Ilọ Osopha Ghan Ogey Osopha

Oomo ayira omoọgh ni osopha dị ewạ mọ osopha. Ibadị amem osopha ayira katue ni atir dọl aghuḍum mọ ayira ḅilhẹ r’asiya arighirị phọ ayira r’aZihova. Esi omaạm, eeni kewạ ni mọ osopha esi dị yira kotọl, ilọ owạ ikpoki orolhọm, obobọ mughumọ oye phọ kapin ni anhịr obobọ abạl ilhom. Mem dị yira osopha ogey osopha, yira romoọgh ghan ni oḅaạl olhoghi koḅilhẹ oḅaalhamhị olhoghi aZihova.

1. ABaibul phọ kalhoghonhaạn nyinhạ ika ḍighaạgh osopha ogey osopha?

Tutụ yira kosopha osopha, ewạ mọ ooḅereghị olhọm olhoghonhaạn aḍighaạgh aZihova kụ oḅilhẹ ooḅeghiọn Baibul phọ orue omhiịn aḍiitughiạn odị. (Ibạl Proverbs 2:3-6.) Idị egbolhomaam iniin araraạr, aZihova angọ ni itọ. Kụ onhaghanhạn ghan itọ phọ ipẹ phọ kụ omạ osopha dị nạ katue asopha.

Kokaạph ika eḍighi maạr dị aBaibul phọ u/ngọ itọ? AZihova kakiọm ni ghisigh aḍeenhaan “nyinhạ eten dị ekpẹ orelhe.” (Isaiah 48:17) Ika? Asinhị-iilhogh etue ni etọl dị kelhoghonhaạn nyinhạ ḍighaạgh. Asinhị-iilhogh aBaibul phọ eḍighi igey dị eganhanhamhi ḍiitughiạn Enhaạn r’idị odị raloghoma ghan. Ibadị amem yira rolegheri ghan idị Enhaạn raloghoma ghan mem dị yira aạl iyaạr dị emite siphẹ aBaibul phọ. Mem dị yira orọph omhiịn idị aZihova alhoghoma ilọ iyaạr, kilhoghonhaạn ni iyira ḍighaạgh osopha idị keḅeraạn nyodị.

2. Ighẹn kụ araraạr dị ekpẹ ophụr ootughiạn kụ ogbi osopha osopha?

ABaibul phọ aḅẹm ni mọ: “Opọ asụ bọ olhoghi phọ ragbiran ghan kụ agbi ogbatạn edạ.” (Proverbs 14:15) Iphẹn phọ remạ ghan mọ tutụ yira kosopha osopha, ewạ mọ osighẹ mem ootughiạn kụ ogbi osopha. Iduọn nạ ramiigha bọ loor kagbiran ilọ iyaạr phọ nạ rawạ bọ oḍighi phọ, puruan loor mọ: ‘Ighẹn asinhị-iilhogh kụ edị mị katue asighẹ aḍighinhom? Oghẹn osopha kụ kungọ imhị eephọ ekpom? Osopha phọ amhị katir ika bunhọn awe? Dị emhạn maạr epu, kaḍighi ni idị olhoghi aZihova kaḅaạl?’—Deuteronomy 32:29.

AZihova kụ amhoọgh elhiom oḅenhị ayira ilọ eru igey r’ikarạph. Mem dị yira okuamhị olhegheri iilhogh phọ r’asinhị-iilhogh phọ odị, kụ osopha odaphạn, yira rotughemhị ghan ooruẹn olhoghi phọ ayira ipẹ eru bọ igey. Ooruẹn olhoghi phọ, pọ iyaạr phọ epẹ riphụr ghan bọ iyira rurụ mọ iphẹn igey obobọ ikarạph. (Rom 2:14, 15) Ooruẹn olhoghi dị motughemhị rulhoghonhaạn ghan iyira ḍighaạgh osopha ogey osopha.

OLHEGHERI OBUGHẸ

3. Meera aBaibul phọ kụ aaḅakị nyinhạ

AVIDIO: Meera Asinhị-iilhogh ABaibul Phọ Kụ Eeḅakị Nyinhạ (5:54)

• Eereẹgh p’eeghe iyaạr?

• Uḍighi ika kụ aZihova ungọ bọ iyira eereẹgh?

• Odị ungọ iyira eeghe iyaạr olhoghonhaạn ayira ḍighaạgh oḍighinhom eereẹgh phọ ayira eten dị enhighẹ?

Orue omhiịn eḍeenhaan aḍinhị-olhogh aBaibul, ibạl Efesọs 5:15, 16. Kụ eghaạph idị nạ katue amaạr aḍighinhom mem mọ anạ kụ . . .

• agbor ghan abạl Baibul phọ.

• akuamhị aḍighi ogey olom obobọ anhịr, odẹ obobọ onhiin, oọny obobọ onyanhị.

• akị aani ghan ituughạ mem dị ookpomhoghan phọ ropạm.

4. Tughemhị ooruẹn olhoghi anạ ilọ osopha ghan ogey osopha

AVIDIO: “Pamhanhạm Ogey Ooruẹn Olhoghi” (5:13)

• Siphẹ avidio phọ, ighẹn aradạ kụ edị onyọ umaranhi phọ agbariọn orue otughemhị ooruẹn olhoghi phọ odị kụ ogbi osopha osopha dị kaḅeraạn aZihova?

