Sa Jéhova Ha Fè Pou Sové Lézòm Hòd Péché Èk Lanmò

1-2. (a) Kisa mo pawòl-la péché vlé di, èk ki mannyè nou sa goumen kont péché èk éwisi? (Gadé osi “Sa Mo Pawòl Sala Vlé Di”.) (b) Kisa nou kay diskité an atik sala? (c) Kisa nou kay diskité an sé lézòt atik-la an Gad sala? (Gadé osi sèksyon-an “An Ti Enfòmasyon Pou Ou” an Gad sala.)

ÈS OU vwéman konnèt ki otan enmen Jéhova enmen’w? Ében an bon mannyè pou’w sav ki otan enmen Jéhova enmen’w, sé pou apwann sa i ha fè pou sové’w hòd péché èk lanmò. Vwéman péchéa sé an mové lèlmi, èk nou pyès pa sa bat li pa kò nou. Anfen nou tout sé péchè, nou ka péché toulé jou, èk a kòz di péché nou ka mò. (Ronm 5:12) Kanmenm la ni bon nouvèl, paski épi èd Jéhova nou sa ganyen a bout péché. Wi, Jéhova ka ban nou asiwans-lan ki, i kay sové nou hòd péché èk lanmò!

² Pou plis pasé sis mil (6,000) lanné Jéhova ka édé moun ni an bon wilasyon épi’y, magwé yo ka péché. Mé pouki Jéhova ka fè sa? Sé paski Jéhova enmen nou. Anfen Jéhova enmen nou si tèlman, i ha fè an chay bagay pou édé nou lè nou péché. Jéhova sav péché ka mennen lanmò, mé i pa vlé nou mò, i vlé nou viv pou tout tan. (Ronm 6:23) Wi, sé sa Jéhova vlé ba ou. Alò, an atik sala, nou kay diskité sé twa kwèsyon sala: (1) Ki èspwa Jéhova bay lézòm? (2) Kisa moun an tan Bib-la té fè pou yo té sa plè Jéhova? Èk (3) kisa Jézi fè pou sové nou hòd péché èk lanmò?

KI ÈSPWA JÉHOVA BAY MOUN KI ÉWITYÉ PÉCHÉ?

3. Pou ki wézon Adanm èk Èv péché?

³ Lè Bondyé fè Adanm èk Èv, i ba yo an bèl plas pou viv. I mayé yo, èk i ba yo bèl twavay pou fè. Pou ègzanp yo té ni pou pléplé latè-a épi ich yo. Èk yo té ni pou fè tout latè-a vini an Pawadi menm kon jaden Édenn. La té ni yon bagay tousèl Jéhova pa té vlé yo fè. Èk i vèti yo si yo dézobéyi’y, yo té kay mò. Mé kisa ki fèt? Ében, an mové nanj ki pa té enmen ni lézòm ni Bondyé, tanté Adanm èk Èv pou dézobéyi Bondyé. Èk Adanm èk Èv swiv Satan, nanj mové sala. Yo pa té konfyé Papa yo ki té moutwé ki otan enmen i enmen yo. Pito yo obéyi’y, yo péché. Kanmenm, sa Jéhova té di fèt vwé. Adanm èk Èv soufè pou lèwèstan lavi yo pou lapéti dézobéyisans yo. Wi yo vin vyé, èk finalman yo mò.​—Jen. 1:28, 29; 2:8, 9, 16-18; 3:1-6, 17-19, 24; 5:5.

