AZihova Ungọ Ni Iyoor Inyaạm Mem Eghạm R’amem Eephọ

Paul: Olhoghi ayoor aḅaạl agey! Unwanyụ aNovember 1985, yoor unyeenhe ni oḅẹl oḍighi amisonarị phọ ayoor—epẹ Liberia, West Africa. Uḅelu phọ ayoor asoor epẹ Senegal. Anne aḅẹm mọ, “esi oniin awạ bịn yoor kosi Liberia!” Yoor odi ni pạ bịn ogbeelhom uḅenhị iyoor mọ: “Oomo abuphẹ oḍiku bọ uḅelu phọ kakị bọ Liberia osoroghu. Abuniin awe moḅian ogboton agadạ itooghị phọ repogh bọ Liberia.” Esi aḍioph aḍughul otu, yoor urọl r’abunhọn amisonarị epẹ Senegal onhaghạn ghan iinhaghạn dị rozẹ ibadị awe ḅilhẹ r’itọ dị abuọ itooghị phọ molhọgh mọ awe ku/mite erugh ḍughul, kụ oye dị amite morạph.

Anne: Araraạr oḅio kaph-kaph iyoor ri/ḅeraạn ghan omhiịn. Okạr oghaạph, k’eghoroghọr ulhegheriom imhị idiphọ oye eepuph. Ghalhamọ kẹn r’oḅeẹny eten asimoto bịn mị rakiilhaan ghan ni! Toroboiperolbọ, yoor uwạ ni oghị aLiberia ghalhamọ r’iduọn iiḅaghamhị phọ edi bọ.

Paul: Ekpisi phọ ookonhom bọ Anne i/kelhạn r’ekpisi phọ uukonhom bọ imhị siphẹ England. Iyạl ayoor umhiigh okọy eten mem mọ yoor omhadạn bọ sekondrị skul. Odẹ r’onhiin amhị ḅilhẹ r’onhiin Anne ugbor ghan uromha iyoor okọy eten. Bidị ukạr kụ obakị eephuạ phọ yoor omhoọgh bọ oḍigh arukumuan oomo amem mọ. Mị r’omhạn 19 asiạ, bịn mị amhoọgh eepoogh oghị aani aBetẹl. Yoor r’aalhạn, lhạ phọ 1982 kụ Anne aru aani Betẹl.

Anne: ABetẹl uḅeraạn iyoor, kuolọ oomo amem yoor uwạ ghan okumuan ekpisi dị ewaạm mọ ebụgh. Yoor ukumuan ghan siphẹ Betẹl r’awe dị oḍighi ghan misonarị, kụ eḍeenhaan phọ abidị ikạr kụ ebughẹ ḍiḅeraạn phọ yoor omhoọgh bọ okumuan ekpisi dị ewaạm mọ ebụgh. Yoor ughol li ilọ iphẹn phọ ooḅereghị ghan torobọ aḍughul esi iraạr asiạ, kuolọ olhoghi ayoor aḅaạl li mem mọ umhạgh bọ iyoor lhạ phọ 1985 oghị aani omhunhenhiom 79 askul aGilead phọ! R’omhạn, bịn usighẹ iyoor oghị Liberia, West Africa.

EPHOMHOGHIẠN ABUMOR R’ABUMARANHI PHỌ IKPARAMHỊ NI IYOOR

Paul: Yoor uḍigh oḅẹl uḅelu phọ omheera bọ m’aghị Liberia. Ariḅio awe aLiberia rekaphagh ni, kụ kẹn k”omheera mọ awe omite erugh ḍughul. Oghiilhaan awe phọ abụgh ni iboom dị atayạ bịn kụ aruphaany bịn awe rosumughu. Oḍighi idị ilhoghi ayoor kepọ, yoor aạl ghan ḍinyạ aPsalms torobọ aḍughul. Etigheri dọl eelhe phọ, yoor uphomhoghiạn agey oḍighi phọ ayoor. Oḍighi Anne aḍighi omite ghan epẹ erugh phọ torobọ aḍio, olọ amhị aḍighi okumuan isiphẹ Betẹl. Kụ mị ukumuan ghan r’umor phọ John Charuk.a Mị utuughạ ni iboom araraạr ḍighaạgh odị, loor esi dị odị marọl Liberia abia kụ alegheri sidọl abumor r’abumaranhi phọ.

