Poko Karatac me Lwongo Dano pi Nipo Cakke i Marci 17

1. Rwec ango ma bicakke i Marci 17?

¹ Kwer me Nipo ma bedo mwaka ki mwaka poyo wiwa pi to ma Yecu. (1 Kor. 11:26) Pi man, wamito ni dano mukene bene gunywak kwedwa i yub man wek guwiny pi mic me mar me ginkok pa Jehovah. (Jon 3:16) I mwaka-ni rwec man me lwongo dano pi Nipo, bicakke i Ceng Abicel me Marci 17. In tika itye atera me medo cawa-ni muromo me nywako i tic man?

2. Waromo loko gin ango ka watye ka poko karatac me lwongo bot dano?

² Gin ma Waromo Lokone: Bedo ber ka waloko macek. Waromo waco ni: “Wurii Maber? Wabino ka lwongo jo me ot man pi kwer mo ma pire tek adada ma bedo mwaka ki mwaka, dok bibedo i twok loboni ducu i April 5. Kibimiyo pwony ma a ki i Baibul ma tito ngo ma to pa Yecu ocobo, ki dong ngo ma en tye ka timone kombeddi. Lwongo man nyutu kabedo ki cawa ma cokke meno bibedo iye.” Ka watye ka nywako i pokone i tum pa cabit, waromo bene miyo magajin kace opore.

3. Waromo lwongo jo ducu ma watwero nining?

³ Lwong Dano Mapol: Watye ki miti madit me lwongo jo ducu ma watwero lwongogi. Dong pi meno, tute me lwongo lutino kwanni me Baibul, jo ma ibidok cen ka limogi, wadi, lutic luwoti, lutino kwan luwoti, jirani, ki ngat mo keken ma ingeyo. Luelda bitito botwu kit me poko karatac me lwongo man i wang ticwu. Yub ma kit man ma kiketo mwaka ki mwaka me lwongo dano-ni, kelo adwogi mabeco. Mwaka mukato-ni, dako mo obino i cokke me kwero Nipo, ci lajol mo acel otemo konye ki nongo ngat ma omiyo bote lwongo-ni. Ento dakoni owaco ni pe engeyo jo ducu ma i kin lwak meno, dok ni en enongo lwongone ki bot ngat mo ma onongo tye kawot i ot ki ot.

4. Watye ki tyen lok ango me tute me nywako i rwec man?

⁴ Oromo bedo ni ngat moni bibedo tye i cokke pi lwongo ma iweko bote. Kadi bed ni ngat mo obino nyo pe, tutewu pud bimiyo caden maber. Lwongo ma wabipokone-ni bitito bot dano ni Yecu dong tye kabaka matek. Tuteni me nywako i rwec man binyutu bot jo ma nenowa—jo ma gibedo i wang ticwa, luye luwoti, ki dong tutwalle, Jehovah—ni itye ki pwoc madit pi mot me ginkok. —Kol. 3:15.