Saḅạr Ozaamhiạn Aloor Dị Kaḅeraạn AZihova

AZihova kụ Enhaạn oḅaạl olhoghi phọ. (1 Timoti 1:11) Kụ odị rawạ mọ yira omhoọgh oḅaạl olhoghi oḅilhẹ oghelhọm ghuḍum ayira. Reḅaạl ghan ni olhoghi odị omhiịn dị yira owạ mem oghelhọm aani loor. Siẹn esi ituughạ phọ ephẹn phọ, yira komiịn idị yira kotue oḍighinhom mem ophooghian ayira kụ okạr okelhọm oḅilhẹ omoọgh ogbaanyạn eten dị eḅeraạn aZihova.

1. Ewạ mọ ootughiạn ghan eeghe mem dị yira rowạ osaḅạr ozaamhiạn aloor?

Nạ raḍighi ghan eeghe mem ophooghian anạ? Eḅeraạn buniin awe orọl olhoghi otu bịn aạl aḍinyạ, onhaghạn asuọr, ophogh afim, obobọ oḍigh isiphẹ intanẹt phọ. Abunhọn rokelhọm ghan ozaamhiạn aloor r’arighirị abidị, esi oghị omhughị amughị, okpor abọl obobọ ophegh enhọn ephegh. Etigheri ozaamhiạn aloor dị yira osaḅạr, omhiịn ni mọ ‘eḅeraạn ni . . . Omoọgh-we phọ.’ (Efesọs 5:10) Iphẹn phọ emạn ni maạr loor esi dị iniin ozaamhiạn aloor dị eetura reḅarạm ghan raraạr dị aZihova aghel, idiphọ iigamanhiạn, orolhạn esi dị u/ḅaạl, obobọ iiḍighi ikarạph aruwaloor. (Ibạl Psalm 11:5.) Eeghe kụ kilhoghonhaạn iyira ḍighaạgh oselẹ ogey ozaamhiạn aloor?

Eḍighi maạr dị yira osaḅạr righirị dị ophomhoghiạn aZihova, bidị kulhoghonhaạn ni iyira ḍighaạgh osaḅạr ogey ozaamhiạn aloor r’oḅilhẹ oḍighi araraạr dị enhighẹ. Iduọn yira motuughạ bọ ni epẹ omhạn, “opọ ratelhean ghan bọ oye dị asụ-olhoghi kasụ ni olhoghi.” Kuolọ eḍighi maạr dị yira ogbor ghan ooḍikuan r’awe dị u/pomhoghiạn siigbu phọ Enhaạn, yira ‘koḍigh ni esi iiḅaghamhị.’—Proverbs 13:20.

2. Uḍighi ika kụ emạn bọ ni maạr okiririom ophogh ghan amem mọ yira olhọgh bọ ozaamhiạn ghan aloor?

Ghalhamọ ozaamhiạn aloor phọ ayira aḍighi ni odị aZihova u/kel, ewạ ni mọ ogonha loor obọ yira kolọgh ghan bọ muboom amem ozaamhiạn aloor. Yira u/gonha loor, etue ni eḍighi idị yira ko/moọgh mem dị ekasiạn oḍighinhom araraạr dị emhạn maạr epu. ABaibul phọ uḅenhị iyira mọ ‘ku/peghom ghan ephegh moọny eepoogh lọ yira omhoọgh.’—Ibạl Efesọs 5:15, 16.

OLHEGHERI OBUGHẸ

Ooḅeghiọn idị yira kotue osopha ghan ogey osopha ilọ ozaamhiạn aloor.

3. Kel ozaamhiạn aloor dị u/nighẹ

Uḍighi ika kụ yira komiigha bọ loor kụ osaḅạr ozaamhiạn aloor? Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Eeghe Odọ Ozaamhiạn Aloor Kụ Edị Mị Kasaḅạr? (4:39)

• Eeghe ooghighighạn kụ odi igbo igbagarạ areephegh aḍuugh aḍuugh phọ ophegh ghan bọ iḍiodi phọ r’iniin areephegh arodon?

• Siphẹ avidio phọ, aDanny atuughạ eeghe iyaạr ilọ araraạr phọ ipẹ odị kasighẹ bọ azaamhiạn loor?

