ESI ITUUGHẠ PHỌ 34
Ika Kụ Idị Yira Kotue Oḍeenhaan Mọ Yira Opomhoghiạn Ni AZihova?
Ephomhoghiạn phọ nạ amhoọgh bọ aghị esi Enhaạn mebụgh ni egbi k’amem mọ nạ amhiigh bọ otuughạ aBaibul phọ? Keḅeraạn ni nyinhạ oghiọm aghisigh okparamhị siya arighirị phọ anạ r’odị? Eḍighi idiphọ, pọ legheri mọ iduọn aZihova ramiịn bọ dị ephomhoghiạn phọ anạ esi odị rebụgh, kụ edị odị kakiọm ghisigh apomhoghiạn kụ aḅilhẹ aphogh ghan nyinhạ. Nạ kaḍeenhaan ika mọ nạ apomhoghiạn ni nyodị?
1. Yira koḍeenhaan ika mọ yira opomhoghiạn ni aZihova?
Yira roḍeenhaan ghan mọ yira opomhoghiạn ni aZihova mem dị yira ooko iilhogh phọ odị. (Ibạl 1 Jọn 5:3.) Odị ra/kpaariọm ghan we onhaghanhạn odị. Odị angọ ghụn torobọ oye eereẹgh osopha mughumọ oye phọ kanaghanhạn ni nyodị obobọ ka/naghanhạn. Eeghe kụ iḍighi? AZihova rawạ mọ ‘onhaghanhạn nyodị r’oomo olhoghi’ ayira. (Rom 6:17) Iduọn phọ pọ, odị rawạ mọ ephomhoghiạn phọ anạ esi odị kụ enyu nyinhạ onhaghanhạn odị. Mookolhobian Ekpịgh phọ 3 r’4 dị kelhoghonhaạn nyinhạ ḍighaạgh oḍeenhaan mọ nạ apomhoghiạn ni aZihova esi oḍighi ghan ipẹ eḅeraạn bọ nyodị, kụ oghel ipẹ nyodị i/ḅeraạn bọ.
2. Uḍighi ika kụ i/dugh bọ oḍeenhaan mọ yira opomhoghiạn ni aZihova?
“Imhinhimhiịn oye elhiom eḍighinhom iyaạr phọ epughạn.” (Psalm 34:19) Loor esi e/munhughan phọ ayira, rikparanhaạn ghan ni iyira oḍighi ipẹ enhighẹ bọ oomo amem. Kụ yira kotue kẹn ni osoman dọl dị ekpạr, ekeeny ooruẹn, r’inhọn odọ iiḅaghamhị. Re/dugh ghan oḍighi ipẹ aZihova rawạ bọ mem dị yira osoman dọl dị ekpạr. Reḍighi ghan iduọn phọ loor esi dị ikarạph phọ kụ redugh ghan oḍighi. Kuolọ mem dị nạ aḍighi ipẹ aZihova aghaạph bọ, nạ raḍeenhaan ghan mọ nạ apomhoghiạn ni nyodị apuemhi torobọ iyaạr. Nạ aḅilhẹ kẹn raḍeenhaan ghan mọ nạ aḅạr nyodị bịn. Kụ odị kaḅạr aani ni nyinhạ. Odị nyinhạ ka/wilhẹ ni bịn.—Ibạl Psalm 4:3.
OLHEGHERI OBUGHẸ
Ooḅeghiọn iyaạr phọ eḍighi bọ kụ aZihova ramoọgh ghan bọ ibo mem dị nạ anhaghanhạn nyodị r’iyaạr dị kelhoghonhaạn nyinhạ ḍighaạgh onhaghanhạn ghan odị.
3. Iiḅaghamhị dị egbolhomaam nyinhạ
Odaphạn ḍinyạ aJob, aSetan agbạ ni okpẹ aḅạm emhụ aJob r’atorobọ oye dị rawạ okumu aZihova. Ibạl Job 1:1, 6–2:10, kụ eeḅeghiọn sipuru phọ iphẹn:
ASetan aḅẹm mọ aJob aghol eeghe kụ ranaghanhạn bọ aZihova?—Miịn Job 1:9-11.
Eeghe okpẹ kụ edị ASetan agbạ aḅạm emhụ omhạr awe, eḅarạm bọ ni nyinhạ?—Miịn Job 2:4.
Ibạl Job 27:5b, kụ eeḅeghiọn ḍipuru phọ aḍiẹn:
AJob aḍeenhaan ika mọ onọ akạr ri apomhoghiạn aZihova?
