Pouki Témwen Jéhova Pa Ka Pwan Pa An Sèten Sélébwasyon?

• Ki mannyè Témwen Jéhova ka désidé si yo kay pwan pa an sèten sélébwasyon opa?

• Ès Témwen Jéhova enmen fanmi yo menm si yo pa ka pwan pa an sèten sélébwasyon épi yo?

• Ès Témwen Jéhova ka di moun pou pa pwan pa an sèten sélébwasyon?

Ki mannyè Témwen Jéhova ka désidé si yo kay pwan pa an sèten sélébwasyon opa?

Avan Témwen Jéhova désidé si yo kay pwan pa an sèten sélébwasyon opa, yo ka gadé pou wè sa Bib-la ka di. Èk wézon-an pou sa sé paski, la ni sèten sélébwasyon ki ka alé kont pwensip Labib. Konsa, Témwen Jéhova pa ka pwan pa an sé sélébwasyon sala. Mé lè i vini pou lòt sélébwasyon, chak Témwen Jéhova ni pou désidé pou kò’y menm si i ka pwan pa an sélébwasyon-an opa. Èk yo ka fè éfò pou ni on bon konsyans “douvan Bondyé épi douvan lézòm.”—Twavay 24:16.

Mi détwa kwèsyon Témwen Jéhova ka mandé kò yo lè yo ka désidé si yo ka pwan pa adan on sèten sélébwasyon opa.a

• Ès sélébwasyon-an bazé asou bagay Bib-la ka kondanné?

  Pwensip Bib: “Bondyé Senyè di, “Sòti anpami sé moun-an ki pa ka kwè-a épi sépawé kò zòt hòd yo. Pa touché sé bagay yo-a péché ja sali-a, épi mwen kay aksèpté zòt ankò.’”—2 Kòrint 6:15-17.

  Témwen Jéhova vwéman vlé sépawé kò yo hòd bagay Bib-la ka kondanné. Konsa, yo pa ka pwan pa an népòt sélébwasyon ki ni pou fè épi sé bagay sala:

  Sélébwasyon ki bazé asou adowasyon lòt dyé. An Mafyou 4:10, Jézi di: “Sé Bondyé Senyè-a an moun ni pou adowé épi sé li yonn ou ni pou sèvi.” Témwen Jéhova ka obéyi koumand sala. Konsa, yo pa ka sélébwé èben pwan pa an Nwèl, Pak, èben May Day, paski sé sélébwasyon sala bazé asou adowasyon lòt dyé pito Jéhova. An plis di sa, yo pa ka pwan pa an sé sélébwasyon sala non plis:

  • Kwanzaa. Liv-la Encyclopedia of Black Studies di, non sala “sòti an mo pawòl-la an Swahili ki ka di matunda ya kwanza, ki vlé di ‘pwèmyé fwi’. Konsa, sa ka moutwé sélébwasyon sala bazé asou sé fèt wékòt-la yo té ka sélébwé an Afwik an tan lontan.” Magwé adan moun ka di Kwanzaa pa ni anyen pou fè épi wilizyon, liv-la, Encyclopedia of African Religion ka konpawé’y épi sèten fèt an Afwik. An sé fèt sala, “moun té ka ofè pwèmyé fwi pou wimèsyé sé Dyé-a èk sé ayèl yo-a.” Liv-la ka di osi, Kwanzaa “sé an fèt Afwo-Lanméwitjen, èk i bazé asou sé fèsten sala.”

    

  • Mid-Autumn Festival. Liv-la Holidays, Festivals, and Celebrations of the World Dictionary di sa sé “on fèsten pou glowifyé Dyé lalin-lan moun ka sélébwé an mwa Sèptanm èben mwa Òktòb.” Osi liv-la Religions of the World—A Comprehensive Encyclopedia of Beliefs and Practices di, an fèsten sala, i ni on pwatik koté ki “fanm kay-la, ka pòstenné Dyé lalin-lan.”

  • Thanksgiving. Menm kon Kwanzaa, sélébwasyon sala bazé asou fèt wékòt ki ka onnowé diféwan Dyé. Liv-la A Great and Godly Adventure—The Pilgrims and the Myth of the First Thanksgiving di, piti an piti, kon ta pasé, “sé légliz-la adòpté sé twadisyon sala.”

