Pwony Ango ma Wanongo ki Bot Latim Bal?

Latim bal ma waromo nongo pwony ki bote en aye ma Yecu tye ka lok kwede i cal kany-nyi. Latim bal-li cwinye ocwer pi balle. En owaco bot Yecu ni: “Po pira ka ibidonyo i kerri.” Kit ma itye ka nenone kwede i cal kany-nyi, Yecu tye ka lok ki latim bal man. Tika ingeyo gin ma Yecu tye ka wacce?—a Yecu tye ka cikke bote ni: ‘Ada awaco boti tin ni, in ibibedo kweda i Paradic.’

Itamo ni Paradic meno bibedo nining?— Wek wabed ki lagam matir, omyero kong walok i kom Paradic ma Lubanga oketo pi Adam ki Kawa, laco ki dako mukwongo. Paradic meno mono onongo tye kwene? Onongo mono tye i polo kece i lobo?—

Lagam-mi tye atir ka iwacci onongo tye i lobo. Pi man dong, ka watamo pi bedo pa latim bal man “i Paradic,” omyero wange atir ni en bibedo i lobo kany ka dong kiloko odoko Paradic. Paradic meno bibedo nining?— Kong wanenu.

I kare ma Lubanga Jehovah ocweyo dano mukwongo, Adam gin ki Kawa, Baibul waco ni oketogi i Paradic i lobo kany. Onongo kilwongo ni “poto ma tye i Eden.” Go kong kit ma onongo ‘poto me Eden’ mwonya kwede!— Ki lok ada, poto man onongo kabedo maber dok mwonya, ma pe porre ki kabedo mo keken i kare-ni!

Itamo ningo? Yecu tika bibedo i lobo kany kacel ki latim bal ma cwinye ocwer pi balle-ni?— Pe kumeno, Yecu bibedo i polo macalo Kabaka kun loyo dano ma gitye i Paradic i lobo kany. Dong, Yecu bibedo ki latim bal-li, pien en bicere woko ci bibedo i Paradic i lobo kany. Ento pingo Yecu biweko latim bal-li kwo i Paradic?— Kong dok wanenu.

Ki lok ada, latim bal-li gire otimo jami maraco adada. Ento dano bilion mapol ma gukwo i lobo kany bene gutimo jami maraco adada. Polgi gutimo pien ni pe gunongo pwony i kom Jehovah ki gin ma en mito ni gutim.

Dong jo ma kit meno, ma bene tye iye latim bal ma Yecu oloko kwede i kare ma kingabe i kom yat-ti, kibicerogi me kwo i Paradic i lobo kany. Kibipwonyogi ki gin ma Lubanga mito. Man biweko ginyuto gin kikomgi ka gimaro Jehovah.

Tika ingeyo kit ma gitwero nyutone kwede?— Ki timo gin ma Lubanga mito ni gutim. Pud dong bibedo me yomcwiny me kwo i Paradic kacel ki jo ma maro luwotgi ki Jehovah ya!