Pim ci Idong Piny ki Ryeko

1. 1 Jo Korint 9:26 twero konyowa nining i ticwa me pwony?

¹ Paulo ocoyo ni: “An mera aringo atir ma pe acabbe atata; ka awacci atye i tuko me dongnge, pe adongo piny macalo ngat ma dongo yamo ata.” (1 Kor. 9:26) Paulo onongo tye ka lok pi kit ma en oketo tamme ducu i kom cobo yub me cwiny. Ento i ada lok man bene konyo i ticwa me pwony. Wamito ni ‘wadong piny,’ nyo watute i tic, ki ryeko wek wacob ticwa maber. I yo ma nining?

2. Watwero lubo lanen pa Paulo ki lutit kwena mukene me cencwari me acel i kit me yero cawa ki kabedo me tito kwena i yo ma nining?

² Cit Ka ma Dano Pol Iye: Paulo kacel ki lutit kwena mukene me cencwari me acel, gutito kwena ka ma dano onongo pol iye. (Tic 5:42; 16:13; 17:17) Dong, ka dano mapol me wang ticwa gibedo paco i cawa me otyeno, man twero bedo kare maber me tito kwena i ot ki ot. Mono kabedo ma dano ito iye mutoka, bac nyo boda bedo ki jo mapol odiko con ma nongo gitye ka cito ka tic, nyo otyeno ka gitye ka dok gang? Awene ma dano maro cito ka wil loyo? Cako lok ki dano i teng gudo i cawa meno twero bedo ber mada.

3. Waromo pimo maber wek wadong piny ki ryeko i wang ticwa nining?

³ Wuti Wang Ticwu ki Ryeko: Myero wagwokke me pimo maber ka watye ka tiyo wang ticwa, ci wabidongo piny ki ryeko. Me labolle, me kaka tero gurup madit tutwal i kabedo acel, ma cwalo cawa malac tutwal dok weko tic kore ki kore bedo tek, bedo ber me poko i gurup i wel dano manok nok. I yo acel-lu, ka watye ka tic i gangi ma i caro, wabityeko wang ticwa oyot dok wabedo ki kare muromo me lok ki dano ka gurupwa pe dit tutwal. Tika watwero nongo wang tic macok ki pacowa wek pe wabal cawa me wot i yo?

4. Ngo ma bikonyowa me cobo ticwa calo “lumak dano”?

⁴ Yecu oporo lutit kwenane ki “lumak dano.” (Mar. 1:17) Miti pa lamak rec pe tye mere me bolo obwo i pii ento me mako rec. Pi meno, lumak rec makwiri gicito i kabedo ka ma gigeno ni rec tye iye dok i cawa mupore, ci gicako mako rec cutcut. Adada, gipimo maber ka ma myero gudong dok gitute ki ryeko. Dong mitte ni ngat acel acel i kinwa myero oket cwinye i ticwa-ni.—Ibru. 6:11.