  Sélébwasyon moun ka tjenn paski yo ka kwè an mal èben chans. An Izaya 65:11, Bib-la ka di: ‘Moun ki ka pwépawé an tab pou dyé Chans-lan” sé moun “ki ka abandonnen Jéhova.’ Konsa, Témwen Jéhova pa ka pwan pa an sé sélébwasyon sala:

• Lunar New Year (Chinese New Year or Korean New Year). Liv-la Mooncakes and Hungry Ghosts—Festivals of China di: “Padan tan sala an lanné-a, sa ki vwéman enpòtan pou fanmi èk jan sé pou fè asiwé bèl bagay wivé yo, glowifyé sé dyé-a èk sé lèspwi-a, èk pou yo swété yonn a lòt on bon lanné.” Osi, an menm mannyè-a, pou Korean New Year-a, liv-la Encyclopedia of New Year’s Holidays Worldwide di: “Yo ka adowé ayèl yo èk fè bagay pou kouwi dèyè vyé lèspwi. Osi yo ka fè bagay pou fè asiwé yo bon chansé pou lanné-a, èk yo ka mandé sé dyé-a ki sa ki kay wivé yo an lanné nèf sala.”

  

Sélébwasyon ki bazé asou kwéyans-lan ki lam-la pa ka mò. Bib-la ka di a klè, lam-la ka mò. (Izikèl 18:4) Konsa, Témwen Jéhova pa ka pwan pa sé sélébwasyon-an ki ka sipòté kwéyans-lan ki lam-la pa ka mò. Sélébwasyon tèl kon:

• Fèt Lé Mò. Liv-la New Catholic Encyclopedia di: “Fèt Lé Mò, sé on jou pou chonjé èk onnowé moun ki ja mò. An tan lontan, moun té ka kwè, asou jou sala, sé lam-la ki té ka soufè pou péché yo avan yo alé an syèl, kay pawèt douvan moun ki té fè yo mal diwan lavi yo kon: lèspwi, jan gajé, kwapo, èk lòt bagay.”

• Chuseok. Liv-la The Korean Tradition of Religion, Society, and Ethics, ka di: “Pou fèsten sala, yo ka ofè lam moun ki ja mò, manjé èk diven, paski yo kwè lam-la ka kontiné viv apwé on moun ja mò.”

Sélébwasyon ki ni pou fè épi tjenbwa. An Ditonronnonmi 18:10-12, Bib-la di: “La pa dwé ni pyèsonn anpami zòt . . . ki ka chaché pou sav sa ki kay fèt denmen, ni majisyen, ni pyèsonn ki ka jété cham asou moun, ni pyèsonn ki ka alé oti on gadè, ni moun ki di yo sa konminiké épi vyé lèspwi ében moun ki di yo sav sa ki kay fèt denmen, ni pyèsonn ki ka konsilté lé mò. Paski Jéhova détèsté népòt moun ki ka fè sé bagay sala.” Témwen Jéhova vlé wèsté lwen hòd tout sa ki ni pou fè épi tjenbwa. Konsa, yo pa ka sélébwé Halloween èben lòt sélébwasyon tèl kon:

• Sinhala èk Tamil New Year. Liv-la Encyclopedia of Sri Lanka di: “Pou sélébwasyon sala, moun ka fè sèten bagay a sèten lè. Yo ka fè twadiksyon sala paski moun ki ka gadé sé étwal-la di sa ka fè yo bon chansé.”

Sélébwasyon Lwa Moziz-la té koumandé jan Izwayèl pou tjenn, mé sa doubout lè Jézi mò. An Ronm 10:4, Bib-la di: “Jézi ja kasé pouvwa lwa-a.” An tan lontan, Jéhova té ba pèp li Lwa Moziz-la. Jòdi jou, Kwityen ka twapé an chay bennéfis hòd sé pwensip-la an Lwa Moziz-la. Mé ès sa vlé di Kwityen ni pou pwan pa sé sélébwasyon-an Lwa Moziz-la té koumandé jan Izwayèl pou tjenn? Non. Kwityen pa ka pwan pa an sé sélébwasyon sala paski sé sélébwasyon sala té ka moutwé Mèsaya-a té ka vini. Mé Kwityen sav, Jézi ja vini. An Kòlòsé 2:17 Bib-la di: “Tout sé lwa sala sé an lonbwaj sèlman an sé bagay-la ki té pou vini-an, mé bagay-la menm sé Jézi.” Bon. An lòt wézon Témwen Jéhova pa ka pwan pa an sé sélébwasyon sala, sé paski sé sélébwasyon sala, ja fè sa yo té ni pou fè. An plis di sa, adan di yo ni bagay Bib-la ka kondanné. Konsa, Témwen Jéhova pa ka pwan pa an sé sélébwasyon sala:

