LOK MA I POK NGEYE | BIKELI ADWOGI MABER ANGO?

**Ker pa Lubanga—Bikeli Adwogi Maber Ango?**

Twero bedo ni iniang ki i pwony mukato-ni ni Lucaden pa Jehovah gitero Ker pa Lubanga calo gin ma pire tek adada. Dok nen calo inongo yomcwiny madit ki i kwano lok i kom mot ma Ker pa Lubanga bikelone. Kadi bed kumeno, itwero bedo ki akalakala ka cikke magi mabeco-ni bicobbe.

Obedo me ryeko pe me ye gin mo keken ma iwinyo. (Carolok 14:15) Man aye bene gin ma jo Bereaa gutimo i kare ca. I kare ma kititigi kwena maber me Ker pa Lubanga, jo Berea pe guye ayea pienni gimito. Ma ka meno, gin gungiyo Ginacoya “pi neno ka lok ducu tye kit meno ada.” (Tic pa Lukwena 17:11) I yo macek, watwero waco ni jo Berea guporo kwena maber ma guwinyo-ni ki gin ma Ginacoya waco. I nge kare mo, gin guye ki cwinygi ducu ni kwena maber-ri ocung i kom Lok pa Lubanga.

Lucaden pa Jehovah bene gicuko cwinyi me timo gin acel-li. Wan wamini kare me poro gin ma Lucaden pa Jehovah giye i kom Ker pa Lubanga ki gin ma Baibul pwonyo kun wakwano kwedi me nono.

Medo i kom pwonyo lok i kom Ker pa Lubanga, kwano Baibul bikonyi me nongo lagam pi lapeny ma pigi tego calo magi:

Wacako bedo kwo nining?
Tika tyen lok me kwo tye?
Pingo Lubanga weko dano deno can?
Ngo ma timme i komwa ka wato?
Tika kibityeko lobo-ni woko?
Ngo ma Kelo Yomcwiny i Kwo me Ot?

Ma dong pire tek loyo, kwano Baibul bikonyi me ‘nyikke cok bot Lubanga.’ (Yakobo 4:8) Ka iwoto ki nyikke cok bot Lubanga, ci ibiniang ni Ker pa Lubanga bikeli adwogi maber pe i kareni keken ento bene pi naka. Yecu olego bot Wonne ni: ‘Man en kwo ma pe tum, ni ginge in Lubanga acel me ada, ki Yecu Kricito ma yam ioro.’—Jon 17:3.

Lucaden pa Jehovah gitwero tic ki magajin man me kwano Baibul kwedi.

Peny Lacaden pa Jehovah nyo pong fom ma tye i www.pr418.com. ka imito ni kikwan Baibul kwedi. (Nen PENY PI KWANO BAIBUL LABONGO CUL MO i )

a Berea onongo tye boma me Makedonia.

Gin Mumiyo Ker pa Lubanga Pire Tek Bote

Cokcok-ki, latin anyaka mo ma mwakane apar ma nyinge Folake kiwacce ni oco waraga i gang kwan kun tiyo ki wi lok ni “Gin ma Amaro Loyo i Lobo-ni.” Folake oyero me coyo lok i kom gin mumiyo emaro tito pi Ker pa Lubanga bot jo mukene.

Folake otito ni: “Ker pa Lubanga obedo gamente kikome ento pe itwero nenone pien pe nen—kadi bed iruko kiyo.”

Folake ocoyo lok i kom mot ma Ker-ri bikelone ma etye ka kurone. En oloko i kom pekki mogo ma Ker-ri bicobone kun coyo ni, “Cwinya cwer ka aneno dano ma gipe ki paco gikwo i teng gudo” kacel ki “lutino ma kec neko i twok lobo mapat pat.” En omedo ni, “Cwinya yom ka akwano Icaya 65:21.” Ma lubbe ki dano ma gubikwo i te loc me Ker pa Lubanga, tyeng meno waco ni: “Dano gibigero odi ci gibedo i igi, gibipuro poto olokgi, ci gibicamo nyige bene.”

Folake owaco ni etye ka kuro kare ma Lubanga bitic ki Kerre me jwayo two ducu. I waraga ma en ocoyo-ni, en oloko i kom Niyabo 21:4, ma waco ni Lubanga “bijwayo pig wanggi woko ducu. To bene dong bibedo pe, kadi kumo nyo koko, nyo arem.” En odolo te lokke kun waco ni lok i kom Jehovah kacel ki Kerre obedo gin ma en maro loyo i lobo-ni. Ki lok ada, Ker pa Lubanga pire tek adada bot latin anyaka man!