Anne: Eeghe kụ iḍighi kụ yoor onhuụn bọ ophomhoghiạn oḍighi phọ ayoor epẹ Liberia? Aloor esi abumor r’abumaranhi phọ. Bidị uḍeenhaan iyoor eboom ephomhoghiạn. Bidị oḍighi we dị okpẹ oḍuomolhoghi. Yoor ukạr kụ otuman bidị agey; kụ bidị oḍighi idiphọ emhoom eghunotu ayoor. Imạ oromha phọ abidị ikạr kụ ikparamhị iyoor. Omite ghan epẹ erugh phọ adụgh ghan agey. Nạ aghị otu phọ kụ anhuụn aḅuạ epin esi awe phọ! Ghalhamọ r’epẹ arobodo phọ bịn awe rokaạph ni raghaạph aBaibul. Kụ nạ katue ni bịn alọgh aani onhụ raghaạph phọ abidị. Yoor umhoọgh ni ibadị awe otughemhị ghan aBaibul, dị tutụ ikparanhaạn ghan ni iyoor otughemhị oomo abidị. Yoor ughelhọm agey oghaạph iiḅi iinhaghạn phọ ekpisi phọ ephẹn phọ!

YOOR UMHOỌGH NI INYAẠM ETIGHERI OGHIILHAAN PHỌ AYOOR

Paul: Esi inya asiạ, ariisi iphooghị ni enụm. Kuolọ lhạ phọ 1989 araraạr inmia ni bịn eghạm emhiigh. Awe phọ oḅian bọ ogboton agadạ itooghị phọ umhoọgh ni ekol unwanyụ aJuly 2, 1990, ekpisi dị etuman Betẹl. Esi iraạr unwanyụ, yoor u/tue ghan mun umạgh buọ enhọn eelhe ghalhamọ r’abuọ eghunotu ayoor r’emhụ agadạ phọ. Igbaragbarạ, okoọny, ḅilhẹ r’obiighi anmanyaạn bịn kụ imuza. Iiḅaghamhị phọ ighiọm ni ghisigh esi 14 asiạ, kụ ikạr kụ etir oomo eelhe phọ.

Anne: Iniin arughunhughun uzẹ ghan buọ inhọn arughunhughun. Awe eghạm umuza ni reten phọ, okạ ghan ruutu oḍigh omhiighi raraạr. Buniin abidị oghiigh oye aḍighi idiphọ “oghiigh akinhẹgh.” Kụ bidị ukpol ghan buphẹ bidị ozẹ bọ esi. Iniin ariisi phọ ikạr kụ etuman siphẹ olạ agadạ phọ. Uzẹ ni buniin Abugbaanhaạn, ḅilhẹ r’iyạl amisonarị.

Abuniin Abugbaanhaạn ulhọgh ghuḍum abidị esi ooto r’osooromineen aaghị abumor r’abumaranhi phọ abuphẹ odi bọ rughunhughun dị rowạ aani ozẹ. Amisonarị r’abudị odi Betẹl kẹn aaghị ni buniin. Siphẹ aBetẹl phọ, abuniin abumor r’abumaranhi ughiil li oḍigh aaghiạn aani. Abuniin urọl anyụ r’ayoor abuniin orọl ude. Eghunotu aḍioph awe r’ayoor kụ urọl ghan osoph.

Paul: Torobọ aḍio, awe eghạm mọ robian bọ buọ itooghị phọ ukparaghạ ghan oḍigh ophogh mughumọ yoor obooghị ni we. Yoor umhoọgh inya awe dị okori ghan esi phọ: iyạl awe urọl osoph kụ ophogh ghan, kụ iyạl orọl ghan siphẹ eḍighom aBetẹl phọ. Eḍighi maạr dị iyạl phọ abuphẹ odi bọ erugh osereghi raghaạgh abidị risigh pọ iiḅaghamhị i/lo. Kuolọ ogbạgh omhạn raghaạgh abidị pọ remạ ghan mọ abuọ eghạm mọ onyạ ni kụ rotu, esi iduọn phọ, buphẹ odi bọ ephẹn olhoghi phọ kụ ropogh, kokiil okị obooghị bumor r’abumaranhi phọ.