AJob aḍeenhaan mọ onọ apomhoghiạn ni aZihova esi oḅạr odị
Yira roḍeenhaan ghan mọ yira opomhoghiạn ni aZihova mem dị yira oghiọm ghisigh oḅạr nyodị
4. Ḍighi idị ekpom aZihova kemoọgh ibo
Ibạl Proverbs 27:11, kụ eeḅeghiọn sipuru phọ iphẹn:
AZihova raloghoma ghan ika mem dị nạ asụ olhoghi kụ aḅilhẹ anhaghanhạn nyodị? Eeghe kụ iḍighi?
5. Nạ katue ni aḅạr aZihova
Ephomhoghiạn phọ yira omhoọgh bọ oghị esi aZihova rinyu ghan iyira oghaạph ilọ odị oḅenhị abunhọn. Mem dị yira osopha oḅạr odị, yira konaghanhạn ni nyodị ghalhamọ ikpạr ri. Ipegh VIDIO phọ, kụ eeḅeghiọn sipuru phọ edaphạn bọ siẹn.
Rekparanhaạn ghan ni nyinhạ oghaạph ilọ aZihova oḅenhị abunhọn?
Odaphạn vidio phọ, eeghe kụ ilhoghonhaạn ḍighaạgh Grayson okpạr opu oghiilhaan phọ odị?
Kidughanhaan ni iyira oḅạr aZihova eḍighi maạr dị yira ophomhoghiạn raraạr dị odị aphomhoghiạn kụ olhọgh ḍien raraạr dị odị alhọgh ḍien. Ibạl Psalm 97:10, kụ eeḅeghiọn sipuru phọ iphẹn:
Odaphạn iphẹn nạ matuughạ bọ, ighẹn kụ iniin araraạr dị aZihova aphomhoghiạn? Ighẹn kụ iniin araraạr dị odị alhọgh ḍien?
Nạ kaḍighi ika kụ atue apomhoghiạn raraạr dị enhighẹ kụ alọgh ḍien idị i/nighẹ?
6. Onhaghanhạn aZihova ringọ ghan iyira suọ
Iyaạr dị enhighẹ epu onhaghanhạn ghan aZihova i/lo. Ibạl Isaiah 48:17, 18, kụ eeḅeghiọn sipuru phọ iphẹn:
Nạ ragbi mọ ekpẹ ni omheeraam mọ oomo amem aZihova alegheri ni raraạr dị kinhighenhaạn iyira? Eeghe kụ iḍighi?
Eeghe asuọ kụ edị nạ mamhoọgh esi otuughạ ghan aBaibul phọ r’ilọ egey Enhaạn phọ, Zihova?
ABUNIIN AWE OOTUGHIẠN MỌ: “Eḍighinhom araraạr abidị ke/tue etir Enhaạn.”
Eghẹn esi aBaibul kụ edị nạ kamạ, oḍeenhaan mọ eḍighinhom araraạr ayira ketue ni eḍighi idị aZihova kamoọgh ibo obobọ akururu?
OGHAẠPH OOKARAGH
Yira roḍeenhaan ghan mọ yira opomhoghiạn ni aZihova mem dị yira onhaghanhạn ghan kụ oḅilhẹ oghiọm ghisigh oḅạr nyodị ghalhamọ ikpạr ri.
Ooḅula
Eḍeenhaan phọ aJob etughemhị nyinhạ eeghe?
Nạ kaḍeenhaan ika mọ nạ apomhoghiạn ni aZihova?
Eeghe kụ kelhoghonhaạn nyinhạ ḍighaạgh oghiọm aghisigh oḅạr aZihova?
WAAGHỊ AMHIỊN
Miịn idị nạ katue aḅạr aZihova r’ookpomhoghan phọ.
Legheri abughẹ ilọ okpẹ phọ aSetan agbạ bọ aḅạm emhụ awe.
“AJob Aphamhanhạm Ḍimeerạ Phọ Odị” (ABaibul Phọ Apạm Eeghe Adom? ekpịgh phọ 6)
Ḅeeḅeghiọn amhiịn idị iḍoọgh r’ikumor awe kotue oḍeenhaan mọ bidị opomhoghiạn ni aZihova.
Ika kụ idị iḍoọgh kotue oḍighi ipẹ aZihova rawạ bọ ghalhamọ r’amem dị iigbo abidị rokpaariọm bidị oḍighi idị i/nighẹ?