4. Pouki Jéhova hayi péché èk ka édé nou pou vansé pwé’y? (Ronm 8:20, 21)

⁴ Bon. Jéhova mété wakont sala an Bib-la pou édé nou konpwann an bagay ki byen enpòtan. Jéhova hayi péché, èk sa sé paski péché ka donmajé wilasyon nou épi’y, èk ka mennen lanmò. (Izay. 59:2) Kanmenm, Satan hayi ni Jéhova ni lézòm. Èk sa sé wézon-an i ankouwajé Adanm èk Èv pou péché menm kon i ka fè épi nou jòdi jou. Bon, lè Adanm èk Èv péché, Satan pitèt té katjilé i té anpéché divwa Bondyé fèt. Mé i pa té konpwann ki otan enmen Bondyé enmen nou. Wi, paski Jéhova ni tèlman lanmityé pou lézòm, i pa té chanjé divwa’y pou désandan Adanm èk Èv. Anfen la menm, i ba tout désandan Adanm èk Èv èspwa. (Li Ronm 8:20, 21.) Wi, Jéhova té sav la té kay ni moun ki té kay chwazi pou enmen’y èk obéyi’y. Alò, Jéhova fè’y posib pou sé moun sala vansé pwé’y, èk twapé délivwans hòd péché èk lanmò. Mé, ki mannyè Jéhova té kay fè sa?

5. Ki lè Jéhova té bay lézòm èspwa? Èspliké. (Jennésis 3:15)

⁵ Li Jennésis 3:15. Apwé Adanm èk Èv péché, Jéhova bay lézòm èspwa lè i di i té kay détwi Satan. Bondyé osi di, la té kay ni an ‘désandan’ ki té kay sové lézòm. Èk désandan sala té kay détwi Satan, èk wanjé tout sé pwòblenm-lan i annékòz an jaden Édenn. (1 Jan 3:8) Mé avan sa fèt, Satan té kay ‘blésé’ désandan sala an talon’y, sa vlé di i té kay tjwé’y. Bon, sa té kay blésé tjè Jéhova an chay. Mé Jéhova té pawé pou soufè, èk pou kité ‘désandan-an’ soufè pou sové lézòm hòd péché èk lanmò!

SA LÉZÒM AN TAN BIB-LA TÉ FÈ POU PLÈ JÉHOVA

6. Kisa Ébèl, Nowa, èk lézòt moun ki té fidèl té fè pou vansé pwé Jéhova?

⁶ Apwé Adanm èk Èv péché, an mizi an mizi Jéhova moutwé mannyè lézòm sa vansé pwé’y. Pwèmyé moun-lan ki mété lafwa an Jéhova apwé Adanm èk Èv péché sété Ébèl, dézyenm gason Adanm èk Èv. Ébèl té enmen Jéhova, èk i té vlé plè’y èk vansé pwé’y. Alò, i ofè Jéhova an sakwifis. Èk paski i sété an bèwjé, sakwifis-la i ofè Jéhova, sété déotwa an sé ti mouton’y-lan. Konsa, ès Jéhova té plè épi sakwifis sala? Ében Jennésis 4:4 ka di nou: ‘Jéhova aksèpté Ébèl épi sakwifis li.’ Jéhova té osi plè épi sakwifis lézòt moun ki té enmen’y èk ki té ka konfyé’y, tèl kon Nowa. (Jen. 8:20, 21) Èk lè Jéhova aksèpté sé sakwifis sala, i té ka moutwé lézòm té sa plè’y èk yo té sa vansé pwé’y.b

7. Abrahanm té pawé pou ofè gason’y kon an sakwifis, kisa nou apwann an ègzanp li?

⁷ Abrahanm sété an nonm ki té ni an chay lafwa an Jéhova. Yon jou Jéhova mandé’y pou fè an bagay ki té byen difisil. I mandé Abrahanm pou ofè gason’y Ayzak kon an sakwifis. Bon. Sa pa té an bagay ki té ézé pou Abrahanm fè. Mé i té pawé pou obéyi Jéhova. Mé kanmenm, kon Abrahanm lévé kouto-a pou tjwé gason’y, Jéhova doubout li. Mé, ègzanp Abrahanm ka moutwé nou sa Jéhova té kay fè an tan pou vini. Wi, Jéhova té pawé pou ofè Gason’y menm, kon an sakwifis pou’y sa sové lézòm. Vwéman, sa ka moutwé ki otan enmen Jéhova enmen lézòm.​—Jen. 22:1-18.