Anne: Ibadị asiwiki reten, abuniin abuọ igbagharạn phọ aarạn ni oḍigh olhoghi. Mị r’oniin onyọ umaranhi ughiil li oḍigh oghoony amuụm kụ aaghiạn loor akoboọd. Onyọ umaranhi phọ atiirạn aḍigh. Abuọ eghạm mọ osiịny anyụ r’igbogh asilaagbạ phọ abidị. R’ophin olhoghi bidị ogiphọgh ghan eghuugh phọ. Kụ aPaul aaḅereghiạn ghan aḅenhị bidị mọ, “anhịr amhị odi oghoony rabura ghan muụm.” Nạ aghị omhaạr oghughi akoboọd phọ pọ bidị konaghạn ni, kụ nạ aghị osereghi araraạr phọ keebinya kụ bidị kootughiạn mọ iyaạr remite ni, esi iduọn phọ oomo aloor amhị imhiigh ophiigha. R’ilọ oḍighi mị u/legheri. Mị akem aaḅereghị alhọm aZihova olhoghonhaạn amhị ḍighaạgh. Kụ mị aghị aghughuron eghuugh phọ aḅilhẹ aphoomhị loor amhạgh bidị. Oniin onyọ abidị ugutonhom imhị anyeenhe epẹ akoboọd phọ, aghughuron aḅiligha yogh epẹ olhoghi phọ aḅilhẹ agunyon raraạr phọ. Iphẹr ri nyodị bịn iduọn oye u/miịn bọ. Abuẹn r’odị oru bọ oḅilhẹ oḍigh inhọn iisoph. Kuolọ oye u/miịn kẹn ni.

IGEY PHỌ IGHỊ NI GHISIGH EMHỤ GHAN

Paul: Esi ibadị arunwanyụ, iyaạr olhe i/kạr ghan itọl. Kuolọ eḍien aruwaloor phọ kụ iphạm ghan iyoor. Iiseeny aḍiroọr phọ ophạm ghan bọ siphẹ aBetẹl phọ kụ iḍighi ghan “eḍien aḍiroọr” ayoor, kụ oomo ayoor usereghiạn ghan ni inyaạm mọ ingọ ghan bọ iyoor.

Mughumọ iḍighi ni edị eḍien olhe r’amuụm emhunheen siphẹ aBetẹl phọ obọ eeni yoor muḍuaghụ ni, bịn eeni miḍighi edị muzeeghị buẹn aaghiạn bọ siẹn aBetẹl phọ. Eeni amem, eten phọ ḅilhẹ r’amem mọ aZihova ratuụgh ghan bọ kamiteom raraạr kangọ we phọ odị reḍighi ghan ni iiḍaạny. AZihova ramaạr ghan ni kuphogh iyira kaḅilhẹ ulhoghonhaạn iyira ḍighaạgh ophoomhị aloor.

Idiphọ adọl eelhe phọ rebeeph bọ kelhoghorị, idiphọ kụ edị igey phọ rikparamhị ghan iyoor. Ibadị amem, abumor r’abumaranhi phọ utuạn ghan ni ophẹl aghuḍum mọ abidị osumughu. Kuolọ bidị uphạm ni omheeraam mọ r’eghuan phọ abidị okparamhị. Abuniin uḅẹm mọ ipẹ bidị orue bọ okaran eghạm mọ “iikolhobian ghan” bidị ilọ igbogh iiḅaghamhị phọ retu bọ.” R’akpọ oḅio, ikumor awe ookpomhoghan r’iḍoọgh abumor uḍighi ni oomo ipẹ bidị kotue bọ olhoghonhaạn abumor r’abumaranhi phọ ḍighaạgh. Abumor r’abumaranhi dị osumughu oghị enhọn ekpisi uḅophoghạn ni omhiigh oghaạph iiḅi iinhaghạn phọ rikpisi phọ bidị odi bọ. Bidị usighẹ ni raraạr dị bidị omhiịn epẹ aruukpuạ phọ olhoghọm Kindọm Họl kụ omhiigh ophạm ghan ituughạ. Siẹn iikiạ asimem mọ amuẹn phọ, oghị ghan ituughạ ḅilhẹ r’oghaạph ghan iiḅi iinhaghạn phọ ikparamhị ni iboom eḅilhẹ engọ ghan oḍuomolhoghi bumor r’abumaranhi phọ. Mem dị yoor rodiighi raraạr dị oruomaan bumor r’abumaranhi phọ, itir ri iyoor mem dị yoor omhiịn dị abumor phọ rolọm ghan mọ oruomaan ghụn bidị rukuru oghimọm ghan epẹ erugh phọ kparipẹ r’arusuomạ! Ibadị awe dị omhiịn raraạr aḍiigu phọ eghạm mọ mekọm bọ ḅilhẹ olhoghi phọ u/ḅaạl unhaghạn ni oghaạph iiḅi iinhaghạn phọ. Iḍigh ni diigu esi abidị iduọn abumor r’abumaranhi phọ omhoọgh bọ ni oḅaạl olhoghi etigheri iiḅaghamhị phọ edi bọ eelhe phọ; bidị uḍighi ḍiḅaạl dị esoor esi ufiri! (Mat. 5:14-16) Oophugh abumor r’abumaranhi phọ ikọm kẹn ni idị abuniin abugbagarạ abuọ eghạm mọ oḍighi bumor.

