odị, aZihova uḍeenhaan ni iyira raagharạ phọ odị. Ipegh VIDIO phọ. Kụ ebạl Rom 1:20, kụ eeḅeghiọn sipuru phọ iphẹn.

AVIDIO: Olhẹm Mọ Agananamhi Ni Ephomhoghiạn Phọ AZihova—Aloor Oye (1:57)

• Ighẹn araagharạ aZihova kụ edị nạ amhiịn esi olhẹm mọ?

OGHAẠPH OOKARAGH

AZihova aḍighi Uwaloor dị yira ko/tue omiịn, kụ amoọgh ni ibadị imạ araagharạ, ekạr nuụn ekpaariọm ephomhoghiạn.

Ooḅula

• Uḍighi ika kụ yira ko/tue bọ omiịn aZihova?

• Uwaloor iigbia phọ p’eeghe?

• Ighẹn kụ iniin araagharạ aZihova?

WAAGHỊ AMHIỊN

Bughẹ olhegheri iyaạr phọ anạ ilọ aZihova esi otuughạ inya ikpanhạ araagharạ phọ odị.

“Enhaạn atọl ika?” (The Watchtower No. 1 2019)

Ḅeeḅeghiọn raraạr dị eḍeenhaan mọ aZihova o/lho torobọ esi.

“Enhaạn odi ni torobọ esi, torobọ amem ḍughụm?” (Edi intanẹt)

Miịn iyaạr phọ eḍighi bọ kụ aBaibul phọ atomaạm bọ uwaloor iigbia phọ righaạgh Enhaạn.

“Uwaloor Iigbia Phọ P’eeghe?” (Edi intanẹt)

Ikparanhaạn ni oye ikpom ariḍien omheeraam mọ Enhaạn apomhoghiạn ni nyodị. Miịn iyaạr phọ enme bọ olhoghi odị.

“Mị Malhoghoma Nyiidiphọ Mọ Mị Katue Ni Aloghonhaạn Bunhọn Ḍighaạgh” (The Watchtower, October 1, 2015)