• Hanukkah. Fèsten sala, sé pou chonjé dézyenm fwa-a yo dèdiké tanp-lan an Jérouzalèm. Mé bagay-la sé sa, an Hibrou 9:11, Bib-la di: “Jézi Kwi ja vini kon pli ho chèf pwèt-la . . . [Èk] Tant-lan i ka fè sèvis adan-an pli enpòtan èk pli pawfé pasé sa ki té asou latè-a. I sé pa an tant nonm fè, ni i pa an latè sala.” Alò pou Kwityen, tant sala, ja wiplasé tanp-lan ki an Jérouzalèm.

• Rosh Hashanah. Sa sé pwèmyé jou-a an kalennda sé Jwif-la. An tan lontan, an fèsten sala, yo té ka ofè Bondyé diféwan sakwifis spésyal. (Limowo 29:1-6) Kanmenm, lè Jézi vini kon Mèsaya-a, i annékòz ‘sakwifis èk ofwan pou doubout’. Konsa, sé sakwifis sala, pa ni pyès valè an zyé Bondyé ankò.—Dannyèl 9:26, 27.

• Ès sélébwasyon-an ka ankouwajé plizyè diféwan wilizyon pou adowé Bondyé ansanm?

  Pwensip Bib: “Ki mannyè an moun ki ka kwè sa maché épi an moun ki pa ka kwè? Kay Bondyé-a pa plas pou imaj.”—2 Kòrint 6:15-17.

  Témwen Jéhova ka fè éfò pou viv an lapé épi vwézinaj yo. Épi yo ka wèspèkté dwa chak moun pou adowé Bondyé an mannyè-a yo vlé. Mé Témwen Jéhova pa ka pwan pa an sélébwasyon ki ka ankouwajé plizyè diféwan wilizyon pou adowé Bondyé ansanm an sé mannyè sala:

  Sélébwasyon ki ka glowifyé moun enpòtan èvèk sélébwasyon ki ka ankouwajé moun an diféwan wilizyon pou adowé Bondyé ansanm. An tan lontan, lè Bondyé mennen pèp li an tè pwonmèt-la, sé moun an péyi-a té ka adowé lòt dyé. Konsa, Bondyé di pèp li: ‘Zòt pa dwé fè yon alyans épi ni yo ni dyé yo . . . Si zòt sèvi dyé yo, asiwéman, sa kay vini kon on zatwap pou zò.’ (Ègzodòs 23:32, 33) Konsa, Témwen Jéhova pa ka pwan pa an sélébwasyon tèl kon:

  • Loy Krathong. Liv-la Encyclopedia of Buddhism di: “Padan fèsten sala yo ka tjenn an péyi Thai, “moun ka sèvi fèy pou fè bòl. Yo ka mété bouji èben bwa lansan andidan’y, èk yo ka ladjé sé bòl-la asou glo-a menm kon on ti kannòt. Yo kwè, sé ti kannòt sala, ka pòté malè-a alé. An wéyalité, sé dyé-a, Buddha, fèsten sala ka onnowé.”

  • National Repentance Day. Mi sé sa, yon ofisyèl gouvèdman an Papua New Guinean di an papyé nouvèl-la, The National: “Moun ki ka patisipé an fèsten sala ka dakò épi sa lafwa Kwityen bazé asou. Fèsten sala ka ankouwajé tout moun an péyi-a, pou swiv pwensip Kwityen.”

  • Vesak. Liv-la Holidays, Festivals, and Celebrations of the World Dictionary di: “Moun ki ka adowé Buddha kwè, jou sala pli sen pasé pyès lòt jou. Asou jou sala, yo ka sélébwé lè Buddha fèt, lè i twapé éklèvayans, èk lè i mò èben twapé Nirvana.”

    

  Sélébwasyon ki bazé asou twadisyon wilizyon, mé pa asou sa Bib-la ka enstwi. An Mafyou 15:6, 9, Jézi di titja lwa sé Jwif-la: “Ou ka dézobéyi lwa Bondyé pouʼw obéyi twadisyonʼw.” Èk osi, Jézi di adowasyon yo “pa ka fè pyès syans . . . paski yo ka enstwi lwa yo menm akwèdi sé lwa mwen yo yé.” Paski Témwen Jéhova ka pwan avètisman sala byen sèwyé, la ni an chay sélébwasyon yo pa ka pwan pa adan.