AZIHOVA UNGỌ NI IYOOR INYAẠM MEM MỌ YOOR ROḌUẠ BỌ LIBERIA

Paul: Ibadị amem, iwạ ghan ni dị yoor koḅuạ Liberia. Yoor uḍuạ ni iraạr amem kụolọ yoor u/bia ghan bịn oḅula. Yoor oḅilhẹ oḍuạ iyạl amem orọl ḍikpom alhạ kụ ogbi oḅula. Oniin onyọ amisonarị akạr kụ aghaạph ipẹ yoor olhoghoma bọ mem mọ oḅẹm bọ mọ yoor uḅuạ. Odị aḅẹm mọ: “Epẹ Gilead, utughemhị iyoor olhọgh oomo ekpom ayoor siphẹ oḍighi phọ ungọ bọ iyoor, kụ ipẹ kụ idị yoor oḍighi. Esi iduọn phọ, owilhẹ abumor phọ ayoor dọl phọ aḍiphẹ bidị osoman bọ, ingọ ni iyoor oboom okururu!” Kuolọ olhoghi ayoor aḅaạl agey olhegheri mọ yoor kotue ni otọl epẹ eelhe phọ yoọr rokị bọ ologhonhaạn ḍighaạgh bumor phọ odi bọ Liberia.

Anne: Unwanyụ aMay 1996, inya ayoor uḍigh ni oghuugh olạ agadạ phọ r’arinyạ dị ephamhanhạm iiḍighi phọ ayira epẹ Liberia. Obọ yoor rokị ekpisi dị ephoọm ephurukpu dị emhạn ni 10 itobi. Iduọn yoor ronyeenhe bọ bịn ozuoghom ekool phọ yoor odi bọ. Abuọ igbagharạn phọ orạph laagbạ abidị anyụ, bịn umheremhị iyoor. Bidị onyuughi iraạr ayoor omiteom siphẹ amoto phọ kuolọ aPaul arọl li siphẹ olhoghi phọ kụ oghiilhom moto phọ oḍuanhạm. Yoor umheerạ pạ phọ bịn, kụ yoor u/legheri ilọ oḍighi. Dị olhoghi yoor u/seere, bịn yoor omhiịn dị aPaul ratu oteẹny ayoor r’iḅaạl dị rekil siphẹ elhor phọ odị. Yoor u/kạr bọ ulegheri ipẹ emite bọ, yoor uutughiạn ghan mọ morạph nyodị. Kuolọ eḍighi maạr dị orạph nyodị, odị mu/telhe utu u/teẹny iyoor! Oniin onyọ abidị kụ agịph Paul mem mọ bidị ronyu bọ nyodị komiteom siphẹ amoto phọ. Enhighenhaạn bọ iḍighi eẹny ebạm esi bịn.

Amoto eghạm dị asaạny we dị rokiilhaan aani ipẹ emite bọ utuman ni iyoor. Kụ yoor oghị okpạph aani omhạn amoto phọ loor esi dị esi oḍigh epẹ olhoghi phọ i/lo. Okiilhom mọ aghiil iboom dị yoor owạ ni omhelheghu. Yoor uuḅereghiạn ni nyodị osophe, kuolọ o/mheera loor oghiilhaan ipẹ remite bọ. Yoor umalhạ ni osi, kuolọ asiloor ayoor iphinhogh ni eḅilhẹ edughogh loor oghiilhaan phọ.

Paul: Arusuomạ ayoor meḍigh eenịr eḅilhẹ epanyuạn. Kuolọ iḍighi ni iikia esi ayoor iduọn yoor odi bọ ni ropooghu. Yoor umhinhạ erugh dị etuman uḅelu dị mọ raḅạl. Kuolọ uḅelu phọ usaạny ni iyoor asiemhi Sierra Leone ḍieriphọ aḍio phọ. Olhoghi ayoor aḅaạl li iduọn yoor orọl bọ ni r’ighuḍum, kuolọ yoor uuḅaghamhiạn ni loor ilọ abumor r’abumaranhi phọ odi bọ Liberia.

