Kit me Ciro Cwercwiny

Tye tam mapol ma kimiyo madok i kom kit me ciro cwercwiny. Ento i kin tam magi ducu, mogo pe tye me kony. Me labolle, jo mogo gitwero wacci ni pe myero ikok, nyo ni pi myero inyut cwer cwinyi i yo mo keken. Jo mukene dok gitwero dini me nyuto cwercwiny-nyi woko ka maleng. Baibul miyo tam mupore ma kwed mapol ma kitimo i kareni bene cwako.

I tekwaro mukene, kineno koko pa co calo gin me lewic adada. Ento tika itamo ni lewic myero omak ngat mo pi koko i dye lwak? Ludaktari me two wic guwaco ni koko twero kweyo cwiny ngat moni. Dok koko twero konyo ngat moni me ciro arem kadi bed ni pekone dit adada. Ento gengo ngat moni ni pe okok, twero wano ngat meno maka konye. Baibul pe cwako tam ni koko lik ki co nyo ni obedo gin marac. Me labolle, tam kong i kom Yecu. I kare ma lareme me amara, Lajaro oto, en pud okok ki pig wange, kadi bed ni en onongo tye ki kero me cero jo muto!​—Jon 11:33-35.

Kumo bene twero rubbe ki kiniga madwong tutwalle ka ngat meno oto atura. Tye tyen lok mapol mumiyo ngat ma orwenyo danone i to twero bedo ki wang ic, me labolle ka ngati mo ma iworo oloko lok ata labongo tam iye. Laco mo ma a ki i South Africa ma nyinge Mike owacci, “An onongo atye ki mwaka 14 keken i kare ma babana oto. I kare me yik, lapwony dini me Purutanti owacci Lubanga mito jo mabeco dok en gamogi woko con.a Kiniga omaka matek pien wan onongo wamito babawa adada. Kombeddi mwaki 63 dong okato, ento cwinya pud cwer.”

Ci dong, ka cwinywa pidowa kono? Tutwalle ka obedo to ma otime atura, ngat ma tye ka kumo twero tamo ni, ‘Onongo kono pe otimme ka onongo atimo gin ma kuman.’ Gwok nyo wudaa i kare ma wurwatte me agikki ki lato-ni. Man twero weko cwinyi pidi adada.

Ka itye ka winyo marac pien cwinyi pidi nyo itye ki kiniga, pe ber me kano kit ma iwinyo kwede. Maka meno, lok ki laremi mo ma niang in maber dok twero cuko cwinyi ni pol dano ma gikumo bene giwinyo kit meno. Baibul poyo wiwa ni: “Ngat ma larem bedo ki mar i kare ducu, ki dano ginywalo me nywako peko ki omegine.”​—Carolok 17:17.

Lacwecwa, Lubanga Jehovah aye larem maber loyo ma ngat mo ma kumo twero bedo kwede. Leg bote kun ititte par ducu ma tye i cwinyi pien ‘en tamo piri.’ (1 Petero 5:7) Medo i kom man, en ocikke ni jo ducu ma gitimo meno gibinongo “kuc pa Lubanga ma kato ngec pa jo ducu” i tamgi ki i cwinygi. (Jo Pilipi 4:6, 7) Lubanga bene bikonyi me cang kun tiyo ki lokke ma nonge i Baibul me cuko cwinyi. Co piny wang Baibul ma romo cuko cwinyi. (Nen bok man.) Itwero bene mako wang Baibul mogo i wii. Bedo ka tamo i kom wang Baibul magi twero bedo me kony tutwalle i dyewor ma nongo itye keni dok nongo tek adada me nino.​—Icaya 57:15.

Cokcok-ki, laco mo ma mwakane tye 40, ma wabilwongo ni Jack, orwenyo dakone me amara i to pi two kanca. Jack owaco ni i kare mogo ewinyo calo etye kene. Ento en onongo kony ki i lega. En owaco ni, “Ka alego bot Jehovah, pe awinyo calo atye kena. Pol kare aco woko i dyewor dok nino dong nongo pe twero mako wanga matwal. Ka akwano dok alwodo tam mogo ma kweyo cwiny ma nonge i Ginacoya, kun amiyo Lubanga ngeyo kit ma awinyo kwede i lega, kweyo cwinya dok wiya bedo ma opye mot, ci man konya me nino.”

Dako mo ma nyinge Vanessa orwenyo minne i to pi two. En bene oniang teko me lega. En owaco ni, “I kare ma kwo tye matek adada, onongo alwongo nying Jehovah keken ci acako koko. Jehovah owinyo legana dok kare ducu omiya teko ma onongo amito.”

Lumi tam bot jo ma kumo gicuko cwiny jo magi ni myero gukony jo mukene nyo gudyer cawagi me tic pi lwak. Timo jami magi twero kelo yomcwiny dok kweyo cwiny ngat ma tye ka kumo. (Tic pa Lukwena 20:35) Lukricitayo mapol ma gikumo gunongo ni tic me konyo jo mukene okeligi kwe cwiny madit.​—2 Jo Korint 1:3, 4.