  • Epiphany (Three Kings Day, Timkat, or Los Reyes Magos). Moun ki ka pwan pa an fèsten sala ka chonjé sé twa nonm-lan ki té vizité Jézi lè i té fèt èben lè Jézi té batizé. Liv-la The Christmas Encyclopedia di: “Fèsten sala té fè sèten sélébwasyon ki ka onnowé dyé glo-a, dyé lawivyè-a èk dyé wavin sanm akonmsi yo sé sélébwasyon Kwityen.” A lòt fèsten, Timkat, sé on fèsten menm kon Epiphany. Liv-la Encyclopedia of Society and Culture in the Ancient World di: “Timkat bazé asou twadisyon.”

  • Fèsten-an pou lè vyèj Mari té mouté an syèl. Sélébwasyon sala bazé asou kwéyans-lan ki manman Jézi té mouté an syèl épi kò laché’y. Liv-la Religion and Society—Encyclopedia of Fundamentalism di: “Sé pwèmyé Kwityen-an pa té konnèt kwéyans sala. Èk la pa ni pyès koté ki an Bib-la ki ka sipòté kwéyans sala.”

  • Feast of the Immaculate Conception. ‘Immaculate Conception’ vlé di Mari pa té ni pyès péché dépi i té fèt. Mé liv-la, New Catholic Encyclopedia di: “Bib-la pa ka enstwi Mari té san péché. . .Sa sé yon lésisyon mèt légliz-la mété.”

  • Lent èben Kawenm. Silon liv-la, New Catholic Encyclopedia, yo établi sélébwasyon sala “an katyenm syèk-la” pli pasé dé san lanné (200) apwé yo té fini ékwi Bib-la. Liv-la osi di: “Kawenm sé on tan pou wépanti hòd péché èk wèsté san manjé.” Konsèné pwèmyé jou-a an Kawenm-lan, liv-la di: “Asou Mékwédi Sen-an, yo ka mété tibwen sann asou fon sé fidèl-la. Sa ka fè yo chonjé, yo bizwen wépanti. Légliz Katolik-la té koumansé twadisyon sala dépi lanné yon mil katwiven wonz (1091).”

  • Meskel (or, Maskal). Sa sé on fèsten an Ethiopia. Liv-la Encyclopedia of Society and Culture in the Medieval World di: “Moun ka sélébwé jou-a yo dékouvè Kwa Vwé-a (sa vlé di, menm Kwa-a Jézi Kwi té kwisifyé asou). Pou fèsten sala, yo ka pwi bouka difé èk dansé oliwon yo.” Kanmenm, Témwen Jéhova pa ka sèvi kwa an adowasyon yo.

• Ès sélébwasyon-an ka onnowé lézonm, an ògannizasyon, èben on senbòl nasyonnal?

  Pwensip Bib: ‘Mi sé sa Jéhova di: “Malédiksyon pou moun-nan ki mété konfyans li an lézòm, ki ka dépan asou nonm ki menm kon li, èk ki ka tounen do’y asou Jéhova.’—Jérémaya 17:5.

  Menm si Témwen Jéhova ni an chay wèspé pou moun èk ka jis pwédyé pou yo, yo pa ka pwan pa sélébwasyon tèl kon:

  Sélébwasyon ki ka glowifyé on kondwitè èben on moun ki enpòtan. Bib-la di an Izaya 2:22: ‘Doubout mété konfyans zòt an lézòm paski sa kay an bennéfis zòt. Lézòm menm kon lisouf-la ki ka sòti an tou né yo. Kisa yo sa fè pou zòt?’ Konsa, Témwen Jéhova pa ka sélébwé jou nésans on wa èben wenn.

  Fèsten ki ka onnowé dwapo on péyi. Témwen Jéhova pa ka pwan pa an jou-a ki dèdiké pou dwapo-a. Poutji? Sé paskè Bib-la di: “Tjenn kò zòt lwen fo bondyé.” (1 Jan 5:21) Adan moun jòdi jou, pa ka konsidiwé dwapo-a kon on fo dyé èben kon on bagay moun ka adowé. Mé Carlton J. H. Hayes, on moun ki ni gwo endikasyon di: “Dwapo-a sé pwensipal senbòl di lafwa èk pwensipal bagay-la moun ka adowé lè yo ka onnowé péyi yo.”

