Nyut Miti i Kom Dano—Ki Bedo Ngat ma Neno dok Niang Jami Oyot
1 Lubanga Jehovah gin ki Yecu Kricito gingeyo gin ma cwiny dano mito dok gimiyo botgi kony ma dong loyo aloya. (2 Tek. 16:9; Mar. 6:34) Ka watyeko ngeyo miti ki tam pa jo ma wanongogi i kare me ticwa me pwony, ci watwero loko kit me tito kwena maber-ri i yo ma rwatte ki mitigi.
2 Bed ki Wang ma Bit: Yecu obedo ngat ma neno jami ki diro. (Mar. 12:41-43; Luka 19:1-6) I kit yo acel-lu, wan bene ka watye ka donyo i gang moni, omyero waket tamwa i ngiyo jami mogo me dini, coc ma tye i kom mutoka, nyo toyi ma tye i dye kal wek okonywa i kit me cako lok me tito kwena maber-ri.
3 Kit ma wang ngat moni nen kwede twero nyuto kit ma en winyo kwede. (Car. 15:13) Oromo bedo ni ngat moni-ni nongo orwenyo danone me amara i to, nyo nongo peko mukene marac aye odiye ma nongo mitte ni kicuk cwinye. Nywako kwede ginacoya mupore twero bedo me kony. (Car. 16:24) Gwok nyo rwed ot tye ka rune me cito ka mo, nyo otingo latin ma tye ka kok. Ka tye kit meno, ci ber iwacce ni ibidwogo i nino mukene. Ka ce ‘wanyuto ni watamo pi dano,’ ci bimiyo dano bedo ki miti me winyo lokwa ka dok wadok cen botgi.—1 Pet. 3:8.
4 Lok Yo me Lokki: Lakwena Paulo ongiyo boma me Atene ki diro ci onongo ni tye ki keno tyer mo ma kidyero ki “lubanga ma pe ngene.” Dong en otiyo kwede me tito kwena maber-ri kun waco ni: “Gin ma wuworo ma pe wungeyo, man aye atuco botwu-ni.” Diro me lok ma Paulo otiyo kwede bot jo ma gubedo ka winyo lokke-ni oloko tamgi omiyo gucako keto cwinygi i kwena maber me Ker-ri ki dong me doko jo muye.—Tic 17:23, 34.
5 I kit yo acel-lu, ka wan bene wabedo ki wang ma bit ci bikonyowa me niang miti pa dano moni, man weko wacako pwonywa i yo ma opore. Ti ki lapeny ma twero weko won ot nyuto tamme. Ti bene ki ginacoya ma twero tugo mitine. (Car. 20:5) Ka wabedo ki wang ma bit dok wanyuto miti i kom dano, ci bikonyowa me nywako kwena maber-ri i yo me ryeko.