AHulda Ateẹny Ni Iyaạr Phọ Odị Awạ Bọ

EḌIGHI maạr dị nạ maghị ni ekpu ogbo phọ aSangir Besar epẹ Indonesia, siạ dị meten, pọ eeni nạ umhiịn ni iraạr abumaranhi ayira dị odi ghan siphẹ esiḍia phọ. Olegheriom bidị siphẹ ekpu ogbo phọ idiphọ abukaaphọm iiḅi iinhaghạn—dị rologhonhaạn ghan we ḍighaạgh onhaghanhạn aBaibul phọ. Etigheri iphẹn phọ, bidị oḅarạm ni onhọn oḍighi.

Eḅẹl phọ, bidị rosuma ghan siphẹ esiḍia phọ kụ otelhe yogh owaaghị ikpo asighiigh osọn osereghi epẹ ogbạl esiḍia phọ. Iniin asighiigh phọ ebụgh idiphọ abọl. Kụ ipẹ reten, bidị otọl ikasị kụ osighẹ hamạ ogurọgh oḅomoghi ikpo asighiigh phọ okpirikpirimhị. Kụ bidị osigheọgh ikpirikpirị ikpo phọ olọgh kuruma opạm oodạ opun anyụ okị epẹ bidị odi ghan bọ. Kụ bidị ologhoḍị ikpo asighiigh phọ igbogh arukuru kụ osaạny moto okị oboolha we dị roḍighi ghan eten.

Oniin onyọ umaranhi phọ ophọn phọ pọ aHulda. Adọl phọ odị imheera ni mọ odị alhọgh mem dị ebụgh epu ipẹ abueriphọ phọ. Odị asighẹ ghan ikpoki oḍighi phọ ophọn phọ aḍighinhom iiḅaghamhị eghunotu phọ odị. Toroboiperolbọ, nyiidiphọ odị rawạ kẹn osighẹ ikpoki phọ oḍighinhom enhon iyaạr. Odị rawạ ogho ogbogh afon pidị odị aḍighinhom aani ghan JW Library^® phọ. AHulda alegheri mọ asividio phọ ḅilhẹ r’ipheriphọ araraạr phọ edi bọ siphẹ aJW Library^® phọ kekạr kụ enighemhị rukumuan epẹ erugh phọ odị, eḅilhẹ ebughẹ onhaghạn aḍughụm aBaibul phọ odị.

AHulda aḅarạm ghan iyạl awạ siphẹ aḍio arukumuan phọ odị esi oniin unwanyụ r’egbem, ookoroghi r’ogurọgh okpirikpirimhị ikpo asighiigh phọ pidị odị amoọgh iboom aal. Eekunha phọ, odị amhoọgh ni ikpoki dị emhanhạm oghoom ogbogh afon phọ.

AHulda aḅẹm mọ, “ghalhamọ r’iduọn aloor amhị edugh ghan bọ ni ḅilhẹ ephin ghan bọ ni ogurọgh ikpo asighiigh phọ okpirikpirimhị, mị ukem ni bịn awulha oomo ipẹ aloor amhị edugh ghan bọ eḅilhẹ ephinhogh, mem mọ afon phọ amhiigh bọ olhoghonhaạn amhị ḍighaạgh oḍighi agey epẹ erugh phọ ḅilhẹ r’ookolhobian ituughạ.” Odị aḅilhẹ kẹn aḅẹm mọ ogbogh afon phọ alhoghonhaạn kẹn nyodị ḍighaạgh mem mọ ezẹgh phọ emhiigh bọ, kụ osighẹ ghan bọ zoom oḍighinhom oomo araraạr siphẹ ookpomhoghan phọ. Yira r’obo ni r’umaranhi phọ Hulda iduọn odị arue bọ ni ateẹny ḍiigbu phọ odị.