Ibạl Rom 12:9, kụ eeḅeghiọn ḍipuru phọ aḍiẹn:

• Ika kụ idị ekpịgh phọ ephẹn phọ kelhoghonhaạn nyinhạ ḍighaạgh osaḅạr ogey ozaamhiạn aloor?

Ighẹn kụ iniin araraạr dị aZihova aghel? Ibạl Proverbs 6:16, 17 r’aGaletia 5:19-21. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:

• Ighẹn araraạr dị edi siikpịgh phọ iphẹn phọ kụ edị nạ ragbor ghan kamhiịn esi araraạr dị rosighẹ ghan kozaamhiọm loor rodon?

Ilọ osaḅạr ogey ozaamhiạn aloor

Puruan loor mọ:

• Epamanhạm ni iyaạr dị aZihova aghel ḍughụm?

• Resighẹ ghan ni mem dị ekpẹ oḍighinhom araraạr dị emhạn maạr iboom ḍughụm?

• Reḍighi ghan ni idị mị raaḍikuan ghan r’awe dị u/pomhoghiạn aZihova ḍughụm?

Eḍighi ni osụ-olhoghi oḍuạ esi ooto r’osooromhinheen. Pọ kụ iyaạr phọ enhighẹ bọ oḍuạ esi ozaamhiạn aloor dị yira ootughiạn mọ o/nhighẹ

4. Maạr aḍighinhom mem mọ anạ

AVIDIO: Eeghe Kụ Resighẹ Ghan Mem Mọ Anạ? (2:45)

• Ghalhamọ r’iduọn umor phọ siphẹ avidio phọ u/pogh bọ ni raraạr dị i/nighẹ, eeghe iiḅaghamhị kụ edị odị amhoọgh?

Ibạl Filipai 1:10, kụ eeḅeghiọn ḍipuru phọ aḍiẹn:

• Ika kụ idị ekpịgh phọ ephẹn phọ kilhoghonhaạn iyira ḍighaạgh osopha onhụ amem dị yira kolọgh ozaamhiạn aloor?

5. Saḅạr ogey ozaamhiạn aloor

Ghalhamọ r’iduọn iniin ozaamhiạn aloor i/ḅeraạn bọ aZihova, inhọn araraạr oghelhọm edi ni dị eḅeraạn nyodị. Ibạl Ecclesiastes 8:15 r’aFilipai 4:8, kụ eeḅeghiọn ḍipuru phọ aḍiẹn:

• Oghẹn ozaamhiạn aloor kụ edị nạ rakelhọm ghan?

OGHAẠPH OOKARAGH

AZihova rawạ mọ yira osaḅạr kụ oḅilhẹ oghelhọm ozaamhiạn aloor dị anhighẹ.

Ooḅula

• Eeghe odọ ozaamhiạn aloor kụ edị aKristẹn kokel?

• Eeghe kụ iḍighi kụ enighẹ bọ ni ogonha aloor onhụ amem mọ yira rolọgh ghan bọ ozaamhiạn aloor?

• Nạ rawạ ni osaḅạr ozaamhiạn aloor dị kaḅeraạn aZihova ḍughụm? Eeghe kụ iḍighi?

WAAGHỊ AMHIỊN

Miịn oye dị kasaḅạr ghan ozaamhiạn aloor dị nạ kakelhọm.

“Abugbaanhaạn AZihova Olọgh Ni Olhogh Mọ Awe Ku/ḍighinhom Ghan Iniin Asifim, Rinyạ Obobọ Suọr?” (Edi intanẹt)

Miịn iyaạr dị kelhoghonhaạn nyinhạ ḍighaạgh osaḅạr ogey ozaamhiạn aloor.

“Ozaamhiạn Aloor Phọ Anạ Aḍighi Ni Olọ Asuọ?” (The Watchtower, October 15, 2011)

Siphẹ emhuoghaạph phọ “Mị Ukpạr Kẹn Ni Apu Ophogh Ghan Awe Osooromhi,” miịn iyaạr dị elhoghonhaạn ḍighaạgh oniin oye onme eten ozaamhiạn aloor phọ odị.

“ABaibul Phọ Ranme Ghan Ni Sighuḍum” (The Watchtower, February 1, 2010)

Miịn idị oniin onhiin asopha ogey osopha ilọ ozaamhiạn aloor dị aḅarạm iiḍighi ikarạph aruwaloor.

Kel Ozaamhiạn Aloor Dị Aḅarạm Iiḍighi Ikarạph Aruwaloor (2:02)