Bot Lutit

Kwena me Ker Ducu:

Wamito cwalo pwocwa pi kony me mar ma kimiyo bot omego ki lumego ma gubedo ki peko me kec ma obino pi two pa piny kacel ki pong pa pii.—Jon 13:35.

Omego mo ma ogamo kony me cam owaco ni: “Kony man obino i karene kikome. Wapwoyo Jehovah kacel ki dulle matek mada pi kony man. Waneno ki wangwa mar kikome ma nyuto ngagi ma gubedo Lukricitayo me ada-ni.” Wacwalo pwocwa pi mot ma wumiyo me cwako tic man ma kwako wi lobo ducu-ni.

Me labolle, i United States, kimiyo kony bot omego ki lumego alip mapol ma kot ma cwer ki yamo magwar obalo kabedogi i Gulf Coast i mwaka 2005. Omego ki lumego makato 8,000 ma gitiyo kacel ki Regional Building Committees 60 mapat pat gumiyo karegi, dirogi ki jamigi me konyo tic man. Gumiyo kony me roco ki yubo ka ma oballe i kom Odi me Ker 86 ki gangi 4,178 kulu. Omego mukene gudwoyo mutoka a ki ka maboco calo Maine ki Washington. Wacwalo pwoc madit adada pi yellegi me mar!—1 Tec. 5:18.

Dano mo acel me Michigan ma omiine kene pi tic man owaco ni: “Neno bwunyo pa jo me odi, i kare ma guneno wi odigi manyen ma waketo okelo bota yomcwiny madwong tutwal. Cwinya yom tutwal me bedo i kin utmego ma mwonya kit man.” Adada, man obedo lanen maber atika ma nyuto kit me konyo jo ma nongo peko ma kumeno opoto i komgi.

Wakwayowu me medde ki lega pi utmegiwa me amara ducu—jo ma nongo peko mapol ma poto atura oromo poto i komgi i kare man me agikki-ni kacel ki jo ma gimiyo botgi kony bene.—2 Kor. 1:11.

Wan utmegiwu,

Me Jang Gang Kal me Burundi, Kenya, Sudan, Tanzania, ki Uganda