ESI ITUUGHẠ PHỌ 38
Ḍeenhaan Mọ Nạ Amaghamhị Ni Maạr Inmo Aghuḍum Mọ
Yira omoọgh ni ibadị araraạr oghelhọm siẹn aghuḍum mọ ayira. Ghalhamọ r’amem dị yira osoman iiḅaghamhị, bịn iniin araraạr edi ghan ni dị yira rokelhọm ghan. Ika kụ idị yira koḍeenhaan mọ yira omaghamhị ni maạr inmo aghuḍum mọ? Eeghe kụ iḍighi kụ ekpẹ bọ ni oḍighi iduọn phọ?
1. Eeghe kụ iḍighi kụ yira komaghamhị bọ maạr ghuḍum?
Ewạ ni mọ omhaghamhị maạr ghuḍum loor esi dị aḍighi inmo dị Odẹ ephomhoghiạn phọ ayira Zihova, kụ angọ. Odị kụ “azin aghuḍum”—odị kụ alhẹm oomo araraạr. (Psalm 36:9) “Odị r’aIoor odị kụ rangọ ghan oomo araraạr ghuḍum r’aḍiphooghu r’ilọ rowạ.” (Iiḍighi 17:25, 28) AZihova ungọ ni iyira torobọ iyaạr dị yira owạ orolhọm. Kuolọ i/munheen pạ bịn, odị aḅilhẹ kẹn ni aḍighi idị yira rokelhọm ghan ghuḍum mọ.—Ibạl Iiḍighi 14:17.
2. Ika kụ idị yira kotue oḍeenhaan aZihova mọ yira omaghamhị ni maạr inmo aghuḍum mọ odị angọ bọ?
Iduọn onhiin phọ anạ raamor bọ eghun anạ, bịn aZihova amhiigh ni omhoọgh aḍiḅeraạn anạ. Siphẹ aBaibul phọ, oniin ebenhẹ aZihova dị oghol mọ Devid aḅenhị ni nyodị esi iiḅereghị mọ: “Nạ umhiịn ni mem mọ rukpo bọ imhị.” (Psalm 139:16) AZihova amaghamhị ni maạr agey ghuḍum mọ anạ. (Ibạl Matiu 10:29-31.) Kepin ni olhoghi aZihova iboom eḍighi maạr dị oye asiemhi eekunha ghuḍum onhọn oye, obobọ olọ odị r’aloor.a (Exodus 20:13) Kepin kẹn ni esi aZihova eḍighi maạr dị oye alhọgh ghuḍum odị esi iiḅaghamhị eten dị i/kpeanhaạn obobọ u/daphạn itọ dị ongọ oghophom asighuḍum abunhọn awe. Mem dị yira omhaạr ophạm ghuḍum mọ ayira, oḅilhẹ olhọgh eegu ghuḍum abunhọn awe, yira roḍeenhaan ghan mọ yira omaghamhị ni maạr iikiạ inmo aghuḍum mọ.
OLHEGHERI OBUGHẸ
Ooḅeghiọn iniin areten dị nạ katue aḍeenhaan mọ nạ rasereghiạn ni inmo aghuḍum mọ.
3. Maạr aphogha loor anạ
AKristẹn dị moḅọgh loor ongọ aZihova rosighẹ ghan oomo adọl aghuḍum mọ abidị kokumuom nyodị, eten dị eghịgh mudị bidị osighẹ loor phọ abidị kụ opighironhọm ekiạ. Ibạl Rom 12:1, 2, kụ eeḅeghiọn sipuru phọ iphẹn:
Uḍighi ika kụ nạ kamaạr ghan bọ apogha loor anạ?
Ighẹn kụ iniin areten dị nạ katue aḍighi iduọn phọ?
4. Miigha ghan loor esi atorobọ iyaạr obọ oye kaḍighima ghan bọ iyaạr obobọ aghuḍum oye asi eekunha
ABaibul phọ uḅenhị iyira mọ oghel oḍighi araraạr dị keḍighi idị oye kaḍighima iyaạr obobọ kepiemhi ghuḍum. Ipegh VIDIO phọ, olhegheri iniin araraạr dị nạ katue aḍighi kụ akoph loor anạ asighẹ esi oḍighima iyaạr.
Ibạl Proverbs 22:3, kụ eeḅeghiọn idị nạ r’abunhọn kotue otọl dị iyaạr ko/ḍighima . . .
siphẹ olhoghi otu phọ anyinha.
epẹ otu oḍighi phọ anyinha.
mem dị nyinha repegh ephegh.
mem dị nyinha eḍigh moto, oghiilhom, obobọ enhọn iyaạr.
5. Logh eegu ghuḍum obumoọny phọ opọ k”omhạr bọ
ADevid aghaạph ni mọ aZihova amaghamhị ni maạr torobọ iyaạr dị remitenhaan obumoọny dị odi olhoghi okuruḅakạ. Ibạl Psalm 139:13-17, kụ eeḅeghiọn ḍipuru phọ aḍiẹn:
Esi aZihova, aghuḍum oye ramiigh ghan mem mọ roomor bọ eghun phọ obobọ mem mọ omhạr bọ?