AZIHOVA UNGỌ NI IYOOR INYAẠM OKARAN IPAANHAẠN DỊ YOOR U/SEERE OLHOGHI

Anne: Yoor usi ni r’eephọ epẹ aBetẹl phọ aFreetown, Sierra Leone. kụ abumor phọ umhaạr kẹn ni uphạm iyoor. Kuolọ mị umhiigh ni ootughiạn ghan ipẹ imitenhaan bọ iyoor epẹ Liberia. Ootaany aruugu rusiph ni imhị. Mị u/tue ghan uutughiạn iyaạr agey, kụ mị ulagharạn ghan riḍien amhị bịn. Kụ ḍughul mị akperenhom asumạ r’eboom elhomhan. Kụ mị rapiigha mudị ekarạph iyaạr rewạ omitenhaan amhị. Mị u/tue upooghu. APaul uḅol imhị kụ aaḅereghị r’amhị. Yoor omoọr suọr ituughạ tutụ aloor amhị esoroghu. Mị ulhoghoma mọ epul amhị i/sereghian mun ḅilhẹ mị ka/tue mun akumuan idiphọ onyọ amisonarị.

Mị ka/tue ni bịn abula ipẹ eḅilẹ bọ emite. Wiki phọ opọ phọ, ungọ ni iyoor iyạl amagazin. Oniin aḍighi Awake! aJune 8, 1996. Iphạm emhuoghaạph dị eḅẹm mọ “Coping With Panic Attacks.” Ipạ phọ kụ edị mị alhegheri ipẹ rimitenhaan bọ imhị. Odị atum pạ pọ aWatchtower aMay 15, 1996, dị aphamhạm emhuoghaạph dị eḅẹm mọ, “Where Do They Get Their Strength?” AWatchtower phọ opọ phọ amhoọgh afoto ophilhiḅa dị araphaam phọ eparanhụ. Emhuoghaạph phọ ighaạph mọ, idiphọ ophilhiḅa dị araphaam phọ meparanhụ rakị ghan bọ ni ghisigh kapheẹph aḅilhẹ awạ eḍien alhe etigheri ipẹ emitenhaan bọ nyodị, r’iikpọ uwaloor iigbia phọ aZihova yira kotue ni okị ghisigh ologhonhaạn ḍighaạgh bunhọn ghalhamọ yira usoman ni iiḅaghamhị dị itir iyira iboom. Iphẹn phọ eḍien dị ingọ imhị inyaạm dị aZihova asighẹ arumom mem dị ekpeanhaạn. (Mat. 24:45) Mị uwaaghị ni inhọn araraạr dị egbolhomaam emhuoghaạph phọ epẹ phọ, kụ aakpomhoghi loor aḍinyạ, kụ ikạr kụ ilhoghonhaạn imhị ḍighaạgh. Esighẹ rekị ghisigh bịn oomo ipẹ imitenhaan ghan bọ imhị i/mite ghan mun.

AZIHOVA UNGỌ NI IYOOR INYAẠM MEM DỊ ONME RUKUMUAN PHỌ AYOOR

Paul: Torobọ amem lọ yoor oḅula Liberia, olhoghi ayoor aḅaạl ghan agey. Tutụ 2004 ramuneen bọ, yoor morọl siẹn arukumuan phọ ayoor 20 asiạ. Eghạm mọ mesi eekunha. Iikolhobian ilọ oḅilhẹ olhoghoḍị inhọn aruutu siphẹ olạ agadạ phọ irọl li. Kuolọ, dị olhoghi yoor u/seere, unme ni ekpisi arukumuan phọ ayoor.

Yoor r’abumor r’abumaranhi phọ odi bọ Liberia ukạr kụ ophomhoghiạn, esi iduọn phọ, iḍighi ni ipaanhaạn owilhẹ abidị oḍuạ. Mem mọ yoor owilhẹ bọ rughunotu phọ ayoor oghị Gilead, yoor umhiịn ni ḍisẹph aZihova. Esi iduọn phọ, yoor u/kiilhaan ekpisi phọ oḅilhẹ bọ usighẹ iyoor rokị. Usighẹ iyoor oghị Ghana, i/kạr ikelạn Liberia.

