Odorọ yogh Ghan Araraạr Keḍighi Idị Nạ Ka/bula Raraạr Dị Nạ Atuughạ

Rekparanhaạn ghan ni ibadị ayira ootughiạn araraạr dị yira otuughạ. Kuolọ, rikparanhaạn ghan ni iyira owulha araraạr phọ ipẹ aZizọs atughemhị bọ loor esi dị odị aghaạph ghan amaanhiọm raraạr dị yira olhegheri. Yira rotue ghan ni kogbiom olhoghi oghaạph omaanhiọm mọ aZizọs aḍighinhom bọ, kụ ipẹ phọ reḍighi ghan idị yira ro/bulha ghan raraạr phọ odị atughemhị bọ. Eniin phọ eten phọ kẹn, eḍighi maạr dị nạ agbiom ghan olhoghi raraạr phọ nạ atuughạ bọ eten dị eghịgh mudị nạ ramiịn ni raraạr phọ, keḍighi idị nạ ka/bulha. Ika kụ edị nạ katue bọ aḍighi iduọn phọ? Esi odorọ ghan asifoto araraạr phọ nạ atuughạ bọ.

Awe dị rodorọ ghan sifoto imhoom araraạr dị bidị otuughạ ro/nuụn ghan kowulha raraạr phọ bidị otuughạ bọ. Bidị omiịn mọ odorọ ghan asifoto araraạr phọ bidị otuughạ bọ reloghonhaạn ghan bidị ḍighaạgh onhaghanhạn ikpo onhụ phọ r’ikpanhạ araraạr phọ bidị rotuughạ bọ. I/moghi dị oye kamoọgh ḍighalhanyạ odorọ ghan araraạr kụ agbi orue odorọ iyaạr dị odị atuughạ. Owaaghị omiịn mọ eten phọ ephẹn phọ reloghonhaạn ghan ḍighaạgh we dị asiạ meghị ootughiạn araraạr dị bidị otuughạ.

Enhọn amem dị nạ aphạm ituughạ oginha anạ, nạ atue ni adorọ sifoto araraạr phọ nạ atuughạ bọ. Nạ kamiịn ni mọ nạ kaatughiạn ghan ni ipẹ nạ atuughạ bọ!