Aḍinyạ Dị Aloor Phọ Repogh Bọ Ogẹ

Buuḅi Abumor r’Abumaranhi:

Ephomhoghiạn phọ yira omhoọgh bọ oghị esi Enhaạn r’awe rinyu ghan ni iyira ‘oghị oomo areelhe aḅirinhi phọ . . . oḍighi awe bumatuạn kụ oḅilhẹ oḍiinye abidị muụm.’ (Mat. 28:19, 20; Mạk 12:28-31) Ephomhoghiạn dị i/ḅarạm owạ ilọ aloor emoọgh iikpọ agey. Eḍighi maạr dị yira omhoọgh odọ ephomhoghiạn phọ ephẹn phọ, yira kotue ni ologhonhaạn ḍighaạgh we dị ‘oḍeenhaan mọ bunọ rowạ ni omhoọgh aghuḍum k’agee-pọ.’—Iiḍ. 13:48.

Mem dị eten, yira ugbon ghan okpạph ophạm areḍeenhaan ilọ oghaạph r’ongọ awe rinyạ. Nyiidiphọ, ewạ mọ okparaghạ onhighemhị eten phọ epẹ yira rokaaphạn ghan bọ we. Yira rowạ oḍeenhaan mọ yira opomhoghiạn ni we esi oghaạph ghan araraạr dị keḍạ ḍiḅeraạn abidị. Iphẹn phọ remạ ghan mọ yira ookolhobian ni onme emhuoghaạph phọ, kụ oḅilhẹ okiririom ghan ophogh raraạr dị oye phọ aghaạph amiteom r’araraạr dị keḍạ ḍiḅeraạn odị. Ika kụ idị abrosọ phọ ophọn phọ kulhoghonhaạn iyira ḍighaạgh oḍighi iduọn phọ?

Abrosọ phọ apamanhạm 12 ariisi ituughạ dị kitughemhị iyira ilọ omhoọgh araagharạ dị ketue ilhoghonhaạn iyira ḍighaạgh oḍeenhaan ephomhoghiạn ḅilhẹ r’oḍighi awe bumatuạn. Okpasị torobọ esi ituughạ esi aBaibul dị eḍeenhaan eegharạ dị aZizọs obobọ onhọn okaaphọm siphẹ oḅẹl okuron asiạ phọ aḍeenhaan siphẹ oḍighi iphelhegbeel phọ. Aḍiigbu ayira ki/ḍighi okpạph ophạm reḍeenhaan ilọ oghaạph, kuolọ owạ areten dị yira koḍeenhaan we ephomhoghiạn. Ghalhamọ r’iduọn emhoghi bọ ni mọ omhoọgh raagharạ phọ iphẹn phọ siphẹ oḍighi iphelhegbeel phọ, yira kooḅeghiọn idị iniin araagharạ phọ iphẹn phọ kilhoghonhaạn iyira ḍighaạgh mem dị yira romiigh oghaạph r’oye, mem dị yira oḅilhẹ oḅula r’amem dị yira rotughemhị oye Baibul.

Iduọn nạ raaḅeghiọn bọ torobọ esi ituughạ, miigha loor aatughiạn idị nạ katue aḍeenhaan eegharạ phọ epẹ phọ mem dị nạ rakaaphạn we epẹ ekool phọ anyinha. Kparaghạ oḍighi idị nạ katue akparamhị ephomhoghiạn phọ nạ amhoọgh bọ aghị esi aZihova r’awe. Ephomhoghiạn phọ epẹ phọ kụ kelhoghonhaạn nyinhạ ḍighaạgh okparaghạ oteẹny aḍiigbu oḍighi awe bumatuạn, kparipẹ r’omhoọgh eniin eten oghaaphạn ghan awe.

Yoor rosereghiạn ni eboom eepoogh phọ yoor omhoọgh bọ okumuan r’anyinha. (Zeph. 3:9) Eḍighi ni idị aZihova kakiọm ghisigh isẹph ghan inyinha, iduọn nyinha reḍeenhaan bọ mọ nyinha epomhoghiạn ni we eḅilhẹ reḍighi bidị bumatuạn!