‘ Ịmaar Ẹpham Ọḅoph Ọnhu Phọ Uwaloor Iigbia Phọ Rạngo Ghan Bọ’
OTELHEDOM mọ a Pọl aromha ni Krịstẹn phọ ọrol bọ Ẹfẹsọs mọ: “Ịmoogh ẹphomoghian, oniin ạminoghom ghan ịkaraph oniin! Ịkparami ḍịghaagh, ẹmaar ẹpham ọḅoph ọnhu phọ Uwaloor Iigbia phọ rạngo ghan bọ, loor ẹepho phọ ẹpe ịḅar bọ inyina ẹḅophoghi.”—Ẹfẹ. 4:2, 3.
“Ọḅoph ọnhu phọ,” ọbobo ạmuḅoph phọ yira rọkelhom ghan bọ aḍighi ịyaar dị “uwaloor iigbia phọ” kụ rạngo ghan. Tọrobo ịpe ẹrol bọ, ịdipho a Pọl ạghaaph bọ, ẹwa ni dị yira kọmaar ọpam ọḅoph ọnhu phọ ọphon phọ. Ạnhian kụ kaḍighi ghan bọ ịphen phọ? Tọrobo ọnyo umor ọbobo umaranhi ạmoogh oḍighi oomo ịpe ọdi katue bọ ọphamhanham ạmuḅoph phọ uwaloor iigbia phọ rạngo ghan bọ.
Ọghaaph ọmaanhiom, ọḅem mọ oye ạngo aani nyịnha omhoom a moto. Ạnhian kụ kạmaar ghan ạpam ạḅilhe aselemhi moto phọ? Ọpo phọ oḍighi ạna. Eḍighi mạar dị nạ ụ́maar ụpam kụ agboronhu, nạ kạ́kpalham oye phọ ạngo bọ nyịnha.
Iginha phọ kẹn, ạmuḅoph phọ yira rọkelhom bọ ịdipho abumor r’abumaranhi, aḍighi inmo dị Ẹnhaan kụ ẹngo. Tọrobo ọnyo ayira kụ ạmhoogh oḍighi ọmhaar ọpham inmo phọ ịphen phọ. Eḍighi mạar dị yira ụ́moogh igey asiya r’ọnyo umor ọbobo umaranhi, ẹwa mọ opuruan loor mọ, ‘Mị raḍighi ni oomo ịpe mị katue bọ ọbo ẹepho ẹtol ookpomhoghan phọ ḍụghum?’
‘ỊKPARAMI ḌỊGHAAGH, ẸMAAR ẸPHAM ỌḄOPH ỌNHU PHỌ’
Ịdipho ạ Pọl ạghaaph bọ, eeni amem kemoghi ni ikuph orue ọphamhanham ạmuḅoph phọ uwaloor iigbia phọ rạngo ghan bọ, ẹkar ẹkpaariom mem dị ọnyo umor ọbobo umaranhi aḍighi ịyaar dị repin esi ạna. Ọphamhanham ạmuḅoph phọ rẹma ghan mọ tọrobo amem dị ọnyo umor ọbobo umaranhi aḍighi ịyaar dị repin esi ạna, mọ nạ kạki ghan ạteeny nyọdi ọghaaphogh ghan ịiḅaghamhi phọ ḍụghum? Eeye. Puruan loor mọ, ‘Ọghi ọḅenhi oye phọ ịpe ọdi uḍighi bọ ịmhi kemiteom ni mụḅoph ọbobo kẹbughe ghụn ịiḅaghamhi phọ?’ Eeni amem keḍighi ghụn ọsu olhoghi ophogh ọgunhom ọbobo ọsar bịn ọwilhe.—Prov. 19:11; Mạk 11:25.
Puruan loor mọ, ‘Ọghi ọḅenhi oye phọ ịpe ọdi uḍighi bọ ịmhi kemiteom ni mụḅoph ọbobo kẹbughe ghụn ịiḅaghamhi phọ?’
Ịdipho otelhedom mọ Pọl ạge bọ “ịmoogh ẹphomoghian, oniin ạminoghom ghan ịkaraph oniin.” (Ẹfẹ. 4:2) Aḍiniin ạḍinya ẹḅem mọ kotue ni ọgba ikpo ọnhu phọ ịphen phọ mọ: “ọsighe ghan we ịdipho bịdi odi bọ.” Ịphen phọ rẹma ghan mọ ọotughian ghan mọ abumor r’abumaranhi phọ ayira úmunhughan, ịduon yira úmunhughan aani bọ. Ii, oomo phọ ayira rọkparagha ghan ni ọkpolhoghian “imoom igey ạroozo phọ.” (Ẹfẹ. 4:23, 24) Tọrobo ịpe ẹrol bọ, ọnyo ayira ólho dị mạzo ịmhoom ạroozo phọ eten dị emhunhughan. (Rom 3:23) Yira ọotughian ghan ịphen phọ, kidughanhaan ghan iyira ọmhinhoghom ghan ịkaraph dị abumor r’abumaranhi phọ ayira uḍighi iyira ḅịlhe r’ọsar ghan ọwilhenhaan ạbidi. Ịphen phọ keḍighi ịdi yira kotue ọpamhanham “ọḅoph ọnhu phọ uwaloor iigbia phọ” rạngọ ghan bọ.
Yira kọmoogh ni ẹepho phọ “ịḅar bọ [iyira] ẹḅophoghi” sịphe ookpomhoghan phọ eḍighi mạar dị yira ọsar ghan ọwilhenhaan bumor r’abumaranhi phọ ayira. Ekpo ọnhu a Grik phọ ọgba bọ mọ “ịḅar bọ inyina ẹḅophoghi” edi bọ ḍịnya ạ Bụo Ẹfẹsọs 4:3 okol mọ “ịphuuny” sịphe ḍịnya ạ Bụo ạ Kọlọsị 2:19. Ịphuuny phọ edi bọ loor ayira rẹloghonhaan ghan ḍịghaagh otulhughi ịikpighonhu r’ịḅarara phọ ayira. Eniiin phọ eten phọ kẹn, ẹepho phọ r’ẹphomhoghian phọ yira ọmhoogh bọ esi abumor r’abumaranhi phọ ayira keḍighi ịdi yira kọkiom ghisigh ọpamhanham siya ạrighiri phọ ayira r’ạbidi, etigheri tọrobo ịyaar dị bịdi uḍighi iyira.
Esi ịduon phọ, eḍighi mạar dị ọnyo umor ọbobo umaranhi aḍighi ọbobo ạghaaph ịyaar dị repin esi ayira, ọzoom ghan bịdi r’igbiririph kpạripe r’ọḍagha ghan ạbidi. (Kọl. 3:12) Eḍighi bọ ẹdi oomo phọ ayira úmunhughan bọ, eeni nạ maḍighi aani ghan ni ịyaar dị ephin esi oye. Ọotughian ghan ịphen phọ, kẹlhoghonhaan nyịnha ḍịghaagh oḍighi ịpe nạ katue bọ orue ọphamhanham “ọḅoph ọnhu phọ uwaloor iigbia phọ rạngo ghan bọ.”