ABaibul Phọ Apamhanhạm Dom Enhaạn

AZihova ungọ iyira iikiạ inmo,—aBaibul phọ. ABaibul phọ apamhanhạm 66 ibạm arinyạ. Kuolọ eeni nạ raakia ni mọ: ‘ABaibul phọ amite ika? Anhiạn kụ amhoọgh Baibul phọ?’ Orue ophanyanhaạn asipuru phọ iphẹn phọ, ooḅeghiọn ipẹ adom mọ Enhaạn, aBaibul phọ, eru bọ iteẹny iyira.

1. Eḍighi maạr dị awe kụ ogẹ Baibul phọ, uḍighi ika kụ roḅẹm ghan bọ mọ Enhaạn kụ amhoọgh?

Isighẹ 40 awe 1,600 asiạ ogẹ aBaibul phọ omhadạn, emhiigh 1513 B.C.E. kụ esi 98 C.E. Asidọl abuphẹ ogẹ bọ Baibul phọ igbaranhaạn yogh ni. Ghalhamọ r’iduọn phọ, aBaibul phọ amoọgh ni muḅọph. Eeghe kụ iḍighi kụ iphẹn phọ edugh bọ? Loor esi dị Enhaạn kụ Amhoọgh Baibul phọ. (Ibạl 1 Tesalonikạ 2:13.) Abuphẹ ogẹ bọ Baibul phọ u/gẹ iitughiạn abidị. Kuolọ, “uwaloor iigbia ghụn kụ asiịny ghan bidị mem mọ bidị rogẹ bọ.”a (2 Pita 1:21) Enhaạn asighẹ uwaloor iigbia phọ odị kụ aphumom we ogẹ iitughiạn phọ odị.—2 Timoti 3:16.

2. Anhiạn kụ katue amooghọm suọ Baibul phọ?

“Awe oomo areelhe phọ r’arughunughun r’arunhụ r’aramạ” kotue ni omooghọm suọ iiḅi iinhaghạn phọ edi bọ siphẹ aBaibul phọ. (Ibạl Ogananami 14:6.) Enhaạn aḍighi ni idị komiteom Baibul phọ ibadị arunhụ eten dị ko/miteom ghan ḍinhọn aḍinyạ. Enighẹ oḅẹm mọ torobọ oye katue ni amoọgh Baibul phọ, etigheri ekpisi phọ aḍuạ bọ aru ḅilhẹ r’onhụ phọ raḅạ bọ.

3. Ika kụ idị aZihova aghoph Baibul phọ?

Emhiighom mọ ugẹ Baibul phọ olhọgh esi araraạr dị ketue ni eḅu, idiphọ apapyrus. Toroboiperolbọ, awe dị ophomhoghiạn Baibul phọ umhiigha ni loor osighẹ righaạgh abidị ogeọm olhọgh inhọn ariisi. Ghalhamọ r’iduọn awe dị omhoọgh iikpọ owạ bọ ni ophiemhi aBaibul phọ, abunhọn ulhọgh ni ghuḍum abidị esi ooto r’osooromhinheen oghoph. AZihova o/mheera mọ oye obobọ iyaạr ekikima nyodị oḅaanhaạn ghan ayira. ABaibul phọ aḅẹm mọ: “Ekpo-onhụ phọ Enhaạn edi ghan ni k’agee-pọ.”—Isaiah 40:8.

OLHEGHERI OBUGHẸ

4. ABaibul phọ akaạph ni ilọ oye phọ Amhoọgh bọ nyodị

Ipegh VIDIO phọ. Kụ ebạl 2 Timoti 3:16, kụ eeḅeghiọn sipuru phọ edaphạn bọ siẹn.

AVIDIO: Anhiạn Kụ Amhoọgh Baibul Phọ?—Ookpera phọ (2:48)

• Eḍighi maạr dị awe kụ ogẹ Baibul phọ, eeghe kụ iḍighi kụ oḅẹm bọ mọ Ekpo-onhụ Enhaạn?

• Eḍighi ni osụ olhoghi omheeraam mọ Enhaạn kụ iphum we mọ ogẹ iitughiạn odị?

5. ABaibul phọ akpạr ri apu isophoghom

AVIDIO: Bidị Umhaghamhị Maạr Baibul Phọ—Ookpera phọ (William Tyndale) (6:17)

• Nyiidiphọ nạ malhegheri bọ rikiạ dị awe ophinyọn oghoph aBaibul phọ, enyu ni nyinhạ aạl ḍughụm? Eeghe kụ iḍighi?

Ibạl Psalm 119:97, kụ eeḅeghiọn ḍipuru phọ aḍiẹn:

• Eeghe kụ inyu bọ ibadị olhọgh aghuḍum abidị esi ooto r’osooromhinheen orue ogbạ kụ oḅilhẹ olheenye elheeny Baibul phọ?

6. Aḍinyạ oomo awe

Odaphạn iphirigba, aḍinhọn aḍinyạ i/lo dị mogbạ oḅilhẹ olheenye elheeny idiphọ aBaibul phọ. Ibạl Iiḍighi 10:34, 35, kụ eeḅeghiọn sipuru phọ iphẹn:

• Eeghe kụ iḍighi kụ Enhaạn rawạ bọ dị kogbạ Ekpo-onhụ phọ odị oleenye elheeny?

• Eeghe iyaạr ilọ aBaibul phọ kụ iḅeeraạn nyinhạ?

OGHAẠPH OOKARAGH

ABaibul phọ Ekpo-onhụ Enhaạn, kụ odị maḍighi ni idị malheeny elheeny.

Ooḅula

• Remạ ghan eeghe mem dị oḅẹm mọ Enhaạn kụ iphum we ogẹ aBaibul phọ?

• Eeghe iyaạr ilọ araraạr phọ ipẹ aBaibul phọ makpạr bọ apu, eten phọ epẹ mogbạ bọ oḅilhẹ olheenye elheeny kụ iḍighan elhegh esi anạ?

• Nạ amiịn ika Enhaạn nyiidiphọ nạ malhegheri bọ ikuph phọ odị alhọgh bọ oḅaanhaạn anạ?

WAAGHỊ AMHIỊN

Bạl amhiịn ipẹ yira oteẹny bọ Baibul phọ ogẹ bọ runhụ phọ arodon.

“Ipẹ Yira Oteẹny Bọ Baibul Phọ” (Awake!, November 2007)

Tuughạ alhegheri ipẹ aBaibul phọ akpạr bọ apu iraạr igbogh araraạr dị mipiemhi.

“Ipẹ ABaibul Phọ Akpạr Bọ Apu Isophoghom” (The Watchtower No. 4 2016)

Miịn idị awe olhọgh ghuḍum abidị esi ooto r’osooromhinheen orue ogbạ aBaibul phọ.

Bidị Umhaghamhị Maạr Baibul Phọ (14:26)

Mogeeghị ni oḅilhẹ ogbaaghị Baibul phọ ibadị amem. Ika kụ idị nạ katue bọ akuphom owol mọ u/nme dom mọ?

“Monme Iyaạr Siphẹ ABaibul Phọ Ḍughụm?” (Edi intanẹt)