Okọy Eten

Yira roḍighinhom ghan agey inyaạm mọ ayira mem dị yira ophighi siigbu okumuom aZihova. (1Kọr 9:26) Asiigbu phọ rilhoghonhaạn ghan iyira ḍighaạgh omhaạr oḍighinhom amem mọ esugha bọ kụ eekunha phọ egbi oteẹny. (Efẹ 5:15, 16) Mem iiseeny eghunotu anạ, ke/nighẹ ophighi asiigbu ilọ aḍimoom alhạ arukumuan phọ? Olhoghonhaạn anạ ḍighaạgh, aḍinyạ ituughạ phọ aḍiẹn epamanhạm ni rumhuoghaạph asiigbu kirokirọ dị nạ kaaḅeghiọn apogh r’iiḅereghị.—Jems 1:5.

Esi omaạm, eghunotu phọ anạ kotue ni oopuruan ologhonhaạn ḍighaạgh ghalhamọ oniin oye siphẹ eghunotu phọ okọy aani eten oomo amem? Eḍighi maạr dị nạ rakiilhaan mọ nạ ka/tue amoọgh onhụ awạ phọ, pọ teẹny bukọy eten dị osoman aani dọl phọ anạ. (Pr 15:22) Nạ atue kẹn ni aapuru sipuru okọy eten mem iiseeny eghunotu anạ. Kụ agẹ alhọgh esi ipẹ nạ agbiighi bọ oḍighi phọ. Eḍighi maạr dị nạ makọy ghan ni eten igbaany, pọ ḅeeḅeghiọn aphogh mughumọ asidọl phọ anạ kemeera ni oḅilhẹ okọy eten nyiidiphọ.

Abuniin siphẹ eghunotu phọ anạ otue ni okọy aani eten oniin obobọ ibadị arunwanyụ? Eḍighi maạr dị inyaạm nyinhạ i/kạr ilo, pọ nạ atue ni akọy aani eten ekula amem esi olhọgh ghan oọny amem torobọ aḍio epẹ erugh phọ. Eḍighi maạr dị nạ ra/moọgh ghan eepoogh omite epẹ erugh phọ siphẹ ogbo awiki phọ loor esi oḍighi obobọ askul anạ, pọ nạ atue ni asaḅạr unwanyụ dị nyinha kemoọgh mem ophooghian obobọ unwanyụ dị amhoọgh oogh eekunha awiki. Gẹ siphẹ akalandạ phọ anạ mem mọ nạ rawạ bọ okọy eten phọ kụ aḅilhẹ ageọm idị nạ agbiighi oḍighi. —Pr 21:5.

IPOGH VIDIO PHỌ KPỌ OḄIO IDIPHỌ . . . OKỌY ETEN, KỤ EPHAGHARANHAẠN ḌIPURU PHỌ EDAPHẠN BỌ SIẸN:

• Ipẹ emitenhaan bọ Umaranhi phọ Aamand itughemhị iyira eeghe ilọ ipẹ aZihova ramaạr ghan bọ kaphogh buphẹ ophinyọn bọ rikiạ okọy aani eten?