Araraạr Dị Kelhoghonhaạn Nyinhạ Ḍighaạgh Ogbor ghan Otuughạ
REKPARANHAẠN ghan ni nyinhạ ogbor ghan ophạm ituughạ ogina anạ? Kụ nạ rakelhọm ghan ni ḍughụm? Iphẹn phọ remitenhaan ghan ni torobọ oye eeni amem. Tuutughiạn inhọn araraạr dị yira rogbor ghan koḍighi, idiphọ owura amuụm. Remoghi ghan ni inyaạm orue owura amuụm, kuolọ tuutughiạn ipẹ owura amuụm riimhanhamhi ghan bọ iyira! Ituughạ aBaibul phọ riimhanhamhi ghan iyira idiphọ amem dị yira owura muụm. (Efe. 5:26) Ooḅeghiọn iniin araraạr dị ketue eloghonhaạn ḍighaạgh:
Moọgh edeọm. Ituughạ aBaibul ogina anạ eḍighi eniin iyaạr dị emhạn maạr agey dị i/wạ mọ nạ idiphọ onyọ aKristẹn kapogh agunhọm. (Fil. 1:10) Olhoghonhaạn anạ ḍighaạgh odaphạn ghan edeọm mọ anạ, pọ gẹ edeọm mọ anạ aseere esi dị ekpeḍien anạ kegbor ghan ekị. Obobọ seere ogbiọm amem anạ eten dị kakar ghan ootughianhạm anạ mem dị amem ituughạ phọ reteẹny
Dạph eten dị kelhoghonhaạn nyinhạ ḍighaạgh. Apụr amem kụ edị nạ rakelhọm ghan ituughạ phọ anạ? Amem dị nạ alhọgh muboom amem obobọ mem dị nạ atuughạ eekulha amem bịn ḍughụm? Nạ kụ ulhegheri dọl phọ anạ, esi iduọn phọ dẹ edeọm ituughạ phọ anạ eten dị edaphạn dọl phọ anạ. Eḍighi maạr dị meteẹny mem mọ nạ amaanhaạn bọ kụ egbogholeẹr i/meera, tuughạ ni ghalhamọ ḍioph ikalhạ bịn. Otuughạ ghan ghalhamọ eẹny ekulha amem enighẹ epu orọl bịn. Kụ eeni nạ amhiigh otuughạ, kephụ ni nyinhạ oghiọm aghisigh ituughạ phọ.—Fil. 2:13.
Sabạr iyaạr phọ nạ katuughạ bọ kụ egbi oteẹny. Eḍighi maạr dị nạ raatughiạn ghan ilọ iyaạr otuughạ mem dị nạ marọl ude, pọ nạ ‘rapeghom ghan ephegh moọny eepoogh dị nạ amhoọgh.’ (Efẹ. 5:16) Moọgh ḍikoọl arumhuoghaạph dị nạ rawạ otuughạ. Nạ amhoọgh iyaạr dị nạ u/kạr unaghanhạn pọ gẹ aḅarạm ḍikoọl araraạr phọ nạ rawạ bọ otuughạ phọ. Kụ tutụ nạ kakureri, kụ nạ amhoọgh inhọn araraạr otuughạ, pọ nạ atue ni agẹ aḅarạm ḍikoọl araraạr phọ na katuughạ bọ.
Kookolhobian ooḅenhion araraạr. Ḅeeḅenhion ghan ni raraạr siphẹ edeọm ituughạ phọ anạ. Esi omaạm, nạ atue ni aaḅenhion mem mọ ituughạ phọ kedoọny bọ esi obobọ rumhuoghaạph phọ nạ katuughạ bọ. Amem mọ, aḍidoọny ituughạ phọ, obobọ iyaạr phọ nạ ratuughạ bọ kụ ke/kpanhạ iyaạr phọ, kuolọ ekpanhạ iyaạr phọ pọ ogbor ghan otuughạ.
Ogbor ghan ophạm ituughạ ogina anạ, kengọ ni nyinhạ oboom asuọ. Keḍur nyinhạ etumeriom aZihova, nạ kazọ ghan r’osụ-olhoghi, kụ eḅilhẹ eemhanhamhi ghan nyinhạ.—Josh. 1:8