Nạ Raakolhobian Ni Olhe Aani “Erua Ade Phọ” Ḍughụm?

KOOKOLHOBIAN OḌIGHI AANI ADE PHỌ PARADAIS

Mem mọ aZihova atọ bọ aḅenhị we mọ “imuzeḍi de phọ kụ etọ ḅerẹ engọ,” odị aḅẹm ghan siẹn phọ mọ awe oḍighi de phọ paradais. (Gen. 1:28) Abuphẹ kotọl bọ siẹn ade phọ k’agee-pọ komunenhi ni ogbi phọ Enhaạn ophọn phọ obobọ itọ phọ iphẹn phọ. Ade phọ egina amem bịn ke/ḍighi paradais idiphọ oghoony phọ Iden. Mem dị Amagedọn aten oboom oḍighi katọl li. Kewạ ni mọ oḅaalhamhị de phọ mophueghị bọ raraạr. Ogbạ agey, arukumuan phọ kebụgh ni!

Iphẹn phọ iitughianhạm iyira oboom oḍighi phọ awe phọ Izrạl oḍighi bọ mem mọ bidị oḅula bọ dọl arebenhẹ epẹ Babilọn. Esi 70 asiạ oye o/rugh de phọ abidị. Kuolọ Aizaya aghaạph ni aḅenhị bidị mọ r’olhoghonhaạn aḍighaạgh aZihova bidị koḅilhẹ ni oḅulhemhi de phọ abidị ipẹ erọl ghan bọ. Oyil phọ Aizaya aḅẹm mọ: “Ghalhamọ ade phọ abidị iisaạr ri bịn mị kaḍighi idiphọ oghoony, idiphọ oghoony phọ Iden.” (Isa. 51:3) AZihova alhoghonhaạn ni ḍighaạgh we phọ Izrạl oḅilhẹ oselhemhi onhighemhị ade phọ abidị. Igina phọ kẹn ni, aZihova kaloghonhaạn ni ḍighaạgh we phọ abuphẹ kotọl bọ siẹn ade phọ, oḍighi idị ade phọ keḍighi imạ aparadais. Kụ nyiidiphọ nạ katue ni aḍighi aḍeenhaan mọ nạ amoọgh ni eephuạ oḍighi aani oḍighi phọ opọ phọ.

Eniin eten dị yira kotue oḍighi iduọn phọ pọ oḍighi aani oomo ipẹ yira kotue bọ oḅaalhamhị ghan amarugh phọ ayira ḅilhẹ r’oḍighi idị kemaạr enighẹ. Nạ katue ni aḍighi iphẹn phọ ghalhamọ r’amem dị nạ odi ekpisi dị awe phọ odi bọ roḍigh ghan eenịr. Nạ katue ni aḍighi iphẹn phọ abughẹ esi olhoghonhaạn aḍighaạgh ogbuurogh ghan r’omhaạr ophogh asiKindọm Họl r’Asembli Họl. Eḍighi maạr dị adọl phọ emheera pọ nạ katue ni amiteom aani loor anạ olhoghonhaạn ghan aḍighaạgh mem dị ekperenhom iiḅaghamhị emite idiphọ eghạm, oghim, ogbogh olophiạ, amuụm aḍigho, ḅilhẹ r’aniạn dị ephueghị raraạr. Iphẹn phọ keḍeenhaan mọ nạ anyạ ni oomo amem olhoghonhaạn aḍighaạgh bumor r’abumaranhi phọ mem lọ omhoghi olhoghonhaạn aḍighaạgh. Puruan loor anạ mọ, ‘Mị katue ni atuughạ aani sighalhanyạ dị mị katue ni aḍighinhom siphẹ paradais lọ aZihova amheera ni mọ mị ule aani erua ade phọ ḍughụm?’

KOOKOLHOBIAN OMHAẠR OPHOGH ABUPHẸ KOḄERION BỌ

Mem mem mọ aZizọs aḅeton bọ onyanhị phọ aJairos odị aḅẹm ni mọ ongọ onyanhị phọ iyaạr olhe. (Mạk 5:42, 43) Ii eeni ke/kạr ekpạr omhaạr ophogh onyanhị 12 asiạ. Kuolọ tuutughiạn oboom oḍighi phọ yira koḍighi bọ mem dị ipẹ aZizọs aghaạph bọ kemunughan, mem dị buphẹ odi bọ pạ iiḍi phọ konaghạn roḍọgh phọ abidị kụ oḍuạ siphẹ iiḍi phọ abidị omiteghu. (Jọn 5:28, 29) Ii aBaibul phọ o/kạr oghaạph k’anhị kalhe ilọ iphẹn phọ, kuolọ yira kotue ni ogbiom olhoghi mọ buphẹ koḅerion bọ komoghi ni olhoghonhaạn aḍighaạgh ayira omhoọgh eḍien, esi orọl, ḅilhẹ r’iinmenian oomnenian. Nạ katue ni aḍighi aḍeenhaan nyiidiphọ mọ nạ raakolhobian ni olhoghonhaạn abidị ḍighaạgh ḍughụm? Miịn iniin asipuru dị nạ katue ni apuruan loor.