Iilhogh phọ aZihova angọ bọ Izrạl iḍiodi phọ ighoph ghan burunhiin r’anmụny phọ odi bọ ilhoghi arukuruḅakạ abidị. Ibạl Exodus 21:22, 23, kụ eeḅeghiọn sipuru phọ iphẹn:
AZihova amiịn ika oye dị u/legheri kụ asiemhi eekunha ghuḍum obumoọny dị k”omhạr?
Ketọl ika esi aZihova eḍighi maạr dị oye akạr alhegheri kụ asiemhi eekunha ghuḍum obumoọny dị odi olhoghi okuruḅakạ?b
Ipẹ Enhaạn alhoghoma bọ ilọ oghaạph phọ ophọn phọ etọl ika esi anạ?
Ghalhamọ anhịr dị amaghamhị ni maạr ghuḍum katue ni aatughiạn mọ eeḍiạn iniin asidọl, osighenhaạn eghun phọ kụ iyaạr dị enhighẹ oḍighi. Ibạl Isaiah 41:10, kụ eeḅeghiọn sipuru phọ iphẹn:
Eḍighi maạr dị rokpaariọm anhịr ephoph osighenhaạn eghun, odị kalọm anhiạn olhoghonhaạn aḍighaạgh? Eeghe kụ iḍighi?
ABUNIIN AWE OOTUGHIẠN MỌ: “Anhịr ephoph amoọgh ni elhiom osopha mughumọ onọ kasighenhaạn eghun, loor esi dị aloor phọ aḍiọ odị.”
Uḍighi ika kụ nạ ameeraam bọ mọ aZihova amaghamhị ni maạr ghuḍum onhiin phọ ḅilhẹ r’aghuḍum obumoọny phọ k”omhạr bọ?
OGHAẠPH OOKARAGH
ABaibul phọ utughemhị iyira mọ ophomhoghiạn, olhọgh eegu, kụ oḅilhẹ omhaạr oghoph inmo aghuḍum mọ aZihova mungọ bọ iyira. Iphẹn phọ eḅarạm ni ghuḍum anạ r’aghuḍum abunhọn.
Ooḅula
Uḍighi ika kụ aZihova amaghamhị bọ maạr ghuḍum awe?
Retọl ghan ika esi aZihova mem dị oye akạr alhegheri kụ asiemhi eekunha ghuḍum oye?
Eeghe iyaạr ilọ inmo aghuḍum mọ kụ ikạr eḅeraạn nyinhạ?
WAAGHỊ AMHIỊN
Ika kụ idị yira kotue oḍeenhaan aZihova mọ yira omaghamhị ni maạr inmo aghuḍum mọ?
Wạ ophagharanhaạn aḍipuru phọ aḍiẹn, Enhaạn kasạr ri abilhenhaạn anhịr dị masighenhaạn ghan eghun ḍughụm?
“ABaibul Phọ Akaạph Aani Eeghe Ilọ Osighenhaạn Eghun?” (Edi intanẹt)
Tuughạ alhegheri idị eten phọ epẹ Enhaạn amhiịn bọ ghuḍum ketir idọ areephegh dị nạ kapegh ghan.
“Nạ Kapegh Ni Reephegh Dị Kelọgh Ghuḍum Anạ Esi Iiḅaghamhị?” (Awake!, October 8, 2000)
Kokaạph ika eḍighi maạr dị oye amhoọgh iitughiạn osiemhi eekunha ghuḍum odị? Miịn idị aBaibul phọ katue aloghonhaạn ḍighaạgh.
a AZihova amoọgh ni ḍiḅeraạn abuphẹ arokpom mọ meḅonyonhu bọ ezuan. (Psalm 34:18) Odị anaghanhạn ni idọ asidọl dị ketue ni eḍighi idị oye kaatughiạn osiemhi eekunha ghuḍum odị, kụ rawạ ni olhoghonhaạn oye phọ ḍighaạgh. Omhiịn idị olhoghonhaạn aḍighaạgh phọ odị katue akparamhị oye oghel aḍiitughiạn osiemhi eekunha ghuḍum odị, bạl emhuoghaạph phọ “Mị Rawạ Omhugh—ABaibul Phọ Katue Ni Ulhoghonhaạn Imhị Ḍighaạgh Mem Dị Mị Amhoọgh Iitughiạn Osiemhi Eekunha Ghuḍum Amhị Ḍughụm?” edi bọ gạ phọ “Waaghị Amhiịn” siẹn esi ituughạ phọ ephẹn phọ.
b Abuẹn mosighenhaạn ghan bọ eghun kuu/ḅaghamhiạn loor iboom, loor esi dị aZihova katue ni asạr abilhenhaạn bidị. Omhiịn iinhaghạn dị epu siẹn, pogh emhuoghaạph phọ “ABaibul Phọ Akaạph Aani Eeghe Ilọ Osighenhaạn Eghun?” edi bọ gạ phọ “Waaghị Amhiịn” siẹn esi ituughạ phọ ephẹn phọ.