Anne: Yoor umhoghi ni iboom mem mọ yoor roḍuạ bọ Liberia. Iḍighi ni iikia esi ayoor mem dị oniin oye dị asiạ meghị anyụ dị oghol mọ Frank, uḅenhị iyoor mọ: “Kii/tughiạn iyoor iboom!” Kụ aḅilhẹ aḅẹm mọ: “Yoor olegheri ni mọ nyinha iyoor ki/wula, kuolọ olhoghi anyinha arọl li epẹ emhoom ekpisi phọ nyinha rekị bọ. Iphẹn phọ iḍuạ ḍighaạgh aZihova kụ eru, esi iduọn phọ, imaạr ephogh bumor r’abumaranhi phọ epẹ phọ.” Iphẹn phọ ilhoghonhaạn iyoor ḍighaạgh okaran ipaanhaạn phọ retọl ghan bọ oghị enhọn ekpisi dị iyạl ikpo awe bịn olhegheri we phọ ḅilhẹ araraạr eḍighi imhoom bịn.

Paul: Toroboiperolbọ, i/bia bịn yoor osighẹ righirị bumor r’abumaranhi phọ epẹ Ghana. Abugbaanhaạn phọ obụgh ni epẹ phọ! Omheeraam r’adọl oḅạr phọ abidị itughemhị ni iyoor ibadị araraạr. Yoor ukumuan epẹ Ghana 13 asiạ. Kụ oḅilhẹ onme rukumuan phọ ayoor, kụ iḍighi ni iikia. Uḅenhị iyoor oghị okumuan epẹ olạ agadạ phọ aKenya, odi bọ pakirị Africa erumuḍio phọ reḍuạ ghan bọ kemite. Inyaam arighirị phọ ayoor isiph ni iyoor iboom, kuolọ yoor uḅilhẹ ni onhuụn oḍigh righirị bumor r’abumaranhi phọ epẹ Kenya. Oboom oḍighi odi ni ephẹn phọ kẹn ni.

OOTUGHIẠN ILỌ AGHUḌUM MỌ AYOOR

Anne: Araraạr oghiilhaan r’ookpereghaan mimitenhaan ni imhị siẹn aghuḍum mọ amhị. Araraạr ooto r’osooromineen r’igbagarạ asidọl ketue ni ekọm iiḅaghamhị engọ loor oye phọ eḅilhẹ eḅonyon ezu. AZihova ru/phẹl ghan iyira kasighẹ esi iphẹn phọ eten iiḍaạny. Mị anhaghạn eḍọgh ibạm r’igbogh asilaagbạ, bịn retu ozuughi ḅilhẹ iiḍir eḍigh raghaạgh amhị. Kuolọ mị matuughạ obeḍenhọm ghan olhoghonhaạn aḍighaạgh phọ aZihova rangọ ghan bọ okparamhị ayira, ḅilhẹ r’olhoghonhaạn aḍighaạgh abumor r’abumaranhi phọ ayira. Kụ mị mamhiịn mọ aZihova katue ni ulhoghonhaạn iyoor ḍighaạgh oghiọm aghisigh rukumuan phọ, lọ yoor otuughạ ghan Baibul phọ, ooḅereghị ghan, oghị ghan ituughạ, oḅilhẹ omite ghan epẹ erugh phọ.

Paul: Eeni amem awe rupuru ghan ni iyoor mọ, “Nyinha epomoghiạn ni rukumuan phọ anyinha ḍughụm?” Areelhe renighẹ ghan ni, kuolọ remoọgh ghan ni iiḅaghamhị r’ooto r’osooromineen. Kụ eeghe kụ edị yoor ophomhoghiạn opu eelhe phọ? Abuuḅi abumor r’abumaranhi phọ oḍighi bọ idiphọ eghunotu. Ghalhamọ r’iduọn yira oḍuạ bọ rikpisi kirokirọ kụ oru, yira omoọgh oniin olhoghi. Obọ urom iyoor oghị okparamhị abidị, kuolọ esi ogbạ agey, bidị ghụn kụ ukparamhị ghan iyoor.

Torobọ amem lọ yoor oghị enhọn ekpisi, yoor umhiịn ghan iniin phọ iiḍaạny phọ: eghunotu abumor r’abumaranhi phọ. Torobọ amem lọ yoor oghị onhọn ookpomhoghan, yoor omoọgh ni esi orọl oḅilhẹ kẹn oḍighi pakirị eghunotu phọ. Yoor okạr kụ okuphom owol mọ eḍighi maạr dị yira oghiọm ghisigh obeḍenhọm aZihova, pọ odị kungọ ni iyira inyaạm odaphạn dọl phọ ayira.—Fil. 4:13.