Uḍighi ika kụ i/wạ bọ oḅenhị oye mọ usophanhaan iyira ilọ oḍighi mem dị ewạ mọ yira kụ osopha? Ibạl Hibru 5:14, kụ eeḅeghiọn sipuru phọ iphẹn:

• Ghalhamọ r’iduọn ketue bọ ni edugh oḅenhị onhọn oye mọ uḅenhị iyira ilọ oḍighi, eeghe iyạl araraạr kụ edị ewạ mọ yira olhegheri ogbaranhaạn phọ?

• Eeghe iyaạr kụ edi olhoghonhaạn anạ ḍighaạgh otughemhị ooruẹn olhoghi phọ anạ kụ oḅilhẹ osopha ogey osopha?

5. Lọgh eegu ooruẹn olhoghi abunhọn

Osopha awe ragbaranhaạn ghan ni. Yira koḍeenhaan ika mọ yira olọgh ni eegu ooruẹn olhoghi abunhọn? Ooḅeghiọn iyạl asidọl:

Eḅẹl phọ: Onyọ umaranhi dị eḅeraạn ogbulha yogh araraạr ghisigh aḍuạ ookpomhoghan odị akị onhọn ookpomhoghan dị ilhoghi abumaranhi phọ re/pọ ghan omhiịn dị anmariịr ogbulha yogh.

Ibạl Rom 15:1 r’1 Korịnt 10:23, 24, kụ eeḅeghiọn sipuru phọ iphẹn:

• Odaphạn riisi aBaibul phọ iphẹn phọ, onyọ umaranhi phọ atue ni asopha oḍighi eeghe? Nạ kaḍighi eeghe eḍighi maạr dị nạ odi r’oye dị ooruẹn olhoghi phọ u/meeraam oḍighi iyaạr dị ooruẹn olhoghi anạ amheeraam ni oḍighi?

Omhunhenhiom iyạl phọ: Onyọ umor dị alhegheri ni mọ aBaibul phọ o/ghel ophughọl amugbagarạ amiim, kuolọ asopha mọ onọ ka/pughọl, akị aani esi dị abumor ookpomhoghan olhe amalhe kụ amiịn dị abunhọn ropughol mugbagarạ amiim.

Ibạl Ecclesiastes 7:16 r’aRom 14:1, 10, kụ eeḅeghiọn sipuru phọ iphẹn:

• Odaphạn riisi aBaibul phọ iphẹn phọ, onyọ umor phọ atue ni asopha oḍighi eeghe? Nạ kaḍighi eeghe eḍighi maạr dị nạ amhiịn dị onhọn oye raḍighi iyaạr dị ooruẹn olhoghi anạ u/meeraam?

Ighẹn araraạr kụ edị oye kaḍighi orue osopha ogey osopha?

1. Lọm aZihova olhoghonhaạn aḍighaạgh orue osopha ilọ oḍighi.—Jems 1:5.

2. Waaghị raraạr siphẹ aBaibul phọ r’arinyạ phọ regbạ ghan bọ Baibul phọ omhiịn asinhị-iilhogh osighẹ oḍighinhom. Nạ atue kẹn ni akaaphạn onyọ aKristẹn dị asilor.

3. Maạr aaḅeghiọn ipẹ osopha phọ anạ katir bọ ooruẹn olhoghi phọ anạ r’olọ abunhọn.

OGHAẠPH OOKARAGH

Mem dị yira owạ olhegheri idị aZihova alhoghoma ilọ iyaạr dị yira rowạ oḍighi ḅilhẹ r’idị ipẹ phọ ketir bunhọn awe kụ edị yira kotue osopha ogey osopha.

Ooḅula

• Ika kụ idị nạ katue asopha osopha dị aḅeraạn aZihova?

• Ika kụ idị nạ katue atughemhị ooruẹn olhoghi phọ anạ?

• Ika kụ idị nạ kaḍeenhaan olhọgh eegu ooruẹn olhoghi abunhọn awe?

WAAGHỊ AMHIỊN

Ika kụ idị nạ katue asopha osopha dị kakparamhị siya arighirị phọ anạ r’Enhaạn?

“Sopha Osopha Dị Kakuenhi Enhaạn” (The Watchtower, April 15, 2011)

Tuughạ abughẹ ilọ areten phọ ipẹ aZihova rangọ ghan bọ oroma.

AZihova Raaḅakị Ghan Ni We Phọ Odị (9:50)

Miịn raraạr dị elhoghonhaạn ḍighaạgh oniin oye osopha osopha dị akpạr ri.

AZihova Aguanhaan Imạ Araraạr (5:46)

Legheri abughẹ ilọ oḍighi ghan idị olhoghi aZihova kaḅaạl mem dị odị u/ngọ itọ ilọ oḍighi iyaạr.

“Nạ Amoghi Ni Mọ ABaibul Phọ Angọ Ghan Nyinhạ Olhogh Torobọ Amem?” (The Watchtower, December 1, 2003)