8. Kisa sé sakwifis-la sé jan Izwayèl-la té ka ofè té ka moutwé? (Livitikòs 4:27-29; 17:11)

⁸ Lè Jéhova té bay jan Izwayèl Lwa-a, i di yo té ni pou ofè sakwifis pou twapé pawdonnasyon pou péché yo. (Li Livitikòs 4:27-29; 17:11.) Wi sé sakwifis sala té ka moutwé Jéhova té kay potjiwé an pli mèyè sakwifis pou sové lézòm hòd péché. Osi, Bondyé té di sé pwofèt li-a, pou ékwi konsèné désandan sala i té pwonmèt pou voyé-a. Èk yo di, an Gason Bondyé ki byen spésyal, té kay soufè èk mò. Yo té kay tjwé’y menm kon yon mouton yo ofè kon an sakwifis. (Izay. 53:1-12) Wi, Jéhova té kay ofè Gason’y-lan i ka chéwi-a si tèlman kon an sakwifis pou sové lézòm. Wi, pou sové’w hòd péché èk lanmò!

KISA JÉZI FÈ POU SOVÉ LÉZÒM HÒD PÉCHÉ?

9. Kisa Jan Batis té di konsèné Jézi? (Hibrou 9:22; 10:1-4, 12)

⁹ An lanné ventnèf (29) an lépòk nou, lè Jan Batis wè Jézi i di: “Mi Ti Mouton Bondyé-a. Sé li Bondyé voyé pou tiwé péché an latè-a!” (Jan 1:29) Sa Jan Batis di moutwé Jézi sété désandan spésyal-la Bondyé té pwonmèt pou voyé. Èk Jézi té kay bay lavi’y kon an sakwifis. Wi, alafen, désandan Jéhova té wivé pou sové lézòm konplètman hòd péché.​—Li Hibrou 9:22; 10:1-4, 12.

10. Ki mannyè Jézi moutwé i “vini an latè-a . . . pou sé péchè-a”?

¹⁰ Lè Jézi té asou latè-a, i fiksé pli asou mannyè i sa édé moun ki té santi yo pa té vo anyen paski yo sété péchè. Konsa, i envité yo pou vini disip li. Jézi té sav sé péché ki té ka annékòz moun pou soufè. Alò, i fè an chay éfò pou édé nonm èk fanm ki té ka soufè pou lapéti sé péché-a yo té fè-a. Anfen, Jézi sèvi an bèl pawabòl, i di: “Moun ki an santé pa bizwen dòktè, mé moun ki malad bizwen an dòktè.” I osi di: “Mwen pa vini an latè-a pou moun ki dwèt, mé pou sé péchè-a.” (Maf. 9:12, 13) Èk sé sa Jézi té fè pou vwé. Pou ègzanp, lè an madanm té ka pléwé èk i mouyé pyé Jézi épi dlo zyé’y, Jézi palé dous ba li èk i pawdonnen péché madanm-lan. (Louk 7:37-50) Épi Jézi patajé bon nouvèl-la épi madanm Sanmariya-a, magwé Jézi té konnèt madanm-lan té ka wèsté épi an nonm i pa té mayé épi. (Jan 4:7, 17-19, 25, 26) An plis di sa, Bondyé sèvi Jézi pou édé moun adan an lòt bèl mannyè. Anfen, Bondyé sav sé péché ki ka annékòz moun pou mò, alò i bay Jézi pouvwa-a pou wésisité moun. Wi, Jézi wésisité nonm, fanm, èk jis zanfan.​—Maf. 11:5.

11. Pouki péchè té enmen Jézi?

¹¹ Bon, nou sa kopwann pouki moun ki té ka fè bagay ki pa té bon té enmen Jézi. Pou ègzanp, Jézi té ka kopwann mannyè yo ka santi èk i té janti épi yo. Konsa yo pa té pè pou palé épi Jézi. (Louk 15:1, 2) Èk Jézi aplodi yo èk i benni yo lè yo moutwé lafwa an li. (Louk 19:1-10) Osi, Jézi ankouwajé péchè pou chanjé lavi yo èk pou swiv li. (Louk 5:27, 28.) Wi, Jézi moutwé mizéwikòd menm kon Papa’y. (Jan 14:9) Anfen, tout sa Jézi té di èk fè ka moutwé nou, Papa’y sé an Dyé ki plen mizéwikòd, ki enmen péchè, èk ki vlé édé yo.

