Nạ Alegheri Ni?

Asuọr imhạn maạr ika esi abuọ Izrạl iḍiodi phọ?

ASUỌR iḍighi ni ekpanhạ iyaạr siphẹ adọl aghuḍum awe Izrạl iḍiodi phọ. Ibadị ariisi, aBaibul phọ akaạph ni akol we dị roti iitia r’awe dị romoọr suọr. Ogbogh opol arinyạ aBaibul phọ eḍighi suọr, idị eḍiemhiom esi arinyạ phọ iphẹn phọ pọ aḍinyạ phọ aPsalms, Song of Solomon, r’aLamentations. Aḍiniin aḍinyạ dị eghaạph ilọ adọl aghuḍum awe amem mọ rogẹ bọ Baibul phọ ekaạph eegholhomhi mọ aweye Izrạl uḅarạm ghan ni suọr esi ibadị araraạr dị bidị oḍighi ghan.”

Idị oḍighinhom ghan suọr torobọ adiọ. Awe phọ Izrạl umhoọr ghan ni suọr oḍeenhaan idị bidị olhoghoma. (Isa. 30:29) Mem dị awe eghạm abidị omhoọgh okpạr opu, mem dị role rayaạl, r’amem dị rodaamhị oolhạ, anmariịr usighẹ ghan ni isaghạ otiom iitia, omhoọr suọr ibo, oḅilhẹ oghẹr ghan iḅạ. (Judg. 11:34; 1 Sam. 18:6, 7; 1 Ki. 1:39, 40) Awe Izrạl umhoọr ghan ni suọr otọ mem lọ oye amhugh. (2 Chron. 35:25) Dị iikia i/lo, “asuọr ikạr kụ eḅeraạn we phọ Izrạl,” ipẹ kụ idị McClintock r’aStrong’s Cyclopedia aghaạph.

Asuọr dị omhoọr ghan ogiga uw-emhạ phọ. Aruw-emhạ phọ Izrạl ughelhọm ghan agey suọr. Esi omaạm, Uw-emhạ phọ Saul arom ni mọ aDevid aru apheghenhaan ghan obobọ atianhaan ghan nyodị onẹ siphẹ ogiga phọ odị. (1 Sam. 16:18, 23) ADevid r’oḍighi bọ uw-emhạ, kụ amakạ raraạr omhoorọm ghan asuọr, agẹ imạ asuọr, kụ aaḅakị ghan kẹn bumoọr suọr phọ mem mọ olhọgh bọ otu iiḅereghị phọ aZihova. (2 Chron. 7:6; Amos 6:5) Uw-emhạ phọ Solomon amhoọgh ni bumoọr suọr, lhephiri r’anmariịr.—Eccl. 2:8.

Asuọr iiseeny. Idị emhạn maạr epelheghiom, abuọ Izrạl usighẹ ghan suọr ooseenyom aZihova. Okạr oghaạph, 4,000 awe kụ uti ghan suọr siphẹ otu iiḅereghị phọ arọl bọ epẹ Jeruselem. (1 Chron. 23:5) Bidị upheghom ghan ikpaalhaạm, renẹ, rokuodụ mem dị romoọr suọr. (2 Chron. 5:12) Ogina abuọ asuọr phọ osilor bọ bịn kụ u/moọr ghan suọr ooseeny ghan aZihova. Awe Izrạl dị rokị Jeruselem olhe eyaạl umhoọr ghan suọr phọ ipẹ edi bọ Ps. 120-134. Kụ odaphạn igẹ aJu phọ, awe Izrạl umhoọr ghan ni iniin asuọr dị edi ḍinyạ aPsalmsa mem dị role Eyaạl Ophẹl Otenhe phọ.

Asuọr emạn kẹn ni maạr esi arebenhẹ Enhaạn rodon. (Jems 5:13) Yira romoọr ghan suọr rodon oboom aZihova. (Efẹ. 5:19) Oḅophoghạn omhoọr riḅophoghị ghan iyira r’abumor r’abumaranhi phọ ayira. (Kọl. 3:16) Asuọr ringọ ghan iyira inyaạm okaran atorobọ aḍikparamhinheẹn. (Iiḍ. 16:25) Kụ eḍighi kẹn emạ eten oḍeenhaan omheeraam r’ephomhoghiạn phọ yira omhoọgh bọ oghị esi aZihova.