  Sélébwasyon ki ka onnowé on sent. Kisa ki té fèt lè Kòniliyòs ajounou douvan zapòt Pita? Bib-la di: “Pita fèʼy lévé épi i diʼy, “Doubout! Mwen sé on nonm menm kon ou!”” (Twavay 10:25, 26) Ni Pita, ni sé lézòt zapòt-la, té aksèpté lonnè hòd pyèsonn. Konsa, Témwen Jéhova pa ka pwan pa an sélébwasyon ki ka bay lonnè pou lé sent. Sélébwasyon tèl kon:

  • Latousen. Liv-la New Catholic Encyclopedia di: “Fèsten sala sé pou onnowé tout sé sent-la. . . Nou pa konnèt ola sélébwasyon sala sòti.”

  • Fiesta of Our Lady of Guadalupe. Silon liv-la The Greenwood Encyclopedia of Latino Literature, fèsten sala ka onnowé “sent gadyenn-lan di Mexico.” Adan moun kwè sen sala sé manman Jézi, Mari. Yo di, Mari té pawèt douvan on fama ki té pòv an nanné yon mil senk san twantenyen (1531).

    

  • Name Day. Liv-la Celebrating Life Customs Around the World—From Baby Showers to Funerals di: “Lè on zanfan ka fè batenm, èben lè i fè konfimasyon, yo ka ba’y non on sen. Asou jou sala, moun ka fè bagay ki ni pou fè épi wilizyon.”

  Fèsten ki ka sélébwé aktivité politik èben aktivité pou fè lavi pli mèyè . Bib-la di: ‘I pli bon pou pwan pwotèksyon an Jéhova pasé pou nou mété konfyans nou an lézòm.’ (Sam 118:8, 9) Konsa, Témwen Jéhova pa ka pwan pa an sélébwasyon tèl kon Youth Day èben Women’s Day paski sa té kay moutwé yo ka konfyé lézonm pou wanjé sé pwòblenm-lan ki asou latè-a. Èk pou menm wézon sala, Témwen Jéhova pa ka pwan pa an Emancipation Day èben népòt lòt sélébwasyon kon sa. Yo sav sé Bondyé ki kay wanjé tout pwòblenm ki asou latè-a. Èk yo ka èspéwé pou Wéyòm Bondyé tiwé sé pwòblenm-lan ki asou latè-a.—Ronm 2:11; 8:21.

• Ès sélébwasyon-an ka fè yon péyi pli enpòtan pasé on lòt èben yon was pli enpòtan pasé on lòt was?

  Pwensip Bib: “Bondyé pa ni pwéféwans pou pyèsonn. I ka aksèpté népòt moun ki ka adowéʼy épi ka fè sa ki dwèt. I pa mélé ki nasyon i sòti.”—Twavay 10:34, 35.

  Magwé Témwen Jéhova kontan péyi yo, yo pa ka pwan pa an sélébwasyon ki ka fè yon péyi pli enpòtan pasé on lòt péyi, èben yon was pli enpòtan pasé on lòt was. Konsa, yo pa ka pwan pa an sélébwasyon tèl kon:

  Sélébwasyon ki ka onnowé lawmé-a. Jézi Kwi pa té ankouwajé èben sipòté ladjè. Anfen, an Mafyou 5:44, Jézi di sé disip li-a: “Enmen lèlmiʼw épi pwédyé bay sé moun-an ki ka maltwétéʼw-la”. Alò, Témwen Jéhova pa ka pwan pa an sélébwasyon ki ka onnowé sé sòlda-a èben sé sélébwasyon sala:

  • Anzac Day. Liv-la Historical Dictionary of Australia di: “Anzac ka wépwézanté lawmé Australia èk New Zealand”, èk “Anzac Day sé on jou pou chonjé sé moun-lan yo tjwé an ladjè.”

  • Veterans Day (Remembrance Day, Remembrance Sunday, or Memorial Day). Silon liv-la Encyclopædia Britannica, sélébwasyon sala sé pou onnowé “moun ki an lawmé-a, èk sé sòlda-a ki mò a ladjè.”