12. Kisa Jézi té di konsèné lanmò’y?

¹² Jézi té sav i té kay bay lavi’y kon an sakwifis. Wi, plizyè fwa i di sé disip li-a moun té kay twayi’y èk yo té kay tjwé’y. (Maf. 17:22; 20:18, 19) Mé Jézi té sav sakwifis li té kay tiwé péché an latè-a menm kon Jan Batis èk sé lézòt pwofèt-la té di. Jézi té osi di apwé i mò i té “kay mennen tout moun vini jwenn” li. (Jan 12:32) Alò moun ki mété lafwa an Jézi èk éséyé swiv ègzanp li té sa plè Jéhova. Èk si yo té fè sa, Bondyé té kay “libéwé [yo] anba péché”. (Ronm 6:14, 18, 22; Jan 8:32) Konsa Jézi moutwé kouwaj, èk i té pawé pou soufè èk mò pou sové nou.​—Jan 10:17, 18.

13. Ki mannyè Jézi mò, èk kisa lanmò’y ka enstwi nou konsèné Jéhova? (Gadé pòtwé-a osi.)

¹³ Yon bon jan Jézi twayi’y, èk apwé sa sé lèlmi’y-la awété’y. Yo ensilté’y, yo manti asou’y, èk pli ta yo kondanné Jézi pou lanmò, èk yo fè’y an chay kwiyoté. Finalman, sé sòlda-a klouwé Jézi asou an poto pou’y sa mò. Wi, Jézi tjébé fò anba tout penn èk soufwans sala. Mé kanmenm, Jéhova té soufè jis plis pasé Jézi kon’y té ka gadé Gason’y soufè. Bon, Jéhova enmen Gason’y an chay èk i té ni pouvwa-a èk abilité-a pou doubout soufwans-lan. Alò, pou ki wézon i pa té fè sa? Ében wézon-an sé sa: Sé paski Jéhova enmen nou. Anfen, Jézi té di: “Bondyé té tèlman enmen sé jan latè-a, i bay sèl Gasonʼy-lan pou yo. Tout moun ki kwè an li pa kay pèd lavi yo, mé yo kay ni lavi étonnèl.”​—Jan 3:16

14. Ki asiwans sakwifis Jézi ka ba’w?

¹⁴ Sakwifis Jézi sé pli gwo pwèv-la ki ka moutwé ki, Jéhova enmen désandan Adanm èk Èv. Wi, sakwifis Jézi ka ba’w asiwans-lan ki, Jéhova enmen’w an chay. Chonjé, Jéhova èspéyansé an chay penn lè’y ofè Gason’y kon an sakwifis pou sové’w hòd péché èk lanmò. (1 Jan 4:9, 10) Wi, Jéhova vlé édé chak di nou pou sèvi’y magwé nou sé péchè. Èk i kay tiwé péché konplètman an tan pou vini!

15. Kisa nou ni pou fè pou twapé bennéfis hòd sakwifis Jézi?

¹⁵ Bondyé ban nou an bèl kado: Sakwifis sèl Gason’y-lan Jézi. Wi, sakwifis sala ka fè’y posib pou twapé pawdonnasyon pou péché nou. Kanmenm, pou twapé bennéfis hòd sakwifis sala, kisa nou ni pou fè? Ében ni Jan Batis ni Jézi Kwi ban nou wépons-lan. Yo toulé dé di: “Tounen hòd péché zòt, paski Bondyé ka vini touswit pou kondwi sé moun li-an.” (Maf. 3:1, 2; 4:17) Alò, si nou vlé vansé pwé Jéhova èk twapé pawdonnasyon pou péché nou, nou ni pou wépanti. Mé kisa i vlé di pou wépanti? Èk lè nou wépanti, ki mannyè sa ka édé nou pou plè Jéhova menm si nou sé péchè? Ében, sé sa nou kay diskité an lòt atik-la.