Kisa Ki Wézèwèksyon-an?
Wépons Bib-la Ka Bay
An Bib-la, mo pawòl-la yo twadwi pou “wézèwèksyon” sé anastasis. Sa sé an mo pawòl an langaj Gwik ki vlé di, “lévé” èben “doubout ankò.” Alò, lè on moun wésisité, sé akwèdi i lévé sòti an lanmò. Sa vlé di, i viwé vivan kon moun-lan i té yé avan i mò.—1 Kòrint 15:12, 13.
Magwé sèksyon Bib-la ki té ékwi an langaj Hibrou, èben sa yo ka kwiyé Vyé Tèstèman-an, pa ni mo pawòl-la “wézèwèksyon,” sa pa vlé di, sèksyon sala an Bib-la pa ka palé konsèné wézèwèksyon-an. Pou ègzanp, mi on bèl pwonmèt Jéhova té sèvi pwofèt Hozéya pou bay pèp li. Jéhova di: “Mwen kay libéwé yo anba pouvwa tonbo-a, mwen kay délivwé yo hòd lanmò.”—Hozéya 13:14; Jòb 14:13-15; Izaya 26:19; Dannyèl 12:2, 13.
Ki koté moun ki wésisité kay viv? Adan sé moun-lan ki wésisité-a kay viv an syèl, èk yo kay kondwi kon wa épi Jézi. (2 Kòrint 5:1; Wévélasyon 5:9, 10) Bib-la ka kwiyé wézèwèksyon sala, “pwèmyé wézèwèksyon-an.” Sa vlé di, la kay ni on lòt, ében on dézyenm wézèwèksyon ki kay fèt. (Wévélasyon 20:6) Majòwité an sé moun-lan ki kay wésisité-a, kay wésisité an dézyenm wézèwèksyon-an, èk yo kay viv asou latè-a.—Sam 37:29.
Ki mannyè moun kay wésisité? Bondyé bay Jézi pouvwa-a pou wésisité lé mò. (Jan 11:25) Èk Jézi kay sèvi pouvwa sala pou fè “tout moun” ki an tou yo, viwé vivan épi menm pèsonnalité-a, èk menm menmwa-a yo té ni. Anfen, lè yo wésisité, yo kay menm moun-lan yo té yé avan yo mò. (Jan 5:28, 29) Moun ki wésisité pou viv an syèl kay wésisité épi an kò lèspwi, èvèk moun ki wésisité pou viv asou latè, kay wésisité épi an kò lachè ki fò, èk ki an bon santé.—Izaya 33:24; 35:5, 6; 1 Kòrint 15:42-44, 50.
Ki moun ki kay wésisité? Bib-la di, ‘ni moun ki bon, ni moun ki mové,’ kay wésisité. (Twav. 24:15) Sé bon moun-lan ki kay wésisité-a sé moun ki té fidèl. Moun tèl kon, Nowa, Sarah èk Abrahanm. (Jennésis 6:9; Hibrou 11:11; Jémz 2:21) Èk sé mové moun-lan ki kay wésisité-a, sé moun ki té dézobéyi Bondyé èk yo té fè sa ki pa bon. Mé yo pa té fè sé mové bagay sala paski yo té méchan. Yo té ka fè sa ki pa bon paski yo pa té ni òpòtyounité-a pou apwann konsèné Bondyé. Konsa yo pa té konnèt pli mèyè.
Bon, la ni moun ki tèlman méchan, yo pa vlé chanjé. Sé moun sala pa kay wésisité. Lè yo mò, yo détwi konplètman. La pa ni pyès èspwa pou yo viwé vivan ankò.—Mafyou 23:33; Hibrou 10:26, 27.
Ki lè wézèwèksyon-an kay fèt? Bib-la ka moutwé, pwèmyé wézèwèksyon-an, ében wézèwèksyon-an pou moun ki ka alé an syèl, té kay koumansé lè Jézi déviwé. Sa vlé di diwan tan-an Jézi ka kondwi kon Wa. Tan sala koumansé an lanné mil nèf san katòz (1914). (1 Kòrint 15:21-23) Èvèk wézèwèksyon-an pou moun ki kay viv asou latè-a, kay fèt diwan mil lanné-a lè Jézi ka kondwi kon Wa. Diwan tan sala, latè-a kay vini on pawadi.—Louk 23:43; Wévélasyon 20:6, 12, 13.