  Fèsten ki ka sélébwé listwa on nasyon èben jou andépandans yo. Lè Jézi té ka palé konsèné sé disip li-a, i di: “Menm kon mwen pa menm èk sé jan latè-a, sé nonm sala sé pa menm èk sé jan latè-a.” (Jan 17:16) Magwé Témwen Jéhova kontan pou apwann konsèné listwa péyi-a, yo pa ka pwan pa an sélébwasyon tèl kon:

  • Australia Day. Silon liv-la Worldmark Encyclopedia of Cultures and Daily Life, pou fèsten sala “yo ka chonjé jou-a an nanné mil sèt san katwiven ywit (1788) lè sé sòlda Langlitè-a lévé dwapo yo èk déklawé, ‘Australia sé on péyi nèf anba kondwit Langlitè.’”

  • Guy Fawkes Day. Liv-la A Dictionary of English Folklore di “sa sé on jou tout moun an nasyon-an ka sélébwé. Èk yo ka chonjé sa ki té fèt an lanné mil sis san senk (1605). Asou jou sala, Guy Fawkes èk lòt manm Katolik, té éséyé asasiné Wa Jémz I èk lòt moun manm an gouvèdman [Langlitè].”

  • Jou Andépandans. Liv-la Merriam-Webster’s Unabridged Dictionary di: “Pou plizyè péyi, asou jou sala, moun ka sélébwé jou-a péyi yo twapé andépandans.”

• Ès sélébwasyon-an ka ankouwajé vis, malpwòpté èben mové kondwit?

  Pwensip Bib: “Paski ou ja pèdi asé tan avan, ka fè bagay jan ki pa ka kwè an Bondyé ka fè. Ou té ka kouwi vyé lavi, swiv vyé dézi, bwè wonm èk toujou sou, anmizé kòʼw an tout kalité bon tan èk fèt, épi adowé fo bondyé, an bagay pyèsonn pa sipozé fè.”—1 Pita 4:3.

  Témwen Jéhova vlé viv lavi yo a ling épi sa Bib-la ka di. Konsa, yo pa ka pwan pa an sélébwasyon ki ka ankouwajé moun pou bwè twòp, èben anmizé kò yo an fèt ki ni malpwòpté. Kanmenm, Témwen Jéhova kontan pasé tan épi jan yo. Èk si yo chwazi pou bwè alkòhòl, yo ka pwan a ti bwè tanzantan. An plis di sa, yo ka fè tout sa yo pé pou swiv pwensip Bib sala: “Ében, népòt bagay ou fè, menm si sé manjé ében bwè, fèʼy adan an mannyè ki kay bay Bondyé lonnè.”—1 Kòrint 10:31.

  Konsa, Témwen Jéhova pa ka pwan pa an kannaval èben népòt lòt sélébwasyon ki ka ankouwajé bagay ki pa ka plè Bondyé. Pa ègzanp, Purim sé on fèsten sé Jwif-la ka sélébwé. Pou fèsten sala, yo ka chonjé jou-a sé Jwif-la té libéwé an senkyenm syèk-la avan lépòk nou. Mé jòdi jou, silon liv-la Essential Judaism, fèsten Purim menm kon Mardi Gras èk Kannaval.” Konsèné jan bakanal, liv-la osi di “moun ka mété diféwan kalité abiman (byen souvan nonm ka abiyé kon fanm), yo ka fè akonmsi yo adan on wévòt, yo bwè jis tan yo sou, èk yo ka fè an chay dézòd.”

Ès Témwen Jéhova enmen fanmi yo menm si yo pa ka pwan pa an sèten sélébwasyon épi yo?

Absoliman! Menm si fanmi Témwen Jéhova adan on diféwan wilizyon, Bib-la ka enstwi nou pou enmen èk wèspèkté tout fanmi nou. (1 Pita 3:1, 2, 7) Sa vwé, lè yon Témwen Jéhova doubout pwan pa an sèten sélébwasyon adan moun an fanmi’y pé lévé faché épi’y, èk yo pé jis santi konmsi moun-lan twayi yo. Konsa, an chay Témwen Jéhova ka fè éfò pou di fanmi yo, yo enmen yo toujou. An plis di sa, épi wèspé, Témwen Jéhova ka èspliké bay fanmi yo, sé wézon-an yo pa ka pwan pa an sèten sélébwasyon. Èk yo ka fè tan pou vizité yo asou lòt lokazyon.

Ès Témwen Jéhova ka di moun pou pa pwan pa an sèten sélébwasyon?

Mé non. Témwen Jéhova ka kwè, chak moun ni pou fè disizyon yo menm. (Jòchwa 24:15) Menm si moun adan on diféwan wilizyon, Témwen Jéhova ka “pòté tout moun wèspé.”—1 Pita 2:17.