Asipuru Dị Abuẹn Robạl Ghan Bọ Rinyạ Phọ Ayira Opuru
Eḍighi ni edị aDevid aatughiạn m’onọ ka/mugh kụ agẹ bọ ipẹ edi bọ Psalm 61:8 eḅẹm bọ mọ mị kaaseeny aZihova “k’agee-pọ” ḍughụm?
Eeye. Opiomạn o/lho esi ipẹ aDevid agẹ bọ.
Ooḅeghiọn ipẹ odị agẹ bọ ekpịgh phọ epẹ phọ ḅilhẹ r’ariisi dị eghighimaạm. Ekpịgh phọ eḅẹm mọ: “Mị kamoọr ghan suọr aboomiom ḍien phọ anạ k’agee-pọ, idiphọ mị kangọ ghan bọ nyinhạ ḍio ḍio ḍio ipẹ mị aguanhaan bọ.” “Mị kaaseeny ni nyinhạ, Sey Zihova Enhaạn amhị r’oomo ekpom amhị, kụ mị kagbeelhom ni ḍien phọ anạ k’agee-pọ.” “Mị kaboom ni ḍien phọ anạ k’agee-pọ k’agee-pọ.”—Ps. 61:8; 86:12; 145:1, 2.
Ikpo onhụ phọ ipẹ phọ aDevid agẹ bọ i/mạ imiteom mọ odị aatughiạn ghan mọ odị ka/mugh. Odị alhegheri ni mọ omhạr awe romugh ghan loor ikarạph, ḅilhẹ mọ odị kẹn oḍighinhom ikarạph. (Gen. 3:3, 17-19; Ps. 51:4, 5) Odị alhegheri ni kẹn mọ awe dị Enhaạn amhiịn mọ okpẹ oḍuomolhoghi idiphọ Ebraham, Aizik, ḅilhẹ r’aJekọb bịn umhugh ni. Kụ odị alhegheri ni mọ odị r’aloor kamugh aani ni ḍiniin aḍio. (Ps. 37:25; 39:4) Kuolọ ikpo onhụ phọ ipẹ odị agẹ bọ Psalm 61:8 eḍeenhaan mọ odị amoọgh ḍiḅeraạn oboom Enhaạn k’agee-pọ siẹn odị odi bọ ni rapooghu.—2 Sam. 7:12.
Iniin araraạr phọ aDevid agẹ bọ eḍighi raraạr dị emite siphẹ adọl aghuḍum mọ odị epẹ omhạn, idiphọ yira omhiịn bọ epẹ anyụ (superscriptions of) aPsalms 18, 51, r’52. Siphẹ Psalm 23, aDevid aḅẹm mọ aZihova opoghom dị rangọ ghan ogey oromha, raamhanhamhi ghan oye, kaḅilhẹ aghoph oye. Odọ opoghom dị arọl idiphọ kụ edị aDevid aru aani. Kụ odị awạ okumu Enhaạn siphẹ ‘oomo asiḍughulotu aghuḍum mọ odị.’—Ps. 23:6.
Lọgh elhegh kẹn mọ aZihova kụ aphum Devid ogẹ. Araraạr phọ odị agẹ bọ eḅaramaạm kẹn imiịn ilọ araraạr dị kemite ghisigh moọny amem. Esi omaạm, siphẹ Psalm 110, aDevid agẹ ni ilọ amem mọ Omoọgh-we phọ odị katọl bọ “ḍighaạgh elhiom [Enhaạn]” epẹ k’akẹ oḅilhẹ ongọ iikpọ. Oḍighi eeghe? Odị kakpạr apu bumulhọgh ḍien phọ Enhaạn aḅilhẹ “aagbo iiruẹn angọ reelhe phọ” siẹn ade phọ. AMesaya phọ aḍuạ siphẹ eghunotu phọ aDevid kụ amite, kụ katọl epẹ k’akẹ kụ atooghị ghan aḅilhẹ aḍighi “opinyọn rikiạ k’agee-pọ.” (Ps. 110:1-6) AZizọs aḅẹm ni mọ imiịn phọ ogẹ bọ Psalm 110 rekaạph ghan ilọ odị kụ kemunughan ni ghisigh.—Mat. 22:41-45.
Ii, aZihova kụ aphum Devid ogẹ idị emite mem mọ odị ḅilhẹ r’idị kemite ghisigh mem mọ koḅeton bọ nyodị oḅilhẹ ongọ ghuḍum kụ odị aboom aZihova k’agee-pọ. Iphẹn phọ ilhoghonhaạn iyira ḍighaạgh olhegheri mọ ipẹ aPsalm 37:10, 11, 29 eghaạph bọ eḍighi raraạr dị emite Izrạl iḍiodi phọ ḅilhẹ r’idị kemite ghisigh mem dị oomo ade phọ keḍighi Paradais.—Miịn ekpịgh phọ 8 siphẹ emhuoghaạph phọ edi bọ siẹn Otu Okoriom mọ ophọn eḅẹm bọ mọ “ ‘Nạ R’amị Kụ Kotọl Epẹ Paradais.’ ”
Psalm 61:8 ḅilhẹ r’inhọn asiikpịgh idiphọ ekpịgh phọ ephẹn phọ eḍeenhaan mọ mem iḍiodi phọ epẹ Izrạl aDevid akạr awạ oboom ghan aZihova tutụ odị amhugh. Kụ eḍeenhaan kẹn idị aDevid katue aḍighi ghisigh mem dị Enhaạn kaḅeton bọ nyodị angọ ghuḍum.