Tekcwiny pa Yekoyada

Jejebel onongo tye ki nyare ma nyinge Atalia, ma onongo kite rac calo minne. Atalia onyomme ki kabaka me Juda. I kare ma cware oto, wode ocako loc. Ento i kare ma wode oto, Atalia okette kene me doko laloc me Juda. En otemo jwero ot ker me Juda woko, kun neko ngat mo keken ma twero doko kabaka, kadiwa likwayone. Dano ducu onongo dong gilwore mada.

Lalamdog Madit Yekoyada, gin ki dakone Yekoceba, gungeyo ni gin ma Atalia tye ka timone rac adada. Guketo kwogi ka mading pi kano lakwar Atalia acel, latin ma nyinge Yoaci. Gubedo ka gwokke i ot pa Lubanga.

I kare ma Yoaci tye ki mwaka abiro, Yekoyada ocoko ludito wi mony ki Lulevi ci owaco botgi ni: ‘Wukur doggola me ot pa Lubanga, dok pe wuwek dano mo odony iye.’ Ka dong Yekoyada oketo Yoaci me doko kabaka ci oketo lalukana i wiye. Dano me Juda gudange ki yomcwiny ni: ‘Kabaka obed kwo nakanaka!’

Daker Atalia owinyo woo pa lwak ci en oringo i ot pa Lubanga. I kare ma en oneno kabaka manyen, okok ki dwan malongo ni: “Roro yai! Roro!” Ludito wi mony gumako daker ma kite rac-ci, gutere woko, ci guneke. Ento tim maraco ma en opiro i cwiny lwak kono?

Yekoyada okonyo lwak me moko gicikke ki Jehovah ni gibiworo Jehovah keken. Yekoyada omiyo gureto ot pa jok Baal dok gungido cal apaya woko matinotino. En oketo lulamdog ki Lulevi me tic i ot pa Lubanga wek lwak gucak woro Jehovah ki kunnu doki. En oketo lugwok doggola me kuro dog ot pa Lubanga wek ngat mo ma pe leng pe odony iye. Ka dong Yekoyada ki ludito wi mony gutero Yoaci i gang kal ci gukete i wi kom ker. Jo me Juda gubedo ki yomcwiny madit. Onongo dong gitwero woro Jehovah, kun gitye agonya ki i loc pa Atalia ki tim me woro jok Baal. Tika dong ineno kit ma tekcwiny pa Yekoyada okonyo kwede jo mapol?