Mem dị ogbeelhom mọ opoghom eghir ratu ookpomhoghan anyinha, nạ ramạgh aani ghan ni oru aani k’anạ olhe eḍien ḍughụm? Mem dị onme rukumuan abumor dị rokumuan epẹ Betẹl kụ oḅenhị mọ oru ekpisi anyinha kụ okumuan obobọ oseere opoghom eghir kụ oḅenhị mọ aru ekpisi anyinha kụ akumuan, nạ katue ni aloghonhaạn bidị ḍighaạgh owaanhaạn esi orọl ḍughụm? Eḍighi maạr dị ropạm ookpomhoghan eephugh ekpisi anyinha, nạ katue ni amiteom aani loor anạ angọ okumuan aani amem dị rookolhobian ḅilhẹ r’amem dị momhạn, obobọ oghị oomhaghạgh abumor mem lọ osi siphẹ ookpomhoghan eephugh phọ ḍughụm?

KOOKOLHOBIAN OTUGHEMHỊ AANI ABUPHẸ KOḄERION BỌ

Odaphạn ipẹ edi bọ Iiḍighi 24:15, yira rogon ni omhiịn ariisi eelạ awe dị koḅerion ongọ ghuḍum. Ibadị abuẹn phọ u/moọgh aani eepoogh otuughạ ilọ aZihova. Mem dị koḅerion bọ bidị kongọ ni bidị eepoogh phọ epẹ phọ.a Arebenhẹ aZihova dị okpẹ oḍuomolhoghi ḅilhẹ momhiịn raraạr kologhonhaạn ni ḍighaạgh otughemhị abuphẹ koḅerion bọ. (Isa. 11:9) Oniin onyọ umaranhi dị oghol mọ Charlotte, dị maghaạph ni oghaạph iiḅi iinhaghạn phọ epẹ Europe, South America, ḅilhẹ Africa, aḅaạl li olhoghi kụ rakori mem mọ amuphẹ phọ. Odị aḅẹm mọ: “Mị rakori ni mem mọ amuphẹ phọ mị katughemhị bọ we phọ abuphẹ koḅerion bọ. Torobọ amem dị mị aạl ilọ oye dị marọl ghan igbaany, mị raatughiạn ghan ni mọ: ‘Saị ḅẹm loor mọ oye phọ ophọn phọ alhegheri ni aZihova obọ adọl aghuḍum mọ odị mi/tọl iḍiphọ.’ Mị akạr rawạ oḅenhị abidị ilọ aZihova ḅilhẹ r’idị adọl aghuḍum mọ abidị kenighẹ eḍighi maạr dị bidị okumu aZihova.”

Ghalhamọ r’arebenhẹ aZihova dị okpẹ oḍuomolhoghi dị orọl kụ aZizọs agbi bọ oru isiẹn ade phọ komoọgh ni iboom araraạr otuughạ. Tuutughiạn ibo phọ ḅilhẹ r’eghuan phọ ketọl bọ oghaạph oḅenhị aDaniel ipẹ imiịn phọ odị agẹ bọ kụ u/naghanhạn bọ emhunhughan bọ. (Dan. 12:8) Obobọ ketọl ika esi anạ olhoghonhaạn aḍighaạgh Ruth r’aNaomi otuughạ olhegheri ipẹ eghunotu phọ abidị eḍighom aani bọ ḍikoọl eemharạ eemharạ aMesaya phọ? P’eeghe ibo dị ketọl ophinhom aani abin ogbogh oḍighi itughemhị phọ ketọl bọ aḅirinhi dị igbaragbarạ ḅilhẹ r’ekarạph eḍighinhom iyaạr i/lo mun!

Ika kụ idị nạ katue aḍighi nyiidiphọ aḍeenhaan mọ nạ raakolhobian ni ophinhom aani abin ogbogh oḍighi itughemhị phọ katọl bọ? Eniin eten dị ekạr eegholhaan dị nạ katue aḍighi pọ, orophomhi asighalhanyạ itughemhị phọ anạ ḅilhẹ r’ophinhom aani abin oḍighi iphelhegbeel phọ rakị bọ ni ghisigh siẹn oomo aḅirinhi phọ. (Mat. 24:14) Ghalhamọ asiạ anạ meghị ni anyụ obobọ asidọl phọ i/meera mun mọ ḍighi abughẹ, ikuph phọ nạ kalọgh bọ keḍeenhaan ni mọ nạ raakolhobian ni otughemhị aani abuphẹ koḅerion bọ.

Iniin asipuru dị emhạn maạr pọ, nạ raakolhobian ni olhe aani erua ade phọ ḍughụm? Olhoghi anạ aḅaạl li obobọ nạ raakolhobian ni oḍighi aani idị ade phọ keḍighi paradais ḍughụm? Ḅilhẹ kẹn, nạ raakolhobian ni otughemhị aani abuphẹ koḅerion bọ ḍughụm? Nạ katue ni aḍighi aḍeenhaan mọ nạ raakolhobian ni esi olhọgh amem oḍighi araraạr dị koḍighi ni siphẹ paradais, mem dị aZihova aḍighi idị nạ kale erua ade phọ!