ESI ITUUGHẠ PHỌ 37
Idị ABaibul Phọ Aghaạph Ilọ Oḍighi r’Ikpoki
Ikpoki obobọ oḍighi meḍighi ghan ni idị nạ amhoọgh ooḅaghamhiạn aloor? Reḍighi ghan ni ipaanhaạn owạ ghan araraạr orolhọm kụ oḅilhẹ ongọ aZihova iiseeny phọ ipẹ esi bọ nyodị. ABaibul phọ angọ ni oromha dị katue ulhoghonhaạn iyira ḍighaạgh.
1. ABaibul phọ akaạph eeghe ilọ oḍighi?
Enhaạn rawạ dị yira kokelhọm rukumuan. ABaibul phọ aḅẹm ni mọ “iyaạr i/lo dị enhighẹ epu dị oye . . . kakelhọm loor, loor esi iikparạ iiḍighi phọ odị.” (Ecclesiastes 2:24) AZihova aḍighi oye arukumuan. Mem dị yira otuughaạny nyodị kụ okumuan ghan, olhoghi odị kaḅaạl li kụ eḅilhẹ ingọ iyira oḅaạl olhoghi.
Oḍighi amạn ni maạr. Kuolọ yira ku/maghamhị maạr upuemhi iiseeny phọ yira rongọ bọ aZihova. (Jọn 6:27) Odị aguan ni mọ eḍighi maạr dị yira osighẹ rukumuan phọ odị oḍighi eḅẹl, pọ odị kungọ ni iyira raraạr phọ ipẹ yira owạ bọ orolhọm.
2. ABaibul phọ akaạph eeghe ilọ ikpoki?
ABaibul phọ akaạph ni mọ “ikpoki eḍighi ni oghoph,” kuolọ aBaibul phọ uphụr ri iyira rurụ mọ ikpoki bịn ke/tue engọ oye oḅaạl olhoghi. (Ecclesiastes 7:12) Esi iduọn phọ, aBaibul phọ uromha iyira mọ ku/pomoghiạn ikpoki, ḅilhẹ mọ ‘ilọ yira omhoọgh igbaanyạn ghan iyira.’ (Ibạl Hibru 13:5.) Eḍighi maạr dị ipẹ yira omhoọgh bọ kụ igbaanyạn iyira, yira ko/ḅonyonhu ozuan loor esi ootughiạn ghan araraạr dị yira u/moọgh. Kighoph kẹn iyira esighẹ esi olheeghi aruumhụgh. (Proverbs 22:7) Yira ko/meel kẹn oḍighanhaan ophegh iko r’iikelheghiạn onhuụn oḍighi oolhạ.
3. Ika kụ idị yira kotue osighẹ ikpoki ayira onmoom inmo?
AZihova Enhaạn inmo, kụ yira rotuughaạny ghan nyodị mem dị yira “onmo ghan inmo.” (1 Timoti 6:18) Yira kotue ni osighẹ ikpoki phọ ayira onmoom inmo esi ongọ mọ osighẹ olhoghonhaạn ḍighaạgh ookpomhoghan phọ ḅilhẹ r’abunhọn awe, ekạr nuụn ekpaariọm buphẹ r’ayira oḅọph bọ omheeraam mọ. Iyaạr dị emhạn maạr iboom esi aZihova pọ iyaạr phọ inyu bọ iyira ongọ ikpoki phọ, k/onhụ ikpoki phọ yira ongọ bọ. Mem dị yira ongọ r’oomo ekpom, yira komoọgh ni oḅaạl olhoghi kụ olhoghi aZihova aḅilhẹ aḅaạl.—Ibạl Iiḍighi 20:35.
OLHEGHERI OBUGHẸ
Omhiịn suọ dị odi ghan mem dị yira osighẹ oḍighi eten phọ epẹ ekpẹ bọ kụ oḅilhẹ omhoọgh ogbaanyạn.
4. Eten phọ epẹ nạ raḍighi ghan bọ oḍighi eghuenhi aZihova
Eten phọ epẹ yira osighẹ bọ oḍighi eḍeenhaan ni mọ yira omoọgh siya arighirị r’aZihova. Ipegh VIDIO phọ, kụ eeḅeghiọn sipuru phọ edaphạn bọ siẹn.
Siphẹ avidio phọ, eghẹn ezọ aJason epẹ otu oḍighi phọ kụ iḅeraạn nyinhạ?
Eeghe kụ ilhoghonhaạn nyodị ḍighaạgh oḍighi oḍighi phọ odị emạ eten?
Ibạl Kolosị 3:23, 24, kụ eeḅeghiọn ḍipuru phọ aḍiẹn:
Uḍighi ika kụ eten phọ epẹ yira omhiịn bọ oḍighi emạn bọ maạr?