Pouki i wézonnab pou kwè an wézèwèksyon-an? Bib-la ka di nou konsèné nèf (9) wézèwèksyon ki té fèt. Èk chak fwa, la té ni moun ki té wè sé wézèwèksyon sala fèt. (1 Wa 17:17-24; 2 Wa 4:32-37; 13:20, 21; Louk 7:11-17; 8:40-56; Jan 11:38-44; Twav. 9:36-42; Twav. 20:7-12; 1 Kòrint 15:3-6) Yonn an sé wézèwèksyon-an Bib-la ka mansyonnen, sé wézèwèksyon Lazaròs. Wézèwèksyon sala té byen entéwésan paski, Lazaròs té ja mò pou kat (4) jou, lè Jézi wésisité’y douvan on latilyé moun. (Jan 11:39, 42) Pa menm sé lèlmi Jézi-a ki té sa di, miwak sala pa té fèt. Anfen, lè yo vini konnèt Jézi wésisité Lazaròs, yo té tèlman kontwayé, yo fè konplo pou tjwé, ni Jézi, ni Lazaròs.—Jan 11:47, 53; 12:9-11.
Bib-la ka moutwé, Bondyé pa sèlman ni abilité-a pou wésisité lé mò. Mé, i osi ni dézi-a pou fè sa. Wi, Bondyé vwéman vlé wésisité lé mò. Osi, Jéhova sé Dyé Toupisan-an èvèk menmwa’y pa ni pyès limit. Konsa, i ka chonjé tout ti détay konsèné chak sé moun-lan i kay sèvi pouvwa’y pou wésisité-a. (Jòb 37:23; Mafyou 10:30; Louk 20:37, 38) Wi, Bondyé sa wésisité lé mò, èk i vwéman vlé fè sa! Bib-la ka dékwi santiman Bondyé lè’y vini pou wézèwèksyon-an. I di: ‘Pa dé anvi [Bondyé] anvi pou wè twavay lanmen’y.’—Jòb 14:15.
Sa moun ka di konsèné wézèwèksyon-an
Sa moun ka di: Wézèwèksyon-an sé lè lam-lan viwé jwenn kò-a.
Lavéwité-a: Bib-la ka moutwé, lam-lan sé moun-lan menm. Lam-lan sé pa on bagay andidan moun-lan ki ka kontiné viv apwé moun-lan mò. (Jennésis 2:7; Izikèl 18:4) Konsa, lè on moun wésisité, sé pa lam li ki ka viwé jwenn kò’y. Sa ki ka fèt sé sa, moun-lan menm ka viwé vivan.
Sa moun ka di: La ni moun ki kay wésisité èk touswit apwé sa, yo kay détwi.
Lavéwité-a: Bib-la di, moun ki “fè mové” kay wésisité, èk “yo kay jwenn [an jijman] kondannasyon.” (Jan 5:29) Mé, jijman sala pa kay bazé asou sa moun-lan té fè avan i mò. Jijman-an kay bazé asou sa i fè apwé i wésisité. Jézi té di: “Sé moun-an ki mò-a kay tann vwa Gason Bondyé, èk sé moun-an ki tann-an èk obéyi sa i di-a kay viv.” (Jan 5:25) Alò, si sé moun-lan ki wésisité-a obéyi sé bagay-la yo apwann apwé yo wésisité, Bondyé kay ékwi non yo an “liv-la ki ni non sé moun-an ki ni lavi étonnèl-la.”—Wévélasyon 20:12, 13.
Sa moun ka di: Lè on moun wésisité, i kay ni menm kò-a i té ni avan i mò.
Lavéwité-a: Apwé on moun mò, kò’y ka pouwi èk i ka tounen lapousyè. Konsa, kò sala pa ka ègzisté ankò.—Ékléziyastis 3:19, 20.