Yocia Obedo ki Lurem Mabeco

In mono itamo ni timo gin matir tek?— Pol pa dano gitamo ni tek. Baibul wacciwa ni obedo tek adada pi awobi ma nyinge Yocia me timo gin matir. Ento en onongo tye ki lurem mabeco ma gukonye. Wapwonyu kong lok i kom Yocia ki lureme.

Won Yocia onongo nyinge Amon, dok obedo kabaka me Juda. Amon onongo kite rac adada dok woro cal jogi. I kare ma won Yocia oto, Yocia odoko kabaka me Juda. Ento en onongo tye ki mwaka aboro keken! Itamo ni en onongo kite rac calo wonne?— Ku, en pe obedo kit meno!

Yocia onongo mito bedo lawiny bot Jehovah kadi i kare ma en pud tidi adada. Pi meno en omako lirem tutwalle ki jo ma maro Jehovah. Dok gin gukonyo Yocia me timo gin matir. Lurem Yocia mogo gubedo angagi?

Lareme acel obedo Jepania. Jepania obedo lanebi ma ociko jo me Juda ni jami maraco bitimme i komgi ka guworo cal jogi. Yocia owinyo lok pa Jepania ci omedde ki woro Jehovah, me kaka woro cal jogi.

Larem Yocia mukene obedo Jeremia. Mwakagi onongo mito bedo rom, dok kabedo ma gudongo iye kingi cokcok. Gubedo lurem macok adada muweko i kare ma Yocia oto, Jeremia ocoyo wer me koko i kom kit ma eparo kwede Yocia. Jeremia okonyo Yocia, dok Yocia bene okonyo Jeremia me timo gin matir ki me bedo lawiny bot Jehovah.

Ngo ma itwero pwonyo ki i lanen pa Yocia?— Kadi i kare ma Yocia obedo awobi matidi, en onongo mito timo gin matir. En onongo ngeyo ni myero emak lirem ki jo ma gimaro Jehovah. In bene myero imak lurem ki jo ma gimaro Jehovah dok gitwero konyi me timo gin matir!