Oḍighi amạn ni maạr. Kuolọ yira ku/maghamhị maạr upuemhi iiseeny phọ yira rongọ bọ aZihova
5. Asuọ odi ni omhoọgh ogbaanyạn
Ibadị awe rokparaghạ ghan omhoọgh ikpoki okpol. Kuolọ aBaibul phọ uromha ni iyira mọ ku/ḍighi idiphọ. Ibạl 1 Timoti 6:6-8, kụ eeḅeghiọn ḍipuru phọ aḍiẹn:
ABaibul phọ uromha iyira oḍighi eeghe?
Ghalhamọ yira u/moọgh ni ibadị araraạr, yira kotue ni omoọgh oḅaạl olhoghi. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Etigheri iduọn arughunotu phọ u/kạr bọ umoọgh ikpoki, eeghe kụ rengọ ghan bidị ibo?
Kuolọ kokaạph ika eḍighi maạr dị yira omhoọgh omuzeḍi kụ oḅilhẹ ni rowạ inhọn? AZizọs angọ ni oghaạph omaanhiọm dị aḍeenhaan iiḅaghamhị dị retọl ghan. Ibạl Luk 12:15-21, kụ eeḅeghiọn ḍipuru phọ aḍiẹn:
Nạ atuughạ eeghe esi iphẹn aZizọs aghaạph bọ?—Miịn ekpịgh phọ 15.
Ibạl Proverbs 10:22 r’1 Timoti 6:10. Kụ eeḅeghiọn sipuru phọ iphẹn:
Siẹn oḍighi oyaghirị aZihova r’omhoọgh iboom ikpoki, eghẹn kụ imhạn maạr epu? Eeghe kụ iḍighi?
Eeghe iiḅaghamhị kụ reḍuạ ghan kemite mem dị oye rawạ ghan omhoọgh iboom ikpoki?
6. AZihova kungọ ni iyira raraạr phọ ipẹ yira owạ bọ orolhọm
Iiḅaghamhị oḍighi r’ikpoki ketue ni edẹgh epogh omheeraam mọ ayira esi aZihova. Ipegh VIDIO phọ omhiịn ilọ oḍighi mem dị iiḅaghamhị phọ iphẹn phọ emite, kụ eeḅeghiọn sipuru phọ edaphạn bọ siẹn.
Onyọ umor phọ asoman eeghe iiḅaghamhị siphẹ avidio phọ?
Aḍighi eeghe orue okpạr opu iiḅaghamhị phọ odị eten dị enhighẹ?
Ibạl Matiu 6:25-34, kụ eeḅeghiọn ḍipuru phọ aḍiẹn:
AZihova aguan oḍighinhaan eeghe buphẹ osighẹ bọ nyodị kụ oḍighi eḅẹl?
ABUNIIN AWE OOTUGHIẠN MỌ: “Ewạ dị bidị kokumuan iboom orue omiteom ongọ eghunotu abidị. Esi iduọn phọ, bidị ko/tue ghan okị ituughạ torobọ awiki.”
Eghẹn esi aBaibul kụ ingọ nyinhạ akpọ oḅio mọ osighẹ iiseeny phọ nạ rangọ bọ aZihova oḍighi eḅẹl kụ emạ iyaạr oḍighi?
OGHAẠPH OOKARAGH
Omhoọgh oḍighi r’ikpoki enighẹ ni, kuolọ ki/sophoghom iyira okumu aZihova.
Ooḅula
Eeghe kụ kelhoghonhaạn nyinhạ ḍighaạgh oḍighi oḍighi phọ anạ emạ eten?
Eeghe asuọ kụ odi esi omhoọgh ogbaanyạn?
Nạ kaḍeenhaan ika mọ nạ aḍuom ni olhoghi ipẹ aZihova aghaạph bọ mọ onọ kamiteom ni angọ we phọ odị?
WAAGHỊ AMHIỊN
Tuughạ alhegheri mughumọ aBaibul phọ aḅẹm ni mọ ikpoki eḍighi ekarạph iyaạr.
“Ikpoki Eḍighi Ni Zin Odọ Kirokirọ Ikarạph Ḍughụm?” (Edi intanẹt)
Tuughạ alhegheri ilọ osighẹ ikpoki oḍighinhom araraạr dị keḅeraạn Enhaạn.
“ABaibul Phọ Akaạph Eeghe Ilọ Onmo Ghan Inmo?” (Edi intanẹt)
Ophegh iko ebeeph ni?
“Idị ABaibul Phọ Aghaạph Ilọ Ephegh Iko” (Awake!, March 2015)
Miịn iyaạr dị elhoghonhaạn ḍighaạgh oye dị aphegh ghan iko kụ aḅilhẹ amhi ghan imhi onmia.
“Mị Uphomhoghiạn Ephegh Oghiilhom Ghan Asụ” (The Watchtower, November 1, 2011)